San Yu E Du Te Yu Abi wan Kesekese Nanga Trawan?

IBRI dei wi abi demakandra nanga ala sortu sma. Furutron, disi kan meki taki wi e prisiri èn taki wi e kon frustan tori na wan tra fasi. Sontron, a e meki so srefi taki sma e kisi kesekese nanga trawan. Son wan fu den kesekese seryusu ala di trawan na pikin problema nomo na ini wi aladei libi. Awansi o bigi a problema de, toku a fasi fa wi e du sani te wi abi kesekese nanga trawan, e wroko tapu a fasi fa wi e denki, a fasi fa wi e firi èn so srefi tapu a yeyefasi fu wi.

Te wi e du ala san wi man fu lusu kesekese na wan switi fasi, dan dati sa yepi wi fu libi wan moro gosontu libi èn fu abi wan moro bun matifasi nanga tra sma. Wan odo fu owruten e taki: „Wan korostu ati na a libi fu den pisi fu a skin.”—Odo 14:30.

Heri tra fasi leki disi wan odo e taki: „Neleki wan foto di den broko go na ini, sondro wan skotu, na so a man de di no man dwengi en yeye” (Odo 25:28). Suma fu wi ben sa wani du sani di kan meki wi kisi takru prakseri makriki, takru prakseri di kan meki wi du fowtu sani — sani di kan meki sma kisi pen èn di kan gi wi pen? Dati ben kan pasa trutru efu wi e taki sani sondro fu basi na atibron fu wi. Na ini a Bergitaki, Yesus ben gi wi a rai fu ondrosuku a fasi fa wi e denki, fu di dati kan abi krakti tapu a fasi fa wi e lusu iniwan kesekese di wi ben kan abi nanga trawan (Mateus 7:3-5). Na presi fu suku fowtu na tra sma, wi musu prakseri fa wi kan kweki èn tan abi matifasi nanga sma di abi difrenti fasi fu si sani èn di abi difrenti sortu background.

A Fasi Fa Wi E Denki

Efu wi e denki taki wan kesekese de, noso efu wi abi wan trutru kesekese nanga wan tra sma, dan a fosi sani di wi musu du, na fu erken taki wisrefi kan kisi takru prakseri nanga fowtu fasi fu denki. Den Buku fu Bijbel e memre wi taki wi alamala e meki fowtu „èn no e doro a glori fu Gado” (Romesma 3:23). Moro fara, efu wi e gebroiki a koni fu man si sani krin, dan wi ben kan kon si taki a problema fu wi no bigin na a tra sma. Nanga disi na prakseri, dan meki wi luku na ondrofenitori fu Yona.

Yehovah ben gi Yona a komando fu go na a foto Ninifei. So bun, a ben go preiki a krutu di Gado ben o tyari heri esi tapu den sma di ben e libi drape. A moi bakapisi fu dati ben de taki a heri foto Ninifei ben abi berow èn ben bigin bribi ini a tru Gado (Yona 3:5-10). Yehovah ben firi taki a sori di den ben sori berow, ben bun nofo fu gi den pardon. So bun, a ben meki den tan na libi. „Ma disi no ben plisi Yona srefisrefi, èn a ben kisi bigi atibron” (Yona 4:1). A de wan fruwondru sani taki Yona ben denki so fu a sari-ati di Yehovah sori. Fu san ede Yona ben atibron nanga Yehovah? A sori taki Yona ben e prakseri en eigi firi nomo. A ben denki taki en fesi ben fadon fesi den sma na ini a libimakandra. A no ben man warderi a sari-ati fu Yehovah. Na wan switi fasi, Yehovah ben meki Yona ondrofeni wan sani nanga yepi fu wan eksempre. Dati ben yepi en fu kenki en fasi fu denki èn a ben yepi en tu fu si taki a sari-ati fu Gado na wan tumusi warti sani (Yona 4:7-11). A krin fu si,  taki na Yona ben musu kenki en fasi fu denki, a no Yehovah ben musu du dati.

A de so nanga wi tu, taki son leisi wi musu kenki a fasi fa wi e denki fu wan afersi? Na apostel Paulus e frumane wi: „Teki fesi te unu e gi makandra grani” (Romesma 12:10). San a ben wani taki nanga disi? Wán sani na taki a e gi wi deki-ati fu de reidelek. A e gi wi deki-ati tu fu sori tra Kresten bigi lespeki èn fu gi den grani. Disi wani taki dati wi e erken taki ibri sma abi a grani fu luku gi ensrefi san a wani. Paulus e memre wi tu: „Ibri sma sa tyari en eigi lai” (Galasiasma 6:5). Fu dati ede, a ben o de wan koni sani trutru fu luku fosi efu a no de fanowdu fu kenki wi eigi fasi fu denki, fosi kesekese meki wan bigi problema kon! Wi musu wroko tranga fu denki neleki Yehovah èn fu tan ini vrede nanga tra sma di lobi Gado trutru.—Yesaya 55:8, 9.

