A Howpu Di Wi Abi fu Kisi wan Opobaka Abi Krakti
A Howpu Di Wi Abi fu Kisi wan Opobaka Abi Krakti
„Mi teki a lasi di mi lasi ala sani . . . so taki mi kan sabi [Yesus Krestes] èn a krakti fu en opobaka.”—FILIPISMA 3:8-10.
1, 2. (a) Fa wan kerki tiriman ben taki fu na opobaka, furu yari pasa? (b) Fa na opobaka sa pasa?
NA INI den yari syatu baka 1890, nyunsu na ini koranti ben taki wan sani fu wan tumusi aparti taki di wan kerki tiriman ben hori na ini Brooklyn, New York, Amerkankondre. A kerki tiriman ben taki dati na opobaka sa de a tyari kon na wan èn a kon na libi baka fu ala den bonyo di oiti ben de na ini wan libisma skin. Disi sa pasa awinsi a skin ben pori fu faya ede noso fu wan onkoloku ede, noso awinsi wan meti ben nyan en noso awinsi a ben kon tron mèst na ini a gron. A preikiman ben taki dati a ben bribi taki, tapu wan seiker dei fu 24 yuru, a loktu ben sa kon blaka nanga den anu, futu, finga, bonyo, titei, nanga skin fu milyunmilyun libisma di dede. Den pisi disi ben sa suku tra pisi fu a srefi skin. Baka dati, den sili ben sa kon fu hemel nanga hel fu kon libi baka na ini den skin disi di kisi wan opobaka.
2 Wan opobaka di sa pasa nanga yepi fu na orga di pikinpikin pisi fu wi skin di ben de fosi, sa orga baka, no de wan reidelek sani. Èn a no de so tu taki libisma abi wan sili di no man dede (Preikiman 9:5, 10; Esekièl 18:4). Yehovah, a Gado di e gi sma wan opobaka, no abi fu poti den pikinpikin pisi fu wi skin di ben de wan libisma skin fosi, na makandra. A kan meki nyun skin gi den wan di a e gi wan opobaka.Yehovah gi en Manpikin, Yesus Krestes, a makti fu opo den dedewan baka, nanga a fruwakti taki den sa man libi fu têgo (Yohanes 5:26). So bun, Yesus ben taki: „Mi na a opobaka nanga a libi. A sma di e poti bribi na mi, sa kon na libi, awinsi a dede” (Yohanes 11:25, 26). Dati na wan pramisi di e waran wi ati trutru! A e gi wi krakti fu horidoro na ondro tesi èn srefi te wi abi fu dede leki getrow Kotoigi fu Yehovah.
3. Fu san ede Paulus ben musu opo taki gi a bun fu na opobaka?
3 Na opobaka no e kruderi nanga na idea taki libisma abi wan sili di no man dede. Disi ben de wan fasi fa a Griki filosofiaman Plato ben denki. Na apostel Paulus ben gi kotoigi na prenspari Griki sma na tapu na Areopagus na ini Ateine. Ma san ben pasa di a ben sori go na Yesus èn ben taki dati Gado ben gi en wan opobaka? „We”, na so a tori e taki, „di den ben yere fu na opobaka fu den dedewan, son wan ben bigin spotu” (Tori fu den Apostel 17:29-34). Furu sma di ben si Yesus Krestes di ben kisi wan opobaka, ben de na libi ete. Èn ala di sma ben spotu den, toku den ben gi kotoigi taki Yesus ben opo baka fu dede. Ma falsi leriman di ben abi demakandra nanga a gemeente fu Korente, ben taki dati na opobaka no ben tru. Fu dati ede Paulus ben opo taki na wan krakti fasi gi a Kresten leri disi na ini 1 Korentesma kapitel 15. Te wi e ondrosuku finifini den sani di a ben taki, dan wi sa si taki wi no abi fu tweifri taki a howpu di wi abi fu kisi wan opobaka, de wan trutru sani èn a abi krakti.
