Têgo Koloku​—Na Hemel Noso na Grontapu?

A KOLOKU fu yu e anga moro furu fu a presi pe yu e libi? Pikin moro ala sma ben sa erken wantewante taki koloku e anga moro furu fu sani soleki wan bun gosontu, wan marki na ini a libi èn fu bun matifasi nanga trawan. Wan Bijbel odo e taki dati na a fasi disi: „Wan skotriki gruntu pe lobi de, bun moro wan mankaw di sma fatu na a nyanyan baki, èn pe bita-atifasi de tu.”—Odo 15:17.

Ma na wan sari sani, taki langa ten kaba grontapu, a tanpresi fu wi, lai bita-atifasi, ogridu di sma e du nanga tranga nanga tra sortu godelowsufasi. Ma fa a de nanga a hemel, noso a yeye kondre, pe furu sma wani go baka te den dede? A ben de ala ten wan presi pe trutru vrede ben de? No wan enkri sani ben man pori a vrede dati, soleki fa sma na ala sei e taki?

Bijbel e leri taki Gado e libi na hemel makandra nanga milyunmilyun yeye mekisani di den e kari engel (Mateus 18:10; Openbaring 5:11). Bijbel e taki dati den yeye disi na „manpikin fu Gado” (Yob 38:4, 7). Neleki libisma, den engel abi wan friwani tu; den no de robot. Fu dati ede meki den kan frukisi tu fu du bun noso fu du ogri. Engel ben sa frukisi fu du ogri? A e fruwondru son sma kande, te den kon sabi taki dusundusun yari pasa, wan bigi pisi fu den engel ben du dati, fu taki en leti, den ben sondu teige Gado — den ben opo densrefi teige en!—Yudas 6.

Opruruman na ini Hemel

Sondu ben kon de na ini a yeye kondre fu di wan engel ben kon tron wan opruruman. Den ben kon kari en Satan (Gensman) èn so srefi Didibri (Ogri-ati leiman). Nanga en friwani, na engel disi di ben e gi yesi fosi, ben frukisi fu du ogri. Baka dati, a ben abi wan takru krakti tapu den tra yeye mekisani. Dati ben meki taki na a ten fu Noa, bifo a Frudu, wan bigi pisi fu den ben opo densrefi makandra nanga Satan, teige Gado.—Genesis 6:2, futuwortu; 2 Petrus 2:4.

Yehovah no ben puru den engel disi di ben fadon wantewante na hemel. Na presi fu dati, den ben kisi pasi fu go drape — soleki fa a e sori dan den ben musu hori densrefi na son wet — dusundusun yari langa. * Ma di Gado no ben frudrage den ogri sma disi moro, dan den ben „trowe” komoto na hemel, fu kisi pori te fu kaba. Wan sten na ini hemel ben taki: „Fu dati ede, un prisiri, un hemel nanga unu di e libi drape!” (Openbaring 12:7-12) A de krin taki, den getrow engel ben prisiri trutru taki te fu kaba, den hemel ben fri fu den ogri yeye disi di lobi fu meki trobi!

Baka di wi luku a tori disi finifini, di furu sma no sabi, dan a de krin fu si taki trutru vrede no man de efu koni mekisani no e poti prakseri na den wet nanga den gronprakseri fu Gado (Yesaya 57:20, 21; Yeremia 14:19, 20). Na tra sei, a de so taki te ala sma e gi yesi na a wet fu Gado, dan vrede sondro dyugudyugu sa de (Psalm 119:165; Yesaya 48:17, 18). So bun, efu ala libisma ben lobi Gado èn ben gi yesi na En èn efu den ben lobi makandra, dan grontapu no ben o de trutru wan prisiri koloku tanpresi? Bijbel e piki taki na so a de!

Ma san o pasa nanga den wan di e weigri fu kenki den godelowsu pasi fu den fu di den e  prakseri densrefi nomo? Den o pori ala ten a vrede fu den wan di wani fu du trutru san Gado wani? Nôno, Gado ben strafu den godelowsu engel na hemel, èn a sa strafu den godelowsu sma di de dyaso na grontapu tu.

Wan Grontapu Di Gado Krin

„Hemel na mi kownusturu, èn grontapu na mi futubangi”, na so Gado ben taki (Yesaya 66:1). Fu di Gado de a santawan srefi, meki a no o gi pasi taki ogri e doti en „futubangi” fu têgo (Yesaya 6:1-3; Openbaring 4:8). Neleki fa a ben puru den ogri yeye na hemel, na so a sa puru ala godelowsu sma na grontapu tu. Dati na wan sani di a pisi fu Bijbel di e kon now, e sori:

„Den ogri sma srefi sa koti puru, ma den wan di e howpu tapu Yehovah na den wan di sa abi grontapu leki a gudu fu den.”—Psalm 37:9.

