Ondrofenitori

Mi Ben Meki Fetisani, Now Mi E Kibri Sma Libi

SOLEKI FA ISIDOROS ISMAILIDIS BEN FRUTERI

Mi ben de na tapu mi kindi ala di watra-ai ben fadon komoto fu mi ai. „O, Gado mi konsensi e taigi mi taki mi no kan go doro fu du a wroko fu meki fetisani”, na so mi ben begi. „Fu tru, mi pruberi fu feni wan tra wroko, ma mi no ben man feni dati. Tamara mi sa meki den kon sabi taki mi e tapu nanga a wroko disi. Grantangi, Yehovah, no meki den fo pikin fu wi dede fu angri.” Fa a ben kon so fara nanga mi?

A LIBI ben switi na ini Drama, na a noordsei fu Grikikondre, pe mi ben gebore na ini 1932. Mi papa ben lobi fu taigi mi san a ben wani mi fu du. A ben gi mi deki-ati fu go na Amerkankondre fu teki leri drape. Baka di den ben fufuru Grikikondre na ini a di fu Tu Grontapufeti, dan wan sani di furu Grikisma ben taki na: „Yu kan fufuru den sani di wi abi, ma yu no man fufuru den sani di wi abi na ini wi prakseri.” Mi ben abi a fasti bosroiti fu teki wan moro hei leri èn fu kisi wan sani di no wan tra sma ben sa man fufuru fu mi noiti.

Sensi mi yongu yari, mi ben go na ini difrenti yongu sma grupu fu a Griki Orthodox Kerki. Drape den ben taigi wi fu no abi noti fu du nanga ogri sekte. Mi kan memre taki den ben kari Yehovah Kotoigi, na anti-christ.

Baka di mi ben kaba nanga wan technisch skoro na Ateine na ini 1953, dan mi ben go na Doisrikondre fu si efu mi ben kan feni wroko drape èn na a srefi ten go na skoro. Ma dati no ben kan, fu dati ede mi ben go na tra kondre. Baka wan tu wiki mi ben de na sekanti na Belgia, sondro moni. Mi e memre ete taki mi ben waka go na ini wan kerki, sidon drape, èn mi bigin krei so tranga taki watra-ai ben fadon na tapu a gron na mi fesi. Mi ben begi taki efu Gado ben sa yepi mi fu doro Amerkankondre, dan mi no ben sa feti baka materia sani ma mi ben sa teki skoro èn du muiti fu  de wan bun Kresten nanga wan bun kondreman. Te fu kaba, na ini 1957 mi doro Amerkankondre.

Wan Nyun Libi na ini Amerkankondre

A libi na ini Amerkankondre ben de muilek gi wan sma di ben komoto fu wan tra kondre èn di no ben sabi taki a tongo fu drape èn di no ben abi moni. Mi ben abi tu wroko na neti èn na deiten mi ben meki tranga muiti fu go na skoro. Mi ben go na difrenti middelbaar skoro èn mi ben kisi diploma fu dati. Baka dati mi ben go na a Universiteit fu California na Los Angelos pe mi ben studeri natuurkunde èn ben kisi wan diploma fu dati. Den wortu di mi papa ben taigi mi fu teki leri, ben yepi mi fu go doro pasa den muilek yari disi.

Na a ten disi, mi miti wan moi Griki uma, Ekaterini, èn wi trow na ini 1964. A fosi boi fu wi ben gebore baka dri yari, èn baka dati fosi fo yari pasa wi ben kisi tu boi moro nanga wán umapikin. A ben de wan trutru tyalensi fu sorgu gi wan osofamiri èn na a srefi ten studeri na a universiteit.

Mi ben wroko gi a legre fu Amerkankondre, gi den srudati di e wroko nanga opolani, na ini wan wrokope pe den ben meki fetisani, èn dati ben de na Sunnyvale, California. Den ben meki mi wroko na ini difrenti sortu project fu raket, soleki na Agena nanga na Apollo programa. Mi ben kisi wan tu medaille srefi gi a wroko di mi ben du gi den raket Apollo 8 nanga Apollo 11. Baka dati mi ben go doro nanga a leri di mi ben teki èn mi ben wroko furu na ini srudatiwroko di abi fu du nanga a meki di a legre ben meki raket. Na a ten dati, mi ben denki taki mi abi ala sani kaba — wan moi switi wefi, fo moi pikin, wan kefalek bun wroko, nanga wan moi oso.