Wan Krakti Buweisi Taki Yesus Ben Opo Baka
4. Sortu buweisi Paulus ben gi, taki ensrefi ben de kotoigi fu na opobaka fu Yesus?
4 Luku fa Paulus ben bigin fu opo taki gi a bun fu na opobaka (1 Korentesma 15:1-11). Den Korentesma ben sa hori steifi na a bun nyunsu fu frulusu, boiti te den ben tron bribiman sondro wan marki. Krestes dede gi den sondu fu wi, den ben beri en, èn a ben kisi wan opobaka. Fu taki en leti, dan Yesus, di kisi wan opobaka, ben sori ensrefi na Sefas (Petrus), „baka dati na den twarfu” (Yohanes 20:19-23). So wan 500 sma ben si en, kande di a ben gi a komando: „Go, meki disipel” (Mateus 28:19, 20). Yakobus ben si en, èn so srefi ala den getrow apostel (Tori fu den Apostel 1:6-11). Krosibei fu Damaskus, Yesus ben sori ensrefi na Saulus, di ben de „leki wan sma di gebore tumusi fruku” — neleki Yesus ben kisi wan opobaka kaba fu kisi libi leki wan yeye (Tori fu den Apostel 9:1-9). Den Korentesma ben tron bribiman fu di Paulus ben preiki gi den, èn den ben teki a bun nyunsu.
5. Fa Paulus ben rideneri, soleki fa dati skrifi na ini 1 Korentesma 15:12-19?
5 Luku fa Paulus e rideneri (1 Korentesma 15:12-19). Fu di sma de di ben si taki Krestes kisi wan opobaka èn den ben preiki fu dati tu, dan fa trawan kan taki dati wan opobaka no de? Efu Yesus no ben kisi wan opobaka fu dede, dan a preikiwroko fu wi nanga a bribi fu wi de fu soso. Dan wi na leiman tu di e kotoigi teige Gado fu di wi e taki dati a ben gi Krestes wan opobaka. Efu den dedewan no e kisi wan opobaka, dan „unu na ini un sondu ete”, èn den sma di dede ini wánfasi nanga Krestes, lasi gowe. Moro fara, „efu na ini a libi disi nomo wi howpu tapu Krestes, dan wi de a wan di de fu sari moro ala sma”.
6. (a) San Paulus ben taki fu sori taki na opobaka fu Yesus tru? (b) San na „a lasti feanti”, èn fa a sa kon tron noti?
6 Paulus e taki dati na opobaka fu Yesus tru (1 Korentesma 15:20-28). Fu di Krestes na „a fosi froktu” fu den wan di e sribi na ini dede, dan trawan ben o kisi wan opobaka tu. Neleki fa dede ben kon di a man Adam ben trangayesi, na so na opobaka e kon nanga yepi fu wan man — Yesus. Den wan di de fu en ben o kisi wan opobaka na ini en denoya. Krestes „e meki ala tiri nanga ala makti nanga ala krakti” di e gens a soevereiniteit fu Gado „kon tron noti”, èn a e tiri leki Kownu te leki Yehovah e poti ala feanti na ondro en futu. Srefi „a lasti feanti” — a dede di wi kisi fu Adam — sa kon tron noti nanga yepi fu na ofrandi fu Yesus. Baka dati Krestes sa gi a Kownukondre baka na en Gado èn Tata, èn a sa saka ensrefi na ondro „a Sma di ben saka ala sani na en ondro, so taki Gado kan de ala sani gi ibriwan sma”.
Dopu Gi den Dedewan?
7. Suma e „dopu nanga a marki fu de dedewan”, èn san disi wani taki gi den?
7 Sma di e taki dati na opobaka no tru, e yere na aksi disi: „San den wan di e dopu nanga a marki fu de dedewan sa du dan?” (1 Korentesma 15:29) Paulus no ben wani taki dati den sma di e libi ben musu teki dopu gi a bun fu den dedewan, bika ibriwan fu den disipel fu Yesus aparti ben musu teki leri, ben musu bribi, èn ben musu teki dopu (Mateus 28:19, 20; Tori fu den Apostel 2:41). Salfu Kresten e „dopu nanga a marki fu de dedewan” fu di den e gi densrefi abra na wan fasi fu libi di sa tyari dede kon, èn baka dati den sa kisi wan opobaka. A sortu dopu disi e bigin te a yeye fu Gado e meki den kisi a hemel howpu. A dopu e kaba te den e kisi wan opobaka fu dede. Den e kisi yeye libi na ini hemel pe den no man dede noiti moro.—Romesma 6:3-5; 8:16, 17; 1 Korentesma 6:14.
