Fu San Ede Den No Abi Pikin?

DELE nanga Fola, * wan trowpaar, ben libi èn ben wroko na a bijkantoro fu a Waktitoren Genootschap na Nigeria. Syatu baka di den ben bigin dini drape, dan Fola en mama ben kon luku den. A ben waka fara fu kon taki wan seryusu tori nanga den, wan tori di ben gi en bun furu broko-ede, èn di ben e meki taki furu neti a no ben man sribi.

„Unu e du so bun sani gi mi”, a ben taigi den. „Unu e seni moi sani gi mi, unu e kon luku mi. A fasi disi fa unu e sori taki unu lobi mi, na wan sani di mi e warderi trutru. Ma den sani disi e gi mi broko-ede tu, bika mi e aksi misrefi suma sa du den sani disi gi unu te unu sa kon grani neleki mi? Unu trow tu yari kaba now, èn unu no abi pikin. Unu no e denki taki a ten doro fu unu gowe libi Bethel èn bigin nanga wan osofamiri libi?”

Disi na a fasi fa Mama ben denki: Dele nanga Fola wroko langa nofo kaba na Bethel. Now a ten doro fu den prakseri san den o du na ini a ten di e kon. A no de fu taki dati tra sma kan du a wroko fu den. A no de so taki Dele nanga Fola musu tapu nanga a furuten diniwroko, ma den kan du tra wroko fu a diniwroko tu, wán di sa gi pasi taki den kan abi pikin èn kan prisiri fu de wan papa nanga mama.

Mama En Broko-ede

Wi kan frustan fu san ede Mama e broko en ede. A wani di sma wani abi pikin de wan prenspari sani èn wan gewoon sani ini ala kulturu èn ala ten kaba dati de so. Te sma e kisi pikin èn e kweki pikin, dan dati e gi den prisiri nanga howpu srefisrefi. „A froktu fu a bere na wan pai”, Bijbel e taki. Iya, a man di wan sma man kisi pikin, na wan warti presenti di komoto fu wi lobi-ati Mekiman.—Psalm 127:3.

Sma na ini furu libimakandra e dwengi den trowpaar taki den musu meki pikin. Fu eksempre, na Nigeria, pe ibri uma e kisi so wan siksi pikin, a de wan gewoon sani fu yere sma di e gi bun winsi na wan trow-oso, e taigi den wan di e trow: „Baka neigi mun, wi e fruwakti fu yere wan beibi e krei na ini yu oso.” Den tu sma di e trow kan kisi wan beibi bedi leki kado. Den mama fu den sma di trow e luku a kalender finifini. Efu a trowmisi no de nanga bere bifo a yari pasa, dan den e suku fu feni efu wan problema de pe den kan gi yepi.

Furu mama e prakseri taki tu sma e trow fu kisi pikin so taki a famiri fu den kan tan go doro. Fola en mama ben taigi en: „Fu san ede yu ben trow efu yu sabi taki yu no sa kisi pikin? Wan sma ben de nanga bere fu meki yu; yusrefi musu de nanga bere fu meki yu eigi pikin.”

Boiti dati, wan tu bun sani de fu prakseri. Na ini furu kondre fu Afrika, lanti no e sorgu den owrusma bun. A gwenti de, taki den pikin e sorgu gi na owru papa nanga mama fu den, neleki fa a papa nanga mama fu den ben sorgu den di den ben yongu. So bun, Fola en mama ben prakseri taki efu den pikin fu en no abi den eigi pikin, dan te den kon owru, den ben sa de den wawan, trawan no ben sa wani den, den o kon pôti, èn no wan sma ben sa de fu beri den te den ben o dede.

Na ini furu kondre fu Afrika, sma e prakseri taki na wan fluku te sma no abi pikin. Na ini son presi, den umasma musu sori srefi bifo den  trow taki den o man kisi pikin. Furu umasma di no man de nanga bere, sa suku fayafaya fu feni dresi di kan yepi den so taki den kan de nanga bere.

