Kownukondre Preikiman E Fruteri

Den Wan Di Lobi Yehovah De Warti gi En

SENSI Bijbel ten libisma sabi Libanon leki wan presi di abi furu gudu (Psalm 72:16; Yesaya 60:13). Den sani di ben abi spesrutu waarde ben de den bun bigi sedre di furu sma ben wani fu gebroiki gi bow wroko, fu di den moi, den e smeri switi, èn a udu fu den no e pori esi. Na ini a fosi yarihondro, wan moro warti sani ben komopo fu Libanon. Na Evangelie fu Markus e taki dati fu Tirus nanga Sidon, di de na ini a kontren fu owruten Libanon, „wan bigi ipi sma ben kon na [Yesus] di den ben yere fu den furu sani di a ben du”.—Markus 3:8.

Na a srefi fasi na ini a ten disi, Libanon e tan gi froktu di de tumusi warti na ini Yehovah ai. Den ondrofeni tori di e kon now e tyari disi kon na krin.

• Den ben aksi wan yongu Kotoigi di nen Wissam fu taki 30 miniti fu wan sani di a ben sreka bun, na fesi en klas na skoro. Wissam ben feni taki dati ben o de wan moi okasi fu gi kotoigi. Fu dati ede a gebroiki a buku Leven — Hoe is het ontstaan? Door evolutie of door schepping? (Libi—Fa A Du Kon? Nanga Yepi fu Evolutie Noso fu di Gado Meki Sani?) èn a sreka ensrefi fu taki fu wan tori di abi fu du nanga a meki di sani ben meki. Ma di a skoromeester fu Wissam ben si fu san a ben wani taki, dan a taki dati fu di a ben de so wan prenspari tori, dan Wissam ben kan taki 45 miniti.

Di Wissam bigin nanga a taki, a skoromeester fu en koti en mofo èn seni kari na uma di ben de na edeman fu a skoro. A no ben teki langa fosi na edeman disi ben doro, èn Wissam bigin baka na a bigin fu a tori. Di a arki den aksi di Wissam ben poti na a bigin fu a tori, dan na edeman kon prisiri èn a taki dati ala skoro pikin musu kisi wan kopi fu a lezing.

Wan syatu pisi ten baka dati, wan tra skoromeester di ben waka pasa si a prisiri di sma ben abi na ini a klas èn a aksi den san e pasa. Di den taigi en, dan a aksi efu Wissam ben pruberi fu sori taki Gado meki sani noso taki sani ben kon nanga yepi fu evolutie. „Gado meki sani”, a piki. Baka di a kon sabi taki Wissam ben de wan Kotoigi fu Yehovah, dan a skoromeester taigi a klas: „Den sani di a boi disi fruteri unu sa meki unu kon frustan taki sabidensi e buweisi dati Gado meki sani èn dati sani no du kon nanga yepi fu evolutie.

A kon na krin taki a skoromeester disi ben abi a Schepping-buku èn a ben gebroiki en fu hori lezing na a universiteit! Fosi a gowe, a aksi efu a ben kan kon baka a tra dei nanga den studenti fu en klas, so taki Wissam ben kan taki nanga den. Dati ben abi leki bakapisi taki wan moi kotoigi ben gi baka gi Yehovah.

• Nina, di ben abi tutenti na tu yari, ben wani sote fu dringi den watra fu waarheid. Wan dei en neef ben gi en wan Bijbel èn a ben meki a kon sabi a Pinkster Kerki. Nina leisi a Bijbel nanga prisiri èn a kon leri fu den sani di a ben leisi taki Kresten musu preiki, fu dati ede a bigin preiki na den mati fu en. Ala den sma disi ben aksi en: „Yu na wan Yehovah Kotoigi?”. A sani dati ben fruwondru en.

Siksi yari baka dati, Yehovah Kotoigi go na Nina en oso èn den fruteri en fu a Kownukondre fu Gado. Na ini a bigin a ben pruberi fu suku fowtu na den sani di den ben leri. Ma a kon si taki ala den piki fu den ben de tru èn den ben abi den gron na tapu Bijbel.

Den sani di Nina ben leri te fu kaba — a nen fu Gado, Yehovah, den blesi fu a Kownukondre, èn so moro fara — overtoigi en taki a ben feni a waarheid. A gi en libi abra na Gado èn a teki dopu. Na ini den seibi yari di pasa, Nina dini leki wan furuten preikiman. Fu tru, Yehovah e blesi den wan di lobi en trutru.—1 Korentesma 2:9.