A Fasi Fa Wi E Du Sani

Prakseri fu tu yongu pikin di e hari na a srefi preisani. Ibriwan fu den e hari tranga moro nanga moro fu di den wani a sani. A kan, taki den e bigin kosi makandra ini a feti. Dati ben kan go so doro teleki te fu kaba wán fu den e lusu a preisani, noso teleki wan tra sma e kon fu tapu a feti.

A tori na ini Genesis e fruteri wi taki Abraham ben yere fu wan kesekese na mindri den skapuman fu en nanga di fu en neef Lot. Abraham ben teki fesi fu go na Lot èn taki: „Grantangi, no meki trobi de moro na mindri mi nanga yu èn na mindri den skapuman fu mi nanga den skapuman fu yu, bika wi man na brada fu makandra.” Abraham ben abi a fasti bosroiti fu no meki no wan feti broko a matifasi di den ben abi. O fara a ben wani go srefi? Leki a moro owru man, a ben abi a grani fu taki fosi Lot san a ben wani. A no ben abi trobi fu lasi a grani dati srefisrefi; a ben de klariklari fu gi wan sani di a ben abi. Abraham ben gi pasi meki Lot luku pe a ben wani tyari en osofamiri nanga den ipi fu en. Lot now, ben teki a moro fatu gron fu Sodom nanga Gomora gi ensrefi. Abraham nanga Lot ben gowe libi makandra leki mati.—Genesis 13:5-12.

Efu wi wani tan abi bun matifasi nanga tra sma, dan wi de klariklari fu handri na a srefi fasi leki fa Abraham ben handri? A Bijbel ondrofenitori disi e sori wi na wan tumusi moi fasi fa wi kan handri te wi abi wan kesekese nanga tra sma. Abraham ben aksi: „No meki trobi de moro.” San Abraham ben wani trutru, na fu lusu a problema na wan switi fasi. Na a srefi fasi, a ben o de wan yepi trutru efu wi ben o taigi a sma taki wi wani tan abi wan bun matifasi nanga en. Dati ben sa yepi a sma fu frigiti taki yu nanga en no ben frustan makandra bun. Baka dati, Abraham ben tapu nanga den wortu „bika wi man na brada fu makandra”. Fu san ede wi ben sa meki so wan warti matifasi lasi gowe fu di wi e luku nomo san wi wani, noso fu di wi abi heimemre? Abraham ben poti prakseri krinkrin na den sani di ben de prenspari. A ben du dati nanga a lespeki di a ben lespeki ensrefi èn nanga grani, èn na a srefi ten a ben gi grani na en neef.

Situwâsi kan de pe a de fanowdu taki tra sma e yepi fu lusu a problema. Fa a ben o de wan moro bun sani efu den sma di abi a kesekese, kan lusu na afersi sondro fu trawan sabi fu dati! Yesus e gi wi deki-ati fu teki fesi fu meki vrede nanga wi brada èn fu aksi pardon efu a de fanowdu * (Mateus 5:23, 24). Disi wani taki dati wi sa musu abi sakafasi noso wan denki fu saka-atifasi, ma Petrus ben skrifi: „Unu alamala tai wan denki fu saka-atifasi leki wan banti lontu un mindribere, gi makandra, bika Gado e kakafutu gi den heimemrewan, ma a e gi no-frudini bun-ati na den sakafasiwan” (1 Petrus 5:5). A fasi fa wi e handri nanga tra anbegiman, abi langalanga fu du nanga a matifasi di wi abi nanga Gado.—1 Yohanes 4:20.

Na ini a Kresten gemeente, den ben kan aksi wi  fu no tan hori wisrefi na wan grani di wi abi, so taki a vrede kan tan. Furu fu den sma di abi demakandra nanga Yehovah Kotoigi nownowde, kon na ini Gado en famiri fu tru anbegiman na ini den feifi yari di pasa. Disi e meki wi ati prisiri trutru! A fasi fa wi e tyari wisrefi, trutru abi krakti tapu den sma disi èn tapu tra sma na ini a gemeente. Disi e sori kaba fu san ede a prenspari fu prakseri bun fosi, san wi sa du na ini wi prisiriten, fa wi sa gebroiki wi fri ten, sortu demakandra wi sa suku, noso sortu wroko wi sa teki. Èn te wi e du disi, dan wi musu hori na prakseri san tra sma ben sa kan denki fu wi. Iniwan sani di wi e du noso e taki kan meki tra sma denki taki wi e du fowtu sani? Den kan naki futu fu disi ede?