Dati meki trawan e denki taki te trowpaar fu densrefi no wani kisi pikin, dan den e lasi wan kefalek bun sani. Furutron trawan e si den leki sma di no de leki ala sma, di e denki don, èn leki sma di yu musu sari.

Prisiri Nanga Frantwortu

A pipel fu Yehovah e erken taki ala di a de wan prisiri sani fu kweki pikin, toku a de wan frantwortu sani tu. Bijbel e taki na 1 Timoteus 5:8: „Iya, efu wan sma no e sorgu gi den sma fu en, èn spesrutu gi den wan di de memre fu en osofamiri, dan a drai en baka gi a bribi èn a moro takru leki wan sma sondro bribi.”

Papa nanga mama musu sorgu na osofamiri fu den na skin fasi èn na yeye fasi, èn fu man du dati den musu du furu muiti èn dati e teki furu ten tu. Den no e prakseri taki na fu di Gado gi den pikin, dan na Gado musu sorgu den pikin tu. Den e frustan taki fu kweki pikin soleki fa Bijbel e taki, na wan frantwortu di Gado gi na papa nanga mama; a no de wan frantwortu di den musu gi na trawan.—Deuteronomium 6:6, 7.

Na ini den „lasti dei” disi fu „muilek ten di tranga fu pasa”, a de wan spesrutu muilek sani fu kweki pikin (2 Timoteus 3:1-5). Boiti taki sma e wroko tranga sondro taki a moni sari fu den libi, dan a gro di godelowsufasi e gro na ini a libimakandra, e meki en moro tranga fu kweki pikin nownowde. Ma toku, na heri grontapu, furu Kresten trowpaar teki a tyalensi disi èn den e kweki pikin na wan fasi di e plisi Gado „na ini a trangaleri èn a seryusu frumane fu Yehovah” (Efeisesma 6:4). Yehovah lobi den papa nanga mama disi èn a e blesi den tu gi a tranga wroko fu den.

Fu San Ede Wan Tu Sma E Tan Sondro fu Kisi Pikin

Na a tra sei, furu tra Kresten trowpaar no abi pikin. Son wan fu den no man kisi pikin èn den no e teki pikin tu fu kweki. Tra trowpaar di man kisi pikin, e teki a bosroiti fu no meki pikin. Den trowpaar disi e tan sondro fu kisi pikin, no fu di den no wani a frantwortu disi noso fu di den frede fu teki a tyalensi fu de wan papa nanga mama. Na presi fu dati, den teki a bosroiti fu poti ala den prakseri na difrenti fasi fu a furuten diniwroko, san den no ben o man du efu den ben o kweki pikin. Son wan e dini leki zendeling. Trawan e dini Yehovah na ini a wroko fu kringopziener noso na Bethel.

Neleki ala tra Kresten, den e frustan taki wan wroko musu du now wantewante. Yesus ben taki: „A bun nyunsu disi fu a kownukondre sa preiki na heri grontapu pe sma e libi, leki wan kotoigi gi ala nâsi, èn dan a kaba sa kon.” A wroko disi e du nownowde. A de wan prenspari wroko, fu di „a kaba” sa wani taki pori gi den wan di no ben gi yesi na a bun nyunsu.—Mateus 24:14; 2 Tesalonikasma 1:7, 8.

A pisi ten pe wi e libi now, gersi a srefi pisi ten di Noa nanga en osofamiri ben bow wan bun bigi ark di ben kibri den libi pasa a bigi Frudu (Genesis 6:13-16; Mateus 24:37). Ala di ala den dri boi fu Noa ben trow, toku no wan fu den ben kisi pikin te baka a Frudu. A kan, taki den trowpaar disi ben wani poti ala den prakseri na a wroko di den ben musu du èn ben wani gi ala den krakti na dati tu. A kan so srefi taki den no ben wani kweki pikin na ini wan kefalek ogri grontapu pe „na ogridu fu libisma ben kon furu . . . èn taki ala prakseri di ben de na ini en ati, ala ten ben de soso takru.”—Genesis 6:5.

