„Koni De na den Sma Di De Bescheiden”

„San Yehovah e aksi fu yu baka, leki fu . . . waka bescheiden nanga yu Gado?”—MIKA 6:8.

1, 2. San na bescheidenfasi, èn fa a de tra fasi leki heimemrefasi?

WAN prenspari apostel e weigri fu hari a prakseri fu sma na ensrefi. Wan krutuman fu Israèl di abi deki-ati e taki fu ensrefi dati a de a moro pikinwan na ini na oso fu en papa. A moro bigi man di oiti ben libi e erken taki a no abi ala makti. Ala den dri man disi e sori taki den de bescheiden.

² Bescheidenfasi de kontrari heimemre. A sma di de bescheiden no e denki tumusi furu fu den sani di a man du èn a no e denki fu ensrefi taki a de tumusi prenspari. Na presi fu abi bigifasi, fu meki bigi, noso fu suku posisi nomo, dan a sma di de bescheiden sabi san a man du èn san a no man du. Fu dati ede a e lespeki den firi fu trawan èn a e hori a fasi fa den e si sani, na prakseri.

3. Fa wi kan taki dati „koni de na den sma di de bescheiden”?

³ Bijbel abi leti te a e taki: „Koni de na den sma di de bescheiden” (Odo 11:2). A sma di de bescheiden de wan koni sma, fu di a e waka wan pasi di Gado feni bun. A e sorgu so srefi fu no sori heimemre, fu di a bakapisi sa de taki a sa kisi syen (Odo 8:13; 1 Petrus 5:5). A fasi fa wan tu dinari fu Gado ben libi, e sori krin taki a de wan koni sani fu de bescheiden. Meki wi go luku den dri eksempre di kari na ini a fosi paragraaf.

Paulus​—Wan ’Sma Di De na Ondro wan Tra Sma’ nanga wan ’Sma Di E Hori Ai Tapu Sani’

4. Sortu aparti grani Paulus ben abi?

⁴ Paulus ben de wan prenspari sma na mindri den fosi Kresten, èn wi kan frustan fu san ede dati ben de so. Na ini a heri diniwroko fu en, a ben reis furu dusundusun kilometer na tapu se èn na ini furu kondre, èn a ben seti furu gemeente. Moro fara, Yehovah ben blesi Paulus fu di a ben gi en fisyun èn A ben gi Paulus a presenti fu man taki difrenti tongo (1 Korentesma 14:18; 2 Korentesma 12:1-5). So srefi Yehovah ben meki Paulus skrifi 14 brifi nanga yepi fu en santa yeye. Now den brifi disi de wan pisi fu den Kresten Griki Buku fu Bijbel. Sondro tweifri wi kan taki dati den wroko fu Paulus ben de moro furu leki den sani di den tra apostel ben du.—1 Korentesma 15:10.

5. Fa Paulus ben sori taki a ben denki fu ensrefi na wan bescheiden fasi?

⁵ Fu di Paulus ben teki fesi na ini a Kresten diniwroko, dan son sma ben sa kan fruwakti taki a ben  o lobi taki sma ben poti furu prakseri na en tapu. Son sma ben sa kan fruwakti srefi taki Paulus ben o sori na wan bigimemre fasi taki a abi wan posisi fu frantwortu. Ma dati no ben pasa, fu di Paulus ben de bescheiden. A ben taki fu ensrefi, dati a ben de „a moro mendriwan fu den apostel”, èn a ben taki moro fara: „Mi no warti fu den kari mi wan apostel, fu di mi ben frufolgu a gemeente fu Gado” (1 Korentesma 15:9). Leki wan sma di ben frufolgu Kresten bifo, Paulus no ben frigiti noiti taki soso fu a no-frudini bun-ati fu Gado ede meki a ben kan abi wan matifasi nanga Gado. Èn a no ben abi a reti srefi fu kisi den aparti grani fu du diniwroko (Yohanes 6:44; Efeisesma 2:8). Na fu dati ede, Paulus no ben denki taki den tumusi bun sani di a ben du na ini a diniwroko ben meki taki a ben hei moro trawan.—1 Korentesma 9:16.

