Wan Ondrofenitori

Wan Tyariman fu Leti gi Furu Nâsi

A TORI FU GEORGE YOUNG SOLEKI FA RUTH YOUNG NICHOLSON BEN FRUTERI

„We, fu san ede meki den sma di e sidon tapu den preiki sturu no e taki wan sani dan? . . . Efu baka di wi sori taki den sani di mi skrifi tru èn toku wi e tan tiri, dan sortu sma wi ben sa de dan? No meki wi hori a pipel don, ma meki wi fruteri ala sma waarheid sondro fu frede noso sondro taki wi e kibri dati.”

DEN wortu disi ben de wan pisi fu wan brifi fu Papa. Na ini a brifi disi di ben abi 33 bladzijde a ben aksi fu den puru en nen na kerki. Disi ben pasa na ini a yari 1913. Sensi a ten dati, a ben bigin libi wan libi di ben o furu nanga ondrofeni di ben o meki taki a ben o go dini leki wan tyariman fu leti gi furu nâsi (Filipisma 2:15). Leki wan yongu umapikin kaba, mi ben bigin skrifi ala den ondrofenitori fu Papa, di mi ben man feni. Famiriman, nanga sani di sma ben skrifi fosi fu en èn so srefi mati, ben yepi mi fu poti ala den pisi fu a libitori fu en kon na wan. Na furu fasi a libi fu Papa e meki mi memre a libi fu na apostel Paulus. Neleki na ’apostel dati fu den nâsi’, Papa ben de ala ten klariklari fu teki waka fu go na sma fu ibri kondre nanga èilanti fu tyari a boskopu fu Yehovah gi den (Romesma 11:13; Psalm 107:1-3). Meki mi fruteri yu fu George Young, mi papa.

Den Bigin Yari

Papa ben de a moro yongu manpikin fu John nanga Margaret Young, di ben de Presbytersma fu Skotland. A gebore tapu 8 september 1886 syatu baka di na osofamiri disi ben froisi fu Edinburg, Skotland, go na British Columbia na ini a westsei pisi fu Kanada. Wan tu yari na fesi den dri bigi brada fu en — Alexander, John, nanga Malcolm — gebore na ini Skotland. A yongu sisa fu den boi, Marion, di den ben lobi fu kari Nellie, ben de tu yari moro yongu leki Papa.

 Den pikin di ben kweki kon bigi na wan burugron ini Saanich foto, krosibei fu Victoria, na British Columbia, ben abi wan switi ten drape. Na a srefi ten, den ben leri fa fu tyari frantwortu. So bun di a papa nanga a mama fu den ben drai kon baka fu Victoria, dan den pikin ben du den wroko na a prasi kaba èn na oso ben krin.

Baka wan pisi ten, Papa nanga den brada fu en ben kon abi belangstelling fu bai èn seri udu nanga gudu di den diki puru na ondrogron. Safrisafri den brada Young ben kon kisi a bun nen leki man di e waka suku pe den kan kapu udu èn leki man di e bai èn e seri udu. Papa ben e du den moni afersi.

Te fu kaba a lobi di papa ben lobi yeye afersi, ben meki a teki bosroiti fu tron wan presbyter dinari. Ma na a ten dati, den lezing di ben skrifi na ini den koranti fu Charles Taze Russell, a fosi presidenti fu Zion’s Watch Tower Tract Society, ben abi bigi krakti tapu en libi trutru. San Papa ben leri, ben meki a skrifi a brifi di den e taki fu en na bigin fu a tori disi. A ben seni a brifi disi go fu taki dati a no de wan memre moro fu a kerki dati.

Na wan switi fasi Papa ben e gebroiki tekst fu Bijbel fu sori na wan krin fasi taki den kerki leri fu a sili di no man dede èn taki Gado sa meki libisma sili pina fu têgo na ini helfaya, no tru. A ben sori tu taki a leri fu a Dri-wánfasi no abi en rutu na ini Krestendom èn taki no wan fu den Buku fu Bijbel e hori baka gi a leri dati. Sensi a ten dati, a ben waka baka na eksempre fu Yesus fu di a ben du a Kresten diniwroko, ala di nanga saka fasi a ben gebroiki ala en krakti nanga koni fu gi Yehovah glori.

