Ondrofenitori

Yehovah E Pai den Loyaal Futuboi fu En Ala Ten

SOLEKI FA VERNON DUNCOMBE BEN FRUTERI

Mi ben kaba nyan wan pikin sani latilati na neti èn soleki fa mi ben gwenti, dan mi ben leti wan sikaret. Dan mi aksi mi wefi Aileen: „Fa a ben de tide neti na a konmakandra?”

A PRAKSERI pikinso, dan a taki: „Den ben leisi wan brifi fu meki wan tu sani bekènti èn den ben kari yu nen. Den poti yu leki a dinari di musu seti sani, so taki sma kan yere a programa bun. A kaba pisi fu a brifi ben taki: ’Efu iniwan fu den brada disi di poti paspas fu du wroko na ini a gemeente, e smoko tabaka, dan den de fruplekti fu skrifi go na a Genootschap fu taki dati den no man teki a wroko disi.’” * Ne mi piki sondro draidrai: „We, . . . mmm! So bun, dati na san a brifi taki.”

Ne mi tai mi tifi. Mi teki a sikaret, masi en na ini na asbaki leti na mi sei. „Mi no sabi fu san ede den ben teki mi fu du a wroko disi. Ma noiti ete mi weigri fu du wan wroko di wan sma gi mi, èn mi no wani bigin du dati.” Mi ben teki a bosroiti fu no smoko noiti moro. A bosroiti dati ben abi wan bigi krakti tapu mi libi leki wan Kresten èn leki wan pokuman. Meki mi fruteri unu finifini fu wan tu sani di ben meki taki mi teki a bosroiti disi.

Na Osofamiri Libi Di Mi Ben De Yongu

Mi gebore tapu 21 september 1914 na Toronto, Kanada, leki a moro bigi manpikin fu Vernon nanga Lila. Mi lobi papa nanga mama ben de sma di ben e wroko tranga fu sorgu wan osofamiri fu fo boi nanga tu umapikin. Baka mi yu e kisi Yorke, dan Orlando, Douglas, Aileen, nanga Coral. Di mi ben abi neigi yari nomo, dan mi mama ben langa wan finyoro gi mi. Ne a sreka sani so taki mi ben kan kisi leri na a Harris School of Music (wan skoro pe den gi leri fu prei poku). A libi no ben makriki, ma Mama nanga Papa ben feni fasi fu pai bus  moni nanga skoro moni. Baka ten mi ben go na a Royal Conservatory of Music (wan poku hei skoro) na ini Toronto. Drape mi ben studeri poku tori nanga fa fu skrifi poku so taki a switi fu arki. Di mi ben abi 12 yari, dan mi ben teki prati na wan poku show pe wan tu sma nomo ben kan wini. Ala den foto ben teki prati na a show dati di ben hori na Massey Hall, a moro moi zaal fu a foto. Mi ben wini a dei dati èn mi ben kisi wan tumusi bun finyoro na ini wan dosu di ben meki fu kaiman buba.

Baka wan pisi ten, mi ben leri fu prei piano nanga a kontra bas (a moro bigi sortu finyoro). Furutron wan tu fu unu ben e prei poku na pikin fesa di ben de freida neti noso satra neti, èn wi ben prei so srefi na skoro fesa pe sma ben e dansi. Na wan fu den dansi disi mi ben miti Aileen a fosi leisi. Na ini a lasti yari di mi ben de na middelbaar skoro, dan mi ben e prei na ini wan tu bigi band na ini a heri foto. Baka di mi ben kisi mi diploma dan mi ben kisi a kari fu go prei na ini wan pikin band, a Ferde Mowry Orchestra. Teleki 1943 a ben de wan wroko di ben pai bun.