6. Fa Paulus ben sori bescheidenfasi di a ben handri nanga den Korentesma?

⁶ A bescheidenfasi fu Paulus ben de fu si spesrutu di a ben handri nanga den Korentesma. Soleki fa a sori, dan son wan fu den ben lobi den sma srefisrefi di den ben denki taki den ben de prenspari opziener, so srefi Apolos, Sefas, nanga Paulus (1 Korentesma 1:11-15). Ma Paulus no ben suku fu kisi prèise fu den Korentesma. A no ben gebroiki a lobi di den ben lobi en gi en eigi bun nomo. Di a ben de makandra nanga den, a no ben kon nanga „tumusi furu wortu noso nanga dipi koni”. Na presi fu dati, Paulus ben taki fu ensrefi èn fu den kompe fu en: „Meki sma si wi dan na a fasi disi: leki sma di de na ondro Krestes èn leki sma di e hori ai tapu den santa kibritori fu Gado.” *—1 Korentesma 2:1-5; 4:1.

7. Fa Paulus ben sori bescheidenfasi, srefi te a ben musu gi rai?

⁷ Paulus ben sori bescheidenfasi srefi di a ben musu gi krakti rai nanga tiri. A ben aksi den kompekresten fu en nanga tranga èn nanga „a sari-ati fu Gado” èn ’fu di a lobi den’, na presi taki a ben du dati fu di a ben abi wan posisi fu frantwortu leki apostel (Romesma 12:1, 2; Fileimon 8, 9). Fu san ede Paulus ben du disi? Fu di a ben si ensrefi trutru leki wan ’kompe-wrokoman’ fu den brada fu en; a no ben si ensrefi leki wan ’basi fu a  bribi fu den’ (2 Korentesma 1:24). A no de fu taki, dati a bescheidenfasi fu Paulus ben meki taki a fosi yarihondro Kresten gemeente ben lobi en sote.—Tori fu den Apostel 20:36-38.

Si Den Grani Di Wi Abi na wan Bescheiden Fasi

8, 9. (a) Fu san ede wi musu abi wan bescheiden fasi fu denki fu wisrefi? (b) Fa den sma di abi wan tu frantwortu kan sori bescheidenfasi?

⁸ Paulus ben de wan heri bun eksempre gi Kresten na ini a ten disi. No wan fu wi musu firi wisrefi moro hei leki wan trawan, awansi sortu frantwortu wi abi. „Efu iniwan sma denki taki a de wan sani ala di a de noti”, Paulus ben skrifi, „dan a e kori en eigi prakseri” (Galasiasma 6:3). Fu san ede? Bika „den alamala sondu èn no e doro a glori fu Gado” (Romesma 3:23; 5:12). Iya, wi no musu frigiti noiti taki wi alamala kisi sondu nanga dede abra fu Adam. Den spesrutu grani di wi e kisi no e puru wi komoto na ini a lagi sondu situwâsi di wi de na ini (Preikiman 9:2). Soleki fa a ben de nanga Paulus, dan soso fu no-frudini bun-ati ede, meki libisma kan kisi wan matifasi nanga Gado. Èn a de fu a no-frudini bun-ati fu Gado ede meki wi kan kisi wan grani fu dini en na ini wan posisi fu frantwortu.—Romesma 3:12, 24.

⁹ Wan sma di de bescheiden èn di e frustan disi, no e kisi heimemre fu di a abi grani fu du spesrutu diniwroko noso a no e meki bigi fu den sani di a man du (1 Korentesma 4:7). Te a e gi rai noso tiri, dan a e du disi leki wan kompe-wrokoman — no leki wan basi. Fu tru, a no ben o de wan bun sani efu wan sma di man du son wroko heri bun, ben o suku fu kisi prèise fu trawan. A no ben o de wan bun sani tu efu a sma disi ben o handri na wan fowtu fasi nanga a lespeki di kompe-bribiman e lespeki en (Odo 25:27; Mateus 6:2-4). A wan-enkri prèise di abi trutru waarde e kon fu tra sma — èn den no musu prèise wi fu di wisrefi e suku dati. Efu den e prèise wi, dan dati no musu meki wi denki moro fu wisrefi leki san de fanowdu.—Odo 27:2; Romesma 12:3.