8. Fu sortu sani Kresten kan de seiker, srefi efu Satan nanga den futuboi fu en ben sa kiri den?
8 Soleki fa den wortu fu Paulus e sori, dan a howpu fu kisi wan opobaka e meki taki Kresten man kakafutu doronomo gi kefar nanga dede fu di den e du a Kownukondre preikiwroko (1 Korentesma 15:30, 31). Den sabi taki Yehovah man gi den wan opobaka, efu a e gi Satan nanga den futuboi fu en pasi fu kiri den. Soso Gado kan kiri den sili, noso a libi fu den, na ini Gehena, san wani taki têgo pori.—Lukas 12:5.
A Fanowdu fu De na Ai
9. Efu a howpu di wi abi fu kisi wan opobaka musu gi wi krakti na ini wi libi, dan sortu sani wi no musu du?
9 A howpu di Paulus ben abi fu kisi wan opobaka ben gi en krakti. Ala di a ben de na ini Efeise, den feanti fu en kande ben trowe en na ini na arena fu feti nanga werdri meti (1 Korentesma 15:32). Efu dati ben pasa, dan a ben kisi frulusu, neleki fa Danièl ben kisi frulusu fu den lew (Danièl 6:16-22; Hebrewsma 11:32, 33). Fu di a ben howpu fu kisi wan opobaka, meki Paulus no ben abi a fasi fu denki di den sma fu Yuda, di ben fadon komoto na bribi na ini den dei fu Yesaya, ben abi. Den ben taki: „Meki wi nyan èn dringi, bika ta-mara wi o dede” (Yesaya 22:13, Septuaginta). Efu a howpu di wi abi fu kisi wan opobaka musu gi wi krakti na ini wi libi, neleki fa a ben gi Paulus krakti, dan wi no musu abi demakandra nanga den wan di e denki na wan fasi di kan tyari pori kon. „No kori unsrefi”, Paulus ben warskow. „Takru kompe e pori bun gwenti” (1 Korentesma 15:33). A no de fu taki, dati a markitiki disi e fiti na ini furu fasi fu a libi.
10. Fa a howpu di wi abi fu kisi wan opobaka kan tan libilibi?
10 Paulus ben taigi den wan di no ben bribi na ini na opobaka: „Unu wiki èn kon de na ai na wan regtfardiki fasi èn no tan du sondu, bika son wan de sondro sabi fu Gado. Mi e taki fu buweigi unu fu firi syen” (1 Korentesma 15:34). Na ini a ’ten disi fu a kaba’, wi musu handri akruderi a soifri sabi fu Gado nanga Krestes (Danièl 12:4; Yohanes 17:3). Disi sa meki taki a howpu di wi abi fu kisi wan opobaka, sa tan libilibi.
Kisi wan Opobaka Nanga Sortu Skin?
11. Fa Paulus ben sori nanga wan eksempre fa den salfu Kresten sa opo baka?
11 Baka dati, Paulus ben piki wan tu spesrutu aksi (1 Korentesma 15:35-41). Kande nanga a marki fu meki sma tweifri na a opobaka, dan wan sma di e ondrosuku sani ben sa kan aksi: „Fa den dedewan e kisi wan opobaka? Iya, nanga sortu skin den e kon?” Soleki fa Paulus ben sori, dan wan siri di prani na ini a gron e dede, te yu e luku en bun, èn a e kenki fu kon tron wan yongu prani. Na a srefi fasi, wan sma di gebore nanga yeye, musu dede. Neleki fa wan prani e opo kon fu wan siri leki wan nyun skin, na so a skin fu a salfu Kresten di kisi wan opobaka, de tra fasi leki libisma skin. Ala di a de a srefi sma nanga den srefi eigifasi di a ben abi bifo a dede, toku a e kisi wan opobaka leki wan nyun mekisani di abi wan yeye skin di man libi na ini hemel. A no de fu taki, dati den wan di sa kisi wan opobaka fu libi na grontapu, sa opo nanga libisma skin.
