Heimemre E Meki Syen Kon

„Heimemre kon? Dan syen sa kon; ma koni de na den sma di de bescheiden.”—ODO 11:2.

1, 2. San na heimemre, èn na sortu fasi a meki taki sma kisi pori?

WAN Leifisma di e dyarusu e tyari wan grupu sma di e opo densrefi teige den wan di Yehovah ben gi posisi fu frantwortu. Wan prins di e feti gi posisi e meki wan bedrigi plan fu teki a kownusturu fu en papa abra. Wan kownu di no abi pasensi no e poti prakseri na den rai di de krin fu frustan èn di e kon fu a profeiti fu Gado. Ala den dri Israèlsma disi abi a srefi eigifasi: heimemre.

² Heimemre na wan eigifasi fu na ati di de wan seryusu kefar gi ala sma (Psalm 19:13). A sma di abi heimemre, sondro frede e pasa markitiki sondro taki a abi a reti fu du dati. Furutron, disi e tyari rampu kon. Fu taki en leti, heimemre meki taki kownu kisi pori èn taki gran kownukondre fadon (Yeremia 50:29, 31, 32; Danièl 5:20). Heimemre kori wan tu fu den futuboi fu Yehovah srefi, èn a meki taki den kisi pori.

3. Na sortu fasi wi kan leri fu den kefar fu heimemre?

³ Bijbel abi leti te a e taki: „Heimemre kon? Dan syen sa kon; ma koni de na den sma di de bescheiden” (Odo 11:2). Bijbel e gi wi eksempre di e sori taki na odo disi tru. Efu wi e go ondrosuku wan tu fu den eksempre disi, dan a sa yepi wi fu si taki a de wan kefar fu pasa den markitiki di poti na wan reti fasi. Fu dati ede, meki wi go luku fa dyarusu, a feti di sma e feti fu kisi posisi, nanga na abi di sma no abi pasensi ben meki den dri man, di wi taki fu den  na a bigin, handri na wan heimemre fasi. Disi ben meki taki den ben kisi syen.

Korak​—Wan Opruruman Di Ben Dyarusu

4. (a) Suma ben de Korak, èn fu sortu sani di pasa na ini a historia, wi kan de seiker taki a ben abi wan prati na dati? (b) Nanga sortu sani di sma no ben taki bun fu dati, Korak ben bigin baka ten?

⁴ Korak ben de wan Leifisma fu a Kehat famiri. A ben de wan neef fu Moses nanga Aron. Soleki fa a sori, dan a ben de loyaal na Yehovah someni tenti yari langa. Korak ben abi a grani fu de na mindri den sma di ben kon fri na wan wondru fasi fu a Redi Se. Kande a ben yepi fu tyari a krutustrafu fu Yehovah kon tapu den Israèlsma di ben anbegi wan pikin kaw na a Sinaibergi (Exodus 32:26). Ma baka ten Korak ben kon tron a fesiman fu wan grupu sma di ben opo densrefi teige Moses nanga Aron. Den Rubensma Datan, Abiram, nanga On, makandra nanga 250 edeman fu Israèl, ben de na ini tu. * „Now a nofo”, den ben taigi Moses nanga Aron, „bika a heri konmakandra, den alamala santa èn Yehovah de na den mindri. We, fu san ede dan unu musu opo unsrefi na tapu a gemeente fu Yehovah?”—Numeri 16:1-3.

5, 6. (a) Fu san ede Korak ben opo ensrefi teige Moses nanga Aron? (b) Fu san ede wi kan taki dati Korak no ben warderi a presi di a ben abi ini a seti fu Gado?

⁵ Fu san ede Korak ben opo ensrefi, baka di a ben de getrow furu yari langa? A tiri di Moses ben tiri Israèl no ben kwinsi den srefisrefi, bika a ben de „a moro safri-atisma fu ala libisma di ben de na grontapu” (Numeri 12:3). Toku a ben gersi leki Korak ben dyarusu tapu Moses nanga Aron. A no ben lobi en taki den ben abi so wan hei posisi. Disi ben meki Korak taki na wan fowtu fasi, dati Moses nanga Aron ben meki densrefi kon tron moro prenspari leki a gemeente fu di den ben denki densrefi nomo.—Psalm 106:16.