„Bika den opregti sma na den wan di sa libi na grontapu, èn den wan sondro fowtu na den wan di sa tan abra na en tapu. Fu taki fu den ogri sma, den sa koti den puru fu grontapu srefi; èn fu taki fu den wan di e tori trawan, den sa hari den puru fu en.”—Odo 2:21, 22.

„Na wan regtfardiki sani taki Gado fu en sei, tyari banawtu kon na tapu den wan di e meki banawtu kon na unu tapu, ma gi unu di e pina fu banawtu ede, frulekti makandra nanga wi te den sa tyari wi Masra Yesus kon na krin na hemel makandra nanga den makti engel fu en, na ini wan tranga faya, te a e teki refensi tapu den wan di no sabi Gado èn tapu den wan di no e gi yesi na a bun nyunsu fu wi Masra Yesus. Den srefi sma disi sa kisi a krutu strafu fu têgo pori, farawe fu a fesi fu Masra èn fu a glori fu en krakti.”—2 Tesalonikasma 1:6-9.

„Boiti dati, grontapu [a godelowsu libisma famiri] e pasa gowe èn so srefi a lostu fu en, ma a sma di e du a wani fu Gado, e tan fu têgo.”—1 Yohanes 2:17.

Vrede Sa Tan na Grontapu?

Den Buku fu Bijbel e sori krinkrin taki Gado no sa frudrage ogridu fu ala ten. Ma te Gado sa puru ogridu kaba, fa wi kan de seiker taki dati no sa sutu ede opo baka? Bika, te yu luku en bun, dan syatu baka a Frudu fu den dei fu Noa, ogridu ben kon baka. A ben kon so furu taki Gado ben abi fu tapu den godelowsu prakseri fu libisma di a ben bruya a tongo fu den.—Genesis 11:1-8.

A moro prenspari reide fu wi fu frutrow taki ogri no sa sutu ede opo baka, na taki libisma no sa tiri grontapu moro, soleki fa a ben pasa syatu baka a Frudu. Na presi fu dati, a Kownukondre fu Gado sa tiri grontapu. A Kownukondre disi sa tiri komoto na hemel èn a o de a wan-enkri tirimakti fu grontapu (Danièl 2:44; 7:13, 14). A sa opo du wan sani esi-esi nanga iniwan sma di e pruberi fu meki ogridu kon baka (Yesaya 65:20). Fu taki en leti, dan te fu kaba a o pori a sma di meki ogridu kon — Satan Didibri — makandra nanga den ogri yeye fu en, den godelowsu engel di ben waka na en baka.—Romesma 16:20.

Boiti dati, a libisma famiri no sa abi fu broko den ede moro nanga nyanyan, krosi, tanpresi, nanga wroko — sani di e mankeri now èn di e meki son sma bigin du ogridu. Iya, a heri grontapu sa kenki kon tron wan paradijs pe sani o waka bun, èn pe sani o de furu gi ala sma.—Yesaya 65:21-23; Lukas 23:43.

Moro prenspari srefi, a Kownukondre sa leri den borgu fu en fa fu libi na ini vrede, ala di a sa yepi den na a srefi ten fu gro kon miti volmaaktifasi (Yohanes 17:3; Romesma 8:21). Baka dati, a libisma famiri no o abi fu feti moro nanga swakifasi èn nanga sondu lostu, san o meki taki den man gi yesi na Gado dorodoro èn so srefi taki dati e prisiri den, soleki fa a ben de na ini a kefal fu a volmaakti man Yesus (Yesaya 11:3). Fu taki en leti, Yesus ben tan loyaal na Gado srefi di a ben abi fu du nanga bigi tesi nanga pina — sani di no  sa de na ini a Paradijs libi kwetikweti.—Hebrewsma 7:26.

Fu San Ede Meki Son Wan E Go na Hemel

Ma furu sma di e leisi Bijbel sabi den wortu fu Yesus: „Na ini na oso fu mi Tata furu tanpresi de. . . . Mi e gowe fu sreka wan presi gi unu (Yohanes 14:2, 3). Disi a no wan heri tra sani leki a howpu fu têgo libi na wan paradijs grontapu?

