A Fasi Fa Yu Libi Kan Abi Moro Waarde

WAN owruten odo e taki: „No wroko tranga fu tron wan guduman. No waka soleki fa yu e prakseri. Yu wani poti yu ai tapu wan sani di no de noti? Bika sondro tweifri a sa meki frei gi ensrefi leki den frei fu wan aka èn frei go na hemel” (Odo 23:4, 5). Nanga tra wortu, a no ben o de wan koni sani te wi e weri wisrefi èn e pruberi fu kon gudu, bika gudu kan frei gowe neleki a de na tapu den frei fu wan aka.

Soleki fa Bijbel e sori, dan materia gudu kan lasi gowe esi-esi. A kan taki a lasi gowe wantewante so, fu di wan rampu, wan ekonomia problema noso wan tra sani di yu no fruwakti, feni presi. Boiti dati, srefi sma di abi nofo gudu moro furu no de koloku. Luku fa sani ben waka nanga John di ben e gi show so taki politiekman, bigi sportman èn so srefi heihei man ben kan abi prisiri.

John e taki: „Mi wroko ben de mi gado. Mi ben abi furu moni, mi ben e tan na ini den moro diri hotel èn son leisi mi ben e go na wroko nanga opolani srefi. Biginbigin mi ben lobi den sani disi, ma safrisafri a no ben de wan prisiri sani srefi. A ben gersi taki den sma di mi ben e suku fu plisi, ben e luku ala sani frafra. Mi no ben abi wan trutru marki na ini mi libi.”

Soleki fa John ben kon si, dan wan libi sondro gronprakseri fu Gado no e meki sma prisiri trutru. Na ini a barinen Bergitaki, Yesus Krestes ben sori fa fu feni koloku di e tan. A ben taki: „Koloku fu den sma di sabi den yeye nowtu, bika hemel kownukondre na fu den” (Mateus 5:3). A de krin, taki na wan koni sani fu poti yeye afersi na a fosi presi na ini a libi. Ma toku, tra sani kan yepi tu fu meki a libi abi moro waarde.

Yu Osofamiri Nanga Mati De Trutru Prenspari Sani

Efu yu no ben sa abi kontakti nanga yu osofamiri èn nanga krosibei mati, yu ben sa prisiri nanga a libi dan? A de krin taki dati no ben o de so. A Sma di meki wi, meki wi na so wan fasi taki wi musu lobi trawan èn trawan musu lobi wi. Disi na wan reide fu san ede Yesus ben poti krakti tapu a penti taki ’wi musu lobi a sma na wi sei leki wisrefi’ (Mateus 22:39). Na osofamiri  na wan presenti di wi kisi fu Gado pe wi abi wan moi okasi fu sori lobi sondro fu denki wisrefi nomo.—Efeisesma 3:14, 15.

Fa wi osofamiri kan meki taki a libi fu wi abi moro waarde? We, wi ben kan teki wan osofamiri pe wánfasi de, gersi nanga wan moi dyari pe wi kan go fu kisi kowru-ati èn pe wi kan puru a broko-ede fu na aladei libi. Na ini na osofamiri so srefi wi kan feni bun mati nanga lobi di e puru a firi di wan sma abi taki a de en wawan. A tru taki, wan osofamiri no e tron wan lanpe gewoon so. Ma efu wi e meki den famiribanti kon moro bun, dan wi e kon moro krosibei na makandra èn a libi e kon moro bun. Fu eksempre, te wi e meki muiti ala dei fu di wi e teki ten fu sori lobi nanga lespeki gi wi trowpatna, dan te fu kaba wi kan abi bun furu bun baka pisi.—Efeisesma 5:33.

Efu wi abi pikin, dan wi musu pruberi fu seti sani na wan yoisti fasi na ini na osofamiri so taki wi kan kweki den pikin bun. A e aksi furu fu wi te wi e teki ten fu de makandra nanga den, te wi e seti sani so taki den kan taki nanga wi ala ten èn te wi e gi rai di de na ini Bijbel. Ma a ten nanga den muiti disi kan gi wi bigi prisiri. Papa nanga mama di kweki pikin bun, e si pikin leki wan blesi, leki wan gudu di e kon fu Gado, di den musu sorgu bun.—Psalm 127:3.

Bun mati e meki taki wan sma abi prisiri èn so srefi taki a libi fu en abi moro waarde (Odo 27:9). Wi kan meki furu mati te wi e sori taki wi e firi gi trawan (1 Petrus 3:8). Trutru mati e yepi wi fu opo baka te wi fadon (Preikiman 4:9, 10). „Wan trutru mati . . . de wan brada di gebore fu yepi te nowtu de.”—Odo 17:17.