Mi Ben Leri Sabi Yehovah

Mi papa nanga mama ben leri sabi Bijbel waarheid a fosi tron, leti bifo a Fosi Grontapufeti. Dati ben pasa di Papa ben e wroko leki wan man di ben e seti sani na ini grasi kasi fu wan bigi wenkri na Toronto foto. Na a presi na wrokope pe den ben e seri nyanyan a ben e arki den takimakandra fu tu tra wrokoman di ben de Bijbel Ondrosukuman (soleki fa den ben sabi Yehovah Kotoigi na a ten dati). Te a ben doro oso na mofoneti, dan a ben e fruteri Mama san a ben yere. Wan tu yari baka dati, na ini 1927, dan den Bijbel Ondrosukuman ben hori wan bigi kongres na ini Toronto na a sport stadion, di ben de na a Canadian National Exhibition Grounds. Twenti na feifi sma di ben kon fu Ohio, Amerkankondre, ben feni wan sribipresi na ini wi oso di ben de tu uku moro fara fu a westsei portu fu a presi.

Baka dati, wan fu den Bijbel Ondrosukuman, Ada Bletsoe, ben bigin go na Mama furutron èn a ben libi den nyun publikâsi na baka. Wan dei a ben taki: „Frow Duncombe, wan pisi ten kaba mi e tyari buku gi yu. Oiti yu leisi wan fu den?” Ala di Mama ben e kweki siksi pikin, toku a ben teki a bosroiti fu bigin leisi den tijdschrift sensi a ten dati, èn noiti a ben tapu fu du dati. Ma mi no ben poti furu prakseri na den buku. Mi ben e pruberi fu puru mi diploma na skoro èn mi ben go dipidipi na ini a poku tori.

Na ini yuni 1935, mi nanga Aileen ben trow na ini na Anglikan kerki. Sensi mi ben gowe libi na United Church (wan kerki) di mi ben abi 13 yari, dan mi no ben de wan memre fu no wan enkri tra kerki; so bun, mi ben skrifi tapu a trow papira taki mi na wan fu Yehovah Kotoigi, ala di mi no ben de wan Kotoigi ete.

Wi ben e howpu taki, wan dei wi ben sa sorgu wi eigi osofamiri èn wi ben wani fu tron wan bun papa nanga wan bun mama. So bun, wi ben bigin leisi a Nyun Testamenti makandra. Ala di wi ben abi someni bun prakseri, toku tra sani ben kon na mindri. Ete wan leisi wi ben pruberi fu leisi makandra, ma a srefi sani ben pasa baka. Dan na a Kresneti ten fu 1935, wi ben kisi wan buku di nen De Harp Gods, di ben domru na ini kado papira. Mi wefi ben taki: „San! Disi na wan aparti Kresneti kado di yu mama seni gi wi.” Ma toku a ben bigin leisi en baka di mi ben go na wroko, èn a ben lobi san a ben leisi. Wan heri pisi ten mi no ben sabi taki a ben e leisi a buku. A howpu fu wi fu kweki pikin, no ben kon tru. Wi umapikin di ben gebore tapu 1 februari 1937, no ben libi. Fa a sani dati ben sari wi trutru!

Na a ten dati, mi famiri ben e du a preikiwroko fayafaya. Mi ben kon sabi taki Papa ben de a wan-enkri Kownukondre preikiman na ini a famiri di no ben sroto wan abonnement ete fu a tijdschrift Vertroosting (now Ontwaakt!). Dati ben de a marki di den ben wani doro a mun dati na ini a preikiwroko. Ala di mi no ben leisi no wan fu den publikâsi fu a Genootschap ete, toku mi ben sari en. Mi ben taki: „A bun Papa, poti mi nen gi wan abonnement, dan yu sa de neleki den trawan.” Di zomer doro, a band ben gowe libi a foto fu go prei na wan fakansi presi. Mi ben tan kisi a tijdschrift Vertroosting. Di herfst doro, a band ben go baka na Toronto. Den tijdschrift ben e tan kon na a nyun presi pe wi ben froisi go libi, èn mi no ben puru no wan fu den na ini a papira di ben domru den.

