A Howpu Di Wi Abi fu Kisi wan Opobaka De Seiker!
A Howpu Di Wi Abi fu Kisi wan Opobaka De Seiker!
„Mi poti mi howpu tapu Gado . . . taki wan opobaka o de.”—TORI FU DEN APOSTEL 24:15.
1. Fu san ede wi kan howpu taki wi o kisi wan opobaka?
YEHOVAH gi wi nofo buweisi fu san ede wi kan howpu fu kisi wan opobaka. Wi abi en wortu taki den dedewan sa opo baka èn taki den sa libi baka. Èn a prakseri fu en di abi fu du nanga den wan di e sribi na ini dede, seiker sa kon tru (Yesaya 55:11; Lukas 18:27). Fu taki en leti, Gado sori a makti fu en kaba fu wiki den dedewan.
2. Fa a howpu di wi abi fu kisi wan opobaka kan gi wi winimarki?
2 Te wi e bribi na ini a seti fu Gado fu wiki den dedewan nanga yepi fu en Manpikin, Yesus Krestes, dan a kan gi wi krakti te wi e kisi fu du nanga furu broko-ede. A howpu di wi abi fu kisi wan opobaka de wan seiker sani. A sabi di wi sabi disi kan yepi wi tu fu hori wi soifri retifasi na wi hemel Tata, srefi efu wi abi fu dede. A howpu di wi abi fu kisi wan opobaka sa kon moro tranga te wi e luku tori fu sma di kisi wan opobaka èn di Bijbel e taki fu den. Ala den wondru disi ben du nanga a krakti fu a Soeverein Masra Yehovah.
Den Ben Kisi den Dedewan fu Den Baka Nanga Yepi fu wan Opobaka
3. Sortu sani Elia ben man du di a manpikin fu wan weduwe fu Sarfat dede?
3 Na ini wan span luku baka fu a bribi di den kotoigi fu Yehovah ben sori di ben libi bifo a ten fu den Kresten, na apostel Paulus ben skrifi: „Uma ben kisi den dedewan fu den baka nanga yepi fu wan opobaka” (Hebrewsma 11:35; 12:1). Wan fu den uma disi ben de wan pôti weduwe fu a foto Sarfat, na ini Funisia. A ben sori taki a ben lobi fu teki Elia, a profeiti fu Gado, na ini en oso. Fu dati ede, na wan wondru fasi a blon nanga na oli fu en no ben kaba na ini wan angriten, di ben o kiri en nanga en manpikin. Di a pikin dede baka ten, Elia ben poti en na tapu wan bedi, a ben begi, a ben langa ensrefi na tapu a pikin dri leisi, èn a ben begi tranga: „O Yehovah, mi Gado, grantangi, meki a sili fu a pikin disi kon baka na en ini.” Gado ben meki a sili, noso a libi, kon baka trutru na ini a boi (1 Kownu 17:8-24). Prakseri a bigi prisiri di a weduwe ben abi di a bribi fu en ben kisi pai. A fosi sma di kisi wan opobaka èn di sma ben skrifi fu en, ben de en eigi lobi manpikin!
4. Sortu wondru Elisa ben du na ini Sunem?
4 Wan tra uma di ben kisi a dedewan fu en baka nanga yepi fu wan opobaka, ben libi na ini a foto Sunem. A ben de a wefi fu wan man di ben owru kaba, èn a ben sori switifasi na a profeiti Elisa nanga en futuboi. A ben kisi wan manpikin leki pai. Ma furu yari baka dati, a ben aksi a profeiti fu kon na en. Di a profeiti ben doro na a oso, a ben kon si taki a boi dede. Baka di Elisa ben begi èn a ben du wan tu sani, dan „safrisafri a skin fu a pikin ben kon waran”. A ben „bigin meki etsjei seibi tron, èn baka dati a boi ben opo en ai”. A de seiker taki na opobaka disi ben meki a mama nanga en manpikin prisiri srefisrefi (2 Kownu 4:8-37; 8:1-6). Ma den sa de moro koloku srefi te den e kon na libi baka na grontapu ini a „moro bun opobaka” — wan opobaka di e gi den na okasi fu no dede noiti moro! Disi na trutru wan sani fu taigi Yehovah tangi, a lobi-ati Gado fu opobaka!—Hebrewsma 11:35.
