Srakti-ofrandi fu Prèise Di E Plisi Yehovah
Srakti-ofrandi fu Prèise Di E Plisi Yehovah
„Pristeri un skin leki wan srakti-ofrandi di de libilibi, di santa èn di e fiti Gado ai.”—ROMESMA 12:1.
1. San Bijbel e taki fu a waarde fu den srakti-ofrandi na ondro a Wet fu Moses di no de gi ala ten?
„FU DI a Wet abi wan skaduw fu den bun sani di musu kon ete, ma no den sani srefi, meki sma noiti, nanga den srefi srakti-ofrandi di den e tyari doronomo yari baka yari, no kan meki den wan di e kon fu tyari den, kon de volmaakti” (Hebrewsma 10:1). Drape, na apostel Paulus ben fruklari krinkrin taki no wan fu den ofrandi di ben tyari na ondro a Wet fu Moses ben abi waarde fu frulusu a libisma famiri gi ala ten.—Kolosesma 2:16, 17.
2. Fu san ede a no de wan soso sani fu pruberi fu frustan den finifini tori fu den ofrandi nanga srakti-ofrandi fu a Wet na ini Bijbel?
2 Disi wani taki dati den tori fu ofrandi na ini den fosi feifi buku fu Bijbel no abi waarde moro gi Kresten na ini a ten disi? Fu taki en reti, no so langa pasa, dan moro leki wán yari langa, sma di ben abi prati na a Theokrasia Diniwroko Skoro na ini den gemeente fu Yehovah Kotoigi na heri grontapu, ben leisi den fosi feifi buku fu Bijbel. Wan tu fu den ben abi fu du furu muiti fu leisi èn frustan ala den finifini tori. Ala den muiti fu den ben de fu soso? Kwetikweti, bika „ala sani di ben skrifi fositen ben skrifi fu gi wi leri, taki nanga a hori di wi e horidoro èn nanga a trowstu fu den Buku fu Bijbel, wi ben sa abi howpu” (Romesma 15:4). Na aksi de so bun: San na a „leri” nanga a „trowstu” di wi kan feni na ini den tori fu ofrandi nanga srakti-ofrandi di skrifi na ini a Wet?
Fu Gi Wi Leri Nanga Trowstu
3. Sortu fondamenti sani wi abi fanowdu?
3 Ala di wi no e tyari ofrandi soleki fa a Wet e taki dati, toku ete wi abi fanowdu san den ofrandi ben du gi den Israèlsma, namku fu kisi pardon fu wi sondu èn fu prisiri fu a feni di Gado e feni wi bun. Ma ala di wi no tyari den sortu srakti-ofrandi fu a Wet moro, dan fa wi kan kisi den winimarki fu dati? Baka di Paulus e sori san den srakti-ofrandi fu meti no man du, dan a e fruklari: „Dati meki di [Yesus] e kon na grontapu a e taki: „ ’Srakti-ofrandi nanga a tyari fu ofrandi yu no ben wani, ma yu ben sreka wan skin gi mi. Heri bron-ofrandi nanga sondu-ofrandi, yu no ben feni bun.’ Ne mi ben taki: ’Luku! Mi kon (na ini a lolo fu a buku den skrifi fu mi) fu du yu wani, o Gado.’”—Hebrewsma 10:5-7.
4. Fa Paulus e gebroiki Psalm 40:6-8 gi Yesus?
4 Paulus ben teki wortu fu Psalm 40:6-8, èn a e sori taki Yesus no ben kon fu meki „srakti-ofrandi nanga ofrandi” go doro, fu meki a „heri bron-ofrandi nanga sondu-ofrandi” go doro. Ala den sani disi Gado no ben feni den bun moro na a ten disi di Paulus ben skrifi en brifi. Na presi fu dati, Yesus ben kon nanga wan skin di en hemel Tata ben sreka gi en, wan skin di na ala fasi ben kruderi nanga a skin di Gado ben sreka gi Adam di A ben meki en (Genesis 2:7; Lukas 1:35; 1 Korentesma 15:22, 45). Leki a volmaakti Manpikin fu Gado, Yesus ben de a „siri” fu na uma, soleki fa dati ben taki na fesi kaba na Genesis 3:15. Yesus ben sa sreka sani fu ’masi Satan na en ede’, ala di Satan ben o ’masi Yesus srefi na en bakafutu’. Na a fasi disi, Yesus ben tron a wrokosani di Yehovah ben gi fu frulusu a libisma famiri, wan sani di getrow man ben suku sensi a ten fu Abel.
5, 6. Fa Kresten kan go na Gado na wan moro bigi fasi?