10. Fruklari fa son sma di a gersi leki den de lagi, na sma di de trutru „gudu na ini bribi”.

¹⁰ Te den brada e frutrow wi èn e gi wi frantwortu, dan bescheidenfasi sa yepi wi fu no poti tumusi furu prakseri na wisrefi. Bescheidenfasi sa yepi wi tu fu no meki sma denki taki sani e go bun na ini a gemeente, soso fu di wi e du so furu muiti èn fu di wi e wroko so tranga. Fu eksempre, kande wi man gi leri na wan tumusi bun fasi (Efeisesma 4:11, 12). Ma efu wi de bescheiden, dan wi sa frustan taki den moro bun sani di wi kan leri na den konmakandra, no de sani di e taki fu a podium. Fu eksempre, yu no e kisi deki-ati te yu e si wan mama noso wan papa di no abi trowpatna, e kon na den konmakandra nanga ala den pikin fu den? Noso yu no e kisi deki-ati te yu e si wan sma di brokosaka, ma di toku e kon na den konmakandra na wan getrow fasi, ala di a e firi doronomo taki a no warti noti? Noso a no e gi yu deki-ati fu si wan yonguwan di e go na fesi na yeye fasi awansi a abi fu du nanga takru sani di abi krakti na en tapu na skoro èn na tra presi? (Psalm 84:10) Kande no wan sma e poti furu prakseri na den wan disi. Furutron trawan no e si srefi taki den e du furu muiti fu hori den soifri retifasi. Ma toku, a kan de so taki den „gudu na ini bribi” neleki den wan di abi moro frantwortu (Yakobus 2:5). Te yu e luku en bun, dan te fu kaba a de a getrowfasi fu wi di e meki taki Yehovah feni wi bun.—Mateus 10:22; 1 Korentesma 4:2.

Gideon​—„A Moro Pikinwan” na ini na Oso fu En Papa

11. Na sortu fasi Gideon ben sori bescheidenfasi di a ben taki nanga na engel fu Yehovah?

¹¹ Gideon, wan loyaal yonkuman fu a lo fu Manase, ben libi na ini wan bruya ten na ini a historia fu Israèl. Seibi yari langa a pipel fu Gado ben pina fu a kwinsi di Midian ben kwinsi den. Ma now a ten ben doro gi Yehovah fu fri en pipel. Fu dati ede, wan engel ben sori ensrefi na Gideon èn a ben taki: „Yehovah de nanga yu, yu tranga man di abi deki-ati.” Gideon ben de bescheiden, so bun a no ben prisiri  tumusi furu nanga a grani di na engel ben gi en. Na presi fu dati, a ben taigi na engel na wan lespeki fasi: „Pardon, mi masra, ma efu Yehovah de nanga wi, dan fu san ede ala den sani disi kon na wi tapu?” Na engel ben tyari sani kon na krin gi Gideon èn a ben taigi en: „Fu tru yu sa frulusu Israèl fu na anu fu Midian.” San ben de a piki fu Gideon? Na presi fu teki a grani fu du diniwroko fayafaya leki wan okasi fu meki ensrefi kon tron a moro bigi man fu a nâsi, a ben taki: „Pardon, Yehovah. Nanga sortu sani mi sa frulusu Israèl? Luku! Den dusun wan fu mi na a moro mendriwan na ini Manase, èn misrefi na a moro pikinwan na ini na oso fu mi papa.” Fa a sori trutru bescheidenfasi!—Krutubakra 6:11-15.

12. Fa Gideon ben sori a koni fu man si sani krin di a ben du a wroko fu en?

¹² Bifo Yehovah ben seni Gideon fu go feti, dan A ben tesi en. Fa a ben du dati? A ben taigi Gideon fu broko na altari fu en papa na pisipisi pe a ben anbegi Bâ-al, èn fu pori a santa postu di ben de sei na altari. A wroko disi ben o aksi taki Gideon ben musu sori deki-ati. Ma na ini a fasi fa a ben du a wroko, dan Gideon ben sori bescheidenfasi nanga a koni fu man si sani krin tu. Na presi taki a ben du disi na publiki pe ala sma ben kan si en, dan a ben wroko na neti pe kande no wan sma ben o si en. Moro fara, Gideon ben luku bun fa a ben o du a wroko fu en. A ben teki tin futuboi nanga en. Kande a du dati, so taki wan tu fu den ben kan hori wakti ala di den trawan ben e yepi en fu pori na altari nanga a santa postu. * Awansi fa a no fa, nanga a blesi fu Yehovah, Gideon ben du a wroko fu en, èn baka ten Gado ben gebroiki en fu fri Israèl fu den Midiansma.—Krutubakra 6:25-27.

Sori Bescheidenfasi Nanga a Koni fu Man Si Sani Krin

13, 14. (a) Fa wi kan sori bescheidenfasi te wi e kisi wan grani fu du diniwroko? (b) Sortu moi eksempre Brada A. H. Macmillan ben gi di e sori wi fa wi kan de bescheiden?