Ala di disi no wani taki dati a de wan fowtu sani fu abi pikin na ini a ten disi, toku furu Kresten trowpaar no wani kisi pikin so taki den kan gi ala den ten na a wroko di musu du wantewante, di Yehovah gi en pipel fu du. Wan tu trowpaar wakti wan pisi ten bifo den kisi pikin; trawan teki a bosroiti fu tan sondro pikin èn den e prakseri kande fu kisi pikin na ini Yehovah en regtfardiki nyun grontapu. Den e denki don? Den e misi wan bun sani na ini a libi? Wi musu sari den?

Seikerfasi Nanga Prisiri Libi

Nownowde Dele nanga Fola, di wi kari na fesi kaba, trow moro leki tin yari kaba, èn den wani  tan sondro fu kisi pikin. „Teleki now den famiriman fu wi e muilek wi fu kisi pikin”, na so Dele e taki. „Den e broko den ede tumusi nanga a tamara fu wi pe wi no sa abi seikerfasi. Ala ten wi e taigi den taki wi e warderi a broko di den e broko den ede nanga wi, ma toku wi e sori den taki wi de trutru koloku nanga san wi e du now. Ini a tori fu seikerfasi, wi e sori den taki wi e poti wi frutrow tapu Yehovah di e broko en ede nanga a tan bun fu ala sma di tan getrow èn di tan loyaal na en. Wi e tyari kon na krin gi den tu, taki na abi di papa nanga mama abi pikin no e gi den a dyaranti taki den pikin sa sorgu gi den te den kon owru. Wan tu sma no e broko den ede nanga den papa nanga mama, trawan no man yepi den papa nanga mama, trawan baka dede bifo den papa nanga mama. Na a tra sei, a tamara fu wi sa de seiker efu a de na ini Yehovah anu.”

Dele nanga trawan neleki en, e frutrow srefisrefi na ini a pramisi fu Yehovah gi den getrow futuboi fu en: „Mi no sa gowe libi yu kwetikweti, èn noiti mi no sa drai mi baka gi yu” (Hebrewsma 13:5). Den e bribi so srefi taki „Yehovah anu no kon syatu, taki a no man frulusu, èn en yesi no kon hebi taki a no man yere”.—Yesaya 59:1.

Wan tra sani di e gi den frutrow, na te den e luku fa Yehovah e yepi den getrow futuboi fu en. Kownu David ben skrifi: „Wan ten ben de taki mi ben de wan yonkuman, mi kon owru tu, èn toku mi no si no wan regtfardikisma libi en wawan krinkrin.” Prakseri fu dati. Yu sabi wán getrow futuboi fu Yehovah di Yehovah gowe „libi en” en „wawan krinkrin”?—Psalm 37:25.

Na presi fu sari, den wan di ben libi den heri libi langa fu dini Yehovah nanga den kompekresten fu den, e firi kefalek bun taki den ben du so. Brada Iro Umah de 45 yari kaba na ini a furuten diniwroko èn nownowde a e dini leki wan opziener di e reis na ini Nigeria. A e taki: „Ala di mi nanga mi wefi no abi pikin, toku wi e hori na prakseri taki ala ten Yehovah sorgu gi wi na yeye fasi èn na skin fasi. Noiti wi ben mankeri wan sani. Yehovah no sa gowe libi wi te wi e kon moro grani. Den yari disi na ini a furuten diniwroko ben de den moro koloku yari fu wi libi. Wi de nanga tangi taki wi kan dini wi brada, èn den brada fu wi e warderi a diniwroko fu wi, èn den e yepi wi.”