5. Fa Elisa ben abi fu du nanga wan wondru, srefi baka a dede fu en?
5 Srefi baka di Elisa dede èn ben beri kaba, Gado ben meki den bonyo fu en abi krakti, nanga yepi fu en santa yeye. Wi e leisi: „Di [wan tu Israèlsma] ben beri wan man, we, den ben si a grupu fufuruman [fu Moab] kon. Wantewante den trowe a man na ini a grebi fu Elisa èn den gowe. Di a [dede] man ben tuka nanga den bonyo fu Elisa, a kon na libi wantronso èn a ben opo tanapu na tapu en futu” (2 Kownu 13:20, 21). A man dati ben musu fruwondru èn a ben musu de koloku srefisrefi! Prakseri a prisiri di wi sa abi te den lobiwan fu wi e kon na libi baka, akruderi a prakseri fu Yehovah Gado di e kon tru ala ten!
A Manpikin fu Gado Ben Gi den Dedewan wan Opobaka
6. Sortu wondru Yesus ben du krosibei fu a foto Nain, èn fa a sani disi di pasa kan abi krakti na wi tapu?
6 A Manpikin fu Gado, Yesus Krestes, gi wi furu buweisi fu bribi taki den dedewan kan kisi wan opobaka, nanga a fruwakti taki den kan kisi têgo libi. Wan sani di ben pasa krosibei fu a foto Nain, kan yepi wi fu frustan taki so wan wondru kan pasa nanga yepi fu a krakti di Gado e gi. Na wan okasi, Yesus ben miti wan grupu sma di ben e sari, ala di den ben tyari a dedeskin fu wan yonkuman na dorosei fu a foto fu go beri en. A ben de a wan-enkri pikin fu wan weduwe. Yesus ben taigi en: „No krei moro.” Baka dati, a fasi a dragi èn a ben taki: „Yonkuman, mi e taigi yu: Opo tanapu!” Na a momenti dati, a ben opo èn a ben bigin taki (Lukas 7:11-15). A wondru disi trutru e tranga na overtoigi fu wi taki a howpu di wi abi fu kisi wan opobaka de wan trutru sani.
7. San ben pasa nanga na umapikin fu Ya-irus?
7 Luku a sani tu di ben pasa nanga Ya-irus, wan fesiman dinari fu a snoga na ini Kaperna-um. A ben aksi Yesus fu kon fu yepi en lobi umapikin di ben abi 12 yari, èn di ben de fu dede. Heri esi sma ben fruteri taki na umapikin dede. Yesus ben gi Ya-irus, di ben sari srefisrefi, deki-ati fu sori bribi èn a ben go nanga Ya-irus na en oso, pe wan ipi sma ben e krei. Den ben lafu di Yesus taigi den: „A yongu pikin no dede, ma a e sribi.” A ben dede trutru, ma Yesus ben o sori taki sma kan kisi wan opobaka, neleki fa yu kan wiki den fu wan dipi sribi. Ala di a teki na anu fu na umapikin, a taki: „Meisje, opo!” A opo wantewante, èn „en papa nanga mama ben breiti srefisrefi” (Markus 5:35-43; Lukas 8:49-56). Wi kan de seiker taki sma na ini na osofamiri sa „breiti srefisrefi” te den lobiwan fu den di dede, e kisi wan opobaka fu libi na tapu wan paradijs grontapu.
8. San Yesus ben du na a grebi fu Lasarus?
8 Lasarus ben dede fo dei kaba di Yesus go na a grebi fu en. A ben meki sma puru a ston di ben de na a mofo fu a grebi. Baka dati a ben begi na publiki, so taki den sma di ben de drape ben sa sabi taki a ben frutrow tapu a krakti di a ben kisi fu Gado. Dan Yesus ben taki nanga wan tranga sten: „Lasarus, kon na doro!” Èn a ben kon na doro trutru! En anu nanga futu ben tai ete nanga grebikrosi, èn en fesi ben tapu nanga wan duku. „Lusu en èn meki a go”, Yesus ben taki. Furu sma ben de drape fu trowstu Maria nanga Martha, den sisa fu Lasarus. Di den sma si a wondru disi, den ben poti bribi na ini Yesus (Yohanes 11:1-45). A tori disi no e gi yu howpu taki den lobiwan fu yu kan kisi wan opobaka na ini a nyun grontapu fu Gado?
