Sai Siri fu Kownukondre Waarheid
Sai Siri fu Kownukondre Waarheid
„Sai yu siri na mamanten èn no meki yu anu rostu teleki neti doro.”—PREIKIMAN 11:6.
1. Na sortu fasi Kresten e sai siri na ini a ten disi?
GRONWROKO ben de wan tumusi prenspari sani na ini a libimakandra fu den Hebrewsma fu owruten. Fu dati ede Yesus, di ben de en heri libi langa leki wan libisma na ini a Pramisi Kondre, ben gebroiki sani di abi fu du nanga gronwroko na ini den agersitori fu en. Fu eksempre, a ben agersi a preiki fu a bun nyunsu fu Gado Kownukondre nanga a sai di wan sma e sai siri (Mateus 13:1-9, 18-23; Lukas 8:5-15). Teleki a ten disi, efu a de so taki wi e libi na ini wan libimakandra di e du gronwroko noso efu wi no e libi na ini so wan libimakandra, toku a sai fu siri na yeye fasi na a fasi disi, na a moro prenspari wroko di Kresten e du.
2. O prenspari a preikiwroko fu wi de èn san na wan tu fu den sani di den e du, fu du a wroko na ini a ten disi?
2 A de wan bigi grani fu teki prati na a saiwroko fu Bijbel waarheid na ini a ten disi fu a kaba. Romesma 10:14, 15 e sori heri bun taki a wroko disi prenspari: „Ma fa den sa yere sondro fu wan sma e preiki? Ma fa den sa preiki efu wan sma no seni den go? Neleki fa a skrifi: ’O switi den futu fu den wan de di e meki bun nyunsu fu bun sani bekènti!’” Noiti bifo a ben de so prenspari fu go doro nanga wan bun fasi fu denki, fu du a wroko disi di Gado ben gi wi. Fu dati ede Kotoigi fu Yehovah e gi densrefi krinkrin na ini a meki di den e meki èn a prati di den e prati Bijbel nanga bijbelstudie yepisani na ini 340 tongo. Fu meki den yepisani disi, den abi moro leki 18.000 friwani wrokoman fanowdu na a edekantoro èn na den bijkantoro fu den na ini difrenti kondre. Pikinmoro siksi milyun Kotoigi e yepi fu prati den Bijbel publikâsi disi na heri grontapu.
3. Sortu marki wi e doro nanga yepi fu a sai di wi e sai Kownukondre waarheid?
3 San na den froktu fu a tranga wroko disi? Neleki fa a ben de na ini den fosi dei fu Krestendom, na so furu sma e teki a waarheid nanga prisiri tu na ini a ten disi (Tori fu den Apostel 2:41, 46, 47). Ma a sani di de moro prenspari leki a bigi nomru fu nyun Kownukondre preikiman di teki dopu, na a tru tori taki a bigi kotoigiwroko disi e yepi fu santa a nen fu Yehovah èn fu regtfardiki en leki a wan enkri tru Gado (Mateus 6:9). Moro fara, sabi fu Gado Wortu e meki a libi fu furu sma kon moro bun èn a kan tyari frulusu kon gi den.—Tori fu den Apostel 13:47.
4. O furu den apostel ben broko den ede nanga den sma di den ben e preiki gi?
4 Den apostel ben sabi heri bun taki a bun nyunsu prenspari fu kisi libi. Den ben e firi srefisrefi gi den sma di den ben e preiki gi. Disi de krin fu si na den wortu fu na apostel Paulus, di a ben skrifi: „Fu di wi abi safu firi fu lobi gi unu, meki nanga ala prisiri wi ben prati no wawan a bun nyunsu fu Gado nanga unu, ma so srefi wi eigi sili, bika unu ben kon de sma di wi lobi” (1 Tesalonikasma 2:8). Di Paulus nanga den tra apostel ben broko den ede trutru nanga sma, dan den ben sori taki den ben e waka baka na eksempre fu Yesus nanga a di fu den engel fu hemel, di abi furu fu du nanga a wroko disi di e kibri libi. Meki wi go luku san na a prenspari wroko fu den futuboi disi na hemel ini a sai di a Kownukondre waarheid e sai. Meki wi luku tu fa na eksempre fu den e gi wi deki-ati fu du san wi musu du.