Den leri disi e kruderi nanga den srefi. Fu taki en leti, a wan e horibaka gi a trawan. Wan fosi sani na taki Bijbel e taki dati wán grupu sma nomo fu getrow Kresten — namku 144.000 fu den — e kisi wan opobaka leki yeye mekisani fu libi na hemel. Fu san ede den e kisi a tumusi moi pai disi? Bika den de wan pisi fu a grupu di Yohanes ben si na ini wan fisyun. A grupu disi di „ben kon na libi èn den ben tiri leki kownu makandra nanga en, dusun yari langa” (Openbaring 14:1, 3; 20:4-6). Te yu e teki den milyardmilyard sma na grontapu gersi nanga den 144.000, dan trutru, den na wan „pikin ipi” (Lukas 12:32). Boiti dati, dan neleki Yesus, den ondrofeni den problema di a libisma famiri gwenti fu kisi. Fu dati ede, den o man „firi nanga wi na ini den swakifasi fu wi”, te den e teki fesi na ini a programa fu meki a libisma famiri nanga grontapu kon bun baka.—Hebrewsma 4:15.

Grontapu​—A Têgo Tanpresi fu Libisma

Di a frulusu-ofrandi fu Yesus Krestes ben pai, dan Gado ben bigin tyari den 144.000 kon makandra, pikinmoro so wan 2000 yari pasa kaba. Èn sani de di e sori wi now taki a grupu disi tyari kon na makandra kaba (Tori fu den Apostel 2:1-4; Galasiasma 4:4-7). Ma na ofrandi fu Yesus no ben de gi den sondu fu den 144.000 wawan, „ma so srefi gi di fu a heri grontapu” (1 Yohanes 2:2). Fu dati ede ala sma di e bribi na ini Yesus abi a howpu fu libi fu têgo (Yohanes 3:16). Den wan di e sribi na ini den grebi, ma di Gado e memre ete, o kisi wan opobaka fu libi na tapu wan krin grontapu, no fu libi na ini hemel (Preikiman 9:5; Yohanes 11:11-13, 25; Tori fu den Apostel 24:15). San den kan fruwakti drape?

Openbaring 21:1-4 e gi a piki: „Luku! A tenti fu Gado de na libisma . . . Èn a sa figi puru ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba.” Prakseri — libisma no o dede moro, èn pen nanga sari di ben kon fu dede ede, sa gowe fu têgo! Te fu kaba, Yehovah en prakseri di a ben abi biginbigin nanga grontapu èn nanga libisma sa kon tru na wan glori fasi.—Genesis 1:27, 28.

A Bosroiti fu Wi​—Libi Noso Dede

Noiti Yehovah ben taigi Adam nanga Eva taki den ben man go na hemel. Den ben man du tu sani nomo: arki Gado èn libi fu têgo na grontapu noso trangayesi Gado èn dede. Na wan sari sani, taki den teki a bosroiti fu no gi yesi èn fu dati ede meki den ben drai go baka na a „doti” fu a gron (Genesis 2:16, 17; 3:2-5, 19). Noiti a ben de a prakseri fu Gado taki a libisma famiri ben o dede èn ben o tan na hemel ala di den komoto na a grebi. Gado ben meki milyardmilyard engel fu libi na hemel; den yeye mekisani disi no de libisma di dede kaba èn di ben kisi wan opobaka fu libi na hemel.—Psalm 104:1, 4; Danièl 7:10.

San wi musu du fu kisi a blesi fu libi fu têgo na ini wan Paradijs na grontapu? A fosi sani na taki wi musu studeri Gado wortu, a Santa Bijbel. „Disi wani taki têgo libi”, Yesus ben taki di a ben begi, „fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes.”—Yohanes 17:3.

Te wi e du a sani dati di wi leri, dan dati na wan tra sani di sa tyari wi go na têgo libi na ini wan Paradijs (Yakobus 1:22-24). Den wan di e libi akruderi a wortu fu Gado, e howpu fu si nanga den eigi ai fa den sortu moi profeititori soleki a wan di skrifi na ini Yesaya 11:9 o kon tru. Drape skrifi: „Sma no sa du no wan enkri ogri èn den no sa pori no wan enkri sani na tapu heri mi santa bergi; bika grontapu sa kon furu trutru nanga a sabi fu Yehovah, soleki fa watra e tapu se.”

[Futuwortu]

 [Prenki na tapu bladzijde 7]

„Na den regtfardikisma, densrefi sa abi grontapu leki a gudu fu den, èn den sa libi na tapu fu têgo.”—Psalm 37:29