Na ini wan Kresneti fakansi fu wi, mi ben luku a bigi ipi tijdschrift. Ne mi ben taigi misrefi taki, efu mi ben pai gi den buku disi, dan awinsi fa no fa mi ben musu leisi wan tu fu den fu si san den ben taki. A fosiwan di mi ben leisi, ben skreki mi. A ben taki fu a kori di politiekman ben e kori sma  èn so srefi fu den kruka sani di ben pasa na a ten dati. Mi ben bigin fruteri den tra pokuman san mi ben e leisi. Ma den ben e tweifri efu san mi ben taki ben tru. Dati meki mi ben abi fu tan leisi so taki mi ben man sori taki den no abi leti. Sondro fu sabi, mi ben bigin gi kotoigi fu Yehovah. Èn sensi a ten dati, noiti mi ben tapu fu leisi den moi Bijbel publikâsi fu „a getrow èn koni srafu”.—Mateus 24:45.

Awansi mi ben abi furu wroko fu du mindri wiki, toku esi-esi mi ben bigin go sonde na den konmakandra nanga Aileen. Wan sonde na ini 1938, di wi ben doro na a konmakandra, tu owru sisa ben taigi wi odi èn wan fu den ben taki: „Yongu brada, yu teki a sei fu Yehovah kaba? Sabi taki Armagedon e kon heri esi!” Mi ben sabi taki Yehovah na a wan-enkri tru Gado èn mi ben abi na overtoigi taki disi na en organisâsi. Fu di mi ben wani de wan pisi fu na organisâsi, mi ben teki dopu tapu 15 oktober 1938. Aileen ben dopu siksi mun baka dati. Mi breiti taki ala sma fu mi famiri ben tron futuboi fu Yehovah di gi densrefi abra na en.

Fa a ben de wan prisiri gi mi fu abi demakandra nanga a pipel fu Gado! Syatu baka dati mi ben firi bun te mi ben de na den mindri. Te mi no ben man go na den konmakandra, dan ala ten mi ben wani fu sabi nomonomo san ben pasa na den konmakandra. A spesrutu neti di kari na a bigin, ben tyari wan kenki kon na ini mi diniwroko gi Yehovah.

Wan Ten fu Bigi Kenki gi Wi

Wan tra prenspari kenki gi wi ben feni presi tapu 1 mei 1943. Na ini september 1942 wi ben go fositron na wan bigi kongres, di ben nen Theocratische Nieuwe Wereld kongres (Theokrasia Nyun Grontapu Kongres) na Cleveland, Ohio. Drape, leti mindri wan ogri grontapufeti di ben gersi leki a no ben o tapu, wi ben yere a moi lezing fu brada Knorr, di ben de presidenti fu a Waktitoren Genootschap na a ten dati. Sondro frede a ben hori a lezing di nen „Vrede—A Sa Tan?” Wi e memre heri bun fa a ben gebroiki Openbaring kapitel 17 fu sori taki baka a feti, wan pisi ten fu vrede ben o de, èn wan bigi preikiwroko ben o du na a ten dati.

A lezing „Yefta Nanga En Pramisi” di brada Knorr ben hori bifo a wan disi, ben naki wi ati moro leki iniwan fu den tra lezing. Baka dati, den ben gi a kari fu moro sma go pionier! Mi nanga Aileen ben luku makandra èn unu ala tu ben taki (makandra nanga furu trawan na a srefi ten dati): „A sani disi na fu wi!” Wantewante wi ben bigin meki plan fu go du wan moro prenspari wroko.

Den ben tapu a wroko fu Yehovah Kotoigi na ini Kanada sensi 4 yuli 1940. Di wi ben bigin pionier tapu 1 mei 1943, dan lanti no ben feni en bun ete taki wi e gi kotoigi fu Yehovah èn taki wi e prati den publikâsi fu a Genootschap na ini a preikiwroko. Leki Kresten wi ben e tyari soso wi eigi King James Bijbel go na ini a diniwroko. Wan tu dei nomo baka di wi ben doro wi fosi pionier toewijzing na Tarry Sound, Ontario, dan a bijkantoro ben seni Stewart Mann kon. A pionier disi di ben lai ondrofeni, ben kon fu wroko makandra nanga wi na ini a preikiwroko. Dati ben de wan moi seti srefisrefi! Brada Mann ben abi bun maniri èn a ben abi switifasi. Wi ben leri fu en èn wi ben abi wan prisiri ten makandra. Wi ben abi furu bijbelstudie di a Genootschap ben seni wi go na Hamilton foto. No langa baka dati, ala di mi ben owru tumusi fu dini leki srudati, toku mi ben kisi a kari fu du srudati wroko. Fu di mi ben weigri fu go na ini a legre, meki skowtu ben hori mi tapu 31 december 1943. Baka di a krutu ben hori, mi ben abi fu koti strafu na ini wan tra kampu, pe mi ben tan teleki augustus 1945.