Tru mati kan meki taki wi e prisiri srefisrefi! Te yu de nanga wan mati, dan wan sondongo na wan moro moi sani, wan nyanyan na wan moro switi sani èn poku e gi moro prisiri. A no de fu taki, dati wan osofamiri pe sma abi wan bun banti nanga makandra èn so srefi mati di yu kan frutrow, na tu sani nomo di e meki taki a libi abi waarde. Sortu tra sani Gado seti so taki a libi fu yu kan abi moro waarde?

Sorgu Gi den Yeye Nowtu fu Wi

Soleki fa wi ben taki na fesi, dan Yesus Krestes ben taki dati koloku abi fu du nanga a sabi di wan sma sabi taki a abi wan yeye nowtu. Gado ben meki wi na so wan fasi taki wi man frustan yeye sani èn so srefi taki wi man sabi san bun èn san ogri. Fu dati ede, Bijbel e taki fu „a sma di abi yeye fasi” èn fu „a fasi fa wan sma de trutru na ini en ati”.—1 Korentesma 2:15; 1 Petrus 3:3, 4.

Akruderi An Expository Dictionary of New Testament Words, di W. E. Vine skrifi, dan na agersi ati na „a heri fasi fa wan sma e denki èn e firi, èn so srefi den ogri noso bun sani di wan sma e du”. Di a ben fruklari sani moro fara, dan Vine e taki: „Nanga tra wortu, den e gebroiki na ati na wan agersi fasi fu sori taki na dati e meki wan sma e bepaal fa a e denki trutru fu wan tori.” A srefi buku e taki tu, dati „na ati, di e didon dipidipi na ini wan sma, na . . . a trutru sma”.

Fa wi kan gi „a sma di abi yeye fasi” noso a „trutru sma”, dati wani taki „a fasi fa wan sma de trutru na ini en ati”, den sani di a abi fanowdu? Wi kan du wan prenspari sani te wi e sori taki wi e frustan san a psalm skrifiman ben taki di a ben singi: „Sabi taki Yehovah na Gado. Na en meki wi, èn a no wi meki wisrefi. Wi na en pipel èn den skapu fu en weigron” (Psalm 100:3). Te wi e erken disi, dan a e meki taki wi e kon frustan taki wi musu gi frantwortu na Gado. Efu wi wani de wan pisi fu „en pipel” èn wi wani de na mindri „den skapu fu en weigron”, dan wi musu du ala sani soleki fa Bijbel, a Wortu fu en e taki.

Dati na wan takru sani? Nôno, fu di te wi e frustan taki a fasi fa wi e tyari wisrefi prenspari gi Gado, dan dati e meki taki wi libi abi moro waarde. A e gi wi deki-ati fu de moro bun sma — trutru wan tumusi bun marki fu feti fu kisi. „Koloku fu a man di e frede Yehovah, di na ini den komando fu en a abi prisiri srefisrefi”, na so Psalm 112:1 e taki. A libi fu wi kan abi moro waarde te wi abi wan lespeki frede gi Gado èn so srefi te wi e gi yesi na den komando fu en nanga wi heri ati.

Fu san ede wi e firi bun te wi e gi yesi na Gado? Fu di wi abi wan konsensi, wan presenti di Gado gi ala sma. A konsensi na a sani di e ondrosuku efu den sani di wi du noso wani du, bun noso ogri. Wi alamala sabi o takru a de fu kisi konsensi fonfon. Ma a konsensi fu wi kan  prèise wi tu. Te wi e du sani gi Gado nanga kompe libisma sondro fu prakseri wisrefi nomo, dan wi e firi bun. Wi e kon si taki „moro koloku de ini a gi fu sani, leki ini a kisi fu sani” (Tori fu den Apostel 20:35). Wan prenspari reide de fu san ede disi e pasa.

Wi Mekiman meki wi na so wan fasi taki den sani di trawan wani nanga den sani di trawan abi fanowdu, abi krakti na wi tapu. Te wi e yepi trawan, dan dati e meki taki wi e prisiri na ini wi ati. Boiti dati, Bijbel e gi wi a dyaranti taki te wi e gi wan sma wan sani di a abi fanowdu, dan a de neleki wi du dati gi Gado.—Odo 19:17.

A e gi wi prisiri te wi e poti prakseri na den sani di wi abi fanowdu na yeye fasi. Ma dati kan yepi wi tu na ini na aladei libi? We, Raymond, wan bisnis man fu Mindri Owstusei e bribi taki dati kan. „Mi ben abi wán marki nomo, èn dati na fu meki moni”, na so a e taki. „Ma sensi a ten di mi ati ben kon erken taki wan Gado de èn taki Bijbel e taki fu den sani di a e aksi fu wi, dan mi kon tron wan tra sma. A meki fu moni, no de a moro prenspari sani na ini mi libi. Fu di mi e pruberi fu plisi Gado, meki mi no kisi a takru firi di bita-ati fasi e gi sma. Ala di mi papa dede fu wan trobi ede, toku mi no wani fu teki refensi tapu den sma di du dati.”

