Frufolgu E Meki Taki a Wroko E Gro na ini Antiokia

BAKA di sma ben kiri Stefanus fu en bribi ede, frufolgu ben kon moro hebi. Furu fu den disipel fu Yesus ben lowe gowe fu Yerusalem. Wan fu den presi pe den ben go fu kisi kibri ben de Antiokia, Siria, di ben de so wan 550 kilometer na noordsei fu Yerusalem (Tori fu den Apostel 11:19). Den sani di pasa drape leki bakapisi fu dati, ben sa abi krakti tapu a heri historia fu den Kresten. Fu frustan san pasa, dan a sa bun fu kon sabi wan tu sani fu Antiokia.

Te wi e taki fu den foto di ben de na ondro a tiri fu a Gran Kownukondre Rome, dan soso Rome nanga Aleksandria ben bigi moro leki Antiokia. Den ben go moro na fesi èn ben de moro prenspari leki Antiokia. A mamafoto disi fu Siria ben tiri a noord-owstusei pisi fu a Mindrikondre Se. Antiokia (di de now Antakya, Torkukondre) ben de na a Orontesliba, di dipi èn bradi nofo so taki sipi ben kan waka go na tapu. Na Orontesliba ben meki taki sma ben man doro Antiokia fu a lanpresi Seleusia Pieria. Disi ben de 32 kilometer fu Antiokia. Antiokia ben e basi a moro prenspari pasi fu pe sma ben du bisnis. A ben tai Rome nanga a Lagipresi fu a Tigrisliba nanga na Eufraatliba. Antiokia ben de a moro prenspari presi pe sma ben e bai noso seri sani, èn a ben du bisnis nanga a heri gran kownukondre. Drape ala sortu sma ben go-kon fu du difrenti sortu wroko. Den sma disi ben tyari nyunsu kon fu kerki organisâsi di ben panya na ala sei na ini a libisma libimakandra di ben de na ondro a tiri fu Rome na a ten dati.

A Griki bribi nanga filosofia ben gro kon furu na ini Antiokia. Ma „na ini a ten fu Krestes”, na so a historia skrifiman Glanville Downey e taki, „den owruten Griki bribi nanga filosofia ben kenki kon tron sani di ibriwan sma aparti ben bribi, fu di ibri sma srefi ben suku fu feni lusu na ini kerki bribi, gi den eigi problema èn gi den sani di den ben wani doro” (A History of Antioch in Syria ). Furu sma ben feni satisfaksi na ini a leri fu a Dyu bribi taki wán Gado nomo de. Den ben feni satisfaksi so srefi tu na ini den seremonia fu a Dyu bribi, èn na ini den sani di den Dyu ben bribi di abi fu du nanga bun gwenti nanga gronprakseri.

Wan bigi Dyu libimakandra ben de na ini Antiokia sensi a foto ben seti na ini 300 b.G.T. Sma teri taki so wan 20.000 te nanga 60.000 Dyu ben de drape, èn dati de moro leki 10 procent fu ala sma di ben libi drape. A historia skrifiman Josephus e taki dati a lin fu kownu fu Seleikos ben gi den Dyu deki-ati fu go libi na ini a foto, èn den ben kisi ala den reti di wan borgu fu a foto ben kisi. Na a ten dati, den Hebrew Buku fu Bijbel ben de fu kisi na ini Grikitongo. Disi ben de wan yepi gi den sma di ben wani horibaka gi a bribi fu den Dyu di ben fruwakti a Mesias. Fu dati ede, den Dyu ben meki furu proselietsma fu den Grikisma. Ala den sani disi ben meki taki Antiokia ben de wan bun kontren fu meki Kresten disipel.

 Gi Kotoigi na den Heiden

Moro furu fu den bakaman fu Yesus di ben kisi frufolgu èn di ben panya fu Yerusalem go na ala sei, ben prati a bribi fu den nanga Dyu nomo. Ma na ini Antiokia, son disipel fu Siprus nanga Sirene ben taki nanga „sma di ben taki Grikitongo” (Tori fu den Apostel 11:20). Ala di den ben preiki kaba gi Dyu di ben e taki Grikitongo èn gi proselietsma sensi a Pinksterfesa fu 33 G.T., toku a sori leki a preikiwroko na ini Antiokia ben de wan nyun sani. A no ben de gi den Dyu wawan. A tru taki a Heiden man Kornelius nanga en osofamiri ben tron disipel kaba. Ma a ben de fanowdu taki Yehovah ben gi Petrus wan fisyun fu overtoigi en taki a ben de wan yoisti sani fu preiki gi den Heiden, noso den sma fu den nâsi.—Tori fu den Apostel 10:1-48.

