Sori a Srefi Fasi fu Denki fu Krestes
Sori a Srefi Fasi fu Denki fu Krestes
„Meki a Gado now di e gi horidoro nanga trowstu, sorgu taki unu abi a srefi fasi fu denki na un mindri di Krestes Yesus ben abi.”—ROMESMA 15:5.
1. Fa a fasi fa wan sma e denki kan abi krakti tapu en libi?
A FASI fa wan sma e denki, abi fu du nanga a fasi fa a e tyari en libi. Wan mi-no-ke fasi noso wan fayafaya fasi fu du sani, wan bun fasi noso wan takru fasi fu denki, wan fasi fu lobi feti noso wan fasi fu wroko makandra, wan fasi fu lobi kragi noso wan fasi fu de nanga tangi; ala den fasi disi kan abi furu krakti tapu a fasi fa wan sma e handri nanga situwâsi ini a libi noso fa tra sma e handri nanga en. Nanga wan bun fasi fu denki, wan sma kan de koloku srefi na ini muilek situwâsi. Gi wan sma nanga wan takru fasi fu denki, no wan sani de bun, srefi efu — te yu luku en bun — a libi e waka bun.
2. Fa wan sma e leri den fasi fu denki?
2 Fasi fu denki — bun noso takru — na fasi di wi kan leri. Fu taki en leti, den fasi disi na sani di sma musu leri. Collier’s Encyclopedia e taki fu wan beibi di gebore paspas: „Den fasi di a beibi o abi te fu baka, na fasi di a musu kisi noso na fasi di a musu leri, neleki fa a musu leri wan tongo noso iniwan tra bekwaamfasi.” Fa wi e leri den sortu fasi disi? Ala di furu sani kan prei wan rol, toku den moro prenspari sani di abi krakti na dati tapu, na a presi pe wan sma e libi èn den mati fu en. Na encyclopedia di wi ben kari kaba, e taki moro fara: „Wi e leri noso wi e teki den fasi abra fu den wan di de krosibei mati fu wi.” Dusundusun yari pasa, Bijbel ben taki wan srefi sortu sani: „A sma di e waka nanga koni sma, sa kon koni, ma a sma di abi fu du nanga den wan sondro frustan, a no sa go bun nanga en.”—Odo 13:20; 1 Korentesma 15:33.
Wan Eksempre fu Yoisti Fasi fu Denki
3. Suma ben de wan bun eksempre na a fasi fa a ben denki, èn fa wi kan waka na en baka?
3 Neleki na ini ala tra sani, dan Yesus Krestes gi wi a moro bun eksempre fu a sortu fasi fa wi musu denki. A ben taki: „Mi gi unu na eksempre, so taki unu ben sa du tu neleki fa mi ben du gi unu” (Yohanes 13:15). Efu wi wani de leki Yesus, dan wi musu leri fu en fosi. * Te wi e studeri a libi fu Yesus, dan wi abi na prakseri fu du san na apostel Petrus ben rikomanderi: „Fu a sani disi ede den ben kari unu, bika srefi Krestes ben pina fu unu ede, èn ben libi gi unu wan eksempre fu waka soifri na ini en futustap” (1 Petrus 2:21). A marki fu wi na fu de leki Yesus so furu leki wi man. Dati wani taki tu dati wi e kweki a fasi fa en ben denki.
4, 5. Sortu sani fu a fasi fa Yesus ben denki, Romesma 15:1-3 e poti krakti na tapu? Fa Kresten kan teki a srefi fasi disi abra?
4 San de ini a tori tu efu wi wani abi a srefi fasi fa Krestes Yesus ben denki? Kapitel 15 fu a brifi fu Paulus gi den Romesma e yepi wi fu piki na aksi dati. Na ini den fosi vers fu a kapitel disi, Paulus e sori go na wan kefalek moi eigifasi fu Yesus, te a e taki: „Ma wi di tranga, musu tyari den swakifasi fu den wan di no tranga, èn wi no musu plisi wisrefi. Meki ibriwan fu wi plisi a sma na en sei na ini san bun fu bow en. Bika Krestes so srefi no ben plisi ensrefi, ma soleki fa skrifi: ’Den kosikosi fu den wan di ben kosi yu, fadon na mi tapu.’”—Romesma 15:1-3.