Soleki fa Raymond ben kon si, dan te wi e sorgu gi den sani di „a sma di abi yeyefasi” abi fanowdu, dan disi kan dresi den dipi firi fu pen. Ma a libi sa de wan prisiri sani gi wi, soso te wi e kakafutu gi den problema fu na aladei libi.

Wi Kan Abi „a Vrede fu Gado”

Fosi yu denki den dei e pasa na ini a grontapu disi pe sma no abi ten. Ongoloku e pasa, sani no e go soleki fa wi seti dati, èn sma e du sani di wi no ben fruwakti fu den. Den sani disi kan meki taki wi e lasi wi prisiri. Ma toku Bijbel e pramisi taki den wan di e dini Yehovah Gado sa firi bun trutru — den sa kisi „a vrede fu Gado”. Fa wi kan kisi a vrede disi?

Na apostel Paulus ben skrifi: „No broko unu ede nanga no wan sani, ma na ini ibriwan sani, meki Gado kon sabi san unu wani fu di unu e begi èn e aksi en tangitangi ala di unu e taigi en grantangi tu. Èn a vrede fu Gado, di pasa ala suma frustan, sa kibri un ati nanga un prakseri na ini Krestes Yesus” (Filipisma 4:6, 7) Na presi taki wi e pruberi fu tyari den problema fu wi, wi wawan, dan wi musu begi fayafaya, ala di wi e trowe den aladei broko-ede fu wi tapu Gado (Psalm 55:22). A bribi di wi abi taki a e arki den fayafaya begi fu wi di wi e seni nanga yepi fu en manpikin Yesus Krestes, sa kon moro bigi te wi e gro na yeye fasi èn e kon frustan fa Gado e yepi wi.—Yohanes 14:6, 14; 2 Tesalonikasma 1:3.

Wi musu meki a frutrow di wi e frutrow na ini Yehovah Gado, a „Yereman fu begi”, kon moro bigi. Dan fosi wi sa man fu kakafutu gi tesi, soleki wan siki di no man dresi, den problema fu na owrudei, noso te wi e sari trutru (Psalm 65:2). Fu kan abi moro waarde na ini a libi trutru, dan wi musu hori a ten di de na wi fesi na prakseri tu.

Prisiri Nanga a Howpu Di De na Wi Fesi

Bijbel e pramisi wi „nyun hemel nanga wan nyun grontapu”. Dati na wan regtfardiki hemel tiri di e tiri a libisma famiri di e gi yesi na Gado (2 Petrus 3:13). Na ini a nyun grontapu dati di Gado pramisi wi, dan vrede nanga regtfardikifasi sa teki presi gi orloku nanga onregtfardikifasi.  Disi a no wan winsi di e tan fu wan syatu pisi ten, ma na wan overtoigi di kan gro kon moro bigi ibri dei. A no de fu taki dati disi na bun nyunsu fu tru èn dati na wan sani di e meki sma prisiri trutru.—Romesma 12:12; Titus 1:2.

John, di wi ben kari na a bigin, e firi now taki a libi fu en abi moro waarde. „Ala di noiti mi no ben de wan fayafaya kerki sma, toku mi ben e bribi ala ten na ini Gado”, na so a e taki. „Ma mi no ben du no wan enkri sani nanga a bribi dati, te leki tu Kotoigi fu Yehovah ben kon na mi. Mi ben poti bun furu aksi gi den soleki: ’Fu san ede meki wi de na grontapu? San o pasa nanga wi na ini a ten di e kon?’ Mi ben feni den Bijbel piki di den ben gi bun. Fu a fosi leisi na ini mi libi, mi ben kon frustan fu san ede mi e libi. Ma dati a no ala ete. Safrisafri mi ben kon kisi wan angri fu waarheid, èn dati meki mi ben kenki ala den sani di fosi ben de prenspari gi mi. Srefi efu mi no gudu moro, toku a gersi taki mi na wan bigi guduman na yeye fasi.”

Kande neleki John furu yari langa yu no du notinoti na yeye fasi. Ma te yu e bigin kweki „wan ati fu koni”, dan yu kan bigin du wan sani na yeye fasi (Psalm 90:12). Te yu abi a fasti bosroiti fu du muiti, dan yu sa abi trutru prisiri, vrede nanga howpu (Romesma 15:13). Iya, dan a libi fu yu kan abi moro waarde.

[Prenki na tapu bladzijde 6]

Begi kan meki wi abi a „vrede fu Gado”

[Prenki na tapu bladzijde 7]

Yu sabi san kan gi sma moro prisiri na ini na osofamiri libi?