Wi Na Den Sma Di Abi Bribi

Meki Gado Kownukondre Bekènti na den Fidyi-èilanti

WAN leisi Yesus Krestes ben taki fu tu pasi. Wan fu den pasi bradi èn a e tyari go na dede. A trawan smara, ma a e meki sma feni libi (Mateus 7:13, 14). A de a prakseri fu Yehovah Gado fu sma preiki a bun nyunsu fu a Kownukondre na heri grontapu, so taki libisma ben kan teki a bun pasi (Mateus 24:14). Leki bakapisi fu dati, dan na ala sei sma e arki a Kownukondre boskopu èn son wan e teki a libi, fu di den e tron „den sma di abi bribi, san e meki a sili tan na libi” (Hebrewsma 10:39). Wi e gi yu wan kari fu leisi fu a teki di son sma teki a smara pasi fu libi na Fidyi èn so srefi na tra krosibei èilanti fu a Stille Zuidzee.

Den Ben Frutrow Tapu Yehovah

Mere ben de wan skoropikin ete di a ben leri sabi a Kownukondre boskopu fositron na ini 1964. Na umapikin disi ben e libi na wan farawe èilanti. Dati meki a no ben miti Kotoigi fu Yehovah furutron. Ma te fu kaba, a ben man teki a soifri sabi fu Bijbel. Na a ten dati, a ben trow nanga wan man di ben de kapten fu en eigi dorpu. Fu di Mere ben teki a bosroiti fu libi soleki fa Bijbel gronprakseri e taki, meki en masra nanga a famiri fu en masra no ben libi bun nanga en moro. Èn den sma fu a dorpu dati ben wisiwasi en srefi. Ma toku a ben teki dopu na ini 1991.

Syatu baka dati dan Josua, a masra fu Mere, no ben libi so takru nanga en moro èn a ben bigin fu sidon srefi makandra nanga Mere nanga den pikin, te Mere ben e taki fu Bijbel nanga den pikin. Josua ben tapu fu go na a Methodist Kerki. Ma leki kapten, dan toku a ben teki fesi ete na den alawiki krutu fu a dorpu. Na ini na ai fu den sma fu a dorpu, dan Josua no ben de loyaal, bika a Methodist Kerki ben de wan prenspari pisi fu a libi fu den sma na den dorpu disi na den Fidyi-èilanti. Dati meki a domri fu a presi dati ben gi Josua begi fu drai go baka na a kerki di a ben de na ini.

Nanga deki-ati Josua ben taki dati en nanga en osofamiri ben teki a fasti bosroiti fu anbegi Yehovah Gado „nanga yeye èn nanga waarheid” (Yohanes 4:24). Na wan krutu di den ben hori baka dati na ini a dorpu, dan a granman ben gi a komando taki Josua nanga en famiri ben musu froisi gowe libi a dorpu. Sma no ben wani den moro na ini a dorpu. Den ben kisi seibi dei fu gowe libi na èilanti, na oso fu den, den gron nanga den sani di den ben prani — iya, a heri libiwroko fu den.

Brada na yeye fasi ben kon fu tra èilanti fu yepi Josua nanga en osofamiri, fu feni wan tanpresi nanga wan gron fu prani. Now Josua nanga en moro bigi manpikin dopu èn wan tra manpikin di no dopu ete e dini leki wan preikiman fu a bun nyunsu. No so langa pasa, dan Mere bigin dini leki gewoon pionier (wan furuten Kownukondre preikiman). A bosroiti di den teki fu dini Yehovah, ben meki taki den lasi a posisi nanga den materia gudu fu den. Ma neleki na apostel Paulus, den e si disi leki noti te den e teki en gersi nanga san den kisi na presi fu san den lasi.—Filipisma 3:8.