Na ini 1917 Papa ben bigin fu dini leki wan pelgrim ondro a tiri fu a Waktitoren Genootschap. Na so den ben e kari fesiman fu Kotoigi fu Yehovah di ben abi a frantwortu fu go na difrenti gemeente. Na ini bigi foto nanga pikin foto na heri Kanada, a ben hori lezing èn a ben sori sma a felem nanga na atogisi di de bekènti leki a „Photo-Drama der Schepping”. Den felem-oso ben span nanga sma te Papa ben e go na den presi. A lijst di e sori o ten a ben o go na wan presi ben de na ini The Watchtower te leki 1921.

Wan koranti fu Winnipeg ben skrifi taki na Evangelie Preikiman Young ben taki nanga 2500 sma èn taki furu sma no ben kan go ini sei bika bun furu sma ben de na ini a zaal. Na ini Ottawa, a ben taki fu a tori „Go na Hel èn Kon Baka”. Drape wan owru man ben taki: „Di George Young ben kaba nanga a lezing, dan a ben gi den kerki fesiman wan kari fu kon na tapu a podium fu taki fu a tori disi nanga en, ma no wan fu den ben opo go. Na so mi ben kon sabi taki mi ben feni a waarheid.”

Papa ben pruberi fu du so furu sani leki a kan te a ben e go na den difrenti presi. Baka dati, dan a ben e lon fu teki a loko fu go na wan tra presi di ben de tapu a lijst fu presi pe a ben musu go. Te a ben e rei nanga oto, dan langa ten bifo a mamanten nyanyan a ben de na pasi kaba fu go na a tra toewijzing fu en. Boiti taki a ben de fayafaya, dan sma ben sabi Papa leki wan man di ben hori trawan na prakseri èn sma ben sabi en fu den Kresten eigifasi fu en èn fu a lobi di a ben lobi fu gi trawan sani bogobogo.

Fu den furu kongres di Papa ben go di kongres ben bigin hori paspas, wan spesrutu wan ben de di sma no man frigiti esi-esi. A kongres disi ben  hori na ini Edmonton, na a presi Alberta, na ini 1918. En heri osofamiri ben de drape fu di Nellie ben o teki dopu. A ben de a lasti leisi tu di ala den boi ben de makandra. Tu yari baka dati, dan Malcolm dede fu di a ben abi wan siki na den fokofoko fu en. Malcolm ben abi a howpu fu libi na ini hemel neleki den dri brada fu en nanga en papa èn den alamala ben tan getrow na Gado te na dede.—Filipisma 3:14.

A Ben Go na den Tra Kondre

Na ini september 1921, baka di Papa ben kaba nanga wan preiki waka na ini Kanada, dan Joseph F. Rutherford di na a ten dati ben de presidenti fu a Waktitoren Genootschap, ben seni en go na den èilanti na ini a Kribisi Se fu go moro fara nanga en wroko. Ala presi pe Papa ben e sori a „Photo-Drama der Schepping”, sma ben lobi a felem. Di a ben de na Trinidad, dan a ben skrifi: „A presi ben span so furu nanga sma taki presi no ben de moro èn fu dati ede bigi grupu sma ben drai gowe. A di fu tu neti, na oso ben lai nanga ipi-ipi sma.”

Na ini 1923, dan den ben seni Papa go na Brasyonkondre. Drape a ben taki nanga bigi grupu sma èn son leisi a ben e pai sma fu vertaal san a ben taki. The Watchtower fu 15 december 1923 ben skrifi: „Fu 1 yuni te go miti 30 september Brada Young ben hori 21 publiki konmakandra, pe 3600 sma ben kon arki, 48 gemeente konmakandra, pe 1100 sma ben kon èn a ben prati ala nanga ala 5000 buku na ini Potogisi sondro fu aksi moni.” Furu sma ben sori taki den wani sabi moro fu di den ben arki a lezing „Milyunmilyun Sma Di E Libi Now Noiti Sa Dede” di Papa ben hori.

Di den ben wei nyun pisi fu a bijkantoro fu Brasyonkondre tapu 8 maart 1997, dan a brochure di meki gi na okasi disi ben skrifi: „1923: George Young e kon na ini Brasyonkondre. A e orga wan bijkantoro leti na a mindrisei pisi fu Rio de Janeiro”. Ala di Bijbel publikâsi ben de fu feni na ini Spanyoro, toku sma ben abi dati fanowdu tu na ini Potogisi, a moro prenspari tongo fu Brasyonkondre. So bun bigin nanga 1 oktober 1923 den ben bigin tyari A Waktitoren kon na doro na ini Potogisi.