Na ini wan foto pe wan bigi Dyu libimakandra ben de furu yari kaba èn pe yu no ben abi bigi feantifasi na mindri den Dyu nanga den Heiden, dan sma di no ben de Dyu ben kisi fu yere a bun nyunsu. Èn den ben du wan sani di den yere a bun nyunsu disi. Te yu luku en bun, dan Antiokia ben abi a yoisti situwâsi fu a bun nyunsu ben kan gro, èn ’furu sma ben tron bribiman’ (Tori fu den Apostel 11:21). Èn di proselietsma di fosi ben anbegi heiden gado, ben tron Kresten, dan den ben de srekasreka fu man preiki gi tra Heiden di ben e anbegi heiden gado ete.

Di a gemeente na ini Yerusalem ben yere fa sani ben go na ini Antiokia, dan den seni Barnabas go drape fu luku fa sani ben waka. A bosroiti dati ben de wan koni sani èn a ben sori taki den ben abi lobi. Barnabas ben de wan man fu Siprus, neleki son wan di ben bigin preiki gi sma di no ben de Dyu. Barnabas ben sa firi ensrefi bun na mindri den Heiden fu Antiokia. Den Heiden fu den sei, ben si Barnabas leki wan memre fu wan libimakandra di den ben sabi kaba. * A ben kan frustan a wroko di den ben du. So bun, „di a ben doro drape èn a ben si a no-frudini bun-ati fu Gado, dan a ben prisiri èn a ben bigin gi den alamala deki-ati fu tan na Masra èn fu meki a sani dati de a prakseri fu den ati;” èn „wan bigi ipi ben kon bribi na ini Masra tu”.—Tori fu den Apostel 11:22-24.

Historia skrifiman Downey e sori: „Bun reide ben de fu san ede a fosi diniwroko na ini Antiokia ben abi bun bakapisi. Na ini a foto disi den zendeling no ben abi fu frede den fanatiek Dyu, di den ben miti na ini Yerusalem. A de so tu taki wan srudati komandanti ben tiri a foto di ben de a mamafoto fu Siria. Fu dati ede, sani ben orga moro bun na ini a foto disi èn yu no ben abi grupu sma di ben suku fu du ogri nanga tranga. Ma disi ben pasa na ini Yerusalem, pe a gersi leki (na a ten disi) den tiriman fu Yudea no ben man hori den fanatiek Dyu.”

Nanga den bun situwâsi disi èn nanga someni sani di a ben musu du, Barnabas ben kon frustan kande taki a ben abi yepi fanowdu. A ben prakseri en mati Saulus. Fu san ede a ben prakseri Saulus, noso Paulus? A ben de so kande fu di Paulus ben tron wan apostel fu den nâsi, ala di a no ben de wan fu den 12 apostel (Tori fu den Apostel 9:15, 27; Romesma 1:5; Openbaring 21:14). Fu dati ede Paulus ben de wan sma di a ben man gebroiki bun leki kompe fu prati a bun nyunsu na ini a Heiden foto Antiokia (Galasiasma 1:16). So bun, Barnabas ben go na Tarsis èn ben feni Saulus, èn a ben tyari en go na Antiokia.—Tori fu den Apostel 11:25, 26; luku a boksu tapu bladzijde 26, 27.

Nanga a Tiri fu Gado Den Ben Kisi a Nen Kresten

Wan heri yari langa, Barnabas nanga Saulus „ben gi leri na wan bigi ipi, èn a ben de na Antiokia fu a fosi leisi, taki nanga a tiri fu Gado den ben kari den disipel Kresten”. A de seiker taki den Dyu no ben de den fosiwan fu kari den bakaman fu Yesus, Kresten (Grikitongo) noso Sma di e Waka Baka a Mesias (Hebrewtongo). Den Dyu ben weigri fu teki a Mesias, noso Krestes. Fu dati ede den no ben o kari den bakaman fu Yesus, Kresten, bika nanga dati den ben sa erken taki Yesus na a Mesias. Son sma denki taki a heiden libimakandra kande ben gi den a nen Kresten, kande fu dreigi den noso fu spotu den. Ma Bijbel e sori taki a nen Kresten ben de wan nen di den ben kisi fu Gado.—Tori fu den Apostel 11:26.

