A Diri Gudu Di Wi Kisi—San A Wani Taki gi Yu?
A Diri Gudu Di Wi Kisi—San A Wani Taki gi Yu?
„Un kon, unu di mi Tata blesi, teki a kownukondre di sreka gi unu sensi di grontapu seti.”—MATEUS 25:34.
1. Sortu sani libisma kisi fu trawan?
ALA libisma abi wan sani di den kisi fu wan trawan. Gi wan tu sma san den kisi kan meki taki den abi nofo moni fu libi switi. Gi trawan a sani di den kisi, e meki taki den e libi leki pôti sma. Na ini wan tu kefal, den sma di ben libi fosi, ben ondrofeni hebi sani; èn dati meki den pikin di ben kon baka den, ben kisi bita-ati gi sma fu tra ras. Ma wi alamala abi wan srefi sortu sani. Wi alamala kisi sondu fu a fosi man, Adam. A sani dati di wi kisi, e meki taki te fu kaba wi e dede.—Preikiman 9:2, 10; Romesma 5:12.
2, 3. Sortu sani Yehovah ben wani gi den pikin fu Adam nanga Efa biginbigin? Fu san ede den pikin no kisi a sani disi moro?
2 Yehovah leki wan lobi-ati hemel Tata, ben gi libisma wan heri tra sani na ini a bigin — a ben gi den têgo libi na ini volmaaktifasi na ini wan Paradijs. Wi fosi papa nanga mama, Adam nanga Efa, ben kisi wan volmaakti libi sondro sondu na ini a bigin. Yehovah Gado ben gi libisma a Grontapu disi leki wan kado (Psalm 115:16). A ben gi den a dyari fu Eden leki wan eksempre fu fa a heri grontapu ben o tron èn a ben gi wi fosi papa nanga mama wan kefalek moi wroko fu du. Den ben musu kisi pikin, den ben musu sorgu gi grontapu nanga ala den pransun nanga meti di de na en tapu, èn den ben musu meki a paradijs kon moro bigi teleki a heri grontapu ben o de wan Paradijs (Genesis 1:28; 2:8, 9, 15). Den pikin fu Adam nanga Efa ben o abi wan prati na a wroko disi. Fu tru, dati ben de wan kefalek moi gudu di Adam nanga Efa ben o gi den pikin fu den!
3 Ma fu nyan bun fu ala den sani disi, dan Adam nanga Efa nanga den pikin fu den ben sa musu de bun mati fu Gado. Den ben musu lobi Yehovah èn gi yesi na En; ma Adam nanga Efa ben misi fu sori warderi gi den sani di Gado ben gi den, èn den no ben gi yesi na san Gado ben taigi den. Den ben lasi a Paradijs oso fu den èn den ben lasi a moi sani di Gado ben o gi den. Fu dati ede, den no ben man gi a sani disi na den pikin fu den.—Genesis 2:16, 17; 3:1-24.
4. Fa wi kan kisi a gudu di Adam lasi?
4 Nanga sari-ati, Yehovah seti sani so taki den bakapikin fu Adam nanga Efa ben kan abi na okasi fu kisi a gudu di Adam ben lasi. Fa Yehovah du dati? Na tapu Gado en fasti ten, dan en eigi Manpikin, Yesus Krestes, ben gi en volmaakti libisma libi gi a bun fu den bakapikin fu Adam. Nanga a sani disi, Krestes ben bai den alamala. Ma den no e kisi a gudu disi somarso. Gado musu feni den bun fosi. Fu meki Gado feni den bun, dan den musu sori bribi na ini a srakti-ofrandi fu Yesus, di e tapu sondu; èn den e sori a bribi disi fu di den e gi yesi na Gado (Yohanes 3:16, 36; 1 Timoteus 2:5, 6; Hebrewsma 2:9; 5:9). A fasi fa yu e libi, e sori taki yu e warderi a seti disi?