Wan Mati Di E Horidoro

Na ini a bigin fu a yari 1967, mi ben miti na mi wrokope wan man di den e kari Jim, wan bun man di ben abi sakafasi. Ala ten a ben gersi taki Jim ben lafu, èn noiti a ben weigri te mi ben gi en wan kari fu teki pikin bro fu dringi pikinso kofi nanga mi. A ben gebroiki den okasi disi fu sori mi sani fu Bijbel. Jim ben taigi mi taki a ben studeri nanga Yehovah Kotoigi.

Mi ben skreki srefisrefi fu yere taki Jim ben abi kontakti nanga a kerki grupu disi. Fa a kan taki so wan switi sma ben kan meki sma fu a sekte disi fu na anti-christ, kori en? Ma toku, mi ben lobi a fasi fa Jim ben de nanga mi èn a switifasi fu en. A ben gersi taki ibri dei Jim ben abi wan tra sani gi mi fu leisi. Fu eksempre, wan dei a ben kon na mi kantoro èn a ben taigi mi: „Isidoros, na artikel disi ini A Waktitoren e taki fu fa fu meki na osofamiri libi kon moro tranga. Tyari en go na oso, èn leisi en makandra nanga yu wefi.” Mi ben taigi en taki mi ben sa leisi en, ma baka ten mi ben go na a toilet èn ben priti a tijdschrift na pisipisi èn ben trowe en na ini a dotibaki.

Dri yari langa mi ben priti ibri buku nanga tijdschrift di Jim ben gi mi. Fu di mi ben abi wan takru denki kaba fu Yehovah Kotoigi, ma toku na a srefi ten mi ben pruberi fu hori Jim leki mati, meki mi ben feni taki a ben moro bun fu arki san Jim ben abi fu taki èn baka dati frigiti den sani dati wantewante.

Ma toku, den takimakandra dati, ben meki mi si taki furu fu den sani di mi ben bribi èn ben du no ben  de fu feni na ini Bijbel. Mi ben kon frustan taki den leri fu a Dri-wánfasi, a helfaya, nanga a dede di a sili no man dede, no ben de leri di komoto fu den Buku fu Bijbel (Preikiman 9:10; Esekièl 18:4; Yohanes 20:17). Mi ben de wan memre fu a Griki Orthodox Kerki. Mi ben abi bigifasi fu dati. Dati meki mi no ben wani sori Jim taki a ben abi reti. Ma fu di ala ten Jim ben gebroiki Bijbel èn noiti a ben taki nomo san ensrefi ben denki, meki te fu kaba mi ben kon erken taki a man disi ben abi wan diri boskopu fu Bijbel gi mi.

Mi wefi ben firi taki wan sani ben e pasa, èn a ben aksi mi efu mi ben taki nanga mi mati di ben abi demakandra nanga den Kotoigi. Di mi ben piki en taki na so a de, dan a ben taki: „Wi kan go na ala tra kerki, ma no meki wi go na den Yehovah Kotoigi.” Ma heri esi baka dati, mi nanga mi wefi makandra nanga den pikin fu wi, ben go na ala den konmakandra fu den Kotoigi.

Wan Hebi Bosroiti

Di mi ben studeri Bijbel, mi ben tuka nanga den wortu disi fu a profeiti Yesaya: „Den sa musu naki den feti-owru fu den kon tron prugu èn den lansri fu den kon tron grasi-nefi. Nâsi no sa opo feti-owru fu feti nanga nâsi, so srefi den no sa leri orloku moro” (Yesaya 2:4). Mi ben aksi misrefi: ’Fa wan futuboi fu wan lobi-ati Gado di lobi vrede, kan wroko na wan presi pe den e meki fetisani fu kiri trawan?’ (Psalm 46:9). A no ben teki langa gi mi fu si taki mi ben musu suku wan tra wroko.