9. Fu san ede wi kan de seiker taki Yesus kan gi den dedewan wan opobaka na ini a ten disi?
9 Di Yohanes a Dopuman ben de na ini dungru-oso, Yesus ben seni en a boskopu disi di ben gi Yohanes deki-ati: „Den breniwan e si baka, . . . èn den dedewan e kisi wan opobaka” (Mateus 11:4-6). Di Yesus ben de na grontapu, a ben gi den dedewan wan opobaka. Sensi a ben man du so na a ten dati, dan seiker a man du en tu leki wan makti yeye mekisani di kisi krakti fu Gado. Yesus na „a opobaka nanga a libi”. A e gi sma trowstu trutru te den kon sabi taki, na ini a ten di e kon, „ala sma di de na ini den memre-grebi, sa yere en sten èn sa kon na doro”.—Yohanes 5:28, 29; 11:25.
Tra Tori fu Sma Di Kisi wan Opobaka, E Meki a Howpu Di Wi Abi Kon Tranga
10. San yu ben sa taki fu a fosi opobaka di wan apostel ben du èn di sma skrifi fu en?
10 Di Yesus ben seni den apostel fu en go leki Kownukondre preikiman, a ben taki: „Opo den dedewan baka” (Mateus 10:5-8). A no de fu taki, efu den ben wani du disi, dan den ben abi fu frutrow tapu a krakti fu Gado. Na Yope na ini 36 G.T., na uma Dorkas (Tabita), di ben gi ensrefi na ini a dini fu Gado, dede. A ben du bun sani, soleki a meki fu krosi gi den weduwe di ben de ini nowtu. A dede fu en ben meki den weduwe disi krei srefisrefi. Den disipel ben sreka sani fu beri Dorkas, èn den ben aksi na apostel Petrus fu kon na den, kande fu trowstu den (Tori fu den Apostel 9:32-38). Petrus ben aksi ala sma fu gowe fu a kamra na sodro, a ben begi, èn a ben taki: „Tabita, opo!” Na uma opo en ai èn a ben go sidon. A teki na anu fu Petrus, èn Petrus ben yepi en fu opo tanapu. A fosi opobaka disi di wan apostel ben du èn di sma ben taki fu dati, ben meki taki furu sma kon kisi bribi (Tori fu den Apostel 9:39-42). A e gi wi moro reide tu fu bribi na ini na opobaka.
11. San ben de a lasti opobaka di skrifi na ini Bijbel?
11 A lasti opobaka di skrifi na ini Bijbel ben pasa na ini Troas. Di Paulus ben de na en di fu dri zending waka, a tan drape, èn a ben hori en publikitaki di ben go doro te na mindrineti. Wan yonkuman di ben nen Eutikus, ben weri kande. Noso a ben kan de so tu taki den furu oli-lampu ben faya tumusi èn taki a konmakandra presi ben furu tumusi nanga sma. Eutikus ben fadon na sribi èn a fadon komoto fu wan fensre fu a di fu dri sodro go na gron. „Di den ben opo en, a ben dede kaba.” A no ben de so taki a ben flaw nomo. Paulus ben trowe ensrefi na tapu Eutikus, a ben brasa en, èn a ben taigi den sma di ben e luku: „No krei moro, fu di en sili de na ini en.” Paulus ben wani taki, dati a yonkuman ben kon na libi baka. Den wan di ben de drape „ben kisi furu trowstu” (Tori fu den Apostel 20:7-12). Na ini a ten disi, den futuboi fu Gado e kisi furu trowstu fu di den sabi taki den kompe fu den di fosi ben de ini a diniwroko fu Gado, sa ondrofeni a kontru fu na opobaka howpu.