⁶ Wan sani di abi fu du nanga a problema fu Korak ben de kande, taki a no ben warderi den grani di a ben abi ini a seti fu Gado. A tru taki den Leifisma fu a famiri fu Kehat no ben de priester, ma den ben de leriman fu a Wet fu Gado. Den ben tyari den meubel nanga den wrokosani fu a tabernakel tu, go na tra presi efu dati ben de fanowdu. Dati ben de wan prenspari wroko, fu di soso den sma di ben de krin na a sei fu a bribi fu den èn di ben tyari densrefi na wan lespeki fasi, ben kan tyari den santa wrokosani (Yesaya 52:11). Fu dati ede, di Moses ben sori Korak en fowtu, dan te yu e luku en bun, a ben aksi en: ’Yu e si a wroko fu yu leki so wan soso sani taki yu musu pruberi fu kisi a priesterwroko tu?’ (Numeri 16:9, 10) Korak ben weigri  fu erken taki a moro bigi grani di wan sma kan abi, na fu dini Yehovah na wan getrow fasi soleki fa en seti sani — a no a kisi di wan sma kan kisi wan spesrutu posisi.—Psalm 84:10.

7. (a) Fa Moses ben handri nanga Korak èn nanga den man fu en? (b) Fa na opo di Korak ben opo ensrefi ben abi wan takru bakapisi?

⁷ Moses ben kari Korak nanga den man fu en fu kon makandra a tra mamanten na a tenti fu konmakandra. Den ben musu tyari patu fu hori faya, so srefi wierook nanga den. Korak nanga den man fu en no ben abi a reti fu òfer wierook, fu di den no ben de priester. Efu den ben o kon nanga patu fu hori faya èn nanga wierook, dan dati ben o sori taki den man disi ben denki ete taki den ben abi a reti fu du a wroko di den priester ben du. Den ben denki so ete, srefi baka di den ben abi a heri neti fu go denki a tori. Di den ben sori densrefi a tra mamanten, dan a ben fiti taki Yehovah ben sori en atibron. Èn a bakapisi ben de taki „grontapu ben opo en mofo èn ben swari den” Rubensma. Den trawan, so srefi Korak, dede fu faya di ben kon fu Gado (Deuteronomium 11:6; Numeri 16:16-35; 26:10). A heimemre fu Korak ben abi leki bakapisi taki a moro ogri sani ben pasa nanga en. A no ben kisi grani èn Gado no ben feni en bun!

Kakafutu gi a „Tranga Lostu fu Dyarusu”

8. Fa wan „tranga lostu fu dyarusu” kan sori ensrefi na mindri Kresten?

⁸ A tori fu Korak na wan warskow gi wi. Fu di „a tranga lostu fu dyarusu” de na ini onvolmaakti libisma, meki a kan sori ensrefi na ini a Kresten gemeente srefi (Yakobus 4:5). Fu eksempre, a kan de so taki wi abi wan tranga lostu fu kisi posisi. Neleki Korak, dan kande wi e dyarusu tapu den sma di abi den grani di wi ben sa wani abi. Noso wi kan kon tron leki a Kresten fu a fosi yarihondro di ben nen Diotrefes. Nomonomo a ben suku fowtu na den apostel di ben abi frantwortu posisi. A ben du disi kande fu di en ben wani abi a frantwortu posisi. Fu tru, Yohanes ben skrifi taki Diotrefes „lobi fu teki a fosi presi”.—3 Yohanes 9.

9. (a) Sortu fasi fu si frantwortu na ini a gemeente wi no musu abi? (b) San na a yoisti fasi fa wi musu si a presi di wi abi na ini a seti fu Gado?

⁹ A no de fu taki, dati a no fowtu te wan Kresten man e du muiti fu kisi frantwortu na ini a gemeente. Paulus ben gi den deki-ati srefi fu waka so wan pasi (1 Timoteus 3:1). Ma noiti wi musu si den grani di wi abi fu du diniwroko leki wan sani di wi e frudini. A no musu de so tu taki, te wi e kisi wan grani, dan a de neleki wi e kisi wan moro hei posisi. Memre taki Yesus ben taki: „A sma na un mindri di wani kon bigi, musu de un dinari, èn a sma na un mindri di wani de a fosiwan, musu de un srafu” (Mateus 20:26, 27). A de krin taki a no ben sa de wan bun sani fu dyarusu tapu den wan di abi moro frantwortu. A wartifasi fu wi na Gado no e anga fu „a posisi” di wi abi na ini na organisâsi fu en. Yesus ben taki: „Unu alamala na brada” (Mateus 23:8). Iya, efu wi na preikiman noso pionier, efu wi no dopu langa ete noso wi hori wi soifri retifasi wan langa pisi ten kaba — ala sma di e dini Yehovah nanga den heri ati abi wan warti presi na ini a seti fu en (Lukas 10:27; 12:6, 7; Galasiasma 3:28; Hebrewsma 6:10). A de wan blesi trutru fu wroko krosibei makandra nanga milyunmilyun sma di e du muiti fu libi akruderi a Bijbel rai: „Tai wan denki fu saka-atifasi leki wan banti lontu un mindribere, gi makandra.”—1 Petrus 5:5.