5 Efu Kresten wani abi a srefi fasi fa Yesus e denki, dan den e kisi a deki-ati fu sreka densrefi fu dini trawan nanga den sani di den abi fanowdu èn nanga sakafasi, na presi fu den plisi densrefi wawan. Fu tru, a wani di den wani dini trawan nanga sakafasi, na wan fasi di e sori taki den na sma „di tranga”. Yesus, di ben tranga na yeye fasi moro leki iniwan libisma di oiti ben libi, ben taki fu ensrefi: „Neleki fa a Manpikin fu libisma no ben kon fu sma dini en, ma fu dini sma èn fu gi en sili leki wan lusu-paiman ini a presi fu furu sma” (Mateus 20:28). Na a srefi fasi, wi leki Kresten wani meki muiti fu dini trawan, so srefi fu dini den wan „di no tranga”.
6. Fa wi kan de leki Yesus te wi e kisi fu du nanga gens èn nanga a kosi di sma e kosi wi?
6 Wan tra fasi fa Yesus ben de, na taki ala ten a ben denki bun èn a ben du bun. Noiti a ben meki a takru fasi fa trawan e denki, abi krakti tapu en eigi bun fasi fa a ben denki fu a dini di a ben dini Gado; wi musu du a srefi sani tu. Di sma ben kosi Yesus èn di den ben frufolgu en fu di a ben anbegi Gado getrow, dan nanga ala pasensi, Yesus ben horidoro sondro fu kragi. A ben sabi taki gens ben o kon fu wan grontapu di no abi bribi èn di no e frustan noti; a gens disi ben o kon tapu den wan di e pruberi fu plisi a sma na den sei „na ini san bun fu bow en”.
7. Fa Yesus ben sori taki a de nanga pasensi, èn fu san ede wi musu de nanga pasensi tu?
7 Yesus ben sori a yoisti fasi fu denki tu na ini tra sani. Noiti a ben sori taki a lasi pasensi nanga Yehovah, ma a ben wakti nanga ala pasensi fu si fa Yehovah e du san En abi na prakseri (Psalm 110:1; Mateus 24:36; Tori fu den Apostel 2:32-36; Hebrewsma 10:12, 13). Boiti dati, Yesus no ben lasi pasensi nanga den bakaman fu en. A ben taigi den: „Leri fu mi”; fu di a ben abi „safrifasi”, dati meki den leri fu en ben bow sma èn ben gi den kowru-ati. Èn fu di a ben abi „sakafasi fu ati”, dati meki noiti a ben du sani nanga furu pranpran noso noiti a ben prei kefalek (Mateus 11:29). Paulus ben gi wi deki-ati fu teki den fasi fa Yesus ben denki, di a ben taki: „Tan hori a fasi fu denki disi na ini unu, di ben de na ini Krestes Yesus tu, di, ala di a ben de na ini a skin leki di fu Gado, no ben prakseri fu teki sani abra nanga tranga, dati wani taki, fu de a srefi leki Gado. Nôno, ma a ben leigi ensrefi èn ben teki a fasi fu wan srafu èn ben kon de leki libisma.”—Filipisma 2:5-7.
8, 9. (a) Fu san ede wi musu meki muiti fu kweki wan fasi fu denki pe wi no e denki wisrefi wawan? (b) Fu san ede wi no musu lasi-ati efu wi e misi fu du soifri leki Yesus ben du, èn fa Paulus ben de wan bun eksempre ini a tori disi?
8 A de makriki fu taki dati wi wani dini trawan èn taki wi wani poti den sani di den abi fanowdu leki moro prenspari leki den di fu wi. Ma efu wi ondrosuku wisrefi bun, dan kande wi sa si taki dati a no a fasi fa wi e denki èn taki wi ati no e firi fu du dati dorodoro. Fu san ede? Nomru wán, fu di wi kisi a fasi fu denki wisrefi nomo fu Adam nanga Efa; nomru tu, fu di wi e libi na ini wan grontapu di e taki dati yu musu denki yusrefi na a fosi presi (Efeisesma 4:17, 18). Efu wi wani kweki wan fasi pe wi no e denki wisrefi wawan, dan furutron dati wani taki dati wi musu du wan sani di no e kruderi nanga na onvolmaakti fasi di de na ini wi èn di wi kisi fu wi papa nanga mama. Fu man du a sani dati dan wi musu wani du en èn wi musu meki muiti gi dati.