Papa ben miti furu sma na ini Brasyonkondre di a no ben sa frigiti moro. Wan fu den ben de wan gudu Potogisi man di ben nen Jacintho Pimentel Cabral di ben gi primisi fu hori konmakandra na ini en oso. Esi-esi Jacintho ben teki a Bijbel waarheid èn baka ten a ben kon tron wan memre fu a Bethelfamiri. Wan trawan ben de Manuel da Silva Jordão, wan yonkuman di ben e krin dyari. A ben yere wan publiki taki di Papa ben hori èn dati ben gi en deki-ati fu drai go baka na Potogisikondre fu dini leki wan kolporteur, soleki fa den ben e kari den furuten dinari fu Yehovah Kotoigi na ini a ten dati.

Papa ben waka bun furu nanga loko na heri Brasyonkondre èn a ben man feni den wan di ben wani arki. Wan fu den leisi di a ben go na wan presi, a ben miti Bony nanga Katarina Green èn a ben tan nanga den so wan tu wiki ala di a ben fruklari den Buku fu Bijbel gi den. So wan seibi memre fu a famiri dati ben sori taki den ben gi densrefi abra na Yehovah fu di den teki dopu na ini watra.

Wan tra sma di a ben miti na ini 1923 ben de Sara Belona Ferguson. Leki wan yongu umapikin a ben froisi komoto na Amerkankondre go na Brasyonkondre na ini 1867, makandra nanga en Brada Erasmus Fulton Smith nanga tra memre fu na osofamiri. Sensi 1899 a ben gwenti fu kisi a Watchtower tijdschrift nanga post. Di Papa ben kon na a presi dati, dan disi ben de wan okasi gi Sara, en fo pikin nanga wan famiriman di Papa ben e kari Tanta Sallie fu teki dopu. Dati ben pasa 11 maart 1924. Someni langa den ben wakti tapu a momenti disi.

No so langa baka dati, dan Papa ben e preiki na ini tra kondre fu Zuid-Amerika. Di a ben de na Peru, dan a ben skrifi tapu 8 november 1924: „Didyonsro de mi kaba fu prati 17.000 traktaat na ini Lima nanga Callao.” Baka dati a ben de na pasi fu go na Bolifia fu prati traktaat drape. Fu na okasi dati a ben skrifi: „Wi Tata e blesi den muiti di wi e meki. Wan Ingi ben yepi mi. Na oso fu en de na den a presi pe a watra fu na Amasoneliba e bigin. A e teki 1000 traktaat nanga wan tu buku fu tyari go baka na en oso.”

A muiti di Papa ben du, ben meki den siri fu Bijbel waarheid panya go na ini furu fu den kondre fu Centraal-Amerika nanga Zuid-Amerika. A Watchtower fu 1 december 1924, ben skrifi: „George Young de now na ini Zuid-Amerika so wan tu yari kaba. . . . A lobi brada disi abi a grani fu tyari a boskopu fu waarheid go na Punta Arenas,  na ini a Magalanes Strati.” Papa ben teki fesi tu na ini a preikiwroko di den ben du na ini kondre soleki Costa Rica, Panama, nanga Venezuela. A ben tan preiki ala di a ben kisi malaria èn a gosontu fu en ben go na baka.

Baka na ini Europa

Na ini maart 1925, Papa ben teki boto go na Europa, pe a ben wani fu prati 300.000 Bijbel traktaat na ini Spanyorokondre nanga Potogisikondre. A ben wani seti sani tu gi Brada Rutherford fu hori lezing gi na publiki. Ma, baka di Papa ben doro na ini Spanyorokondre, dan a ben taki dati a ben e tweifri efu a ben de wan bun sani taki Brada Rutherford ben o hori den sortu lezing disi, fu di sma no ben wani si tra kerki drape.

Leki piki, Brada Rutherford ben skrifi den wortu fu Yesaya 51:16: „Mi ben poti mi wortu na ini den mofo, èn mi kibri den na ini a sombra fu mi anu, so taki mi kan prani den hemel, èn poti na fondamenti fu na grontapu, èn taigi Sion: ’Yu na mi pipel” (King James Version). Nanga dati na prakseri, dan Papa ben taki te fu kaba: „Fu tru na a wani fu Masra taki mi go doro èn libi san o pasa gi En.”