Ala di furu trowpaar no meki pikin fu densrefi, toku den meki pikin na wan tra fasi: Kresten disipel di e anbegi Yehovah. Na apostel Yohanes ben abi so wan 100 yari di a ben skrifi: „Mi abi no wan moro bigi reide fu de nanga tangi, leki den sani disi taki, mi e yere dati den pikin fu mi e tan waka na ini a waarheid” (3 Yohanes 4). Yohanes ben prisiri srefisrefi nanga a getrowfasi fu den „pikin” fu en — den sma di a ben tyari kon na ini a „waarheid”.

A srefi prisiri de furufuru na ini a ten disi. Bernice, wan umasma fu Nigeria, trow 19 yari kaba sondro fu kisi pikin, wan sani di ensrefi ben bosroiti. Na ini den 14 yari di pasa, a dini leki wan pionier. Now di a e doro a ten fu en libi pe a no sa man kisi pikin fu ensrefi moro, a no e sari taki a ben gi en libi na a wroko fu meki disipel. A e taki: „Mi e firi bun fu si fa den pikin fu mi na yeye fasi e gro kon bigi. Srefi efu mi ben abi mi eigi pikin, toku mi no denki taki den ben o de so krosibei fu mi leki den wan di mi ben yepi leri waarheid. Den e teki mi leki den eigi mama, e fruteri mi den sani di e prisiri den nanga den problema fu den, èn den e aksi mi fu gi den rai. Den e skrifi brifi, èn wi e go luku makandra.

Wan tu sma e si en leki wan fluku fu no abi yu eigi pikin. Den e taki dati yu sa pina te yu kon grani. Ma a no so mi e si a tori. Mi sabi taki so langa mi e dini Yehovah nanga mi heri ati, a sa pai mi baka èn sorgu mi. Noiti a sa trowe mi fu di mi kon owru.”

Gado Lobi Den èn A E Warderi Den

Den wan di meki pikin èn kweki den fu „tan waka na ini a waarheid” abi furu sani fu de nanga tangi gi dati. Dati meki Bijbel e taki: „Sondro misi, a papa fu wan regtfardikiwan sa prisiri; a sma di e tron papa fu wan koniwan, sa prisiri so srefi nanga en. Yu papa nanga yu mama sa prisiri, èn na uma di ben meki yu sa prisiri”!—Odo 23:24, 25.

Den Kresten dati di no ben firi a prisiri fu meki den eigi pikin, kisi blesi na tra fasi. Furu  fu den trowpaar disi ben de kefalek prenspari fu meki a Kownukondre wroko go na fesi na furu fasi. Na ini den yari di pasa, den kisi moro ondrofeni, moro koni, nanga moro bekwaamfasi, èn dati e meki taki den man gi yepi na ini a Kownukondre wroko na wan warti fasi. Furu fu den e teki fesi na ini a wroko.

Ala di den tan sondro fu kisi pikin gi a bun fu a Kownukondre, toku Yehovah blesi den kaba nanga wan lobi-ati famiri na yeye fasi di e warderi furufuru den muiti di den meki. A de soleki fa Yesus ben taki en: „No wan sma libi oso noso brada noso sisa noso mama noso papa noso pikin noso pranigron fu mi ede èn fu a bun nyunsu ede, di no sa kisi wan hondro tron nownow, na ini a pisi ten disi, oso nanga brada nanga sisa nanga mama nanga pikin nanga pranigron, makandra nanga frufolgu, èn na ini a seti fu sani di e kon, têgo libi.”—Markus 10:29, 30.

Fu tru, ala den wan di de getrow na Yehovah, de warti gi en! Ala den loyaal sma disi, den wan di abi pikin nanga den wan di no abi pikin, e kisi a dyaranti fu na apostel Paulus: „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en, fu di unu ben dini den santawan èn e tan dini den.”—Hebrewsma 6:10.

[Futuwortu]

[Prenki na tapu bladzijde 23]

Trowpaar di no abi den eigi pikin, blesi nanga wan lobi-ati famiri na yeye fasi