Kownukondre Preikiman E Fruteri

Nati den Siri fu Waarheid na ini Chili

NA INI a woestijn na a noordsei fu Chili, wan tu yari kan pasa bifo alen fadon. Ma te a fadon, dan a drei gron di lai nanga ston trutru e kenki kon tron wan bigi matamata fu difrenti sortu kloru bromki. A de wan kefalek moi sani fu si, èn a e hari sma fu ala presi na ini a kondre fu kon luku en.

Ma toku wan moro moi sani e pasa na mindri den sma fu Chili. Den watra fu waarheid di de na ini Bijbel e lon go na ini ibri uku fu a kondre, èn furu opregti sma e „gi bromki” kon tron disipel fu Yesus Krestes. Wan sani di sma e gebroiki fu prati den watra fu waarheid disi, na a telefon. Den ondrofenitori di e kon now, e sori den bun bakapisi di sma e kisi fu di den e gi kotoigi nanga yepi fu telefon.

• Den ben aksi wan furuten evangelie preikiman di nen Karina, fu demo na wan kring konmakandra fa fu gi kotoigi nanga yepi fu telefon. Ma Karina noiti ete ben preiki na a fasi dati. Fu gi en deki-ati fu teki prati na a kring konmakandra, dan wan owruman nanga en wefi ben taki nanga Karina fu wan tu penti di e sori fa fu gi kotoigi nanga yepi fu telefon. Den gi en deki-ati tu fu begi Yehovah fu sori en a pasi ini a tori disi. A du dati èn te fu kaba a bosroiti fu pruberi fu bel wan sma.

Karina teki wan telefon nomru fu wan dorpu di ben de krosibei. Wan uma di abi a wroko fu yepi sma di e bel, ben piki, èn Karina fruteri en fu san ede a bel. Na uma teki a tori na wan bun fasi èn den seti sani fu taki ete wan leisi baka dri dei. A gobaka nanga yepi fu telefon, ben abi leki bakapisi taki wan bijbelstudie ben opo, èn a ben gebroiki a brochure San Gado e aksi foe wi? Sensi a dei dati den e prisiri fu bun bijbelstudie, èn Karina seni buku go gi na uma so taki a ben kan kisi piki tapu den aksi fu en.

• Bernarda ben bosroiti fu gi kotoigi na wan man di ben meki wan fowtu di a ben bel, meki a bel a nomru fu en. Na presi fu sori taki a sani disi ben fruferi en, dan Bernarda taigi a man taki en na wan Kotoigi fu Yehovah, èn a aksi a man efu a ben abi yepi fanowdu. Wan takimakandra bigin, èn a man arki di Bernarda fruteri en taki Gado en Kownukondre heri esi sa puru kruktudu krinkrin. A man gi Bernarda en telefon nomru, èn Bernarda tyari gobaka nanga yepi fu telefon. Wan leisi di den ben abi wan takimakandra, dan Bernarda leisi wan pisi fu a buku Sabi di e tjari joe go na têgo libi. A man aksi en fa a ben kan kisi wan eksemplaar fu a buku, èn Bernarda seni wan go gi en makandra nanga wan Bijbel. A seti sani so taki wan brada fu a presi drape ben kan go na a man, èn now a brada disi e go doro fu „watra” a „prani” disi di e gro kon moi.

Iya, na ini a drei gron na yeye fasi fu a grontapu disi, siri di no de fu si e wakti fu sproiti, te den watra fu waarheid di e gi libi, doro den. Dusundusun sma di e pina fu dreiwatra e tan „sproiti” èn e tan „gi bromki” fu di den e tron getrow futuboi fu Yehovah Gado.—Yesaya 44:3, 4.