Na Opobaka—Sma Ben Abi a Howpu Disi wan Langa Pisi Ten Kaba
12. Sortu overtoigi Paulus ben sori di a ben de na fesi Feliks, Tiriman fu Rome?
12 Di Paulus ben de na krutu na fesi Feliks, Tiriman fu Rome, a ben gi kotoigi: „Mi e bribi ala den sani di skrifi na ini a Wet nanga den Profeiti, èn mi poti mi howpu na tapu Gado . . . taki wan opobaka o de fu den regtfardikiwan nanga den onregtfardikiwan” (Tori fu den Apostel 24:14, 15). Fa den pisi na ini a Wortu fu Gado, soleki „a Wet”, e sori go na a kisi di den dedewan sa kisi wan opobaka?
13. Fu san ede wi kan taki dati Gado ben sori go na a opobaka di a ben gi a fosi profeititori?
13 Gado srefi ben sori go na wan opobaka di a ben taki a fosi profeititori na ini Eden. Di a ben krutu „a fosi sneki”, Satan Didibri, dan Gado ben taki: „Mi sa poti feantifasi na mindri yu nanga na uma èn na mindri yu siri nanga en siri. A sa masi yu na a ede èn yu sa masi en na a bakafutu” (Openbaring 12:9; Genesis 3:14, 15). Taki den ben o masi a bakafutu fu a siri fu na uma, ben wani taki dati den ben o kiri Yesus. Efu a Siri dati ben sa musu masi na ede fu a sneki baka dati, dan Krestes ben sa musu kisi wan opobaka fu dede.
14. Fa wi kan taki, dati Yehovah „no de wan Gado fu den dedewan, ma fu den libiwan”?
14 Yesus ben meki bekènti: „Srefi Moses ben tyari kon na krin taki den dedewan e kisi wan opobaka, na ini a tori fu a brantimaka, di a e kari Yehovah ’a Gado fu Abraham èn a Gado fu Isak èn a Gado fu Yakob’. A no de wan Gado fu den dedewan, ma fu den libiwan, bika gi en, den alamala e libi” (Lukas 20:27, 37, 38; Exodus 3:6). Abraham, Isak, nanga Yakob dede kaba. Ma a prakseri di Gado ben abi fu gi den wan opobaka ben de so seiker taki gi Gado, a ben de neleki den ben de na libi.
15. Sortu bun buweisi Abraham ben abi fu bribi na ini na opobaka?
15 Abraham ben abi bun buweisi fu abi a howpu taki a ben o kisi wan opobaka. En nanga en wefi Sara ben owru srefisrefi èn den dede na a fasi disi, taki den no ben man meki pikin moro. Ma na wan wondru fasi Yehovah ben meki a krakti di den ben abi fu man meki pikin, kon nyun baka. Disi ben de neleki te wan sma e kisi wan opobaka (Genesis 18:9-11; 21:1-3; Hebrewsma 11:11, 12). Di a manpikin fu den, Isak, ben abi wan sani fu 25 yari, Gado ben taigi Abraham fu gi Isak leki wan srakti-ofrandi. Ma na a momenti di Abraham ben o kiri Isak, na engel fu Yehovah ben hori en anu. Abraham ben „hori na prakseri taki Gado ben man opo [Isak] baka na dede srefi, èn fu drape a kisi en tu na wan agersi fasi”.—Hebrewsma 11:17-19; Genesis 22:1-18.
16. Sortu sani Abraham, di e sribi now na ini dede, e wakti?
16 Abraham ben abi a howpu fu kisi wan opobaka na ondro a tiri fu a Mesias, a pramisi Siri. Di a Manpikin fu Gado ben de na hemel bifo a ben tron wan libisma, a ben si a bribi fu Abraham. Fu dati ede, di a ben de a man Yesus Krestes, a ben taigi den Dyu: „Abraham, unu tata, ben prisiri srefisrefi fu si mi dei” (Yohanes 8:56-58; Odo 8:30, 31). Abraham e sribi now na ini dede. A e wakti fu kisi wan opobaka fu kon na libi na grontapu, na ondro a Mesias Kownukondre fu Gado.—Hebrewsma 11:8-10, 13.