Tapu 10 mei 1925 Brada Rutherford ben hori en lezing nanga yepi fu wan tolk, na a Novedades Felem-oso na ini Barcelona. Moro leki 2000 sma ben kon arki, so srefi wan ofisiri fu lanti nanga wan bodyguard di ben tanapu tapu a podium. Wan srefi sortu sani ben pasa na ini Madrid, pe 1200 sma ben kon arki. Fu di furu sma ben kon arki den lezing disi, meki taki wan bijkantoro ben poti na ini Spanyorokondre. A Jaarboek van Jehovah’s Getuigen 1979 e taki dati disi ben pasa „na ondro a tiri fu George Young”.

Brada Rutherford ben hori wan lezing na ini Lisabon, na Potogisikondre tapu 13 mei 1925. Di a ben go drape dan sani ben waka bun tu, ala di den kerki fesiman ben suku fu tapu a konmakandra fu di den ben e meki babari èn ben e iti sturu broko. Baka di Brada Rutherford ben hori den lezing na ini Spanyorokondre nanga Potogisikondre, dan Papa ben go moro fara fu sori sma a „Photo-Drama” èn a ben seti sani tu fu kan druk èn prati Bijbel publikâsi na den presi disi. Na ini 1927 a ben taki dati a „bun nyunsu ben meki bekènti na ini ibri bigi foto nanga pikin foto fu Spanyorokondre”.

A Preikiwroko na ini Sovjet Unie

A tra toewijzing di Papa ben kisi leki zendeling ben de Sovjet Unie, pe a ben  doro tapu 28 augustus 1928. Wan pisi fu a brifi di skrifi tapu 10 oktober 1928 e taki:

„Sensi mi kon na Rosiakondre, mi kan begi trutru nanga mi heri ati ’Meki yu Kownukondre kon.’ Mi e leri taki a tongo, ma dati no e go so gaw. A tolk fu mi ben de wan aparti man. A man disi na wan Dyu, ma a e bribi na ini Krestes èn a lobi Bijbel. Mi e ondrofeni wan tu moi sani dyaso, ma mi no sabi o langa mi sa kisi primisi fu tan dya. A wiki di pasa de, mi ben kisi wan brifi di e taki dati mi musu gowe na ini wán dei, ma wi seti a tori disi so taki mi ben kan tan moro langa.”

Wi ben miti wan tu Bijbel Ondrosukuman na ini Karkov, now wan prenspari foto na ini Ukraini èn a switi demakandra di wi ben abi nanga den ben abi leki bakapisi taki watra-ai ben fadon komoto na wi ai fu prisiri ede. Ibri neti wi ben hori wan pikin kongres te leki mindri neti. Di Papa ben skrifi baka ten fu a konmakandra disi nanga den brada, dan a ben skrifi: „Ke pôti fu den brada disi, bika lanti teki den weiniki buku di den ben abi èn no handri bun nanga den, ma toku den de koloku.”

Na ini wan spesrutu brochure di den meki gi den wan di ben kon makandra tapu 21 yuni 1997 fu wei a nyun bijkantoro na ini Sint Petersburg, Rosiakondre, den taki fu a diniwroko fu Papa na ini Sovjet Unie. A brochure e taki dati den ben seni Papa go na Moskow. A e taki tu dati a ben kisi primisi fu „meki 15.000 kopi fu den pikin buku Vrijheid voor de volkeren nanga Waar zijn de dooden? fu prati den na ini Rosiakondre.

Baka di Papa ben drai kon baka fu Rosiakondre, dan a ben kisi a toewijzing fu du a pelgrim wroko na ini Amerikankondre. Na ini South Dakota a ben go na a oso fu Nellena nanga Verda Pool, tu sisa di ben kon tron zendeling baka ten na ini Peru. Den ben sori trutru taki den ben warderi a diniwroko fu Papa di a ben du fayafaya. Den tu sisa ben taki: „Den brada fu a ten dati ben denki trutru leki pionier fu di den ben go na den freimde presi disi nanga pikinso fu den gudu disi di grontapu abi, ma den ben du disi nanga wan ati di furu nanga lobi gi Yehovah. Dati ben meki den man du a wroko fu den.”

Trowlibi èn a Di Fu Tu Preiki Waka

Na ini ala den yari disi, Papa nanga Clara Hubbert fu Manitoulin-èilanti na Ontario ben abi kontakti fu di den ben e skrifi brifi gi makandra. Ala tu ben de na a kongres di ben hori na ini Columbus, Ohio, tapu 26 yuli 1931, di den bijbelstudenti ben teki a nen Yehovah Kotoigi (Yesaya 43:10-12). Den ben trow wan wiki baka dati. Syatu baka dati, dan Papa ben gowe baka, na a di fu tu preiki waka na den èilanti na ini a Kribisi Se. Drape a ben yepi fu orga konmakandra èn ben leri trawan fa fu du na oso-fu-oso diniwroko.

