Kresten Skapuman, ’Opo Un Ati Bradi’!

„YEHOVAH na mi Skapuman. Noti mi sa mankeri.” Nanga den wortu dati, David ben sori taki a ben frutrow dorodoro tapu a Gado fu en. Yehovah ben tyari en go, fu taki en so na yeye fasi, na ini „wei di furu nanga grasi” èn na den „presi fu rostu pe furu watra e lon”, èn A ben tiri en „na tapu den pasi fu regtfardikifasi”. Di gensman ben lontu David, dan Yehovah ben horibaka gi en èn A ben gi en deki-ati. Dati meki David taigi Yehovah: „Mi no e frede no wan ogri, bika yu de nanga mi.” Fu di a ben abi so wan Hei Skapuman, meki a ben abi a fasti bosroiti fu „tan na ini na oso fu Yehovah fu ala ten”.—Psalm 23:1-6.

Gado en wan-enkri gebore Manpikin ben kisi a lobi sorgu fu Yehovah tu, èn a ben sori a lobi sorgu dati na wan volmaakti fasi na ini a fasi fa a ben e handri nanga den disipel fu en na ini a pisi ten di a ben de na grontapu. Fu dati ede den Buku fu Bijbel e taki fu en leki „a bun skapuman”, „a bigi skapuman”, èn „a gran skapuman”.—Yohanes 10:11; Hebrewsma 13:20; 1 Petrus 5:2-4

Yehovah nanga Yesus Krestes e go doro fu wei den wan di lobi den. Wan fasi fa dati de fu si, na a lobi seti taki ondro-skapuman de na ini a gemeente. Paulus ben taki nanga den skapuman disi na ini a gemeente di a ben e taki: „Poti prakseri na unsrefi èn na a heri ipi, di santa yeye ben poti unu na wroko leki opziener na den mindri, fu wei a gemeente fu Gado, di a ben bai nanga a brudu fu en eigi Manpikin.”—Tori fu den Apostel 20:28.

A no de wan makriki wroko fu wei na ipi akruderi na eksempre di Yehovah nanga Krestes Yesus ben gi, ma a moro prenspari now leki oiti bifo. Prakseri fu disi, taki moro leki wan milyun Kotoigi teki dopu na ini den dri yari di pasa! Den sma disi no abi a tranga rutu na yeye fasi di e kon fu a du di wan sma e du a diniwroko furu yari langa kaba. Prakseri tu, fu den Kotoigi di de pikin-nengre noso tini ete. A de fanowdu taki den papa nanga mama fu den poti prakseri na den tapu, ma so srefi den ondro-skapuman fu a gemeente.

Fu tru, ibri Kresten e kisi kwinsi fu sma di no de na bribi, èn kwinsi fu speri tu. Den alamala musu kakafutu gi a hari di grontapu e hari den nanga tranga, meki den waka a pasi fu grontapu fu satisferi den lostu fu den nomo. Na ini son kondre, Kownukondre preikiman kan lasi-ati fu di furu sma no wani arki a boskopu fu den. Furu preikiman abi seryusu problema nanga a gosontu fu den. Kande broko-ede na moni sei e puru a prakseri fu trawan fu suku a Kownukondre fosi. Trutru, wi alamala — so srefi den wan di de langa ten kaba na ini waarheid — abi a yepi fu lobi skapuman fanowdu èn de warti fu kisi dati.

A Yoisti Reide Di Musu Buweigi Wi

Den fosi yarihondro Kresten ben kisi a frumane: ’Opo un ati bradi’! (2 Korentesma 6:11-13) A bun taki Kresten owruman e gi yesi na a rai disi te den e du den plekti leki skapuman. Fa den kan du disi? Èn fa a de nanga dinari ini a diniwroko, di furu fu den kan tron skapuman na ini a ten di e kon?

Efu Kresten owruman wani de wan blesi gi na ipi, dan moro leki a firi nomo taki den abi wan plekti musu buweigi den. Den e kisi a rai: „Wei na ipi fu Gado di de na ondro un sorgu, no nanga dwengi, ma fu di unu de klariklari; no fu di unu lobi kisi wini na wan kruka fasi, ma nanga faya” (1 Petrus 5:2). Fu dati ede, efu unu wani wei den skapu bun, dan unu musu de klariklari fu du so èn unu musu abi na angri fu dini trawan (Yohanes 21:15-17). A wani taki, dati unu musu si den nowtu fu den skapu èn taki unu musu handri esi-esi fu du wan sani fu yepi den. A wani taki, dati unu musu sori den tumusi moi Kresten eigifasi di  wi sabi leki den froktu fu Gado yeye te unu e handri nanga trawan.—Galasiasma 5:22, 23.