12. San den wortu „skin fu hemel” nanga „skin fu grontapu” wani taki?
12 Soleki fa Paulus ben taki, dan a skin fu libisma de tra fasi leki a skin fu meti. Srefi difrenti sortu meti abi difrenti sortu skin (Genesis 1:20-25). Den „skin fu hemel” fu den yeye mekisani e difrenti na ini glori fu den „skin fu grontapu”. Difrenti de tu na ini a glori fu a son, munkenki, nanga den stari. Ma den salfu wan di kisi wan opobaka abi wan moro bigi glori srefi.
13. Akruderi 1 Korentesma 15:42-44, san e sai èn san e opo baka?
13 Baka di Paulus ben taki fu den difrenti di de, dan a ben taki moro fara: „Na so na opobaka fu den dedewan de tu” (1 Korentesma 15:42-44). A ben taki: „A e sai ini a fasi taki a kan pori, èn a e opo baka na wan fasi di no kan pori.” Kande Paulus e taki dyaso fu den salfuwan leki wan grupu. Te den dede, dan den sai na ini a fasi taki den kan pori. Ma a grupu disi e kisi wan opobaka na wan fasi di no kan pori, fri fu sondu. Ala di den salfuwan no e kisi grani fu grontapu, toku den e opo baka fu kisi libi na ini hemel èn den e tyari kon na krin nanga Krestes na ini glori (Tori fu den Apostel 5:41; Kolosesma 3:4). Te den salfuwan dede dan den e sai ini „wan libisma skin” èn den e opo baka na ini „wan yeye skin”. Fu di disi kan pasa nanga Kresten di gebore nanga yeye, meki wi kan de seiker taki trawan fu a libisma famiri kan opo baka fu kisi libi na grontapu.
14. Fa Paulus ben agersi Krestes nanga Adam?
14 Baka dati, Paulus ben agersi Krestes nanga Adam (1 Korentesma 15:45-49). Adam, a fosi man, „ben tron wan libi sili” (Genesis 2:7). „A lasti Adam” — Yesus — „ben tron wan yeye di e gi libi.” A ben gi en libi leki wan lusu-paiman, na a fosi presi gi den salfu bakaman fu en (Markus 10:45). Leki libisma, den e „tyari a prenki fu a wan di ben meki fu doti”. Ma te den e kisi wan opobaka, den e tron leki a lasti Adam. A no de fu taki, dati a srakti-ofrandi fu Yesus sa gi winimarki na ala libisma di e gi yesi, so srefi den wan di sa kisi wan opobaka fu libi na grontapu.—1 Yohanes 2:1, 2.
15. Fu san ede salfu Kresten no e kisi wan opobaka na ini a skin, èn fa den e kisi wan opobaka na ini a denoya fu Krestes?
15 Te salfu Kresten dede, dan den no e opo baka nanga libisma skin (1 Korentesma 15:50-53). Wan skin fu meti nanga brudu di kan pori no kan kisi libi pe a no man pori. A no man kisi libi na ini a hemel Kownukondre tu. Wan tu fu den salfuwan no sa abi fu sribi wan langa pisi ten na ini dede. Te den kaba a libi fu den na grontapu na wan getrow fasi, den ben sa „kenki, na ini wan momenti, nanga wan pingi fu na ai”. Den ben sa opo baka wantronso fu kisi yeye libi di no kan pori èn den sa kisi glori. Te fu kaba, a „trowmisi” fu Krestes na ini hemel sa de 144.000 sma.—Openbaring 14:1; 19:7-9; 21:9; 1 Tesalonikasma 4:15-17.
Den Wini Dede!