Wan Gudu Di Kon Nanga Yepi fu Abraham
5. Fa Abraham ben sori taki a ben warderi a matifasi fu en nanga Yehovah?
5 Di Yehovah du san en abi na prakseri nanga grontapu, dan a ben handri na wan spesrutu fasi nanga Abraham. Yehovah ben taigi a getrow man dati fu libi en kondre èn froisi go na wan kondre di Gado srefi ben o sori en. Abraham ben de klariklari fu gi yesi na Gado. Baka di Abraham doro drape, dan Yehovah ben taki dati den bakapikin fu Abraham ben sa kisi a kondre leki wan gudu; èn a no Abraham ben o kisi a gudu (Genesis 12:1, 2, 7). San Abraham ben du? A ben de klariklari fu dini Yehovah, awansi pe a ben musu dini Gado noso fa a ben musu dini en, so taki den bakapikin fu en ben kan kisi a gudu fu den. Abraham ben dini Yehovah na ini wan kondre di no ben de fu en, so wan 100 yari, teleki a dede (Genesis 12:4; 25:8-10). Yu ben o du so wan sani? Yehovah ben taki dati Abraham ben de en „mati”.—Yesaya 41:8.
6. (a) San Abraham ben sori di a ben de klariklari fu òfer en manpikin? (b) Sortu diri gudu Abraham ben kan gi den bakapikin fu en?
6 Abraham ben wakti furu yari langa fu kisi wan manpikin, Isak, èn a ben lobi a boi dati srefisrefi. Di a boi ben gro tron wan yonkuman kaba, dan Yehovah ben taigi Abraham fu teki a boi èn òfer a boi leki wan srakti-ofrandi. Abraham no ben sabi taki san en ben o du, ben o sori san Gado srefi ben o du te a ben o gi en Manpikin leki wan frulusu-ofrandi; ma toku, Abraham ben gi yesi èn a ben de fu òfer Isak leki wan srakti-ofrandi, ne Yehovah en engel tapu Abraham fu du so (Genesis 22:9-14). Yehovah ben taki kaba taki den sani di A ben pramisi Abraham, ben sa kon tru nanga yepi fu Isak. Fu dati ede, Abraham ben bribi srefisrefi taki efu a ben sa de fanowdu, dan Gado ben kan meki Isak opo baka fu dede, ala di so wan sani noiti no ben pasa ete (Genesis 17:15-18; Hebrewsma 11:17-19). Fu di Abraham no ben hori srefi en manpikin na baka gi Yehovah, dati meki Yehovah ben fruklari: „Nanga yepi fu yu siri ala nâsi fu grontapu fu tru sa blesi densrefi” (Genesis 22:15-18). Disi ben sori taki a Siri di ben kari na Genesis 3:15, a Mesias leki frulusuman, ben sa kon nanga yepi fu a famirilin fu Abraham. Dati ben de trutru wan diri gudu fu kisi!
7. Fa Abraham, Isak, nanga Yakob ben sori taki den ben warderi a gudu di den kisi?
7 Abraham no ben sabi o prenspari a sani ben de di Yehovah ben du na a ten dati, èn so srefi en manpikin Isak nanga en granpikin Yakob no ben sabi dati; Yakob nanga Isak ben tron „erfgenaam nanga en fu a srefi pramisi”. Ma den alamala ben bribi tranga ini Yehovah. Den no ben go moksi densrefi nanga no wan fu den kownukondre foto na ini a kondre, bika den ben fruwakti wan moro bun sani — „a foto di abi trutru fondamenti, a foto di Gado na a bowman nanga a mekiman fu en” (Hebrewsma 11:8-10, 13-16). Ma, a no ala den bakapikin fu Abraham ben frustan o diri a gudu dati ben de di den ben kisi nanga yepi fu Abraham.