Absalom​—Wan Man Di Ben Suku En Eigi Wini Nomo èn Di Ben Feti fu Kisi Posisi

10. Suma ben de Absalom, èn fa a ben pruberi fu feni a bun-ati fu den sma di ben kon na a kownu fu kisi krutu?

¹⁰ A libi fu a di fu dri manpikin fu Kownu David, Absalom, na wan bun eksempre fu a tranga lostu di wan sma abi fu kisi posisi. A man disi ben abi triki plan èn a ben suku en eigi wini nomo. A ben pruberi fu kori sma fu di a ben prèise den wan pasa marki di ben kon na a kownu fu kisi krutu, èn a ben du disi na so wan fasi taki a ben sa feni a bun-ati fu den. Fosi a ben meki den denki taki David no ben luku srefi san den ben abi fanowdu. Baka dati a no ben taki sani na wan kibri fasi moro, ma a ben taki krinkrin san a ben wani trutru. Absalom ben taki: „O, efu den ben poti mi leki krutuman na ini a kondre, efu ibri man di ben abi wan problema noso wan krutu afersi, ben sa kon na mi! Dan trutru mi ben sa koti krutu na wan leti fasi gi en”. A triki fasi fa Absalom ben handri no ben abi kaba. „Te wan man ben kon krosibei fu en fu boigi gi en”, na so Bijbel e taki, „dan a ben langa en anu grabu a man, èn a ben bosi en. Èn Absalom ben tan du den sani disi nanga ala den Israèlsma di ben kon na a kownu fu kisi krutu.” San ben de a  bakapisi? „Absalom ben go doro fu fufuru na ati fu den man fu Israèl.”—2 Samuèl 15:1-6.

11. Fa Absalom ben pruberi fu teki a kownusturu abra fu David?

¹¹ Absalom ben abi a fasti bosroiti fu teki a kownumakti abra fu en papa. Feifi yari bifo dati, a ben meki sma kiri Amnon, a moro owru manpikin fu David. A gersi leki Absalom ben du disi fu di a ben wani teki refensi fu di Amnon ben didon nanga tranga na Tamar, a sisa fu Absalom (2 Samuèl 13:28, 29). Ma srefi na a ten dati kaba, Absalom kande ben wani abi a kownusturu. A ben si a kiri di a ben kiri Amnon leki wan bun fasi fu puru wan gensman. * Awansi fa a no fa, di a ten ben doro, dan Absalom ben du wan sani. A ben meki sma meki bekènti na ini a heri kondre taki a ben tron kownu.—2 Samuèl 15:10.

12. Tyari kon na krin fa a heimemre fu Absalom ben meki taki a ben kisi syen.

¹² Absalom ben abi bun bakapisi gi wan pisi ten nomo, bika „a takru plan ben tan kon moro tranga, èn a nomru fu sma di ben kon na Absalom, doronomo ben gro kon moro bigi”. Te fu kaba, Kownu David ben abi fu lowe gowe so taki a ben kan kibri en libi (2 Samuèl 15:12-17). Ma heri esi a wroko di Absalom ben du ben kaba. Yoab ben kiri en, trowe en na ini wan olo èn a ben tapu en nanga ston. Prakseri a sani disi — a man disi di ben feti fu kisi posisi èn di ben wani de kownu no ben kisi wan bun beri srefi di a dede! * Heimemre ben meki taki Absalom ben kisi syen trutru.—2 Samuèl 18:9-17.

No Abi wan Tranga Lostu fu Kisi Posisi

13. Fa wan Kresten kan bigin kisi a tranga lostu na ini en ati fu kisi posisi?

¹³ Wi kan leri wan sani fu a makti di Absalom ben kisi èn a fadon di a fadon baka dati. Na ini a grontapu fu tide pe sma no e hori densrefi na gronprakseri, a de wan gewoon sani gi sma fu prèise den basi fu den pasa marki. Nanga disi den e pruberi fu meki den basi fu den, lobi den noso feni den bun. Den e du disi nomo fu di den wani taki den basi fu den musu denki bun fu den noso gi den wan grani noso wan moro hei posisi. Na a srefi ten den e meki bigi na fesi den sma di e wroko na den ondro, èn den e howpu na so wan fasi fu feni a bun-ati nanga a yepi fu den sma disi. Efu wi no e luku bun, dan na ini wi ati wi kan bigin kisi wan tranga lostu fu kisi posisi. Soleki fa a sori, disi ben pasa nanga wan tu sma na ini a fosi yarihondro. Fu dati ede a ben de fanowdu taki den apostel ben musu gi tranga warskow teige den sortu sma disi.—Galasiasma 4:17; 3 Yohanes 9, 10.