Yu kan frustan taki disi ben de wan bigi tyalensi. Mi ben abi wan kefalek bun wroko. Furu yari langa mi ben wroko tranga, ben teki leri, èn ben libi tra sani na wan sei nomo fu kon so fara pe mi ben de now. Mi ben kon kisi wan hei posisi, èn dyaso mi ben tanapu e denki fu libi ala den sani disi. Ma a dipi lobi fu mi gi Yehovah èn na angri di mi ben angri fu du en wani, te fu kaba na dati ben wini a tori.—Mateus 7:21.

Mi ben teki a bosroiti fu go wroko na wan wrokopresi na Seattle, Washington. Ma mi ben lasi-ati, bika heri esi mi ben si taki mi kisi fu du nanga moro wroko di no ben e kruderi nanga Yesaya 2:4. Den muiti di mi ben du fu du tra wroko drape no ben yepi, èn a konsensi fu mi ben bigin fon mi baka. Mi ben si krinkrin taki mi no ben man tan du a wroko disi èn na a srefi ten hori wan bun konsensi.—1 Petrus 3:21.

A ben kon de krin taki wi ben sa musu tyari prenspari kenki kon. Bifo siksi mun pasa, wi ben kenki a fasi fa wi ben libi èn now a moni fu sorgu na osofamiri ben de afu fu san a ben de bifo. Baka dati wi ben seri a diri oso fu wi èn wi ben bai wan pikin oso na Denver, Colorado. Now mi ben de srekasreka fu du a lasti sani — tapu nanga a wroko fu mi. Mi ben skrifi a brifi pe mi ben sori taki mi ben wani tapu nanga a wroko, èn mi ben tyari kon na krin taki a ben de wan bosroiti di mi teki fu di mi no man du a wroko disi nanga wan bun konsensi. A neti dati, baka di den pikin ben go sribi, mi ben fadon tapu mi kindi makandra nanga mi wefi èn wi ben begi Yehovah, soleki fa dati de fu leisi na ini a bigin fu na ondrofenitori disi.

Fosi wan mun pasa, wi ben froisi go na Denver,  èn tu wiki baka dati, na ini yuli 1975, mi nanga mi wefi ben teki dopu. Siksi mun langa mi no ben man feni wroko, èn safrisafri mi ben gebroiki ala a moni di wi ben poti na wan sei. Na ini a di fu seibi mun, a moni di ben tan abra no ben nofo fu pai a paiman gi na oso di wi ben musu pai ibri mun. Mi ben bigin suku ala sortu wroko di de fu feni, ma wantewante baka dati mi ben feni wan wroko leki wan ingenieur. A moni ben de soso afu fu san mi ben kisi fosi; ma toku a ben moro furu leki san mi ben aksi Yehovah. Fu tru, a ben meki mi firi kefalek koloku taki mi ben poti yeye afersi na a fosi presi!—Mateus 6:33.

Kweki den Pikin fu Wi fu Lobi Yehovah

Na ini a ten dati, mi nanga Ekaterini ben meki muiti fu kweki den fo pikin fu wi akruderi den gronprakseri fu Gado. Koloku, nanga Yehovah en yepi, wi si ala den fo pikin tron lepi Kresten, di gi den libi abra na a prenspari wroko fu preiki fu a Kownukondre. Den dri boi fu wi, Christos, Lakes, nanga Gregory ben klari a Dinariskoro èn now den e dini na difrenti fasi fu fisiti èn tranga den gemeente. Na umapikin fu wi, Toula, e wroko friwani na a edekantoro fu Yehovah Kotoigi na New York. A ben naki wi ati trutru fu si fa ala den fo pikin libi bun wroko na wan sei nanga wroko di e pai kefalek bun, nomo fu dini Yehovah.

Furu sma ben aksi wi fa a du kon taki a waka so bun nanga wi fu kweki den pikin. A no de fu taki dati wán spesrutu fasi no de fu kweki pikin, ma wi ben pruberi fayafaya fu poti lobi gi Yehovah na ini den ati èn so srefi lobi gi den sma na wi sei (Deuteronomium 6:6, 7; Mateus 22:37-39). Den pikin ben leri taki wi no kan taigi Yehovah taki wi lobi en efu den sani di wi e du no e sori dati.