Den Wan Di No Ben Lobi a Gudu Di Den Kisi
8. Fa Esau ben sori taki a no ben warderi a gudu di a ben kisi?
8 Esau, a moro owru manpikin fu Isak, no ben warderi a reti di a ben abi leki a fosi geborewan. Esau no ben warderi santa sani. So bun, wan dei di angri ben kiri Esau, a ben seri a reti di a ben abi leki a fosi geborewan; a ben seri en gi en brada, Yakob. Gi san a ben seri en? Gi wan nyanyan fu brede nanga pesi! (Genesis 25:29-34; Hebrewsma 12:14-17) A nâsi di ben o meki den sani kon tru di Gado ben pramisi Abraham, ben komoto fu Yakob; èn Gado ben kenki Yakob en nen tron Israèl. A spesrutu gudu dati di den ben kisi, ben gi den sortu okasi?
9. Sortu frulusu den bakapikin fu Yakob, noso Israèl, ben kisi fu a yeye gudu fu den?
9 Na ini wan angriten, Yakob ben froisi nanga en osofamiri go na Egipti. Drape den ben meki pikin èn den ben kon de nanga furu sma, ma den ben tron srafu tu drape. Ma, Yehovah no ben frigiti en frubontu nanga Abraham. Na Gado en fasti ten, a ben frulusu den manpikin fu Israèl fu a katibo èn a ben taigi den taki a ben o tyari den go na „wan kondre pe merki nanga oni e lon”, a kondre di a ben pramisi Abraham.—Exodus 3:7, 8; Genesis 15:18-21.
10. Sortu kefalek sani di ben abi fu du nanga a gudu di den manpikin fu Israèl ben kisi, ben feni presi moro fara na a Sinaibergi?
10 Di den manpikin fu Israèl ben de na pasi e go na a Pramisi Kondre, dan Yehovah ben tyari den kon makandra na a Sinaibergi. Drape a ben taigi den: „Efu unu sa gi yesi soifri na mi sten èn trutru sa hori mi frubontu, dan seiker unu sa tron mi spesrutu gudu na mindri fu ala tra pipel, bika heri grontapu na fu mi. Èn unsrefi sa tron wan kownukondre fu priester èn wan santa nâsi gi mi” (Exodus 19:5, 6). Baka di ala sma fu a pipel ben agri nanga disi sondro dwengi, dan Yehovah ben go moro fara fu gi den a Wet fu En — wan sani di a no ben du noiti ete nanga no wan tra pipel.—Psalm 147:19, 20.
11. San ben de wan tu fu den diri sani di ben de na ini a yeye gudu di den manpikin fu Israèl ben kisi?
11 A nyun nâsi dati ben kisi wan yeye gudu trutru! Den ben anbegi a wan-enkri tru Gado. Gado ben frulusu den komoto fu Egipti èn den ben de kotoigi fu kefalek sani di e gi sma frede, èn di ben pasa di den ben kisi a Wet na tapu a Sinaibergi. A gudu di den ben kisi ben kon warti moro di den ben kisi „den santa wortu di Gado ben taki” nanga yepi fu den profeiti (Romesma 3:1, 2). Yehovah ben frukisi den fu de en kotoigi (Yesaya 43:10-12). A Mesias Siri ben o kon, komoto na ini a nâsi fu den. A Wet ben sori go na a Siri disi; a Wet ben o meki den kon sabi suma na en; èn a Wet ben musu yepi den fu frustan o tranga den ben abi a Siri disi fanowdu (Galasiasma 3:19, 24). Moro fara, den ben o kisi na okasi fu dini makandra nanga a Mesias Siri dati leki wan kownukondre fu priester èn leki wan santa nâsi.—Romesma 9:4, 5.