16. Soleki fa Paulus nanga tra profeiti fu fositen ben taki, san sa pasa nanga dede di wi kisi fu a sondari Adam?
16 Nanga furu prisiri Paulus ben meki bekènti taki Yehovah sa swari dede fu têgo (1 Korentesma 15:54-57). Te den sma di man pori èn di man dede kon kenki na so wan fasi taki den no man pori èn den no man dede moro, dan den wortu disi sa kon tru: „Den swari dede fu têgo.” „Dede, pe yu fektori de? Dede, pe yu maka de?” (Yesaya 25:8; Hosea 13:14) A maka di e meki taki dede e kon, na sondu. Èn a Wet ben de a krakti fu sondu, fu di a Wet ben krutu sondari taki den musu dede. Ma fu a srakti-ofrandi fu Yesus èn fu na opobaka fu en ede, meki dede di wi kisi fu Adam di ben sondu, no sa wini moro.—Romesma 5:12; 6:23.
17. Fa den wortu na ini 1 Korentesma 15:58 e fiti na ini a ten disi?
17 „Dati meki, mi lobi brada”, na so Paulus ben taki, „kon de kánkan, no beifi, abi ala ten furu fu du na ini a wroko fu Masra, fu di unu sabi taki a wroko fu unu no de fu soso ini a tori fu Masra” (1 Korentesma 15:58). Den wortu dati e fiti a salfu fikapisi na ini a ten disi èn den e fiti den „tra skapu” fu Yesus, srefi efu den dede na ini den lasti dei disi (Yohanes 10:16). A wroko di den e du leki Kownukondre preikiman no de fu soso, fu di wan opobaka e wakti den. So bun, leki futuboi fu Yehovah, meki wi tan abi furu fu du na ini a wroko fu Masra, ala di wi e wakti a dei te wi kan bari taki nanga prisiri: „Dede, pe yu fektori de?”
A Howpu Di Wi Abi fu Kisi wan Opobaka Kon Tru!
18. O tranga a howpu fu Paulus ben taki a ben o kisi wan opobaka?
18 Den wortu fu Paulus di skrifi na ini 1 Korentesma kapitel 15 e sori krin taki na opobaka howpu ben abi krakti na ini en libi. A ben de seiker srefisrefi taki Yesus ben opo baka fu dede èn taki tra sma ben o kon fri tu fu a grebi pe a heri libisma famiri e go. Yu abi so wan tranga overtoigi? Paulus ben si winimarki pe sma e denki densrefi nomo „leki wan ipi doti” èn a ben „teki a lasi di [a] lasi ala sani” so taki a ben man ’sabi Krestes èn a krakti fu en opobaka’. Na apostel ben wani dede na a srefi fasi leki Krestes, fu di a ben howpu fu kisi „a moro fruku opobaka”. Den e kari en so srefi „a fosi opobaka”, èn den 144.000 salfu bakaman fu Yesus e kisi disi. Iya, den e opo baka fu kisi libi leki wan yeye na ini hemel, ala di „den tra dedewan” sa kisi wan opobaka fu libi na grontapu.—Filipisma 3:8-11; Openbaring 7:4; 20:5, 6.
19, 20. (a) Sortu sma di Bijbel skrifi fu den, sa kisi wan opobaka fu libi na grontapu? (b) Suma yu ben sa wani si na ini na opobaka?
19 A howpu fu kisi wan opobaka kon tron wan tumusi moi sani di kon tru gi den salfuwan di de getrow te na dede (Romesma 8:18; 1 Tesalonikasma 4:15-18; Openbaring 2:10). Sma di e pasa „a bigi banawtu” libilibi sa si a howpu di den abi fu kisi wan opobaka kon tru na grontapu te „a se e gi den dedewan abra di ben de na en ini, èn dede nanga Hades e gi den dedewan abra di ben de na den ini” (Openbaring 7:9, 13, 14; 20:13). Na mindri den wan di sa kisi wan opobaka fu libi na grontapu sa de Yob, di ben pina fu di a lasi seibi manpikin nanga dri umapikin. Prakseri a prisiri di a sa abi te a e gi den wan switi kon baka. Èn prakseri tu a prisiri di den pikin sa abi taki den abi seibi tra brada nanga dri tra moi sisa!—Yob 1:1, 2, 18, 19; 42:12-15.