Wán dei na ini a wiki, furutron dati ben de satra, a heri osofamiri ben teki prati na a preikiwroko. Ala munde neti, baka a neti nyanyan wi ben abi wan osofamiri studie, èn wi ben abi wan studie tu nanga ibri pikin. Di den pikin ben moro yongu, wi ben studeri nanga ibri pikin wan syatu pisi ten difrenti tron na ini wan wiki, ma di den ben gro kon moro bigi dan wi ben studeri moro langa nanga den wán leisi wan wiki. Na den ten disi di wi ben studeri nanga den, den pikin fu wi no ben hori sani na baka èn ben taki fri nanga wi fu den problema fu den.

Wi ben nyan bun fu prisiri demakandra leki osofamiri tu. Wi ben lobi fu prei poku makandra, èn ibri pikin ben lobi fu singi a singi di en ben lobi. Wan tu satra nanga sonde, wi ben gi tra osofamiri wan kari fu abi demakandra nanga wi. Wi ben go nanga fakansi makandra leki osofamiri tu. Na wan fu den fakansi disi, wi ben tan tu wiki fu go luku den bergi fu Colorado èn fu wroko makandra nanga a gemeente drape na ini a preikiwroko. Den pikin fu wi e feni en wan switi sani fu memre fa den ben du difrenti wroko na den distrikt kongres, èn fa den ben yepi fu bow  Kownukondre zaal na difrenti presi. Di wi ben tyari den pikin go na Grikikondre fu miti den tra famiriman fu den, dan den ben man miti furu getrow Kotoigi tu di ben de na dungru-oso fu a bribi ede wan ten. A sani disi ben naki den ati srefisrefi, èn dati ben yepi den teki a bosroiti fu tan getrow èn fu tan abi deki-ati gi a waarheid.

A no de fu taki, dati sontron wan tu fu den pikin no ben tyari densrefi na wan bun fasi noso den no ben teki bun bosroiti ini a tori fu suma den e teki leki mati. Na tra ten, wi ben gi den problema fu di wi ben de tumusi strak na ini wan tu tori. Ma a hori di wi ben hori wisrefi na a „seryusu frumane fu Yehovah” soleki fa dati de fu feni na ini Bijbel, ben yepi wi fu poti sani reti baka gi wi alamala.—Efeisesma 6:4; 2 Timoteus 3:16, 17.

A Moro Bun Ten fu Mi Libi

Baka di den pikin fu wi ben go na ini a furuten diniwroko, dan mi nanga Ekaterini ben bigin denki seryusu san wi ben sa kan du fu du moro na ini a wroko disi di e kibri sma libi. So bun, na ini 1994 di mi ben go fruku nanga pensyun, wi ala tu ben bigin dini leki gewoon pionier. Na ini a diniwroko fu wi, wi e go tu na middelbaar skoro nanga universiteit ini a birti fu wi, èn drape wi e gi kotoigi na den studenti èn e studeri Bijbel nanga wan tu fu den. Fu di mi kan frustan den problema fu den — fu di misrefi ben de wan studenti no so langa pasa — meki a e waka bun nanga mi fu yepi den leri sabi Yehovah. A de trutru wan prisiri fu studeri Bijbel nanga studenti fu Bolifia, Brasyonkondre, Chili, China, Egipti, Etiopia, Meksikow, Tailand, nanga Torkukondre! A ben go bun nanga mi tu fu gi kotoigi nanga yepi fu telefon, spesrutu na den sma di e taki mi eigi tongo.

Mi no man du furu moro fu di a taki di mi e taki Grikitongo, de fu yere na ini tra tongo di mi e taki èn so srefi fu di mi e kon moro owru. Toku ala ten mi meki muiti fu de klariklari fu dini èn fu abi a yeye fu Yesaya di ben taki: „Dya mi de! Seni mi” (Yesaya 6:8). Wi prisiri fu a yepi di wi ben man yepi moro leki siksi sma fu gi den libi abra na Yehovah. Fu tru, disi de a moro bun ten fu wi libi.