5 Paulus ben taki fu a spesrutu rol disi fu Yesus, di a ben taki: „A wan di no ben sabi sondu, [Gado] meki tron sondu gi wi, so taki nanga yepi fu en wi ben sa kan tron a regtfardikifasi fu Gado” (2 Korentesma 5:21). Den wortu „meki tron sondu” kan vertaal tu nanga ’meki leki wan sondu-ofrandi’. Na apostel Yohanes ben taki: „A de wan zoen-ofrandi gi den sondu fu wi, ma no wawan gi di fu wi, ma so srefi tu gi di fu a heri grontapu” (1 Yohanes 2:2). Fu dati ede den Israèlsma ben kan go na Gado nanga yepi fu den srakti-ofrandi fu den gi wan pisi ten nomo, ma Kresten abi wan moro bun sani fu go na Gado — a srakti-ofrandi fu Yesus Krestes (Yohanes 14:6; 1 Petrus 3:18). Efu wi e poti bribi na ini a frulusu-ofrandi di Gado gi èn gi yesi na en, dan wi kan kisi pardon fu sondu tu èn prisiri fu a feni di Gado e feni wi bun èn a blesi di A e blesi wi (Yohanes 3:17, 18). Dati no e gi trowstu? Ma fa wi kan sori taki wi e poti bribi na ini a frulusu-ofrandi?
6 Baka di Paulus ben tyari kon na krin gi Kresten taki den abi wan moro bun sani fu go na Gado, dan na apostel e sori dri fasi fa wi kan sori wi bribi nanga wi warderi gi san Gado seti gi wi na wan lobi-ati fasi, soleki fa wi e leisi na Hebrewsma 10:22-25. Ala di a frumane fu Paulus ben de moro furu gi den wan di e waka „a pasi fu go na ini a moro santa presi” — dati na den salfu Kresten di e go na hemel, — toku a no de fu taki dati ala libisma musu poti prakseri na den santa wortu fu Paulus efu den wani feni winimarki fu a zoen-ofrandi fu Yesus.—Hebrewsma 10:19.
Tyari Srakti-ofrandi Di Krin èn Di No Doti
7. (a) Fa Hebrewsma 10:22 e sori san wan sma ben musu du te a ben tyari wan srakti-ofrandi? (b) San ben musu du fu de seiker taki Gado ben kan teki wan srakti-ofrandi?
7 Na fosi presi, Paulus e gi den Kresten tranga: „Meki wi kon na en nanga wan opregti ati, na ini ala dyaranti fu a bribi, fu di wi ben meki den natinati wi ati fu meki a kon krin fu wan godelowsu konsensi èn ben meki den wasi a skin fu wi nanga krin watra” (Hebrewsma 10:22). Den wortu di gebroiki dyaso, e sori krinkrin san wan sma ben musu du te a ben tyari wan srakti-ofrandi na ondro a Wet. Èn disi e fiti, bika fu Gado teki wan srakti-ofrandi, dan a ben musu òfer nanga wan bun ati èn a ben musu de krin èn a no ben musu pori. A meti di den ben o òfer, ben musu komoto fu den kaw, skapu, noso krabita, èn a ben musu de wan krin meti, èn gosontu. Efu a srakti-ofrandi ben de fu den fowru, dan a ben musu teki fu den yongu doifi. Efu dati ben de a situwâsi, dan Gado ben ’musu teki [na ofrandi] fu verzoen gi en’ (Lefitikus 1:2-4, 10, 14; 22:19-25). A siri-nyanyan ofrandi no ben abi srudeki di e prenki a pori di sani pori, èn so srefi a no ben sa abi oni, soleki fa a sori dan dati na a watra fu froktu, di kan kenki kon tron win. Te den ben òfer den srakti-ofrandi — meti noso siri-nyanyan — na tapu na altari, dan den ben poti sowtu tu, wan sani di e meki taki a srakti-ofrandi no e pori so esi.—Lefitikus 2:11-13.
8. (a) San a sma di ben tyari na ofrandi ben musu du? (b) Fa wi kan sorgu taki Yehovah e teki na anbegi fu wi?