¹³ Wi kan leri furu fu a bescheidenfasi di Gideon ben sori. Fu eksempre, fa wi  e handri te wi e kisi wan grani fu du diniwroko? Wi e denki fosi fu a posisi di wi sa abi nanga a grani di wi sa kisi leki wan bakapisi fu disi? Noso wi e prakseri na wan bescheiden fasi èn na ini begi efu wi kan du den sani di a wroko disi e aksi fu wi? Brada A. H. Macmillan, di en libi na grontapu ben kon na wan kaba na ini 1966, ben gi wan moi eksempre ini a tori disi. C. T. Russell, a fosi presidenti fu a Watch Tower Society ben aksi Brada Macmillan wan leisi, suma a ben denki ben sa kan du a wroko te ensrefi no ben o de. Na ini a takimakandra di den ben abi baka dati, dan no wan leisi Brada Macmillan ben taki dati ensrefi ben sa kan du a wroko, ala di a ben o de wan yoisti sani gi en fu teki a wroko. Na a kaba, dan Brada Russell ben aksi Brada Macmillan fu prakseri efu a ben sa kan teki a wroko disi. „Mi ben tanapu drape èn mi no ben sabi san fu taki”, Brada Macmillan ben skrifi furu yari baka dati. „Mi trutru ben denki a tori na wan seryusu fasi, èn mi ben begi fu en gi wan pisi ten. Baka dati mi fruteri en taki mi ben sa breiti fu du ala san mi man fu yepi en.”

¹⁴ No so langa baka dati Brada Russell dede. Wan sma ben sa musu tron presidenti fu a Watch Tower Society. Fu di Brada Macmillan ben yepi Brada Russell di a ben teki en lasti preikiwaka, dan wan brada taigi en: „Mac, yu abi wan bigi tyans fu tron a presidenti. Yu ben de a spesrutu sma di ben teki presi gi Brada Russell te a no ben de, èn a ben taigi wi alamala fu du san yu e taki. We, a ben gowe èn a no ben kon baka noiti moro. A gersi leki yu na a man fu du a wroko moro fara.” Brada Macmillan ben piki: „Brada, dati a no a fasi fu si a tori. Disi na a wroko fu Masra, èn a wan-enkri wroko di yu e kisi na ini Masra en organisâsi, na a wroko di Masra srefi wani gi yu. Mi de seiker taki mi a no a sma fu du a wroko.” Baka dati Brada Macmillan ben gi wan tra sma a frantwortu fu du a wroko. Neleki Gideon, a ben si ensrefi na wan bescheiden fasi. A ben sa bun efu wi e si wisrefi na a srefi fasi.

15. San na wan tu bun fasi fa wi kan sori a koni fu man si sani krin te wi e preiki gi trawan?

¹⁵ So srefi wi, musu de bescheiden ini a fasi fa wi e du a wroko di wi kisi fu du. Gideon ben sori a koni fu man si sani krin, èn a ben pruberi fu no meki den sma di ben gens en, kon mandi fu soso. Na a srefi fasi, te wi e preiki, dan wi musu sori taki wi de bescheiden èn taki wi abi a koni fu man si sani krin te wi e taki nanga tra sma. A tru taki wi de na ini wan feti na yeye fasi fu trowe „sani di seti steifi” èn fu trowe ’fasi fa sma e rideneri’ (2 Korentesma 10:4, 5). Ma wi no musu taki nanga trawan na wan fasi di e sori taki wi e denki taki wi de moro prenspari noso moro koni leki den. So srefi wi no musu gi den no wan-enkri reide fu no arki a boskopu fu wi. Na presi fu dati, wi musu lespeki a fasi fa den e si sani èn wi musu taki fu sani di wi ala tu e agri nanga den. Baka dati wi musu poti prakseri na den tumusi bun sani fu a boskopu fu wi.—Tori fu den Apostel 22:1-3; 1 Korentesma 9:22; Openbaring 21:4.

 Yesus​—A Moro Bun Eksempre fu Bescheidenfasi

16. Fa Yesus ben sori taki a ben si ensrefi na wan bescheiden fasi?

¹⁶ A moro moi eksempre fu bescheidenfasi na di fu Yesus Krestes. * Ala di a ben abi wan krosibei matifasi nanga en Tata, toku Yesus no ben draidrai fu erken taki son sani ben de, di a no ben man du (Yohanes 1:14). Fu eksempre, di a mama fu Yakobus nanga Yohanes ben aksi efu den tu manpikin fu en ben kan sidon sei Yesus na ini a kownukondre, dan Yesus ben taki: „Fu sidon na mi reti anusei nanga na mi kruktu-anusei no de wan sani di mi kan gi” (Mateus 20:23). Na wan tra okasi, Yesus ben taki na wan fri fasi: „Mi no kan du no wan sani fu misrefi . . . mi no e suku mi eigi wani, ma a wani fu en di seni mi.”—Yohanes 5:30; 14:28; Filipisma 2:5, 6.