12. Ala di den Israèlsma ben go na ini a Pramisi Kondre, toku san den no ben man ondrofeni? Fu san ede?
12 Yehovah ben hori ensrefi na en pramisi, dati meki a ben tyari den Israèlsma go na a Pramisi Kondre. Ma soleki fa na apostel Paulus ben tyari kon na krin baka ten, dan fu di den Israèlsma ben mankeri bribi, meki a kondre drape no ben de trutru wan „wan presi fu rostu”. Leki wan pipel, den no ben go na ini „a rostu fu Gado” fu di den no ben man si èn den no ben wroko na ini wánfasi nanga a sani di Gado ben abi na prakseri gi en eigi dei fu rostu, di ben bigin baka di Gado ben meki Adam nanga Efa.—Hebrewsma 4:3-10.
13. Fu di Israèl no ben warderi a yeye gudu di den ben kisi, meki san den ben lasi leki wan nâsi?
13 Den trutru Israèlsma srefi ben sa kan sorgu taki nofo sma ben o de fu abi wan prati nanga a Mesias na ini en hemel Kownukondre leki wan kownukondre fu priester nanga wan santa nâsi. Ma den no ben warderi a diri gudu fu den. Soso wan fikapisi fu trutru Israèlsma ben teki a Mesias di a ben kon. Dati meki soso wan pikin nomru fu Israèlsma ben de na ini a kownukondre fu priester soleki fa a ben taki na fesi. Yehovah teki a Kownukondre puru fu den sma di ben gebore leki Israèlsma èn A „gi [en] na wan nâsi di e meki den froktu fu en” (Mateus 21:43). Sortu nâsi na dati?
Kisi wan Gudu na ini Hemel
14, 15. (a) Baka di Yesus dede, dan fa den nâsi bigin blesi densrefi nanga yepi fu a „siri” fu Abraham? (b) San den sma fu „na Israèl fu Gado” e kisi leki wan gudu?
14 A nâsi di ben kisi a Kownukondre ben de „na Israèl fu Gado”, Israèl na yeye fasi, di abi 144.000 salfu bakaman fu Yesus Krestes (Galasiasma 6:16; Openbaring 5:9, 10; 14:1-3). Wan tu fu den 144.000 sma ben de trutru Dyu, ma moro furu fu den 144.000 ben de sma fu den Heiden nâsi. Na a fasi dati, Yehovah en pramisi ben bigin kon tru; Yehovah ben pramisi Abraham taki nanga yepi fu en „siri” ala den nâsi ben sa kisi blesi (Tori fu den Apostel 3:25, 26; Galasiasma 3:8, 9). Na ini a fosi kontru dati, Yehovah Gado ben salfu den sma fu den nâsi nanga santa yeye èn A ben teki den leki manpikin na yeye fasi, brada fu Yesus Krestes. Na so den ben tron wan di fu tu pisi tu fu a „siri” dati.—Galasiasma 3:28, 29.
15 Bifo Yesus dede, dan a ben meki den Dyu sma di ben o de memre fu a nâsi dati, kon sabi a nyun frubontu; a frubontu dati ben sa kisi krakti nanga Yesus en eigi brudu. Tapu gron fu a bribi di den ben bribi na ini a srakti-ofrandi dati, dan Gado ben sa gi den wan disi di ben kon na ini a frubontu dati, „volmaaktifasi fu têgo” (Hebrewsma 10:14-18). Gado ben kan „fruklari [den] regtfardiki” èn a ben kan gi den pardon fu sondu (1 Korentesma 6:11). Na a fasi dati den de leki Adam, bifo Adam ben sondu. Ma, den wan disi no sa libi na ini wan paradijs na grontapu. Yesus ben taki dati a ben o sreka wan presi gi den na ini hemel (Yohanes 14:2, 3). Den e libi a howpu di den abi fu libi na grontapu na baka èn na presi fu dati den ’kan kisi wan gudu di ben poti na wan sei gi den na hemel’ (1 Petrus 1:4). San den e du drape? Yesus ben tyari kon na krin: „Mi e sroto wan frubontu nanga unu, . . . fu wan kownukondre.”—Lukas 22:29.