 Na ini den Kresten Griki Buku fu Bijbel, a werkwortu di gebroiki makandra nanga a nyun nen, moro furu e vertaal leki „ben kari”. Ala ten disi abi fu du nanga wan sani di hei moro leki libisma; wan santa sani, noso wan sani di e kon fu Gado. So bun, sabiman e vertaal en nanga „fu taki wan santa sani”, „wan dipi sani fu Gado”, noso „fu gi wan komando di e kon fu Gado, fu gi leri fu hemel”. Fu di den ben kari den bakaman fu Yesus, Kresten „nanga a tiri fu Gado”, dan a kan taki Yehovah ben tiri Saulus nanga Barnabas fu gi den a nen.

Den ben tan gebroiki a nyun nen disi. Sma no ben kan denki moro taki den disipel fu Yesus ben de wan sekte fu a Dyu bribi. Den ben de heri tra fasi leki dati. Na wan sani fu 58 G.T., den tiriman fu Rome ben sabi heri bun sortu sma den Kresten ben de (Tori fu den Apostel 26:28). Soleki fa a historia skrifiman Tacitus ben taki, dan na ini 64 G.T., bun furu sma na ini Rome ben gebroiki a nen tu.

Yehovah E Gebroiki den Getrow Sma fu En

A bun nyunsu ben go na fesi na wan heri bun fasi na ini Antiokia. Nanga a blesi fu Yehovah èn nanga a fasti bosroiti di den bakaman fu Yesus ben abi fu go doro fu preiki, dan Antiokia ben tron a moro prenspari presi gi a fosi yarihondro Krestendom. Gado ben gebroiki a gemeente di ben de drape leki wan presi fu pe den ben bigin prati a bun nyunsu na farawe kondre. Fu eksempre, Antiokia ben de a presi fu pe na apostel Paulus ben bigin nanga ibriwan fu den zending waka fu en fu opo nyun kontren gi a preikiwroko.

A srefi sani e pasa na ini a ten disi. A faya nanga a fasti bosroiti di sma abi ala di gens de, e meki taki a tru Krestendom man gro. Disi e meki taki furu sma kan yere a bun nyunsu èn kan sori taki den e warderi en. * So bun, efu yu kisi fu du nanga gens fu di yu e horibaka gi a tru anbegi, dan hori na prakseri taki Yehovah sabi fu san ede a e gi pasi meki gens de. Neleki fa a ben de na ini a fosi yarihondro, sma na ini a ten disi musu kisi na okasi fu yere fu a Kownukondre fu Gado èn fu teki sei fu a Kownukondre dati. A fasti bosroiti di yu abi fu go doro fu dini Yehovah na wan getrow fasi, kan de yoisti a sani di de fanowdu fu yepi wan sma fu kon kisi wan soifri sabi fu waarheid.

[Futuwortu]

[Faki na tapu bladzijde 26, 27]

„Den Yari” fu Saulus „Di Sma No Sabi Noti fu Den”

A LASTI leisi di den e taki fu Saulus na ini a buku Tori fu den Apostel, bifo a ben froisi go na Antiokia wan sani fu 45 b.G.T., na di den ben meki wan takru plan fu kiri en na ini Yerusalem èn tra bribiman ben seni en go na Tarsis (Tori fu den Apostel 9:28-30; 11:25). Ma dati ben de neigi yari na fesi, na wan sani fu 36 b.G.T. San a ben du na ini a pisi ten dati — wan pisi ten di den e kari den yari fu Saulus di sma no sabi noti fu den?

Komoto na Yerusalem, Saulus ben go na den kontren fu Siria nanga Silisia, èn den gemeente fu Yudea ben yere: „A man di ben frufolgu wi fosi, e meki a bun nyunsu bekènti now fu a bribi di a ben pori fosi” (Galasiasma 1:21-23). A sani dati ben kan sori go na a wroko fu en nanga en kompe Barnabas na ini Antiokia, ma srefi bifo a ten dati, dan a de seiker taki Saulus no ben de sondro taki a ben abi wan wroko fu du. Na ini 49 G.T., wan tu gemeente ben de na ini Siria nanga Silisia. Wan fu den ben de na ini Antiokia, ma son sma denki taki tra gemeente ben kon fu a wroko di Saulus ben du na ini a pisi ten, di den e kari den yari di sma no sabi noti fu den.—Tori fu den Apostel 11:26; 15:23, 41.