A Wet Nanga den Psalm E Gi Kotoigi
17. Fa den „sani di ben skrifi na ini a Wet” ben sori go na a opobaka fu Yesus Krestes?
17 A howpu fu Paulus taki a ben o kisi wan opobaka ben de akruderi den „sani di ben skrifi na ini a Wet”. Gado ben taigi den Israèlsma: „Unu musu tyari . . . wan bosu fu den fosi froktu fu a kotiwroko fu unu, go na a priester. Èn [tapu 16 Nisan] a musu wai a bosu go èn wai en kon na fesi Yehovah, so taki a kan feni unu bun” (Lefitikus 23:11). Kande nanga a wet disi na prakseri, Paulus ben skrifi: „Krestes opo baka na dede, a fosi froktu fu den wan di go sribi na ini dede.” Leki „a fosi froktu”, Yesus ben kisi wan opobaka tapu 16 Nisan, 33 G.T. Baka ten, na ini a ten fu en denoya, wan opobaka ben sa de fu ’froktu di ben kon baka dati’ — den bakaman fu en di salfu nanga santa yeye.—1 Korentesma 15:20-23; 2 Korentesma 1:21; 1 Yohanes 2:20, 27.
18. Fa Petrus ben sori taki den Psalm ben taki na fesi fu na opobaka fu Yesus?
18 Den Psalm e horibaka gi na opobaka tu. Na a dei fu a Pinksterfesa na ini 33 G.T., na apostel Petrus ben teki wortu fu Psalm 16:8-11, èn a ben taki: „David e taki fu [Krestes]: ’Ala ten Yehovah ben de na mi fesi; bika a de na mi reti-anusei, so taki noiti mi ben sa degedege. Fu dati ede mi ati ben prisiri èn mi tongo ben breiti srefisrefi. Moro fara, mi skin srefi sa rostu na ini howpu; bika yu no sa libi mi sili na ini Hades, èn yu no sa gi pasi taki a sma di de loyaal na yu, e si pori.’” Petrus ben go doro: „[David] ben si na fesi èn a ben taki fu na opobaka fu Krestes, taki Gado no ben libi en sili na ini Hades èn taki en skin no ben kisi pori.” Gado ben gi a Yesus disi wan opobaka.—Tori fu den Apostel 2:25-32.
19, 20. O ten Petrus ben teki wortu fu Psalm 118:22, èn fa disi ben abi fu du nanga a dede èn nanga na opobaka fu Yesus?
19 Wan tu dei baka dati, Petrus ben tanapu na fesi a Sanhedrin èn agen a ben teki wortu fu den Psalm. Di den aksi en fa a ben meki wan begiman di ben de lan, kon betre, na apostel ben taki: „Meki un alamala sabi èn ala den sma fu Israèl, taki na ini a nen fu Yesus Krestes, a Nasarètsma, di unu ben spikri na wan postu, ma di Gado ben opo baka na dede, taki nanga yepi fu en a man disi e tanapu dyaso gosontu na un fesi. Disi [Yesus] na ’a ston di unu bowman ben handri nanga en leki a de noti èn di kon tron na ede fu na uku’. Boiti dati, no wan tra sma de di kan gi frulusu, bika no wan tra nen de na ondro hemel di gi na mindri libisma, èn di musu gi wi frulusu.”—Tori fu den Apostel 4:10-12.
20 Dyaso Petrus ben teki wortu fu Psalm 118:22. A ben fiti den sani di a tekst disi e taki, na Yesus en dede èn na a opobaka fu en. Fu di den kerki fesiman fu den ben sutu faya gi den, meki den Dyu ben weigri fu teki Yesus (Yohanes 19:14-18; Tori fu den Apostel 3:14, 15). A teki di ’den bowman no ben wani teki a ston’, ben abi leki bakapisi taki Krestes dede, ma taki ’a ston ben tron na ede fu na uku’ wani taki dati Yesus ben kisi wan opobaka leki wan glori yeye mekisani na ini hemel. Soleki fa a psalm skrifiman ben taki na fesi, dan „na Yehovah srefi meki a sani disi pasa” (Psalm 118:23). A meki di Yehovah ben meki „a ston” kon tron na Ede fu na uku, ben wani taki dati a ben hei en leki a Sma di a poti na wroko leki Kownu.—Efeisesma 1:19, 20.