Di den lusu mi, dan wantewante mi nanga Aileen ben kisi wan tra pionier toewijzing fu go na Cornwall, Ontario. Syatu baka dati, wi ben go na Quebec fu di a Wettelijk Afdeling fu a Waktitoren Genootschap (di e luku krutu afersi) ben seni wi go drape fu go taki nanga skowtu krutubangi. Dati  ben pasa na ini Quebec na a ten fu Duplessis, di den ben e frufolgu Yehovah Kotoigi na wan ogri-ati fasi. Ibri wiki mi ben gebroiki furu dei fu yepi den brada fu wi na ini fo difrenti krutu. Den ten dati ben de span ten èn so srefi ten di ben e tranga a bribi.

Baka a kongres fu Cleveland na ini 1946, mi ben kisi a toewijzing fu dini leki kringopziener èn so srefi leki distriktopziener. A toewijzing disi ben meki taki mi nanga mi wefi ben go fu a wan sei fu Kanada te go miti a tra sei. Sani ben e pasa esi-esi. Na ini 1948 wi ben kisi a kari fu go na a di fu 11 klas fu a Waktitoren Bijbelskoro Gilead. Brada Albert Schroeder nanga Maxwell Friend ben de tu fu den leriman fu wi èn a klas fu wi ben abi 108 studenti, pe 40 salfuwan ben de na ini tu. Fu tru, makandra nanga someni dinari fu Yehovah di ben dini en langa ten kaba, na ondrofeni disi ben de wan di ben leri wi furu sani èn a ben gi wi furu prisiri.

Wan dei brada Knorr ben komoto na Brooklyn kon luku wi. Na ini en lezing a ben gi wan kari fu 25 sma di ben wani leri Yapantongo. Ala 108 sma ben gi densrefi leki friwani-wrokoman! So bun, a ben de a frantwortu fu a presidenti fu teki den wan puru di ben o kisi leri fu taki a tongo dati. Mi denki taki Yehovah ben tiri a bosroiti dati bika sani ben waka bun srefisrefi. Furu fu den 25 sma di ben teki puru èn di baka ten ben kisi a grani fu bigin a wroko na ini Yapan, de drape na ini a toewijzing fu den ete — iya, den owru, ma den de drape ete. Den ben puru son wan soleki Lloyd nanga Melba Barry èn den ben gi den wan tra toewijzing. Lloyd ben de wan memre fu a Tiri Skin teleki a dede a yari di pasa. Wi e prisiri nanga den alamala nanga a pai di Yehovah ben gi.

A dei di den ben o hori a programa gi den wan di kaba a skoro nanga bun bakapisi ben kon, èn den ben seni wi go na Jamaica. Ma fu di den krutu afersi na ini Quebec ben e go nanga langa, meki wi ben kisi a rai fu go baka na Kanada.

Moro Poku!

