„Den Ten te Ala Sani Kon Bun Baka” De Krosibei!

Syatu bifo Yesus opo go na hemel, wan tu fu en getrow disipel ben aksi en: „Masra, na ini a ten disi yu e opo a kownukondre gi Israèl baka?” A piki fu Yesus ben sori taki wan pisi ten ben o pasa bifo a Kownukondre ben o kon. Na ini a ten dati, den bakaman fu en ben o abi wan bigi wroko fu du. Den ben sa musu de kotoigi fu Yesus „na Yerusalem èn na heri Yudea nanga Samaria èn te na a moro farawe presi fu grontapu”.—Tori fu den Apostel 1:6-8.

DEN no ben kan du a wroko dati na ini soso wan tu dei, wan tu wiki, noso wan tu mun. Toku, den disipel bigin preiki wantron. Ma den ben tan hori na prakseri a tori di abi fu du nanga a kon di sani o kon bun baka. Petrus ben taki fu dati nanga wan bigi ipi sma di ben kon makandra na ini Yerusalem, èn a ben taki: „Abi berow . . . èn drai baka, so taki den sondu fu unu kan figi puru, so taki ten di e gi kowru-ati kan kon fu Yehovah èn so taki a kan seni a Krestes di de fu unu, Yesus, go, di musu tan na hemel srefi te leki den ten te ala den sani kon bun baka, di Gado ben taki fu dati nanga yepi fu a mofo fu den santa profeiti fu en fu owruten.”—Tori fu den Apostel 3:19-21.

Den „ten [disi] te ala sani kon bun baka” ben musu tyari „ten di e gi kowru-ati” kon fu Yehovah. A kon di sani ben o kon bun baka, soleki fa ben taki na fesi, ben o feni presi ini tu pisi. Na fosi presi, sani ben o kon bun baka na yeye fasi èn dati ben o gi sma nyun krakti, wan sani di e pasa kaba na ini a ten disi. Na a di fu tu presi, dan wan trutru paradijs ben o seti na grontapu baka dati.

A Ten te Ala Sani O Kon Bun Baka E Bigin

Neleki fa na apostel Petrus ben sori a bigi ipi sma dati na ini Yerusalem, dan ’Yesus ben tan na’ hemel. Disi ben de so te 1914, di Yesus teki en kownu makti èn bigin tiri leki a kownu di Gado poti. Na a ten dati, soleki fa Petrus ben taki na fesi, dan Yehovah ben o „seni” en Manpikin, san wani taki dati A ben o gi Yesus okasi fu du san a ben musu du leki a moro prenspari sma na ini den sani di Gado abi na prakseri. Bijbel e fruteri fu a sani dati na agersi fasi: „Èn [Gado en hemel organisâsi] ben meki wan boi, wan manpikin, [Gado en Kownukondre na ini na anu fu Yesus Krestes] di musu wei ala den nâsi nanga wan isri tiki.”—Openbaring 12:5.

Ma den nâsi no ben prakseri srefisrefi fu saka densrefi na ondro a tiri fu Krestes. Fu tru, den ben kosi den getrow borgu fu en na grontapu di sma sabi leki Kotoigi fu Yehovah na ini a ten disi. Neleki den apostel di ben de fosi den, den Kotoigi no ben draidrai srefisrefi fu go doro nanga „a wroko fu gi kotoigi fu Yesus” (Openbaring 12:17). Na a wan kondre baka a trawan, sma moro nanga moro bigin gens a wroko di den opregti Kresten ben du. Na ini 1918, den ben tyari wan tu sma di ben abi frantwortu posisi na a edekantoro fu a Waktitoren Genootschap na ini Brooklyn, New York, go na krutu fu sani di den no ben du, èn den brada kisi strafu na wan onregtfardiki fasi, fu di den poti den na strafu-oso wan  langa pisi ten. Wan pisi ten a ben gersi taki a kotoigiwroko fu disiten di ben musu du „te na a moro farawe pisi fu grontapu” no ben o man du.—Openbaring 11:7-10.