8 San wi kan taki fu a sma di ben tyari na ofrandi? A Wet ben taki dati iniwan sma di ben kon na fesi Yehovah, ben musu de krin èn no ben musu doti. Efu wan sma ben kon doti awansi fu sortu sani tu, dan a ben musu òfer wan sondu-ofrandi noso wan paiman-ofrandi fosi, so taki a ben kon krin baka na fesi Yehovah èn so taki Yehovah ben sa kan teki a bron-ofrandi noso gemeenschap-ofrandi fu a sma (Lefitikus 5:1-6, 15, 17). Fu dati ede, wi tu e frustan o prenspari a de fu ala ten tan krin na fesi Yehovah? Efu wi wani taki Yehovah teki na anbegi fu wi, dan wi musu de gaw fu meki ibri ogri di wi du na den wet fu Gado kon bun baka. Wi musu de gaw fu teki den sani di Gado gi fu yepi wi — èn den sani di a gi na „den owruman fu a gemeente” èn a „zoen-ofrandi gi den sondu fu wi”, namku Yesus Krestes.—Yakobus 5:14; 1 Yohanes 2:1, 2.
9. San na a bigi difrenti na mindri den srakti-ofrandi di sma ben tyari gi Yehovah èn den wan di sma ben tyari gi den falsi gado?
9 Fu taki en leti, fu no kon pori na no wán fasi kwetikweti, ben de a bigi difrenti na mindri den srakti-ofrandi gi Yehovah èn den srakti-ofrandi gi den falsi gado di den pipel fu den kondre lontu Israèl ben tyari. Wan buku ben gi komentaar tapu a spesrutu sani disi fu den srakti-ofrandi na ini a Wet fu Moses, èn na ini a buku skrifi: „Wi kan si taki ini a tori fu den srakti-ofrandi na ini a Wet fu Moses, no wan sortu lukuman wroko ben kon na ini a tori; noiti sma ben bruya èn lasi densrefi, noiti den ben gi densrefi mankeri fu espresi, noiti den ben du santa hurudu, noiti den ben du ogri sani na seks sei, noiti den ben òfer libisma, noiti den ben tyari ofrandi gi den dedewan.” Ala den sani disi e poti prakseri na wán tru tori, èn dati na Yehovah de santa, èn no wan sortu fu sondu noso pori sani a e feni bun (Habakuk 1:13). Na anbegi fu en nanga den srakti-ofrandi di ben tyari gi en, ben musu de krin èn den no ben musu pori na skin sei, na a sei fu bun gwenti nanga wet, èn na yeye fasi.—Lefitikus 19:2; 1 Petrus 1:14-16.
10. Akruderi a frumane fu Paulus na Romesma 12:1, 2, dan fa wi musu ondrosuku wisrefi?
10 Fu dati ede, wi musu ondrosuku wisrefi na ini ala sani fu wi libi fu de seiker taki Yehovah e teki a diniwroko fu wi. Noiti wi musu denki taki so langa wi abi wan prati na den Kresten konmakandra èn na a diniwroko, dan a no abi trobi san wi e du na ini wi eigi libi. So srefi wi no musu firi taki te wi abi wan prati na den Kresten wroko, dan dati e gi wi pardon fu no du san a wet fu Gado e taigi wi ini tra sani ini wi libi (Romesma 2:21, 22). Wi no musu fruwakti taki Gado sa blesi èn feni wi bun, efu wi e meki wan sani di no krin na ini En ai, pori wi denki noso pori den sani di wi e du. No frigiti den wortu fu Paulus: „Mi e teki a sari-ati fu Gado begi unu, un brada, fu pristeri un skin leki wan srakti-ofrandi di de libilibi, santa èn e fiti Gado ai, wan santa diniwroko nanga a krakti fu un denki. Èn no kon de moro leki a seti fu sani disi, ma kon kenki fu di unu e kenki un prakseri, so taki unu kan ondrosuku èn si gi unsrefi san na a bun, switi èn volmaakti wani fu Gado.”—Romesma 12:1, 2.
Tyari Srakti-ofrandi fu Prèise Nanga Yu Heri Ati
11. San de tu na ini den wortu „meki bekènti na publiki”, soleki fa a skrifi na Hebrewsma 10:23?
11 Baka dati Paulus skrifi den Hebrewsma, èn a ben wani taki den musu poti den prakseri na wan tra prenspari sani fu tru anbegi: „Meki wi hori fasti na a meki di wi musu meki a howpu fu wi bekènti na publiki sondro fu degedege, bika a sma di gi a pramisi, de getrow” (Hebrewsma 10:23). Den wortu „meki bekènti na publiki” wani taki trutru „bekènti fu sondu”, èn Paulus e taki tu fu „wan srakti-ofrandi fu prèise” (Hebrewsma 13:15). A sani disi e memre wi na den sortu srakti-ofrandi di Abel, Noa, nanga Abraham ben tyari.
12, 13. San wan Israèlsma ben erken te a ben òfer wan bron-ofrandi? Èn san wi kan du tu fu sori a srefi fasi dati?
