Yu Libi Kan Abi Moro Waarde?

NA WAN tru sani taki a no ala ten wan dokumenti warti leki san skrifi na en tapu. Tapu a moro warti papira-moni di ben druk na ini Amerkankondre, sma skrifi taki a warti 10.000 Amerkan dala. Ma toku, a papira srefi di den gebroiki fu druk a moni disi, warti wan tu sensi nomo.

Oiti yu aksi yusrefi efu pisi papira nomo, di no warti so furu, kan meki yu libi abi moro waarde? Furu sma e denki taki dati kan. Milyunmilyun sma e wroko dei nanga neti, so taki den kan frudini someni moni leki den man. Sontron a muiti di den e du fu feni moni, e meki taki den no abi ten moro fu luku a gosontu fu den. Den no abi ten tu gi mati èn srefi gi den osofamiri fu den. Sortu bun dati e tyari kon? A kan taki moni — noso den sani di wi e bai nanga en — e gi wi trutru prisiri di e tan?

A de neleki fa ondrosukuman e taki, dati o moro wi e meki muiti fu suku prisiri nanga yepi fu den gudu di wi abi, o moro pikin a tyans de taki wi kan feni a prisiri dati. A nyunsuman Alfie Kohn e taki dati „prisiri a no wan sani di yu kan bai. . . . Sma di e feni taki gudu na wan prenspari sani na ini a libi, furutron abi tumusi furu broko-ede èn den e  lasi-ati tu. Furutron sani no e go bun na ini a libi fu so wan sma.”—International Herald Tribune.

Ala di ondrosukuman kon frustan kande taki wan libi di abi moro waarde e aksi wan tra sani boiti moni nomo, toku furu sma e denki tra fasi. Disi na wan sani di pikinmoro no e fruwondru sma bika ibri dei den wan di e libi na ini den gudu kondre, e kisi so wan 3000 boskopu di e gi den sma deki-ati fu bai sani. Efu den e meki reklame gi oto noso gi sukrusani, a boskopu di den wani gi, na disi: ’Te yu bai a sani disi, dan yu sa de moro koloku.’

San e pasa fu di sma e tan gi trawan deki-ati doronomo fu abi materia gudu? We, sma e poti yeye gronprakseri moro furu na wan sei! Akruderi wan raportu na ini a tijdschrift Newsweek, dan wan edeman fu den beskopu fu Keulen, na Doisrikondre, ben fruklari no so langa pasa taki „na ini wi libimakandra, sma no e taki so furu moro fu Gado”.

Kande yu gi ala yu krakti fu seti wan libi. Kande yu e firi taki yu no abi furu ten fu du iniwan tra sani. Ma toku, kande wanwan leisi yu e firi taki a libi abi moro sani na ini leki fu tan du a srefi fruferi wroko nomo ala ten baka, teleki yu no man moro fu di a gosontu fu yu kon takru noso fu di yu kon owru.

Te yu poti moro prakseri na yeye afersi, dan dati kan gi yu moro prisiri? San kan meki yu libi abi moro waarde?