Wan Bosroiti Di Abi fu Du Nanga a Konsensi

Bribi nanga deki-ati de fanowdu efu wan sma e teki a bosroiti fu arki wan konsensi di kisi leri fu Bijbel. Disi ben de so nanga wan yongu uma di e libi na Tarawa, wan fu den Kiribati-èilanti. A yongu uma disi, Suraang, di dopu paspas ben aksi primisi so taki a no ben abi fu du wán fu den sani di a ben musu du leki zuster na ati-oso. Den no ben lobi a sani disi di a ben aksi, kwetikweti. Fu dati ede den ben seni en fu go wroko na a pikin datra-oso na wan farawe èilanti pe a no ben man miti kompe-bribiman moro.

 Na a èilanti dati, a de wan gwenti taki ala sma di e kon libi drape fositron, e tyari wan ofrandi gi a „yeye” fu a presi dati. Den sma e bribi taki efu wan sma no e du dati dan a ben o dede. Fu di Suraang ben weigri fu sma du na afkodrei sani disi gi en èn gi en wroko, meki taki den sma fu a dorpu ben wakti fu si fa a yeye disi di a ben afrontu ben o tyokro Suraang kiri. Di no wan ogri sani ben pasa nanga Suraang èn nanga en wroko, dan a ben kisi furu okasi fu gi wan bun kotoigi.

Ma Suraang no ben kaba kisi tesi. Son wan fu den yonkuman na a èilanti dati ben feni en wan kefalek sani fu suku den yongu uma di kon na a èilanti. Ma Suraang ben man kakafutu gi den muiti di den ben meki fu suku en èn a ben tan hori en soifri retifasi. Fu taki en leti, srefi awansi a ben de so taki a ben musu de klariklari fu wroko leki wan ati-oso zuster heri dei, toku a ben man dini leki wan gewoon pionier.

Bifo wan fesa ben hori fu Suraang ede, na a ten di a ben sreka fu gowe libi na èilanti, dan den bigisma fu a dorpu ben taki dati en ben de a fosi trutru zendeling di ben kon luku den. Fu di a ben tan hori ensrefi na Bijbel gronprakseri, meki trawan fu na èilanti arki a Kownukondre boskopu.

Tyalensi na Skin Fasi

Fu di son èilanti de farawe, meki a pipel fu Yehovah musu du bun furu muiti fu teki prati na a diniwroko èn fu go na den Kresten konmakandra. Luku na eksempre fu fo Kotoigi di dopu kaba — wan man nanga dri uma — di e teki waka fu go na den konmakandra someni yuru langa. Te den e waka nanga futu dan den musu koti dri liba abra tu. Te a de frudu watra, dan a brada fosi e swen abra, ala di a e tyari wan bigi bori patu. Na ini a patu dati den ben poti den tas, den buku nanga den krosi di den o weri na a konmakandra. Dan a e swen go baka fu yepi den dri sisa.

Wan tra pikin grupu, di e hori konmakandra na a farawe èilanti Nonouti, na Kiribati, e miti difrenti muilek situwâsi tu. Na oso pe den e kon makandra e teki seibi noso aiti sma nomo. Trawan di e kon na a konmakandra, e sidon na dorosei èn e suku fu luku pasa na oso skin. Na oso skin ben meki fu frekti isri titei di sma gwenti fu gebroiki gi fowrukoi. Den tra sma fu a dorpu di e go noso e komoto na den bun bigi kerki, man si a konmakandra presi heri bun. A no de fu taki dati futuboi fu Yehovah sabi taki na sma, no den oso, na sani di Yehovah e si leki warti sani trutru (Hagai 2:7). A wan dopu sisa na a èilanti owru èn a no man waka fara. Ma toku wan yongu uma di de wan preikiman di no dopu ete e yepi en na ini a diniwroko, fu di a e tyari en na ini wan wagi di a musu pusu nanga anu. Dati e sori trutru taki den abi warderi gi a waarheid!

Den moro leki 2100 preikiman di e dini na den Fidyi-èilanti teki a fasti bosroiti fu go doro fu meki a bun nyunsu fu Gado Kownukondre bekènti. Den abi a frutrow taki moro sma sa kon tron „sma di abi bribi, san e meki a sili tan na libi”.

[Karta na tapu bladzijde 8]

(Efu yu wani si pe den sani disi skrifi, luku a tijdschrift)

Australia

Fidyi