17. Fa Yesus ben sori bescheidenfasi di a ben abi fu du nanga tra sma?

¹⁷ Yesus ben hei moro onvolmaakti libisma na ini ala fasi, èn a ben kisi makti fu en Tata, Yehovah, moro leki san iniwan tra sma ben kisi. Ma toku Yesus ben de bescheiden di a ben handri nanga den bakaman fu en. A no ben leri den so furu sani, taki den no ben sabi san fu du nanga ala a sabi dati. A ben sori taki a ben firi gi den, a ben sori sari-ati, èn a ben hori den sani di den ben abi fanowdu leki libisma, na prakseri (Mateus 15:32; 26:40, 41; Markus 6:31). So bun, ala di Yesus ben de volmaakti, a no ben suku sani tumusi fini. Noiti a ben aksi den disipel fu en moro leki san den ben kan gi, èn noiti a ben gi den moro furu sani leki san den ben man teki (Yohanes 16:12). A no de fu fruwondru taki a ben gi so furu sma kowru-ati!—Mateus 11:29.

Waka Baka na Eksempre fu Yesus Di Ben Sori Bescheidenfasi

18, 19. Fa wi kan waka baka a bescheidenfasi di Yesus ben sori (a) na ini a fasi fa wi e si wisrefi, èn (b) na ini a fasi fa wi e handri nanga trawan?

¹⁸ Efu a moro bigi man di oiti ben libi ben sori bescheidenfasi, dan wi musu sori en moro leki en srefi. Libisma di no de volmaakti, furutron no wani erken taki den no abi ala makti. Ma Kresten di e waka baka Yesus, e du muiti fu de bescheiden sma. Den no abi bigifasi èn fu dati ede den e gi frantwortu na den wan di doro den markitiki fu kisi a frantwortu. Den no abi heimemre tu èn fu dati ede den e teki tiri fu den wan di kisi a frantwortu fu gi tiri. Den e sori taki den trutru wani wroko makandra nanga trawan, èn den e sorgu taki ala sani na ini a gemeente „feni presi na wan fasi di fiti èn leki fa sani seti”.—1 Korentesma 14:40.

¹⁹ Bescheidenfasi sa meki tu taki wi de reidelek na ini den sani di wi e fruwakti fu trawan. A sa yepi wi so srefi fu hori den sani di trawan abi fanowdu, na prakseri (Filipisma 4:5). Kande wi abi wan tu bun eigifasi noso wan tu sani di wi kan du heri bun, di trawan no abi noso no man du. Toku, efu wi de bescheiden, dan a no ala ten wi sa fruwakti fu trawan taki den musu du sani soleki fa wi ben sa wani dati. Fu di wi sabi taki ibri sma abi sani di a man du èn sani di a no man du, dan nanga bescheidenfasi wi sa luku pasa den fowtu fu den. Petrus ben skrifi: „Moro furu, abi tranga lobi gi makandra, fu di lobi e tapu wan heri ipi sondu.”—1 Petrus 4:8.

20. San wi kan du efu wi e si taki wi abi na eigifasi fu no de bescheiden?

²⁰ Soleki fa wi ben leri, dan koni de trutru nanga den wan di de bescheiden. Ma san yu musu du efu yu e si taki yu abi na eigifasi fu no de bescheiden sontron èn taki yu e sori heimemre? No lasi-ati. Na presi fu dati, waka baka na eksempre fu David, di ben begi: „Hori yu dinari baka fu a no handri na wan heimemre fasi; no meki den basi mi” (Psalm 19:13). Efu wi e waka baka a bribi fu man leki Paulus, Gideon, èn — moro leki iniwan tra sma — Yesus Krestes, dan wi sa ondrofeni fu wisrefi taki den wortu disi tru: „Koni de na den sma di de bescheiden.”—Odo 11:2.

[Futuwortu]

Yu E Memre Disi Ete?

• San na bescheidenfasi?

• Fa wi kan waka baka a fasi fa Paulus ben sori bescheidenfasi?

• San wi kan leri fu bescheidenfasi efu wi e luku na eksempre fu Gideon?

• Fa Yesus ben gi a moro bun eksempre fu bescheidenfasi?

[Aksi fu a tori disi]

[Prenki na tapu bladzijde 15]

A bescheidenfasi fu Paulus ben meki taki en kompekresten ben lobi en

[Prenki na tapu bladzijde 17]

Gideon ben gebroiki koni fu du a wani fu Gado

[Prenki na tapu bladzijde 18]

Yesus, a Manpikin fu Gado, e sori bescheidenfasi na ini ala san a e du