Ma na ini 1919, den memre fu na edekantoro di ben poti na strafu-oso kon fri, èn baka dati den nen ben krin fu ala falsi kragi. Den no lasi ten fu bigin baka nanga a wroko fu meki ala sani kon bun baka na yeye fasi. Sensi a ten dati, a pipel fu Yehovah e prisiri fu a tanbun na yeye fasi, leki noiti bifo.

Den bigin nanga wan bigi kotoigiwroko fu leri sma fu ala nâsi fu du den sani di Yesus ben komanderi en bakaman fu du (Mateus 28:20). Fa a ben switi fu si taki wan tu fu den wan di ben sori eigifasi leki di fu meti bifo, ben kenki a fasi fa den ben denki! Den puru na owru persoonlijkheid fu den, di e meki den kisi den eigifasi leki „atibron”, „kosi”, nanga „dotitaki” èn den e weri a nyun persoonlijkheid, „di e meki kon nyun nanga yepi fu soifri sabi akruderi a prenki fu Gado di ben meki en”. Na yeye fasi, den wortu fu a profeiti Yesaya e kon tru na ini a ten disi srefi: „A wolfu [wan sma di fosi ben sori eigifasi leki di fu wan wolfu] sa tan trutru wan pisi ten na sei a pikin manskapu [a sma di e sori taki a abi safri-ati eigifasi], èn a penitigri srefi sa go didon na sei a pikin bokoboko, èn a pikin kaw nanga a yongu lew di abi neki-wiwiri, nanga a meti di kisi bun nyanyan, alamala makandra.”—Kolosesma 3:8-10; Yesaya 11:6, 9.

Dyonsro a Wroko fu Meki Sani Kon Bun Baka E Go Doro!

Boiti a kon di sani kon bun baka, wan sani di abi wan paradijs na yeye fasi leki bakapisi na ini a ten disi, dan a ten taki a planeiti fu wi sa tron wan trutru paradijs e kon krosibei esi-esi. Wan pikin pisi fu grontapu ben de wan paradijs na a ten di Yehovah ben poti den afo fu wi, Adam nanga Efa, na ini a dyari fu Eden (Genesis 1:29-31). Fu dati ede wi kan taki dati a Paradijs meki kon bun baka. Ma fosi dati pasa, dan falsi bribi di no e gi Gado grani musu puru fu grontapu. Den politiek elementi fu a grontapu disi sa du dati (Openbaring 17:15-18). Na a ten dati, dan den politiek nanga den bisnis elementi, makandra nanga den bakaman fu den sa kisi pori. Te fu kaba, dan den lasti gensman fu Yehovah — Satan Didibri nanga den ogri yeye fu en — sa sroto wán dusun yari langa — a heri pisi ten di a sa teki fu meki ala sani kon bun baka. Na a ten dati, dan a „gran sabana nanga a presi sondro watra sa breiti pasa marki, èn a woestijn opo presi sa de nanga prisiri èn a sa gi bromki leki a safraan” (Yesaya 35:1). A heri grontapu sa kon fri fu bruya (Yesaya 14:7). Srefi den milyunmilyun sma di dede sa opo baka fu libi na grontapu. Ala sma sa ondrofeni den winimarki fu a frulusu-ofrandi di sa meki sani kon bun baka (Openbaring 20:12-15; 22:1, 2). Brenisma, dofusma, noso malengrisma no sa de moro na grontapu. „Èn no wan sma di e libi drape sa taki: ’Mi siki’” (Yesaya 33:24). Syatu na baka a kaba fu a Dusun Yari Tiri fu Krestes, Gado sa lusu Satan nanga den ogri yeye fu en wan syatu pisi ten, èn den sa si fa a prakseri di Gado abi gi grontapu kon tru te so fara. Te fu kaba, den sa kisi pori fu têgo.—Openbaring 20:1-3.

Te a grontapu sa doro a kaba fu den dusun yari di de fanowdu fu meki sani kon bun baka, dan „ibri sani di e bro” sa prèise Yehovah èn den sa du dati fu ala ten (Psalm 150:6). Yu sa de na den mindri? Dati kan.