 Mama ben e kisi fotow, karta nanga brifi fu Suriname, Sint Kitts nanga furu tra presi. Den brifi ben e taki fa a Kownukondre preikiwroko ben e go na fesi èn son leisi wan tu tori fu den fowru, meti, nanga sani di e gro na ini a kondre pe a ben de. Di Papa ben kaba nanga en toewijzing na den èilanti fu Kribisi Se na ini yuni 1932, dan a ben go, soleki fa a ben gwenti, nanga sipi baka na Kanada. Baka dati makandra nanga Mama a ben abi wan prati na a furuten preikiwroko, na ini den kowru ten fu 1932/33 na ini Ottawa nanga wan bigi grupu fu tra furuten dinari.

Wan Syatu Osofamiri Libi

Na ini november 1934 mi brada David ben gebore. Di a ben de wan pikin boi nomo, dan a ben lobi fu tanapu na tapu a boksu pe mama ben poti den ati fu en na ini, dan a ben e oefen fu hori „lezing”. Neleki en papa, a sori en heri libi langa taki a e dini Yehovah fayafaya. Te den dri sma disi ben e go luku den gemeente di e bigin na owstusei syoro te go miti a westsei syoro fu Kanada, dan den ben e waka nanga oto ala di den ben tai wan speaker tapu a daki fu na oto. Mi ben gebore na ini 1938 ala di Papa ben dini na ini British Columbia. David e memre taki Papa ben poti mi na tapu a bedi, dan makandra nanga mama nanga David, den ben kindi lontu a bedi, ala di Papa ben begi fu taigi Yehovah tangi taki den abi mi.

Na ini a kowru ten fu 1939, dan wi ben libi na ini Vancouver ala di Papa ben luku den gemeente na ini na kontren dati. Wan fu den furu brifi di wi ben kibri na ini ala den yari ben de a wan fu 14 yanuari 1939 di a ben skrifi di a ben de na ini Vernon, British Columbia. Papa ben skrifi en gi Clara, David nanga Ruth, èn ben taki: „Wan pikin bosi nanga wan brasa nomo.” Na ini a brifi wan boskopu ben de gi ibriwan fu unu. A ben taki dati a kotiwroko bigi, ma taki nofo wrokoman no de.—Mateus 9:37, 38.

Wan wiki baka dati di Papa ben drai kon baka fu a toewijzing fu en, dan a ben fadon na gron na wan konmakandra. Di den ben ondrosuku en baka ten dan a ben kon na krin taki a ben abi kanker na ini en edetonton. A libi fu en na grontapu ben kon na wan kaba tapu 1 mei 1939. Mi ben abi neigi mun èn David ben o tapu feifi yari. A lobi mama fu wi di ben abi wan hemel howpu tu, ben tan getrow na Gado te leki a dede tapu 19 yuni 1963.

A fasi fa Papa ben si a bigi grani fu en fu tyari a bun nyunsu gi furu kondre, skrifi na ini wan fu den brifi fu en di a ben skrifi gi Mama. Wan pisi fu a brifi e taki: „Na wan bun-ati fasi Yehovah ben gi pasi taki mi ben kan go na den kondre disi leki wan leti di e tyari a Kownukondre boskopu. Sma musu prèise a santa nen fu en. A glori fu En e skèin, ala di wan sma swaki èn no abi nofo koni.”

Now den pikin nanga granpikin, nanga den pikin fu den granpikin fu George nanga Clara Young e dini a lobi Gado fu wi, Yehovah tu. Den fruteri mi taki Papa ben lobi fu taki den wortu di skrifi na ini Hebrewsma 6:10, pe skrifi taki: „Bika Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en.” Wi tu no frigiti a wroko di Papa ben du.

[Prenki na tapu bladzijde 23]

Mi papa na a leti-anusei makandra nanga den dri brada fu en

[Prenki na tapu bladzijde 25]

Papa (e tanapu) nanga Brada Woodworth, Brada Rutherford nanga Brada Macmillan

Ondrosei: Papa (a lasti wan na a kruktu-anusei) na ini wan grupu nanga Brada Russell

[Prenki na tapu bladzijde 26]

Papa nanga Mama

Ondrosei: A trowdei fu den

[Prenki na tapu bladzijde 27]

Makandra nanga David nanga Mama wan tu yari baka di Papa dede