Awinsi mi ben libi poku na baka fu a pionierwroko ede, toku a ben gersi taki poku no ben gowe libi mi. Wan yari na baka, a presidenti fu a Genootschap, Nathan Knorr, nanga a sekretarsi fu en, Milton Henschel, ben kon na Maple Leaf Gardens na ini Toronto. A publikitaki fu brada Knorr di ben nen „Is het later dan u denkt?” (A De Moro Lati Leki Yu Denki?) ben seki ibriwan sma. Disi ben de a fosi leisi di mi ben kisi wan kari fu sorgu gi a grupu pokuman di ben o prei poku na a kongres. Wi ben skrifi fa den musu prei wan tu pôpi singi na ini a Kingdom Service Song Book (Singibuku fu a Kownukondre Diniwroko) (1944). A ben gersi taki den brada ben feni en moi. Di a programa ben kaba satra bakadina, dan wi ben oefen den poku di wi ben o prei sonde. Di mi ben si brada Henschel waka kon miti wi, dan mi ben stop a grupu pokuman fu prei, so taki mi ben kan go fu taki nanga en. A ben aksi: „Omeni pokuman de dyaso na ini yu grupu?” „Te alamala de dya, dan a de so wan 35 sma”, mi ben piki. „We, a tra zomer yu sa abi tu tron moro furu na ini New York”, a ben piki.

Ma bifo a zomer ben doro, mi ben kisi wan kari fu kon na Brooklyn. Biginbigin Aileen no ben man kon nanga mi, fu wan tu situwâsi ede. Den no ben kaba bow a nyun 124 Columbia Heights ete. Fu dati ede mi ben kisi wan sribipresi na ini a fosi Bethel-oso, na ini wan pikin kamra nanga tu salfu brada — wan owru brada Payne nanga Karl Klein, di mi ben miti fu a fosi leisi now. Tumusi furu sma ben de na ini a kamra? Iya. Ma toku wi ben e libi bun nanga makandra. Den owru brada ben frudrage furu èn den ben abi pasensi. Mi ben pruberi nomo, fu no hendri den! Dati ben de wan warti sani di ben sori san Gado yeye kan du. Di mi ben leri sabi brada Klein èn wroko makandra nanga en, dan dati ben tyari so furu blesi gi mi. Ala ten a ben abi switifasi èn a ben e yepi trawan. Wi ben wroko switi makandra èn wi ben tan bun mati fu moro leki 50 yari.

Mi ben kisi a grani fu yepi nanga poku na den kongres na a Yankee Stadium na ini 1950, 1953, 1955 nanga 1958. Boiti dati, dan makandra nanga Al Kavelin, mi ben abi a frantwortu gi a band na a kongres fu 1963, di ben hori na a Rose Bowl stadion na Pasadena, California. Na a kongres fu 1953, na Yankee Stadium, wan poku programa ben de sonde, bifo a publikitaki ben hori. Erich Frost ben tyari Edith Shemionik (baka ten Weigand) kon, di ben e singi nanga wan fini sten. A ben singi a singi, „Go na fesi, oen Kotoigi!” makandra nanga a band fu wi. Dan wi ben prisiri srefisrefi di wi ben yere fositron den tumusi moi sten fu wi Afrikan brada nanga sisa. A zendeling Harry Arnott ben tyari wan tumusi moi cassette lolo fu Noord-Rodesia (now Sambia). Dati ben de wan prisiri sani fu arki. Yu ben kan yere den sten na ini a heri stadion.

 Poti a Singibuku fu 1966 Tapu Cassette Lolo

Yu e memre a singibuku nanga wan ròs kafti ete, „Zingen en uzelf begeleiden met muziek in uw hart” (Singi èn Tyari Yusrefi Nanga Poku na ini Yu Ati)? Di den ben de fu kaba sreka a buku disi, dan brada Knorr ben taki: „Wi o poti wan tu fu den singi tapu cassette lolo. Mi wani taki yu musu orga wan pikin band, wan tu sma nomo di e prei finyoro nanga wan tu di e prei froiti. Mi no wani taki no wan sma ’e kon blo tutu’!” A Kownukondre zaal na Bethel ben o de a presi pe wi ben o poti den poku tapu cassette lolo. Ma wi ben abi wan tu problema efu wi ben o gebroiki a zaal. San ben o pasa efu a skin fu a zaal noso a gron di meki fu tegel, so srefi den isri sturu na ini a zaal, ben o meki a poku bari tumusi tranga? Suma ben sa man yepi wi fu lusu den sortu problema disi? Wan sma ben taki: „Tommy Mitchell! A e wroko na ABC Network Studios.” Wi ben miti brada Mitchell, di ben breiti taki a ben man yepi wi.