Yesus—A Saiman fu Kownukondre Waarheid
5. Sortu wroko Yesus ben du na a fosi presi di a ben de na grontapu?
5 Yesus, wan volmaakti man, ben abi a makti fu gi furu bun sani na materia sei na den sma fu a ten fu en. Fu eksempre, a ben kan puru furu fu den fowtu denki di sma ben abi fu sani di abi fu du nanga a gosontu nanga datratori na ini en ten. A ben kan meki libisma kon moro koni tu na ini tra afersi fu sabidensi. Ma frukufruku na ini en diniwroko a ben sori krin taki a wroko fu en ben de fu preiki a bun nyunsu (Lukas 4:17-21). Èn di a diniwroko fu en ben e kon na wan kaba, a ben fruklari: „Na fu a sani disi ede mi gebore, èn na fu a sani disi ede mi kon na grontapu, fu mi gi kotoigi fu a waarheid” (Yohanes 18:37). So bun, a ben e sai siri fu Kownukondre waarheid. A gi di Yesus ben e gi den sma fu en ten leri, fu Gado èn fu den prakseri fu En, ben de moro prenspari moro ibri tra leri di a ben kan gi den.—Romesma 11:33-36.
6, 7. (a) Sortu tumusi aparti pramisi Yesus ben du bifo a opo go na hemel, èn fa a e meki disi kon tru? (b) Fa a sani di Yesus e du ini a tori fu a preikiwroko, abi krakti na yu tapu?
6 Yesus ben sori go na ensrefi leki a Saiman fu Kownukondre waarheid (Yohanes 4:35-38). A ben prati siri fu bun nyunsu na ibri okasi. Srefi di a ben e dede na a postu, a ben meki bun nyunsu bekènti fu wan paradijs na grontapu na ini a ten di e kon (Lukas 23:43). Boiti dati, a bigi broko-ede di a ben abi taki sma ben musu preiki a bun nyunsu, no ben kon na wan kaba nanga a dede fu en na a pina-udu. Bifo a opo go na hemel, a ben gi den apostel fu en a komando fu go doro fu sai siri fu Kownukondre waarheid èn fu meki disipel. Ne Yesus ben pramisi wan sani di ben de tumusi aparti. A ben taki: „Luku! Mi de nanga unu ala den dei te na a kaba fu a seti fu sani.”—Mateus 28:19, 20.
7 Nanga den wortu disi, Yesus ben pramisi fu horibaka, fu tiri, èn fu kibri a wroko fu preiki a bun nyunsu „ala den dei te na a kaba fu a seti fu sani”. Te na ini a ten fu wi, Yesus srefi tan poti ala en prakseri na a preikiwroko. En na wi fesiman, di abi a frantwortu gi a sai di wi e sai Kownukondre waarheid (Mateus 23:10). Leki Edeman fu a Kresten gemeente, a abi a frantwortu na fesi Yehovah fu du a wroko disi na heri grontapu.—Efeisesma 1:22, 23; Kolosesma 1:18.
Den Engel E Meki Prisiri Nyunsu Bekènti
8, 9. (a) Fa den engel sori taki a prakseri fu den de trutru na den afersi fu libisma? (b) Na sortu fasi wi ben sa kan taki dati wi de na ini wan prei na ini wan komedi-oso, na fesi den engel?
8 Di Yehovah ben meki grontapu, dan den engel „ben bari makandra fu prisiri ede, èn . . . ben bigin bari wan prisiri babari (Yob 38:4-7). Fu sensi a ten dati, den mekisani disi na hemel sori taki a prakseri fu den de fayafaya na den afersi fu libisma. Yehovah gebroiki den fu gi libisma den boskopu fu en (Psalm 103:20). Disi de spesrutu so te a abi fu du nanga a prati fu a bun nyunsu na ini den dei fu wi. Na ini na openbaring di na apostel Yohanes ben kisi, a ben si wan „engel e frei na mindrisei fu hemel” di abi „têgo bun nyunsu fu meki bekènti leki prisiri nyunsu gi den sma di e libi na grontapu, èn gi ibri nâsi nanga lo nanga tongo nanga pipel, èn a ben taki nanga wan tranga sten: ’Frede Gado èn gi en glori, bika a yuru doro te a sa tyari krutu kon’.”—Openbaring 14:6, 7.