Na apostel Paulus e memre wi: „Sma mag du ala sani, ma a no ala sani bun. Sma mag du ala sani, ma a no ala sani e bow sma. Meki ibri sma no tan suku en eigi bun, ma di fu a tra sma” (1 Korentesma 10:23, 24). Leki Kresten, wi e broko wi ede trutru fu tranga a lobi nanga a wánfasi fu wi Kresten bradafasi.—Psalm 133:1; Yohanes 13:34, 35.

Wortu Di E Dresi Sma

Wortu kan abi so wan bigi krakti taki den kan meki sani waka bun. „Switi wortu na wan oni-godo, switi gi a sili èn dresi gi den bonyo” (Odo 16:24). A tori fu Gideon di ben drai baka gi wan feti nanga den Efraimsma, e sori fa na odo disi tru.

Di Gideon ben de na ini wan hebi feti nanga Midian, dan a ben aksi a lo fu Efraim fu kon yepi en. Ma baka a feti, dan Efraim ben mandi èn den ben kragi taki Gideon no ben aksi den fu kon yepi na a bigin fu a feti. A skrifi taki „den ben suku fu meki trobi nanga en nomonomo”. Gideon ben piki den baka: „San mi du, te mi e teki misrefi gersi nanga unu? Den tarwe di Efraim piki, no bun moro leki den droifi di Abiyeser koti? Na ini un anu, Gado ben gi den granman fu Oreb nanga Se-eb, èn san mi ben man du, te mi e teki misrefi gersi nanga unu?” (Krutubakra 8:1-3). Fu di Gideon ben taki wortu di a ben prakseri bun fosi, wortu di ben gi kowru-ati, meki a no ben abi fu bigin wan feti na mindri lo di ben kan abi takru bakapisi srefisrefi. A kan, taki den sma fu a lo fu Efraim ben abi a problema taki den ben feni densrefi prenspari moro leki tra sma èn taki den ben abi heimemre. Ma dati no ben meki Gideon tapu fu meki muiti so taki den ben kan tan libi ini vrede nanga makandra. Wi kan du a srefi sani?

A kan, taki tra sma e kisi atibron èn dati kan meki den kon abi feantifasi nanga wi. Erken taki den e firi so wan fasi, èn pruberi fu frustan fa den e denki. A de so, taki kande wi du wan sani di meki den firi so wan fasi? Efu a de so, dan fu san ede wi no e fruteri taki a trobi bigin fu di wi fowtu tu. Sori tu fa yu e sari taki yu meki a problema kon moro bigi. Wan tu wortu di yu prakseri heri bun na fesi, ben sa kan meki wan matifasi di ben broko, kon bun baka (Yakobus 3:4). San son sma di atibron abi fanowdu, na taki wi e fruteri den nomo na wan switi fasi taki den no abi fu broko den ede. Bijbel e taki dati „pe udu no de, a faya e dede” (Odo 26:20). Iya, wortu di yu prakseri bun na fesi èn di yu taki na a yoisti fasi, kan „drai atibron puru” èn kan de wan dresi trutru.—Odo 15:1.

Na apostel Paulus e fruteri wi san wi musu du: „Efu a kan, so langa a e anga fu unu, abi vrede nanga ala sma” (Romesma 12:18). A tru taki wi no kan meki sma firi leki fa wi wani taki den musu firi, ma wi kan du sani di sa yepi fu meki vrede de. Na presi fu gi pasi meki fowtu sani di wi taki noso fowtu sani di trawan taki abi krakti tapu a fasi fa wi e du sani, wi musu meki muiti nownow fu gebroiki Bijbel gronprakseri di e wroko heri bun. Efu wi e du sani leki fa Yehovah e leri wi fa fu du sani te wi abi wan kesekese nanga trawan, dan dati sa meki taki wi sa abi vrede nanga koloku fu têgo.—Yesaya 48:17.

[Futuwortu]

[Prenki na tapu bladzijde 24]

Wi wani nomonomo taki sani musu waka leki fa wi wani?

[Prenki na tapu bladzijde 25]

Abraham ben gi wan tumusi moi eksempre fu sakafasi di a ben musu lusu wan kesekese