Wan ten, mi heri libi ben drai lontu a meki di mi ben meki bigi fetisani fu kiri libisma leki mi. Ma Yehovah nanga en no-frudini bun-ati, opo a pasi gi mi nanga mi osofamiri fu tron futuboi di gi wisrefi abra na En. Dati ben meki wi gi wi libi fu tyari a bun nyunsu fu têgo libi na tapu wan paradijs grontapu gi sma. Te mi e memre baka den tranga bosroiti di mi ben musu teki, dan mi e prakseri den wortu fu Maleaki 3:10: „’Grantangi, tesi mi nanga dati’, Yehovah fu den legre taki, ‘efu mi no sa opo den sroisi fu hemel gi unu èn trutru kanti wan blesi kon na unu tapu te leki no wan sani e mankeri moro.’” Na trutru disi A du gi wi èn trutru dati ben meki wi ati firi heri bun!

[Faki/​Prenki na tapu bladzijde 27]

Lakes: Mi papa no ben lobi hoigrifasi kwetikweti. A ben meki furu muiti fu no hoigri, spesrutu fu di a wani poti wan bun eksempre gi en osofamiri. Furutron a ben taigi wi: „Efu yu gi yu libi abra na Yehovah, dan dati wani taki wan sani. Dati wani taki dati yu musu wani fu tyari òfer gi Yehovah. Dati na san a wani taki fu de wan Kresten.” Mi no ben frigiti den wortu disi èn den ben yepi mi fu waka baka na eksempre fu mi papa fu tyari òfer gi Yehovah.

[Faki/​Prenki na tapu bladzijde 27]

Christos: Mi ben abi furu warderi gi a de di mi papa nanga mama de loyaal na Yehovah nanga den heri ati èn so srefi fa den ben teki a frantwortu fu den leki wan tranga plekti. Ala sani wi ben du makandra leki osofamiri — fu a diniwroko fu wi te go miti den fakansi fu wi. Ala di mi papa nanga mama ben kan go du wan lo tra sani, toku den ben hori a libi fu den eenvoudig, èn ben poti ala prakseri na a diniwroko. Nownowde, mi sabi taki mi de moro koloku efu mi e gi ala mi ten na ini a diniwroko fu Yehovah.

[Faki/​Prenki na tapu bladzijde 28]

Gregory: Mi papa nanga mama ben taki nanga mi fu gi mi deki-ati fu du moro ini mi diniwroko; ma moro leki den wortu dati, na eksempre fu den èn a prisiri fu den ini a diniwroko fu Yehovah ben pusu mi fu prakseri baka fu mi situwâsi, poti ala sani di ben trobi mi fu no bigin nanga a furuten diniwroko na wan sei, èn gi moro fu misrefi na ini a wroko fu Yehovah. Mi e taigi mi papa nanga mama tangi taki den yepi mi fu feni a prisiri di e kon fu a meki di mi e meki moro muiti.

[Faki/​Prenki na tapu bladzijde 28]

Toula: Ala ten mi papa nanga mama ben poti krakti tapu a de di a matifasi fu wi nanga Yehovah de a moro warti sani di wi ben kan abi èn taki a wan-enkri fasi taki wi kan de trutru koloku na te wi e gi Yehovah a moro bun sani di wi abi. Den ben meki taki Yehovah ben de wan trutru sma gi wi fu tru. Furutron mi papa ben taigi wi taki a de wan kefalek bun firi fu man go sribi te neti nanga wan krin konsensi, fu di yu sabi taki yu du ala san yu man fu meki Yehovah koloku.

[Prenki na tapu bladzijde 25]

Di mi ben de wan srudati na ini Grikikondre, na ini 1951

[Prenki na tapu bladzijde 25]

Nanga Ekaterini na ini 1966

[Prenki na tapu bladzijde 26]

Mi nanga mi osofamiri na ini 1996: (fu kruktu-anusei go na reti-anusei, bakasei): Gregory, Christos, Toula; (fesisei) Lakes, Ekaterini, nanga mi