16. Sortu kefalek moi diniwroko den salfu Kresten o kisi fu du?
16 Wán fu den sani di den wan di o tiri makandra nanga Yesus na hemel, sa du, na taki den sa yepi fu puru ala fasi fu opruru teige a reti di Yehovah abi fu tiri grontapu (Openbaring 2:26, 27). Leki wan di fu tu pisi fu a yeye siri fu Abraham, den sa abi wan prati fu tyari a blesi fu libi ini volmaaktifasi kon gi sma fu ala nâsi (Romesma 8:17-21). Fu tru, dati na wan diri gudu di den abi!—Efeisesma 1:16-18.
17. Fu sortu sani fu a gudu di den salfu Kresten kisi, den e nyan bun fu en te den de na grontapu ete?
17 Ma a gudu di den salfu bakaman fu Yesus kisi a no soso gi a ten di e kon. Na wan fasi di no wan trawan kan du dati, Yesus ben yepi den fu sabi Yehovah, a wan-enkri tru Gado (Mateus 11:27; Yohanes 17:3, 26). Nanga den sani di Yesus ben taki èn nanga den sani di a ben du, a ben leri den san a wani taki fu ’frutrow tapu Yehovah’ èn san a wani taki fu gi yesi na En (Hebrewsma 2:13; 5:7-9). Yesus ben meki den sabi a waarheid ini a tori fu a sani di Gado abi na prakseri èn Yesus ben gi den a dyaranti taki a santa yeye ben sa yepi den frustan sani moro bun (Yohanes 14:24-26). A ben poti na ini den ati èn na ini den frustan, o prenspari a Kownukondre fu Gado de (Mateus 6:10, 33). Yesus ben gi den a wroko tu fu gi kotoigi èn fu meki disipel fu sma na Yerusalem, na Yudea, na Samaria, èn na den moro farawe presi fu grontapu.—Mateus 24:14; 28:19, 20; Tori fu den Apostel 1:8.
Wan Bigi Ipi E Kisi wan Diri Gudu
18. Fa a pramisi fu Yehovah taki ala den nâsi sa blesi densrefi nanga yepi fu Abraham „siri”, e kon tru na ini a ten disi?
18 Soleki fa a sori, dan ala den sma fu Israèl na yeye fasi, a „pikin ipi” fu Kownukondre erfgenaam, na sma di Gado frukisi kaba (Lukas 12:32). Someni tenti yari kaba, Yehovah poti prakseri na a tyari di a e tyari wan bigi ipi fu sma fu ala den nâsi kon makandra. So bun, a sani di Yehovah ben pramisi Abraham taki nanga yepi fu en „siri” ala den nâsi sa blesi densrefi, e kon tru na wan moro bigi fasi. A de wan prisiri sani, taki den blesiwan disi e du santa diniwroko gi Yehovah èn den e erken taki a frulusu fu den e anga fu bribi ini a Pikin Skapu fu Gado, Yesus Krestes (Openbaring 7:9, 10). Yu teki a switi kari di Yehovah e gi yu fu de na mindri a koloku grupu dati?
19. Sortu gudu den wan fu den nâsi di e kisi blesi now, e fruwakti fu kisi?
19 Sortu diri gudu, Yehovah e gi den wan di no de fu a pikin ipi? Nôno, a no a gudu fu libi na hemel. A de a gudu di Adam ben musu gi na den bakapikin fu en — a howpu fu libi fu têgo na ini volmaaktifasi na ini wan paradijs di safrisafri sa teki a heri grontapu abra. A sa de wan grontapu pe „dede no sa de moro, no wan sari, no wan babari, no wan pen no sa de moro” (Openbaring 21:4). Dan gi yu, a Wortu fu Gado di skrifi nanga en santa yeye e taki: „Frutrow tapu Yehovah èn du bun; tan libi na grontapu, èn handri nanga getrowfasi. Abi switi prisiri na ini Yehovah tu, èn a sa gi yu san na ati fu yu e aksi. Èn ete wan syatu pisi ten moro èn a godelowsuwan no sa de moro . . . Ma den safri-atisma srefi sa abi grontapu leki a gudu fu den, en den sa feni trutru switi prisiri na ini vrede pasa marki. Na den regtfardiki sma srefi sa abi grontapu leki a gudu fu den, èn den sa libi na tapu fu têgo.”—Psalm 37:3, 4, 10, 11, 29.