Kisi Krakti fu a Howpu Di Wi Abi fu Kisi wan Opobaka
21, 22. Fu sortu howpu Yob ben taki, soleki fa a skrifi na ini Yob 14:13-15, èn fa disi kan gi trowstu na ini a ten disi na den wan di lasi wan sma na ini dede?
21 Ala di wisrefi noiti si taki wan sma opo baka fu dede, toku wi si wan tu tori fu Bijbel di e gi wi a seikerfasi taki na opobaka de wan trutru sani. Fu dati ede, wi kan abi a srefi howpu di na opregti man Yob ben taki fu en. Di a ben pina, a ben begi: „O, taki yu [Yehovah] ben sa kibri mi na ini Syeol, . . . taki yu ben o poti wan ten gi mi èn ben sa memre mi! Efu wan man di gosontu èn tranga na skin fasi dede, a kan libi baka? . . . Yu sa kari, èn misrefi sa piki yu. Yu sa angri fu a wroko fu yu anu” (Yob 14:13-15). Gado sa ’angri fu a wroko fu en anu’, fu di a wani srefisrefi fu gi Yob wan opobaka. Dati e gi wi howpu trutru!
22 Wan sma na ini na osofamiri, di abi frede gi Gado, kan kon siki seryusu, neleki fa Yob ben kon siki. Kande a feanti dede kan kisi en srefi. Den wan di lasi a sma na ini dede, kan krei fu sari ede, neleki fa Yesus ben krei fu a dede fu Lasarus (Yohanes 11:35). Ma a de wan trowstu trutru taki Gado sa kari den wan di de na ini a prakseri fu en, èn den sa piki en! A sa de neleki den kon baka fu wan reis — den no sa siki noso de malengri moro, ma den sa de gosontu.
23. Fa son sma sori taki den e frutrow na ini na opobaka howpu?
23 A dede fu wan getrow owru Kresten ben buweigi kompe-bribiman fu skrifi: „Grantangi, wi wani taki yu musu sabi taki wi e prakseri yu, fu di yu lasi yu mama. A sa de wan syatu pisi ten nomo te leki wi sa bari en wan switi kon — a sa kon de moi èn libilibi!” Wan papa nanga wan mama di lasi a manpikin fu den ben taki: „Wi e luku go na a dei te Jason sa opo baka trutru! A sa luku lontu en èn a sa si a paradijs di a ben wani kisi srefisrefi. . . . Fa disi e buweigi na ati fu den wan fu wi di ben lobi en, fu de drape tu.” Iya, èn wi kan de nanga tangi taki na opobaka howpu de wan seiker sani!
San Yu E Piki?
• Fa wi kan kisi winimarki efu wi e bribi na ini a seti fu Gado, fu gi den dedewan wan opobaka?
• Sortu sani di pasa èn di skrifi na ini den Buku fu Bijbel, e sori wi krin fu san ede wi kan howpu fu kisi wan opobaka?
• Fu san ede wi kan taki dati na opobaka na wan howpu di sma ben abi wan langa pisi ten kaba?
• Sortu howpu di abi fu du nanga den dedewan, kan gi wi krakti?
[Aksi fu a tori disi]
[Prenki na tapu bladzijde 10]
Nanga a krakti fu Yehovah, Elia ben meki a yongu manpikin fu wan weduwe kon na libi baka
[Prenki na tapu bladzijde 12]
Di Yesus ben gi na umapikin fu Ya-irus wan opobaka, dan a papa nanga mama fu en ben breiti srefisrefi
[Prenki na tapu bladzijde 15]
Tapu a dei fu a Pinksterfesa na ini 33 G.T., na apostel Petrus ben gi kotoigi sondro frede taki Yesus ben kisi wan opobaka fu dede