Fu wei sma wani taki tu, dati unu e go luku den brada nanga sisa na den oso fu den. * Ma skapuman di ’e opo na ati fu den bradi’, e gi densrefi na ini a wroko. Dati wani taki, dati den e du moro leki fu go luku den skapu ten na ten nomo. Den e gebroiki ibri okasi bun fu wei trawan fu na ipi.

Leri Trawan fu Kon Tron Skapuman

Ibri brada, awansi omeni yari a abi, di „e suku fu kisi wan wroko leki opziener . . . wani wan tumusi bun wroko” (1 Timoteus 3:1). Furu dinari ini a diniwroko sori taki den de klariklari fu suku fu kisi tra grani. Fu dati ede, owruman e prisiri fu yepi den brada disi di de klariklari fu du wroko, fu bigin wroko na a prenspari bosroiti disi fu „suku fu kisi wan wroko leki opziener”. Disi wani taki dati unu musu leri den brada disi fu wroko fu tron bun skapuman.

Yehovah en Kresten gemeente e hori ensrefi finifini na den hei markitiki. Fu dati ede, falsi skapuman neleki den wan di den e taki fu den na ini Esekièl 34:2-6, no meki den kon swaki. Yehovah ben fru-akti den falsi skapuman disi èn a ben abi leti fu du dati. Na presi taki den ben gi na ipi nyanyan, den ben gi densrefi nyanyan. Den no ben tranga den wan di ben swaki. Den no ben dresi den wan di ben e sikisiki. Den no ben teki wensre tai den wan di broko. Den no tyari den wan di ben panya go na ala sei noso den wan di ben lasi, kon baka. Fu di den skapuman ben handri moro leki wolfu na presi fu handri leki skapuman, meki den ben kwinsi den skapu. Den skapu di den no ben luku ben panya go na ala sei, den ben e wakawaka lontu èn no wan sma ben sorgu gi den.—Yeremia 23:1, 2; Nahum 3:18; Mateus 9:36.

Kresten skapuman e waka baka na eksempre fu Yehovah. Den de heri tra fasi leki den skapuman dati di no de getrow. Den e yepi fu tyari den skapu go na ini den „wei di furu nanga grasi” na yeye fasi èn den „presi fu rostu pe furu watra e lon”. Den e meki muiti fu tiri den „na tapu den pasi fu regtfardikifasi” fu di den e yepi den fu frustan a Wortu fu Yehovah na wan bun fasi èn fu fiti en na ini den aladei libi. Den kan du disi nanga bun bakapisi fu di den „abi a koni fu gi bun leri”.—1 Timoteus 3:2.

Furu fu den leri di den owruman e gi, e feni presi te den e taki fu na podium te den konmakandra e hori. Ma owruman e gi leri tu na ibri sma aparti. A no de fu taki, dati son wan kan gi leri moro bun te den de den wawan e taki nanga wan sma, ala di trawan abi a koni fu gi leri heri bun te den e hori lezing. Ma te wan sma no abi nofo koni na ini wan fasi fu gi leri, dan disi no wani taki nomonomo taki so wan sma no abi a koni fu de wan leriman. Den owruman e gi leri, ala di den e meki gebroiki fu ala okasi di opo gi den fu du dati, srefi te den e du a wroko fu go luku den skapu. Den owruman e du a wroko dati te den orga sani na fesi fu go luku den skapu na oso. Ma den owruman kan go luku den skapu na tra okasi tu, èn dati e tyari furu winimarki tu.