9 Na onvolmaaktifasi fu wi, de krinkrin heri tra fasi leki a volmaakti eksempre di Yesus libi na baka gi wi. Kande wi e firi taki a no kan taki wi kan abi a srefi fasi fu denki leki Yesus. Ma luku a deki-ati di Paulus ben gi, nanga den wortu: „Mi sabi taki na ini mi, dati wani taki, na ini mi skin, no wan sani no de di bun; bika a man di mi man winsi de na ini mi, ma a man di mi man du san bun no de na ini mi. Bika a bun di mi wani du, mi no e du, ma na ogri di mi no wani du, na dati mi e du. Mi e prisiri trutru fu a wet fu Gado akruderi a sma di mi de na inisei, ma na ini den memre fu mi skin mi e si wan tra wet e feti nanga a wet fu mi frustan èn di e tyari mi go na ini katibo fu a wet fu a sondu di de na ini den memre fu mi skin” (Romesma 7:18, 19, 22, 23). A de tru, taki na onvolmaaktifasi fu Paulus ben tapu en ibritron baka fu du a wani fu Gado soleki fa a ben wani du en; ma a fasi fa Paulus ben denki èn ben firi fu Yehovah nanga den wet fu En, dati ben de wan bun eksempre gi trawan. A fasi fa wi e denki èn e firi fu Yehovah nanga den wet fu en, kan de wan bun eksempre tu gi trawan.
Puru den Fowtu Fasi fu Denki
10. Paulus ben gi den Filipisma deki-ati fu kweki sortu fasi fu denki?
10 A kan, taki wan tu sma musu puru a fowtu fasi fa den e denki? Iya, a kan. Na so a ben de tu nanga son Kresten na ini a fosi yarihondro. Paulus ben taki fa fu abi a soifri fasi fu denki, di a ben skrifi en brifi gi den Filipisma. A ben skrifi: „A no de so taki mi kisi en kaba [a libi na ini hemel nanga yepi fu a fruku opobaka] noso taki mi kon volmaakti kaba, ma mi e du muiti fu si efu mi kan grabu hori a sani tu di Krestes Yesus ben grabu hori mi gi dati. Brada, mi no e si misrefi leki wan sma di hori en kaba, ma wán sani de seiker: Ala di mi frigiti den sani di de na mi baka èn langa misrefi go na den sani di de na mi fesi, mi e suku fu doro a marki fu kisi a prijs fu a kari di Gado e kari sma go na tapusei, nanga yepi fu Krestes Yesus. So bun, meki someni fu wi di lepi, abi a fasi disi fu denki.”—Filipisma 3:12-15.
11, 12. Fa Yehovah e tyari kon na krin gi wi san na wan yoisti fasi fa wi musu denki?
11 Den wortu fu Paulus e sori taki iniwan sma di tron wan Kresten, ma di no e firi taki a de fanowdu fu go na fesi, abi wan fowtu fasi fu denki. A Kresten dati misi fu teki a fasi fa Krestes e denki (Hebrewsma 4:11; 2 Petrus 1:10; 3:14). Dan howpu no de moro gi so wan sma? Kwetikweti. Gado kan yepi wi fu kenki a fasi fa wi e denki èn e firi, efu wi wani dati trutru. Paulus ben taki moro fara: „Efu unu abi na prakseri fu du tra fasi, dan Gado sa tyari a denki disi kon na krin gi unu.”—Filipisma 3:15.
12 Ma toku, efu wi wani Gado tyari kon na krin gi wi a yoisti fasi fu denki, dan wi fu wi sei musu du wan sani tu. Wan sani di kan yepi den wan di e „firi fu [denki] tra fasi” so taki den kan kisi a yoisti fasi fu denki, na te den e studeri Gado Wortu. Den musu studeri Gado Wortu na wan seryusu fasi nanga yepi fu Kresten publikâsi di a „getrow èn koni srafu” e gi wi (Mateus 24:45). Kresten owruman di santa yeye poti na wroko „fu wei a gemeente fu Gado”, e prisiri te den kan gi yepi ini a tori disi (Tori fu den Apostel 20:28). Wi de nanga tangi na ati trutru taki Yehovah e hori na prakseri taki wi de onvolmaakti! Wi de en grantangi taki a wani yepi wi na wan lobi-ati fasi! Meki wi teki a yepi dati.
Leri fu Trawan
13. San na wan yoisti fasi fu denki te wi luku a Bijbel tori fu Yob?
13 Na ini Romesma kapitel 15, Paulus e sori wi taki efu wi e prakseri dipi fu den eksempre fu owruten, dan dati kan yepi wi fu kenki a fasi fa wi e denki. A e skrifi: „Ala sani di ben skrifi fositen ben skrifi fu gi wi leri, taki nanga a hori di wi e horidoro èn nanga a trowstu fu den Buku fu Bijbel, wi ben sa abi howpu” (Romesma 15:4). Wan tu fu den getrow futuboi fu Yehovah na ini a ten di pasa, ben musu puru wan tu spesrutu fasi fa den ben denki. Fu eksempre, ala nanga ala, Yob ben abi wan bun fasi fu denki. A no ben taki no wan takru sani fu Yehovah, èn noiti a ben meki a pina di a ben pina meki a lasi en frutrow na ini Gado (Yob 1:8, 21, 22). Toku Yob ben abi a denki taki en ben abi reti. Yehovah ben tyari Elihu go na Yob fu yepi Yob fu kenki a fowtu denki disi. Na presi fu Yob ben firi taki Elihu ben afrontu en, dan Yob ben abi sakafasi, èn a ben si taki a ben de fanowdu fu kenki en eigi denki, èn wantewante a bigin tyari den kenki disi kon.—Yob 42:1-6.