14. Fu san ede wi no musu abi wan tranga lostu fu kisi posisi noso fu meki wisrefi kon hei?

¹⁴ Yehovah no abi wan presi na ini en organisâsi gi sma di e dyaf èn e meki triki plan fu meki densrefi kon tron prenspari, èn di e pruberi fu „suku den eigi glori” (Odo 25:27). Iya, Bijbel e gi a warskow: „Yehovah sa koti ala den grati mofobuba puru, a tongo di e taki bigi sani” (Psalm 12:3). Absalom ben abi grati mofobuba. A ben taki wortu fu dyaf na den wan di a ben abi a bun-ati fu den fanowdu. A ben du ala den sani disi fu di a ben abi bigi-ai èn a ben wani kisi wan hei posisi. Kontrari fu dati, a de wan blesi gi wi taki wi kan de na mindri wan bradafasi di e waka baka a rai fu Paulus: „No du noti fu di unu lobi fu meki trobi noso prakseri unsrefi nomo, ma nanga sakafasi fu yeye, [unu musu si] den tra sma moro hei leki unsrefi.”—Filipisma 2:3.

Saul​—Wan Kownu Di No Ben Abi Pasensi

15. Fa Saul ben sori wan leisi, taki a ben de bescheiden?

¹⁵ Wan ten ben de taki Saul, di baka ten ben tron a kownu fu Israèl, ben de bescheiden. Luku fu eksempre san ben pasa na ini den yongu yari fu en. Di Samuèl, a profeiti fu Gado, ben taki bun sani fu Saul, dan nanga sakafasi Saul ben piki: „Mi a no wan Benyaminsma, fu a moro pikin lo fu Israèl, èn a famiri fu mi no de a moro pikinwan fu ala den famiri fu a lo fu Benyamin? Dan fu san ede yu taigi mi so wan sani?”—1 Samuèl 9:21.

16. Na sortu fasi Saul ben sori taki a no ben abi pasensi?

¹⁶ Ma baka ten Saul no ben de bescheiden moro. Ala di a ben feti nanga den Filistijnsma, a ben go  na Gilgal. Drape a ben musu wakti Samuèl di ben musu kon fu begi Gado èn fu tyari srakti-ofrandi. Di Samuèl no ben kon na a ten di den ben agri, dan na wan heimemre fasi Saul ben tyari bron-ofrandi ensrefi. Di a ben kaba, Samuèl ben doro. „San yu ben du?”, Samuèl ben aksi. Saul ben piki: „Mi ben si taki a pipel ben panya gowe fu mi, èn yu — yu no ben kon na a ten di wi ben agri . . . So bun, mi ben dwengi misrefi èn mi ben tyari a bron-ofrandi.”—1 Samuèl 13:8-12.

17. (a) Te yu e luku a tori frafra, dan fu san ede a sani di Saul ben du ben kan sori fu de wan bun sani? (b) Fu san ede Yehovah ben strafu Saul fu a handri di a ben handri na wan fasi di ben sori taki a no ben abi pasensi?

¹⁷ Te yu e luku a tori frafra, dan a ben kan gersi leki den sani di Saul ben du, ben de bun sani. Te yu e luku en bun, dan a pipel fu Gado ben de „ini bigi problema” èn „sani ben kon hebi gi den” èn den ben beifi fu di den ben de na ini wan situwâsi sondro howpu (1 Samuèl 13:6, 7). A tru taki a no fowtu fu opo du wan sani te a situwâsi e aksi dati. * Ma memre taki Yehovah kan leisi san de na ini wi ati èn taki a kan sabi san na den dipi firi na ini wi di e buweigi wi fu du sani (1 Samuèl 16:7). Fu dati ede, kande Yehovah ben si wan tu sani na Saul di a Bijbel tori no e taki fu den. Fu eksempre, Yehovah ben si kande taki na abi di Saul no ben abi pasensi ben de fu di a ben abi heimemre. Kande Saul ben mandi srefisrefi taki en — a kownu fu heri Israèl — ben musu wakti wan sma di a ben si leki wan owru profeiti di ben skoifi sani poti na wan tra ten. Awansi fa a no fa, Saul ben feni taki, fu di Samuèl no ben handri esi, meki a ben abi a reti fu du sani ensrefi. Na so fasi a no ben poti prakseri na den krinkrin rai di a ben kisi. San ben de a bakapisi? Samuèl no ben taki bun fu a sani di Saul du. Kontrari fu dati, a ben strafu Saul, èn a ben taki: „A kownukondre fu yu no sa tan . . . fu di yu no ben tan du san Yehovah ben komanderi yu” (1 Samuèl 13:13, 14). Heimemrefasi ben meki ete wan leisi, taki sma kisi syen.