A fosi satra mamanten ben doro di wi ben o poti den poku tapu cassette lolo. Di den pokuman ben taki suma den de, dan wan fu den brada ben abi wan dosu nanga wan trombone (wan sortu trompeti). Mi ben memre a warskow di brada Knorr ben gi mi: „Mi no wani no wan sma ’e kon blo tutu’!” We, san mi ben kan du now? Mi ben luku di a brada ben puru a trombone komoto na a dosu; a ben seti en, èn a ben bigin prei pikinso. A brada ben de Tom Mitchell, èn den fosi sani di a ben bro ben moi trutru. A ben meki a trombone prei neleki wan finyoro! Mi ben prakseri: ’A brada disi musu tan!’ Brada Knorr noiti no taki wan sani fu a tori disi.

Na ini a band dati, wi ben abi wan grupu fu bun pokuman di ben de lobi brada nanga sisa tu. No wan fu den ben de muilek sma! A ben de wan hebi wroko fu poti poku tapu cassette lolo. Ma no wan sma ben e kragi. Di a wroko ben kaba, dan wi ben krei di wi abi fu prati; èn wan tumusi bun matifasi ben tan na mindri den wan di ben yepi. Ibri wan fu wi ben prisiri nanga a grani disi, èn grantangi fu Yehovah taki wi ben man klari a wroko.

Tra Grani Di Ben Gi Prisiri

Baka someni yari, mi e prisiri ete nanga a furuten diniwroko. Mi ben wroko leki kringopziener èn so srefi leki distriktopziener 28 yari langa — ibriwan fu den yari disi ben tyari prisiri kon. Dan feifi yari langa mi ben sorgu taki ala sani ben go bun nanga a Norval kongreshal, na ini Ontario. Mi nanga Aileen ben abi furu fu du, fu di kring konmakandra ben e hori ibri wiki, èn so srefi distrikt kongres ben de na ini tra tongo. Na ini 1979 nanga 1980, dan sma di sabi fa fu bow sani, ben gebroiki den oso na a kongreshal di den ben meki plan fu bow wan bijkantoro fu a Genootschap na ini Halton Hills. Baka a wroko fu wi na a kongreshal, dan mi ben kisi wan tra toewijzing fu yepi moro fara nanga poku na ini Brooklyn, fu 1982 te go miti 1984.

Mi lobi uma dede tapu 17 yuni 1994, seibi dei nomo baka di wi memre taki wi trow 59 yari. Makandra wi gi wisrefi na ini a pionier diniwroko 51 yari.

Te mi e prakseri den furu sani di mi ondrofeni na ini mi libi, dan mi e memre taki Bijbel ben de wan tirilin di abi bun furu waarde. Son leisi, mi e gebroiki a Bijbel fu Aileen èn mi e kisi bigi prisiri te mi e luku sortu sani ben naki en ati — wan heri vers, wan tu pisi fu wan vers, nanga spesrutu wortu di a ben marki. Neleki fa a ben de nanga Aileen, dan mi srefi abi tekst di wani taki wan spesrutu sani gi mi. Wan fu den na Psalm 137, di e taki a moi begi disi gi Yehovah: „Meki mi no man prei a harpu noiti moro, efu mi ben o frigiti yu, o Yerusalem! Meki noiti moro mi kan singi efu mi no e memre yu, efu mi no e si yu leki a sani di e gi mi a moro bigi prisiri!” (Psalm 137:5, 6, Today’s English Version). Ala di mi lobi poku, toku a moro bigi prisiri fu mi e kon fu di mi e dini Yehovah na wan loyaal fasi, èn a ben pai mi nanga wan tumusi moi libi di e gi mi prisiri.

[Futuwortu]

[Prenki na tapu bladzijde 28]

Nanga Aileen na ini 1947

[Prenki na tapu bladzijde 30]

Na ini a bigin, di wi ben poti poku tapu cassette lolo