De Skapuman Nanga Leriman Ala Ten

Wan datra abi sabi nanga ondrofeni fanowdu fu du en wroko. Ma den sikisma di a e luku e warderi en te a e sori switifasi nanga sari-ati, te a e broko en ede nanga den èn te a e sori taki a e prakseri den ala ten. Den eigifasi disi musu de wan pisi fu a sortu sma di a de. Den srefi eigifasi disi musu tron wan pisi tu fu a sortu sma di wan bun leriman nanga skapuman de, wan pisi fu a fasi fa ensrefi de ala dei. Wan tru leriman sa de srekasreka fu gi den sma di de lontu en, rai te a de fanowdu. „Wan wortu di taki na a yoisti ten o fa dati bun!” na so Odo 15:23 e taki. A „yoisti ten” kan de te a e tanapu na tapu a podium fu taki, te a e preiki oso fu oso, noso te a abi wan takimakandra na ini a Kownukondre zaal noso te a e taki na a telefon. Na so wan bun skapuman e pruberi tu fu sori heri moi eigifasi fu sorgu gi sma ala ten, no wawan te a abi fu go luku den skapu. Fu di a skapuman ’opo en ati bradi’, meki a sa gebroiki ibri okasi bun fu wei den skapu, ala di a e gi den a sorgu di den abi fanowdu na a yoisti ten. Disi e meki a de wan sma di den skapu lobi.—Markus 10:43.

Wolfgang, di de wan owruman now, e memre wan prisiri takimakandra di en nanga en  osofamiri ben abi nanga wan dinari ini a diniwroko nanga en wefi di ben kon na den oso. Wolfgang e taki: „Den pikin fu wi ben breiti srefisrefi nanga a poti di den ben e poti prakseri na den èn a prisiri ten di wi ben abi. Te now ete den e taki fu dati.” Iya, a dinari ini a diniwroko disi ben sori taki a ben broko en ede nanga den; a ben ’e opo en ati bradi’.

Wan tra okasi fu ’opo yu ati bradi’ na te yu e go luku sikisma, te yu e seni den wan syatu brifi fu gi den deki-ati, noso te yu e taki nanga den na a telefon–iniwan sani fu meki den sabi taki yu e broko yu ede nanga den! Go yepi te a de fanowdu. Efu den wani taki, dan arki nanga ala yu prakseri. Taki bun fu den theokrasia wroko di span èn di e du na ini a gemeente pe yu de èn na tra presi. Yepi den fu poti prakseri na wan tumusi moi tamara di poti aparti gi den sma di lobi Yehovah, sa kisi.—2 Korentesma 4:16-18.

A Sani Di Den Musu Du Boiti Taki Den E Go Luku den Skapu

Te wi e hori a marki na prakseri fu san ede wi e wei den skapu, dan a de krin taki te wi e orga sani fu go luku den brada nanga sisa na oso, dan dati no de nofo. Ala di dati na wan prenspari sani, toku a de wan pisi nomo fu san de ini a tori. Wan lobi-ati skapuman ’e opo en ati bradi’ fu di na ini ala situwâsi sma man go taki makriki nanga en  ala ten. A waran matifasi di a e kweki nanga den brada fu en e gi den a dyaranti taki na ini tumusi kefalek ten, den no abi fu frede no wan enkri takru sani, fu di den sabi taki a lobi brada fu den, a Kresten skapuman, e sorgu gi den.—Psalm 23:4.

Iya, unu alamala leki Kresten skapuman un ’opo un ati bradi’. Sori opregti lobi gi den brada fu yu — gi den deki-ati, gi den kowru-ati, bow den na yeye fasi na ibri fasi di yu man. Yepi den fu tanapu kánkan na ini bribi (Kolosesma 1:23). Den skapu no sa mankeri noti, fu di den blesi nanga Kresten skapuman di e ’opo den ati bradi’. Den sa abi a fasti bosroiti, soleki David, fu tan na ini na oso fu Yehovah wan langa pisi ten (Psalm 23:1, 6). San wan lobi skapuman ben sa kan wani moro?

[Futuwortu]

[Faki na tapu bladzijde 30]

Kresten Skapuman

• Abi wan angri fu dini èn de klariklari fu du dati

• E gi na ipi nyanyan èn sorgu gi den

• E yepi trawan fu suku fu tron skapuman

• E go luku den sikisma èn e sorgu gi den

• De na ai fu yepi den brada fu den ala ten

[Prenki na tapu bladzijde 31]

Efu owruman de na ini a preikiwroko, na den konmakandra, noso na okasi pe den abi prisiri demakandra, den de skapuman, ala ten