20. Fa den „tra skapu” e nyan bun fu furu fu den yeye gudu di den salfu Kresten e kisi?
20 Den „tra skapu” fu Yesus abi wan gudu di den sa kisi na ini a grontapu kontren fu a hemel Kownukondre (Yohanes 10:16a). Ala di den no sa de na ini hemel, toku den e kisi furu fu a yeye gudu di den salfuwan e nyan bun fu en. Nanga yepi fu a grupu fu salfuwan, „a getrow èn koni srafu”, den tra skapu kon frustan den moi pramisi na ini Gado Wortu (Mateus 24:45-47; 25:34). Den salfuwan nanga den tra skapu sabi a wan-enkri tru Gado, Yehovah, èn den e anbegi En leki wán grupu makandra (Yohanes 17:20, 21). Den e taki Gado tangi gi Yesus en srakti-ofrandi di e tapu sondu, èn den e du dati leki wán grupu makandra. Leki wán grupu makandra, den e dini leki wán ipi na ondro wán Skapuman, Yesus Krestes (Yohanes 10:16). Den alamala de wan pisi fu wán lobi-ati bradafasi na heri grontapu. Leki wán grupu makandra, den abi a grani fu de Kotoigi fu Yehovah èn fu en Kownukondre. Iya, efu yu na wan futuboi fu Yehovah di gi ensrefi abra na En èn di teki dopu kaba, dan ala den sani disi de na ini a yeye gudu di yu sa kisi.
21, 22. Fa wi alamala kan sori taki wi e boboi a yeye gudu di wi kisi?
21 O warti a yeye gudu disi de gi yu? Yu e si en leki so wan warti sani taki yu e meki a du di yu e du Gado wani de a moro prenspari sani na ini yu libi? Leki wan buweisi fu dati, yu e gi yesi na a rai fu en Wortu èn fu en organisâsi fu de na ala den konmakandra fu a Kresten gemeente doronomo? (Hebrewsma 10:24, 25) A gudu dati abi so furu waarde gi yu, taki yu e tan dini Gado awansi o tranga dati de tu? A warderi di yu e warderi a gudu dati, tranga nofo fu gi yu krakti so taki yu man kakafutu gi iniwan tesi di kan meki yu lasi a gudu disi?
22 Meki a de so, taki wi alamala e boboi a yeye gudu di Gado gi wi. Meki wi poti wi ai tapu a Paradijs di de na wi fesi e kon, èn meki wi abi wan prati doronomo na ala den grani na yeye fasi di Yehovah e gi wi now. Te wi e meki wi libi drai lontu wi matifasi nanga Yehovah, dan wi e sori trutru o furu waarde a gudu abi di Gado gi wi. Meki wi de na mindri den wan di e fruklari: „Mi sa hei yu, o mi Gado a Kownu, èn mi sa blesi yu nen te ten di no skotu, iya, fu têgo.”—Psalm 145:1.
Fa Yu Ben Sa Tyari Disi Kon na Krin?
• Efu Adam ben tan loyaal na Gado, dan sortu gudu a ben o gi wi?
• Fa den bakapikin fu Abraham ben du nanga a gudu di den ben kisi?
• Sortu sani de tu na ini a gudu di den salfu bakaman fu Krestes e kisi?
• San na a gudu di a bigi ipi e kisi, èn fa den kan sori taki den e warderi a gudu dati trutru?
[Aksi fu a tori disi]
[Prenki na tapu bladzijde 20]
Den bakapikin fu Abraham ben kisi a pramisi taki den ben o kisi wan diri gudu
[Prenki na tapu bladzijde 23]
Yu e warderi a yeye gudu fu yu?