Son sabiman e bribi taki span sani na ini a libi fu Saulus pasa na ini a srefi pisi ten disi. Efu a ben de tra fasi, dan wi no sa man poti den furu problema di Saulus ben kisi leki wan „dinari fu Krestes” na ini no wan tra pisi ten na ini en diniwroko (2 Korentesma 11:23-27). O ten den Dyu ben gi Saulus fonfon feifi leisi, pe den ben naki en 39 leisi? Pe den ben naki en dri tron nanga tiki? Pe a ben de ’furu leisi’ na ini dungru-oso? A poti di den ben poti en na ini dungru-oso na Rome, ben kon baka ten. Wi abi wan tori di e fruteri wi fu wan tron di den ben fon en èn ben poti en na ini dungru-oso – na ini Filipi. Ma fa a de nanga ala den tra okasi di den ben  fon en èn ben poti en na ini dungru-oso? (Tori fu den Apostel 16:22, 23) Wan skrifiman e taki dati na ini a pisi ten disi, Saulus ben „gi kotoigi fu Krestes na ini den snoga fu den Dyu na ini a Diaspora. A ben du disi na so wan fasi, taki a tyari frufolgu kon na en tapu fu den kerki tiriman èn so srefi fu lanti tiriman”.

Saulus ben ondrofeni brokosipi fo leisi, ma den Buku fu Bijbel e fruteri wi fu soso wan fu den leisi disi. A ben pasa baka di a kari den problema fu en di a ben skrifi go na den Korentesma (Tori fu den Apostel 27:27-44). So bun, den tra dri leisi di a ben ondrofeni brokosipi, kande pasa nanga en na den reis fu en di wi no sabi noti fu dati. Iniwan fu den sani disi, noso srefi ala den sani disi, kande pasa na ini „den yari di sma no sabi noti fu den”.

Wan tra sani di a gersi leki a ben pasa na ini a pisi ten disi, de fu feni na 2 Korentesma 12:2-5. Saulus ben taki: ’Mi sabi wan man ini wánfasi nanga Krestes di, tin-na-fo yari pasa kaba ben tyari go na a di fu dri hemel, na ini paradijs, èn a ben yere wortu di wan sma no ben man taki èn di wan sma no mag taki’ (2 Korentesma 12:2-5). Soleki fa a sori, dan Saulus ben taki fu ensrefi. Fu di a ben skrifi disi na ini 55 G.T., dan 14 yari na fesi ben sa tyari wi na ini 41 G.T., na a mindri pisi fu den „yari di sma no sabi noti fu den”.

A no de fu taki, a fisyun dati ben gi Saulus spesrutu koni fu man si sani krin. A ben de wan sani fu sreka en fu de „wan apostel fu den nâsi”? (Romesma 11:13) A ben abi krakti tapu a fasi fa a ben denki, skrifi èn taki baka ten? Den yari di ben de na mindri a drai di Saulus ben drai en libi èn a kari di a ben kisi fu go na Antiokia, ben de fu leri en èn fu meki en kon moro lepi so taki a ben kan teki frantwortu baka ten? Awansi sortu piki den aksi disi abi, wi kan de seiker taki, di Barnabas ben kari Saulus fu yepi en meki a preikiwroko na ini Antiokia go moro esi, dan Saulus di ben abi faya ben de srekasreka fu du a wroko dati.—Tori fu den Apostel 11:19-26.

[Karta na tapu bladzijde 25]

(Efu yu wani si pe den sani disi skrifi, luku a tijdschrift)

SIRIA

Orontes

Antiokia

Seleusia

SIPRUS

MINDRIKONDRE SE

Yerusalem

[Sma di abi a reti fu a karta]

Mountain High Maps® Copyright © 1997 Digital Wisdom, Inc.

[Prenki na tapu bladzijde 24]

Tapusei: Antiokia na ini a ten disi

Mindrisei: Seleusia, te yu e luku en fu a zuidsei

Na ondrosei: A skotu na a lanpresi fu Seleusia