12 Te wan Israèlsma ben òfer wan bron-ofrandi, dan a ben du dati „nanga en fri wani na fesi Yehovah” (Lefitikus 1:3). Nanga yepi fu so wan srakti-ofrandi, a ben meki bekènti na publiki, noso a ben erken, nanga en friwani, taki Yehovah e blesi en pipel bogobogo èn A abi furu lobi bun-ati gi den. Memre taki wan spesrutu sani fu a bron-ofrandi ben de taki a heri ofrandi ben musu bron na tapu na altari — dati e prenki soifri fa wan sma e gi ensrefi abra na Gado èn e gi ensrefi na ini a dini fu Gado krinkrin. Na a srefi fasi tu, wi e sori wi bribi na ini a frulusu-ofrandi èn a warderi di wi e warderi a seti dati, te nanga wi heri ati èn nanga wi eigi friwani wi e òfer „srakti-ofrandi fu prèise, dati na a froktu fu wi mofobuba” gi Yehovah.
13 Ala di Kresten no e tyari trutru srakti-ofrandi — meti noso gruntu — toku den abi a frantwortu trutru fu gi kotoigi fu a Kownukondre bun nyunsu èn fu meki disipel fu Yesus Krestes (Mateus 24:14; 28:19, 20). Yu e meki bun gebroiki fu okasi di yu abi fu abi wan prati na a meki bekènti fu a bun nyunsu fu Gado Kownukondre na tra sma, so taki moro furu sma kan kon sabi den kefalek moi sani di Gado abi gi den libisma di e gi yesi na en? Nanga yu friwani, yu e teki yu ten èn e gi yu krakti fu leri sma di wani arki èn yepi den fu tron disipel fu Yesus Krestes? A fayafaya prati di wi abi na ini a diniwroko, na wan switi smeri fu wan bron-ofrandi di e kowru na ati fu Gado, èn so srefi a e plisi En.—1 Korentesma 15:58.
Prisiri fu De Mati Nanga Gado èn Nanga Tra Libisma
14. Fa den wortu fu Paulus na Hebrewsma 10:24, 25 gersi den sani di musu du na a gemeenschap-ofrandi?
14 Te fu kaba, Paulus e poti wi prakseri na a matifasi fu wi nanga kompekresten te wi e anbegi Gado. „Meki wi poti ai na makandra, so taki wi e tranga makandra fu sori lobi èn fu du bun wroko, fu no libi a kon di wi e kon makandra, soleki fa son wan abi a gwenti fu du, ma fu gi makandra deki-ati, èn dati moro furu, fu di unu e si a dei e kon krosibei” (Hebrewsma 10:24, 25). Den wortu soleki „e tranga makandra fu sori lobi èn fu du bun wroko”, „a kon di wi e kon makandra”, èn „fu gi makandra deki-ati”, ala den wortu dati e memre wi na a sani di a gemeenschap-ofrandi ben du gi a pipel fu Gado na ini Israèl.
15. Sortu srefi sani wi e si na mindri a gemeenschap-ofrandi nanga den Kresten konmakandra?
15 Sontron den e vertaal den wortu „gemeenschap-ofrandi” nanga „vrede-ofrandi”. A Hebrew wortu gi „vrede” dyaso de gi moro leki wán sani nomo. Kande dati e sori taki te wan sma ben abi prati na so wan srakti-ofrandi, dan dati ben meki a abi vrede nanga Gado èn vrede nanga kompe-anbegiman. Wan sabiman ben taki fu a gemeenschap-ofrandi: „Fu tru disi ben de wan switi ten fu abi demakandra nanga a Gado fu Frubontu, pe A ben meki ensrefi tron wan Fisitiman fu Israèl na a srakti-ofrandi nyanyan fu den, neleki fa ala ten a ben de a Sma di e teki den na En oso.” Disi e memre wi na a pramisi fu Yesus: „Pe tu noso dri sma e kon makandra na ini mi nen, na drape mi de na den mindri” (Mateus 18:20). Ala ten te wi e fisiti Kresten konmakandra, dan wi e nyan bun fu bun demakandra, fu leri di e gi wi deki-ati, èn fu a prakseri taki wi Masra Yesus Krestes de nanga wi drape. Dati e meki wan Kresten konmakandra wan trutru prisiri sani èn wan okasi fu meki wi bribi kon moro tranga.