14. Fa wi kan de leki Yob te wi e kisi rai fu a fasi fa wi e denki?
14 Wi ben o du a srefi sani leki Yob? Efu wan tra Kresten ben o taigi wi na wan switi fasi taki a fasi fa wi e denki no de yoisti, wi ben o teki a rai dati? Meki wi de leki Yob, èn meki wi no „taki no wan takru sani fu Gado” (Yob 1:22). Efu wi e pina sondro taki wi abi a fowtu fu dati, dan meki noiti wi kragi taki na Yehovah tyari wi na ini den problema disi. Meki wi no pruberi fu sori taki na wi abi reti ala ten; meki wi no frigiti taki awansi sortu grani wi abi tu na ini Yehovah en diniwroko, toku wi „de soso-srafu” ete.—Lukas 17:10.
15. (a) Sortu fowtu fasi fu si sani wan tu fu den bakaman fu Yesus ben abi? (b) Fa Petrus ben sori taki a ben abi wan moi fasi fu si sani?
15 Na ini a fosi yarihondro, wan tu sma di ben arki Yesus, no ben sori wan yoisti fasi fu denki. Wan ten, Yesus ben taki wan sani di ben muilek fu frustan. Dati meki, „furu fu den disipel fu en, baka di den yere disi, ben taki: ’A leri disi tranga srefisrefi, suma kan arki en?’” Den disipel disi krinkrin ben abi wan fowtu fasi fu si sani. Èn a fowtu fasi disi ben meki taki den no ben wani arki Yesus moro. A tori e taki: „Fu a sani disi ede meki furu fu den disipel fu en ben drai go baka na den sani di den ben libi na baka, en den no ben waka moro nanga en.” Na ala den disipel ben abi wan fowtu fasi fu si sani? Nôno. A tori e taki moro fara: „Fu dati ede Yesus ben taigi den twarfu disipel: ’Unu no wani gowe tu?’ Simon Petrus ben piki en: ’Masra, na suma wi sa go?’” Baka dati, Petrus ben piki en eigi aksi: „Yu abi wortu fu têgo libi” (Yohanes 6:60, 66-68). Dati na wan kefalek moi fasi fu Petrus! Te wi e feni en muilek fu frustan den sani di den Buku fu Bijbel e tyari kon na krin noso den fruklari di kon moro soifri, dan a no ben sa de wan bun sani fu sori a srefi fasi fa Petrus ben si sani? A ben sa de wan don sani fu tapu nanga a dini fu Yehovah! Noso a ben sa de wan don sani tu fu taki sani kontrari „na eksempre fu gosontu wortu”! Èn ala den sani disi wi ben sa du nomo fu di wan tu sani de muilek fu frustan.—2 Timoteus 1:13.
16. Sortu takru fasi fu si sani den Dyu kerki fesiman ben abi na ini Yesus ten?
16 Den Dyu kerki fesiman fu a fosi yarihondro, no ben sori a srefi fasi fu denki leki Yesus. A fasti bosroiti di den ben abi fu no arki Yesus, den ben sori di Yesus ben opo Lasarus baka fu dede. Gi ibri sma nanga wan yoisti fasi fu denki, a wondru dati ben sa de wan trutru buweisi taki Gado ben seni Yesus kon. Ma toku wi e leisi: „Ne den ede-priester nanga den Fariseiman ben tyari a Sanhedrin kon makandra èn ben bigin taki: ’San wi musu du, bika a man disi e du furu marki? Efu wi meki a go doro na a fasi disi, dan den alamala sa poti bribi na ini en, èn dan den Romesma sa kon puru a presi fu wi, so srefi a nâsi fu wi.’” Fa den ben lusu a problema? „Sensi a dei dati den ben meki plan fu kiri en.” Boiti taki den ben seti sani fu kiri Yesus, dan den ben seti sani tu fu puru ala buweisi fu a wondru di Yesus ben du. „Den granpriester now ben meki plan fu kiri Lasarus tu” (Yohanes 11:47, 48, 53; 12:9-11). A ben sa de wan tegu sani trutru efu wi ben o teki a fasi disi abra! A ben sa de wan tegu sani tu efu wi e atibron fu sani di trutru de sani di musu meki wi prisiri! Iya, èn wi ben o de na ini bigi kefar tu!