9 Bijbel e taki fu engel leki „yeye, fu du diniwroko na publiki, di A ben seni go fu dini fu a bun fu den sma di o kisi frulusu” (Hebrewsma 1:14). Te den engel e du den plekti di den kisi fu du, dan den abi na okasi fu si wi èn den wroko fu wi. A de neleki wi ben sa de na tapu wan trutru podium fu wan komedi-oso pe someni sma kan si wi, na so wi e du wi wroko na fesi fu wan publiki na hemel (1 Korentesma 4:9). Fa a de wan seryusu èn span sani fu sabi taki wi no de wi wawan e wroko leki saiman fu Kownukondre waarheid!
Fayafaya Wi E Du den Sani Di Wi Musu Du
10. Fa wi kan gebroiki a bun rai na ini Preikiman 11:6 gi a preikiwroko fu wi?
10 Fu san ede Yesus nanga den engel e poti prakseri so furu na a wroko fu wi? Yesus ben kari wán reide fu san ede a de so di a ben taki: „Mi e taigi unu, taki den engel fu Gado e prisiri te wán sondari abi berow” (Lukas 15:10). Wi srefi tu e poti prakseri na sma trutru. Fu dati ede, wi e du ala muiti fu prati siri fu Kownukondre waarheid na ala presi. Den wortu fu Preikiman 11:6 fiti a wroko di wi e du. Drape Bijbel e gi wi seryusu rai: „Sai yu siri na mamanten èn no meki yu anu rostu teleki neti doro; bika yu no sabi pe disi sa abi bun bakapisi, a kan de dyaso noso a kan de drape, noso taki ala tu sa bun a srefi.” A tru taki gi ibri sma di e teki a boskopu fu wi, yu kan abi hondrohondro sma noso srefi dusundusun sma di e weigri en. Ma neleki den engel, wi e prisiri te „wan sondari” srefi e teki a boskopu fu frulusu.
11. O bun a bakapisi kan de te wi e gebroiki publikâsi di e taki sani di de na ini Bijbel?
11 A preiki fu a bun nyunsu abi fu du nanga furu sani. Wan prenspari sani di e yepi wi na ini a wroko disi, na den publikâsi di e taki fu sani di de na ini Bijbel èn di Kotoigi fu Yehovah e gebroiki. Na ini son kefal, den publikâsi disi de neleki siri tu di panya go na ala presi. Wi no sabi pe den sa abi bun bakapisi. Sontron wan publikâsi kan komoto fu na anu fu a wan sma go na a trawan bifo wan sma leisi en. Na ini son kefal, Yesus nanga den engel fu en kan seti sani so fu meki disi feni presi fu a bun fu den reti-ati wan. Luku wan tu ondrofenitori di e sori fa Yehovah kan gi kefalek moi bakapisi, di sma no ben fruwakti, nanga yepi fu publikâsi di ben libi na baka gi sma.