16. Efu wi e prakseri a gemeenschap-ofrandi, dan san e meki den Kresten konmakandra spesrutu prisiri demakandra?
16 Na a gemeenschap-ofrandi, ala fatu — lontu na inibere, den niri, a lefre, den mindribere, èn so srefi a fatu tere fu a skapu — ben òfer gi Yehovah fu di den ben bron den, a ben tron smoko na tapu na altari (Lefitikus 3:3-16). A fatu ben de a moro bun pisi fu a meti. Te wan sma ben òfer dati na tapu na altari, dan a ben sori taki a ben gi Yehovah a moro bun sani di a ben abi. A sani di e meki Kresten konmakandra wan spesrutu prisiri sani, na taki wi no e kisi leri wawan, ma wi e òfer prèise gi Yehovah. A sani disi wi e du fu di wi e teki prati — nanga ala wi muiti ma toku nanga sakafasi — na a singi di wi e singi nanga wi heri ati, na arki di wi e arki bun, èn a gi di wi e gi komentaar te na okasi de. „Prèise Yah, un pipel!” na so a psalm skrifiman ben bari taki. „ Singi wan nyun singi gi Yehovah, a prèise fu en na ini a gemeente fu den loyaalwan.”—Psalm 149:1.
Bogobogo Blesi fu Yehovah E Wakti Wi
17, 18. (a) Sortu bigi srakti-ofrandi Salomo ben tyari na a ten fu na inwijding fu a tempel na Yerusalem? (b) Sortu blesi a pipel ben feni fu a fesa fu na inwijding fu a tempel?
17 Na a inwijding fu a tempel na ini Yerusalem, na ini a di fu seibi mun fu a yari 1026 b.G.T., Kownu Salomo ben òfer „wan bigi srakti-ofrandi na fesi Yehovah”, di ben abi na ini „a bron-ofrandi nanga a siri-nyanyan ofrandi èn den fatu pisi fu a gemeenschap-ofrandi”. Na tapu fu a siri-nyanyan ofrandi, a ben òfer 22.000 kaw nanga 120.000 skapu leki srakti-ofrandi na a okasi dati.—1 Kownu 8:62-65.
18 Yu kan si omeni a wroko ben kostu èn o bigi a wroko ben de na a bun bigi fesa dati? Toku, den blesi di Israèl ben kisi ben bigi srefisrefi moro den kostu di den ben meki. Na a kaba fu a fesa, Salomo „ben seni a pipel gowe; èn den ben bigin blesi a kownu èn ben go na den oso fu den, èn den ben breiti èn ben abi prisiri na ati fu ala den bun sani di Yehovah ben du gi en futuboi David èn gi en pipel Israèl” (1 Kownu 8:66). A de trutru, soleki fa Salomo e taki en, „a blesi fu Yehovah — dati na san e meki sma kon gudu, èn a no e poti pen na tapu”.—Odo 10:22.
19. San wi kan du tu fu kisi bigi blesi fu Yehovah now èn fu têgo?
19 Wi e libi now na a ten di a „skaduw fu den bun sani di musu kon ete” no de moro, ma na ini en presi kon „den sani srefi” (Hebrewsma 10:1). Yesus Krestes di e du priesterwroko leki na agersi bigi Granpriester, doro na hemel kaba èn drape a pristeri a waarde fu en eigi brudu fu verzoen ala den wan di e poti bribi na ini a srakti-ofrandi fu en (Hebrewsma 9:10, 11, 24-26). Na tapu gron fu a bigi srakti-ofrandi dati èn fu di nanga wi heri ati, wi e òfer na Gado srakti-ofrandi fu prèise di krin èn di no pori, meki wi tu kan go doro fu „breiti èn abi prisiri na ati”, e wakti den bogobogo blesi fu Yehovah di e kon.—Maleaki 3:10.
San Yu Ben Sa Piki?
• Sortu leri nanga trowstu wi kan feni fu den srakti-ofrandi nanga ofrandi di skrifi na ini a Wet?
• San ben de a fosi sani di ben de fanowdu fu Gado teki wan srakti-ofrandi, èn san dati wani taki gi wi?
• San wi kan òfer leki sani di gersi na òfer di sma ben òfer bron-ofrandi nanga den fri wani?
• Fa wi kan agersi den Kresten konmakandra nanga a gemeenschap-ofrandi?
[Aksi fu a tori disi]
[Prenki na tapu bladzijde 18]
Yehovah ben gi a frulusu-ofrandi fu Yesus fu frulusu a libisma famiri
[Prenki na tapu bladzijde 20]
Efu wi wani taki Yehovah musu teki a diniwroko fu wi, dan wi no musu doti na no wán fasi
[Prenki na tapu bladzijde 21]
Wi e erken a bun-ati fu Yehovah na publiki, te wi e go na ini a preikiwroko