Teki a Bun Fasi Fa Krestes Ben Denki, Abra
17. (a) Na ini sortu situwâsi Danièl ben sori taki a no ben frede? (b) Fa Yesus srefi ben sori taki a ben abi deki-ati?
17 Den futuboi fu Yehovah e tan abi wan bun fasi fu si sani. Di den feanti fu Danièl ben wani meki wan wet di ben o taki dati no wan sma ben musu begi na wan tra gado boiti na a kownu 30 dei langa, dan Danièl ben sabi taki a wet disi ben o muilek a matifasi fu en nanga Yehovah Gado. Danièl no ben o begi Gado 30 dei langa? Nôno, sondro fu frede, Danièl ben go doro fu begi Yehovah dri tron wán dei, neleki fa a ben gwenti du dati (Danièl 6:6-17). Na a srefi fasi Yesus no ben meki den feanti fu en tapu skreki gi en. Tapu wan sabadei, a ben miti wan man nanga wan drei anu. Yesus ben sabi taki furu fu den Dyu drape no ben lobi a sani taki a ben dresi wan sma tapu a sabadei. A ben aksi den fu densrefi taki fa den ben denki fu a tori. Di den no ben piki Yesus, dan a ben go doro èn a ben dresi a man (Markus 3:1-6). Noiti Yesus ben lon gi a diniwroko di a ben musu du, te a ben firi taki a ben de a yoisti sani fu du.
18. Fu san ede wan tu sma e gens wi, ma fa wi musu du nanga a takru fasi disi?
18 Na ini a ten disi, Yehovah Kotoigi e erken taki den srefi no musu meki trawan tapu skreki gi den, te den wan disi wani handri na wan takru fasi nanga den noso te den wani gens den. Efu den Kotoigi no du dati, dan den ben sa du tra fasi leki fa Yesus e denki. Furu sma e gens Yehovah Kotoigi; wan tu sma e gens den fu di den no sabi den Kotoigi bun, èn trawan baka e gens den Kotoigi fu di den abi bita-ati gi den èn gi a boskopu fu den. Ma meki noiti a pasa so taki a de di den de sondro switifasi, abi krakti tapu a bun fasi fa wi de. Noiti wi musu meki trawan drai wi nanga a fasi fa wi musu anbegi Yehovah.
19. Fa wi kan sori a srefi fasi fa Yesus Krestes ben denki?
19 Ala ten Yesus ben sori wan bun fasi fu denki fu den bakaman fu en èn fu den sani di Gado seti, awansi o tranga a ben de tu gi en (Mateus 23:2, 3). Wi musu teki na eksempre fu Yesus abra. A tru, wi brada de onvolmaakti, ma wi de onvolmaakti tu. Boiti dati, pe wi kan feni moro bun mati nanga trutru mati? A no de so taki wi kan feni den na ini a bradafasi fu wi na heri grontapu? Yehovah no meki wi frustan ala sani ete fu den sani di skrifi na ini En Wortu; ma sortu tra kerki e frustan moro sani fu a Wortu dati? Meki wi abi a yoisti fasi fu denki ala ten, a srefi fasi fu denki di Yesus Krestes ben abi ala ten. Wán fu den fasi dati, na a sabi di wi musu sabi fa fu wakti tapu Yehovah. A tori disi wi sa taki nanga makandra na ini a tra artikel.
[Futuwortu]
^ paragraaf 3 A buku A moro bigi man di oiti ben libi, di a Watchtower Bible and Tract Society of New York Inc., tyari kon na doro, e taki fu a libi nanga a diniwroko fu Yesus.
Yu Kan Tyari Disi Kon na Krin?
• Fa a fasi fa wi e denki, abi krakti tapu wi libi?
• Fruteri fu a fasi fa Yesus Krestes ben denki.
• San wi kan leri fu a fasi fa Yob ben si sani?
• San na a yoisti fasi fu denki di wi musu abi te wi e kisi fu du nanga gens?
[Aksi fu a tori disi]
[Prenki na tapu bladzijde 7]
Wan Kresten di abi a yoisti fasi fu denki, e meki muiti fu yepi trawan
[Prenki na tapu bladzijde 9]
Te wi e studeri Gado Wortu na wan seryusu fasi, dan dati e yepi wi fu kisi a fasi fa Krestes e denki