’Den E Taki fu Bunfasi Nanga Lobi’

NA INI den yari di no pasa so langa ete, sma seti wan seryusu programa fu pori a nen fu Yehovah Kotoigi na ini Fransikondre. Fu kan gi den wan takru nen na publiki, meki gensman gebroiki leitori. Na a bigin fu 1999, Yehovah Kotoigi prati na heri Fransikondre 12 milyun traktaat di nen People of France, You Are Being Deceived! (Sma fu Fransikondre, Den E Kori Yu!) Na ini a traktaat disi, den Kotoigi e krutu na publiki den sani di sma taki fu pori den nen.

Wan tu dei baka a programa disi, dan datra masra Jean Bonhomme, di ben de wan memre fu a Parlement, ben seni wan brifi go na wan koranti kantoro fu den poti dati na ini koranti. A ben seni a brifi fu sori taki a no ben agri nanga den sani di sma ben taki fu den Kotoigi. A ben skrifi: „Wanwan leisi Yehovah Kotoigi e kon na mi oso. Den e kon fu taki nanga mi fu bunfasi nanga lobi di sa kon na a heri grontapu. . . . Den no e dwengi sma fu arki den. Den e taki nanga sakafasi èn den e arki na wan switi fasi te mi e taki wan lo sani di e sori taki mi no e bribi.”

Masra Bonhomme ben taki fu a fasi fa Yehovah Kotoigi e si sani akruderi Bijbel: „A no de wan bigi ogri te den no sabi ala sani fu grontapu. Ma te a de so, taki son politiekman no sabi ala sani fu grontapu, dan dati kan pori a vrede fu den sma fu a kondre, a kan pori a wánfasi fu a libimakandra tu.”