A Wroko fu a Tru Gado
12. Fa wan owru tijdschrift ben de a wrokosani fu yepi wan osofamiri fu leri sabi Yehovah?
12 Na ini 1953, Robert, Lila, nanga den pikin fu den ben froisi komoto fu wan bigi foto go na ini wan brokobroko owru oso fu wan burugron na den boitipresi fu Pennsylvania, Amerkankondre. Syatu baka dati di den ben froisi go drape, Robert ben teki na bosroiti fu poti wan wasi-oso na ondro wan trapu di ben e go na sodro, èn di tapu na lontu. Baka di a ben puru wan tu planga, dan a ben kon si taki na baka den seiplanga, moismoisi ben kibri pisipisi papira, leigi walnoto buba, nanga tra doti. Drape, na mindri ala den sani disi, wan tijdschrift The Golden Age ben de. Robert ben wani sabi moro spesrutu fu wan artikel di ben taki fu a tori fu a kweki fu pikin. Den ben gi krin tiri, di teki fu Bijbel, na ini a tijdschrift èn dati ben naki Robert en ati sote, taki a ben taigi Lila dati den ben o go horibaka gi den sma fu „a kerki fu The Golden Age”. Na ini wan tu wiki nomo, Kotoigi fu Yehovah ben kon na a oso fu den, ma Robert ben taigi den taki en osofamiri ben wani sabi sani fu „a kerki fu The Golden Age” wawan. Den Kotoigi ben tyari kon na krin taki a tijdschrift The Golden Age ben abi wan nyun nen now, Ontwaakt! Robert nanga Lila ben bigin studeri Bijbel ala wiki nanga den Kotoigi. Te fu kaba, den ben teki dopu. Den, fu den sei, ben sai siri fu waarheid na ini den pikin fu den èn den ben abi bun furu winimarki. Now, moro leki 20 memre fu a famiri disi, so srefi ala den seibi pikin fu Robert nanga Lila, na dopu futuboi fu Yehovah Gado.
13. San ben meki taki wan trowpaar na ini Puerto Rico ben wani sabi sani fu Bijbel?
13 So wan 40 yari pasa kaba, William nanga Ada, wan trowpaar fu Puerto Rico, no ben wani yere noti fu a studeri fu Bijbel. Te Kotoigi fu Yehovah ben naki na a doro fu den, dan a trowpaar ben du neleki den no ben de na oso. Wan dei William ben go na wan presi pe den abi owru sani di sma e seri, fu bai wan sani di a ben kan gebroiki fu meki wan sani di ben broko na en oso. Di a ben e gowe, dan a ben si wan moi grun buku di ben de na ini wan bigi doti-baki. A ben de Religion (Relisi), wan buku di Kotoigi fu Yehovah ben tyari kon na doro na a ten dati na ini 1940. William ben tyari a buku go na oso èn san a ben leisi ben naki en ati fu di a ben e leisi fu a difrenti na mindri falsi bribi nanga tru bribi. A tra leisi di Kotoigi fu Yehovah ben kon na a oso fu William nanga Ada, dan den ben arki a boskopu fu den Kotoigi nanga prisiri. William nanga Ada ben bigin tu fu studeri Bijbel nanga den Kotoigi. Wan tu mun baka dati, den ben teki dopu na a Gado Wani Internationaal Konmakandra na ini 1958. Sensi a ten dati, den yepi moro leki 50 sma fu tron wan pisi fu wi Kresten bradafasi.
14. San den publikâsi fu wi di e taki fu sani di de na ini Bijbel kan du, so leki wan ondrofenitori e sori wi?
14 Karl ben abi 11 yari nomo èn a ben ogri pikinso. A ben feni taki ala ten a ben kon na ini problema. En papa, wan Doisri Methodist preikiman, ben leri en taki sma di e du takru sani sa bron na ini hel, baka di den dede. So bun Karl ben frede hel srefisrefi. Wan dei na ini 1917, Karl ben si wan pisi papira na strati. Sani ben skrifi na tapu a papira èn a ben teki en. Di a ben leisi en, dan wantewante en ai ben fadon na tapu na aksi: „San na hel?” A papira ben de wan kari fu kon na wan publikitaki di ben abi fu du nanga a tori fu hel. Den Bijbel Ondrosukuman, di sma sabi leki Kotoigi fu Yehovah na ini a ten disi, ben seti a konmakandra dati. Pikinmoro wan yari baka dati, baka di a ben kisi bijbelstudie, dan Karl ben teki dopu, èn a ben tron wan Kotoigi fu Yehovah. Na ini 1925 a ben kisi wan kari fu go wroko na a edekantoro fu Yehovah Kotoigi di e tiri a wroko na heri grontapu — te now ete a e wroko drape. Wan pisi ten fu moro leki 80 yari fu Kresten diniwroko, ben bigin nanga wan pisi papira di a ben feni na strati.