Luku Bun fu No Sori Taki Yu No Abi Pasensi

18, 19. (a) Fruteri fa na abi di wan dinari fu Gado na ini a ten disi no abi pasensi, kan meki taki a e du sani na wan heimemre fasi. (b) Sortu sani wi musu hori na prakseri ini a tori fu a fasi fa a Kresten gemeente e wroko?

¹⁸ A tori di e fruteri wi fu a heimemre fasi fa Saul ben handri, ben skrifi na ini Gado Wortu gi a bun fu wi (1 Korentesma 10:11). A de makriki gi wi fu kon mandi nanga den onvolmaakti fasi fu wi brada. Neleki Saul, dan a kan taki wi no e sori pasensi. Kande wi feni taki, efu sani musu du na wan bun fasi, dan wi musu du den wisrefi. Kon meki wi taki, fu eksempre, taki wan brada sabi heri bun fa fu orga sani. Ala leisi a e kon biten, a sabi ala ten sortu nyun sani musu orga na ini a gemeente, èn a sabi fa fu taki èn fa fu gi leri na wan heri bun fasi. Ma na a srefi ten a e si taki trawan no man du sani na so wan bun èn soifri fasi leki fa en e du dati èn leki fa en ben sa wani taki den musu du den. Disi e gi en a reti fu no abi pasensi nanga den? A musu krutu den brada fu en? Noso a musu taki kande taki a gemeente no ben o waka bun efu ensrefi no ben du so furu sani? Efu a ben du disi, dan a ben o sori taki a abi heimemre!

¹⁹ Fu taki en leti, san na a sani di e hori wan gemeente fu Kresten makandra? A de a fasi fa sani orga noso a du di sani e du na wan bun fasi? Noso a de na abi di den brada abi furu sabi? A tru taki, efu den sani disi de, dan afersi na ini a gemeente e waka heri bun (1 Korentesma 14:40; Filipisma 3:16; 2 Petrus 3:18). Ma Yesus ben taki, dati sma ben o sabi suma na den bakaman fu en, fu di den ben sa abi lobi na a fosi presi (Yohanes 13:35). Na fu dati  ede owruman di e sorgu den skapu, ala di den e luku so srefi taki sani e waka bun, e frustan taki a gemeente a no wan bisnis di den musu tiri na wan tranga fasi. Na presi fu dati, a gemeente na wan presi pe skapu de di abi safu-ati sorgu fanowdu (Yesaya 32:1, 2; 40:11). Efu, na wan heimemre fasi, sma no e poti prakseri na den markitiki disi, dan a bakapisi sa de taki strei sa opo kon. Kontrari fu dati, efu sani e waka na a fasi fa Gado seti dati, dan a sa tyari vrede kon.—1 Korentesma 14:33; Galasiasma 6:16.

20. San wi sa luku na ini a tra artikel?

²⁰ Den Bijbel tori fu Korak, Absalom, nanga Saul e sori krinkrin taki heimemre e tyari syen kon, soleki fa wi kan leisi dati tu na ini Odo 11:2. Ma a srefi Bijbel vers e taki moro fara: „Koni de na den sma di de bescheiden.” San na bescheidenfasi? Sortu eksempre fu Bijbel kan yepi wi fu kon sabi moro fu na eigifasi disi, èn fa wi kan sori bescheidenfasi na ini a ten disi? Wi sa luku den aksi disi na ini a tra artikel.

[Futuwortu]

Yu E Memre Disi?

• San na heimemre?

• Fa dyarusu ben meki Korak handri na wan heimemre fasi?

• San wi e leri fu a tori fu Absalom di ben abi a tranga lostu fu kisi posisi?

• Fa wi kan sorgu taki wi no de leki Saul, di ben sori taki a no ben abi pasensi?

[Aksi fu a tori disi]

[Prenki na tapu bladzijde 10]

Saul ben lasi pasensi èn a ben handri na wan heimemre fasi