20 A sa de wan blesi trutru te Abraham nanga Sara, Isak nanga Rebeka — iya, èn someni trawan, so srefi „ala den profeiti” — e kisi wan opobaka fu libi na grontapu! (Lukas 13:28) Wan fu den profeiti dati ben de Danièl. Yehovah ben pramisi fu gi en wan opobaka na ondro a tiri fu a Mesias. Danièl rostu na ini a grebi so wan 2500 yari kaba, ma nanga a krakti fu na opobaka, heri esi a sa ’opo gi a porsi fu en’ leki wan fu den „granman na heri grontapu” (Danièl 12:13; Psalm 45:16). A sa de wan trutru prisiri sani fu gi den getrow sma fu owruten wan switi kon baka. No soso den getrow sma, ma so srefi yu eigi papa, mama, manpikin, umapikin, noso tra lobiwan di a feanti dede teki fu yu!
21. Fu san ede wi no musu draidrai fu du bun sani gi tra sma?
21 Wan tu fu den mati nanga lobiwan fu wi kande dini Gado someni tenti yari kaba, èn den kon owru. Fu di den kon owru, meki a de muilek gi den fu kakafutu gi den tyalensi fu a libi. A de wan lobi sani trutru fu gi den ala yepi di wi man gi den nownowde! Te wi e du dati, dan wi no sa abi fu firi sari taki wi no du san wi ben musu du gi den na a wan noso tra fasi, efu dede ben sa teki den (Preikiman 9:11; 12:1-7; 1 Timoteus 5:3, 8). Wi kan de seiker taki Yehovah no sa frigiti den bun sani di wi e du gi trawan, awinsi omeni yari den abi noso awinsi sortu situwâsi den de na ini. „So langa a ten bun gi wi ete”, na so Paulus ben skrifi, „meki wi du bun gi ala sma, ma spesrutu gi den wan di de na ini a srefi bribi leki wi.”—Galasiasma 6:10; Hebrewsma 6:10.
22. Te leki a howpu di wi abi fu kisi wan opobaka e kon tru, sortu fasti bosroiti wi musu abi?
22 Yehovah na „a Tata fu safu sari-atifasi èn a Gado fu ala trowstu” (2 Korentesma 1:3, 4). En Wortu e gi wi trowstu èn e yepi wi fu trowstu trawan nanga a opobaka howpu di abi furu krakti. Ala di wi e wakti a kontru fu a howpu dati pe den dedewan sa kisi wan opobaka fu libi na grontapu, meki wi de leki Paulus, di ben bribi na ini na opobaka. Meki wi waka spesrutu na Yesus baka, di ben howpu fu kisi wan opobaka nanga yepi fu a krakti fu Gado, èn en howpu ben kon tru. Den wan na ini den memregrebi heri esi sa yere a sten fu Krestes èn den sa kon na doro. Meki a de so taki disi e gi wi trutru trowstu nanga prisiri. Ma na tapu fu ala sani, meki wi taigi Yehovah tangi, di meki taki wi kan wini dede nanga yepi fu wi Masra Yesus Krestes!
San Yu E Piki?
• Sortu buweisi Paulus ben gi fu na opobaka fu Yesus, di ensrefi ben si tu?
• San na „a lasti feanti”, èn fa a sa kon tron noti?
• Na ini a kefal fu salfu Kresten, san e sai èn san e kisi wan opobaka?
• Sortu sma di Bijbel ben skrifi fu den, yu ben sa wani miti te den kisi wan opobaka fu libi na grontapu?
[Aksi fu a tori disi]
[Prenki na tapu bladzijde 16]
Na apostel Paulus ben opo taki na wan krakti fasi gi a bun fu na opobaka
[Prenki na tapu bladzijde 20]
Na opobaka fu Yob, fu na osofamiri fu en, èn fu furu tra sma, sa de wan sani di sa gi sma trutru prisiri!