15. San Yehovah kan du, so leki fa en e feni en bun?
15 A tru, libisma no abi a koni fu taki efu den engel ben abi langalanga fu du nanga den ondrofenitori disi èn o furu den engel ben abi fu du nanga den. Ma toku, noiti wi musu tweifri na a tru tori taki Yesus nanga den engel abi furu fu du nanga a preikiwroko. Wi no musu tweifri tu na a tru tori taki Yehovah na a Sma di kan tiri afersi so leki fa en e feni en bun. Den ondrofenitori disi èn furu trawan leki disi, e sori a bun bakapisi di den publikâsi fu wi kan abi baka di wi gi den na tra sma.
Wi Kisi a Frantwortu fu Sorgu gi wan Gudu
16. San wi kan leri fu den wortu fu 2 Korentesma 4:7?
16 Na apostel Paulus ben taki fu wan „gudu na ini tokotoko patu”. A gudu dati na a komando di Gado gi fu preiki. Den tokotoko patu na libisma di Yehovah gi a gudu disi. Fu di den libisma dati no de volmaakti èn den no man du ala sani, meki Paulus e taki moro fara dati „a krakti di e pasa san de normaal ben sa de fu Gado èn no fu wisrefi” (2 Korentesma 4:7). Iya, wi kan frutrow tapu Yehovah taki a sa gi wi a krakti di de fanowdu fu meki wi du a wroko di de fu du.
17. San wi sa ondrofeni te wi e sai siri fu Kownukondre waarheid, èn fu san ede toku wi musu tan abi wan bun fasi fu denki?
17 Furutron a e aksi bun furu sani fu wi. A kan, taki a muilek noso taki a e gi problema fu wroko na ini son gebied. Wan tu presi de pe moro furu fu den sma abi mi-no-ke fasi krinkrin, den abi feantifasi srefi. Kande furu muiti ben du na ini den presi dati, ma toku a sori leki den bakapisi no de fu si. Ma a warti fu du muiti te so furu sani de ini a tori. Memre, taki den siri di yu e sai kan meki sma koloku now èn den kan meki sma kisi têgo libi so srefi na ini a ten di e kon. Furutron den wortu fu Psalm 126:6 sori taki den tru: „A sma di trutru e go doro, srefi ala di a e krei, ala di a e tyari wan saka di lai nanga siri, seiker sa drai kon baka nanga wan prisiri babari, èn a sa tyari den bosu fu en.”
18. Fa wi kan poti prakseri doronomo na wi diniwroko, èn fu san ede wi musu du dati?
18 Meki wi grabu ibri okasi di fiti, fu sai siri fu Kownukondre waarheid bogobogo. Meki wi no frigiti noiti taki, ala di wi na den wan di e prani èn taki wi na den wan di e gi den siri watra, toku na Yehovah na a Sma di e meki den gro (1 Korentesma 3:6, 7). Ma neleki fa Yesus nanga den engel e du den pisi fu a wroko, na so Yehovah e fruwakti fu wi taki wi e du wi diniwroko dorodoro tu (2 Timoteus 4:5). Meki wi poti prakseri doronomo na den sani di wi e leri sma èn na a fasi fa wi e denki. Meki wi poti prakseri tu na a fayafaya fasi fa wi e du a diniwroko fu wi. Fu san ede? Paulus e piki: „Efu yu e du disi, dan yu sa frulusu yusrefi nanga den wan di e arki yu.”—1 Timoteus 4:16.
San Wi Ben Leri?
• Na sortu fasi a saiwroko fu wi abi bun bakapisi?
• San Yesus Krestes nanga den engel abi fu du nanga a preikiwroko na ini a ten disi?
• Fu san ede wi musu de leki saiman fu Kownukondre waarheid di e sai bogobogo?
• Te wi e miti nanga mi-no-ke fasi noso feantifasi na ini wi diniwroko, dan san musu buweigi wi fu tan go doro?
[Aksi fu a tori disi]
[Prenki na tapu bladzijde 15]
Neleki gronman na ini na Israèl fu owruten, na so Kresten na ini a ten disi e sai siri fu Kownukondre waarheid bogobogo
[Prenki na tapu bladzijde 16, 17]
Kotoigi fu Yehovah e meki èn e prati wan heri ipi difrenti publikâsi na ini 340 tongo. Den publikâsi disi e taki fu sani di de na ini Bijbel