A Fasi Fa Yu Kan Kon Krosibei na Gado

Yakobus 4:8 e taki: „Kon krosibei na Gado, èn en sa kon krosibei na yu”. Yehovah Gado wani taki libisma musu abi wan bun matifasi nanga en èn a sori taki a wani dati trutru di a ben gi en Manpikin fu wi eigi bun ede.

A LOBI-ATI sani dati di a ben du, ben meki na apostel Yohanes skrifi: „Wi lobi [Gado], bika a ben lobi wi fosi” (1 Yohanes 4:19). Ma wisrefi musu du wan tu sani efu wi wani kisi wan bun matifasi nanga Gado. Dati na den srefi fo sani di wi musu du efu wi wani kisi wan bun matifasi nanga tra libisma, soleki fa na artikel na fesi ben sori. Meki wi ondrosuku den sani disi now.

Luku den Kefalek Moi Eigifasi fu Gado

Gado abi furu kefalek moi eigifasi. Wan tu fu den moro prenspariwan na lobi, koni, retidu nanga makti. A koni nanga a makti fu en de fu si bun furu na ini na universum di de farawe èn na ini a grontapu lontu wi, fu den kefalek bigi stari sistema te go miti den pikin atoom. A psalm skrifiman ben skrifi: „Den hemel e meki a glori fu Gado bekènti; Èn a loktu e fruteri fu a wroko fu en anu.”—Psalm 19:1; Romesma 1:20.

Den sani di Gado meki, e sori tu taki a abi lobi. Fu eksempre, a fasi fa wi meki e sori taki Gado wani taki wi musu nyan bun fu a libi. A meki wi na so wan fasi taki wi man si kloru, taki wi man tesi èn smeri sani èn taki wi man prisiri nanga poku. Wi man lafu, prisiri fu moi sani ede èn du so srefi furu tra sani. Gado gi wi moro sani srefi di no de fanowdu kwetikweti fu tan na libi. Iya, Gado na trutru wan sma di lobi fu gi sani, di abi switifasi nanga lobi. Sondro tweifri den eigifasi disi e meki taki en na „a koloku Gado”.—1 Timoteus 1:11; Tori fu den Apostel 20:35.

Yehovah e prisiri nanga a fasi fa a e gebroiki a reti di a abi fu tiri, fu di a reti disi abi en gron moro furu tapu lobi. A e prisiri so srefi nanga den koni mekisani fu en, di e horibaka gi a fasi fa a e gebroiki a reti disi, fu di lobi na a moro prenspari sani di e pusu den fu du dati (1 Yohanes 4:8). Fu tru, Yehovah na a Sma di abi a reti fu tiri ala sani, ma a e handri nanga libisma, spesrutu nanga den loyaal getrow futuboi fu en, soleki fa wan lobi-ati papa e handri nanga den pikin fu en (Mateus 5:45). A no e hori no wan enkri sani na baka, di de gi a bun fu den (Romesma 8:38, 39). Soleki fa wi taki kaba, dan a gi srefi a libi fu en wan-enkri gebore Manpikin gi a bun fu wi. Iya, fu di Gado lobi wi, meki wi de na libi èn wi abi a howpu fu libi fu têgo.—Yohanes 3:16.

Yesus ben meki wi kon sabi trutru sortu sma Gado de fu di a ben waka soifri baka na eksempre fu en Tata (Yohanes 14:9-11). A no ben denki ensrefi kwetikweti èn a ben hori sma na prakseri. Wan leisi, sma ben tyari wan man di ben dofu èn di no ben man taki bun, kon na Yesus. Yu kan frustan taki, kande a man disi ben e syensyen na mindri ipi-ipi sma. A moi fu si, taki Yesus ben teki a man disi go na wan sei èn a ben dresi en drape (Markus 7:32-35). Yu e warderi sma di e frustan fa yu e firi èn sma di e lespeki a wartifasi fu yu? Efu dati de so, dan trutru yu sa kisi wan moro bun matifasi nanga Yehovah èn nanga Yesus te yu e leri moro fu den.

Prakseri fu den Eigifasi fu Gado

Wan sma kan abi kefalek moi eigifasi, ma wi musu denki fu a sma dati bifo wi kan kisi wan bun matifasi nanga en. Na so a de tu nanga Yehovah. A prakseri di wi e prakseri dipi fu den eigifasi fu Yehovah, na a di fu tu prenspari sani di wi musu du trutru fu kon krosibei na en. Kownu David, wan man di ben lobi Yehovah trutru en di ’Yehovah ati  ben feni bun, ben taki „Mi memre den dei fu granwe; mi prakseri dipi fu ala den sani di yu e du; nanga prisiri mi ben prakseri furu fu a wroko fu yu eigi anu.”—Tori fu den Apostel 13:22; Psalm 143:5.

Te yu e luku den wondru sani di Gado meki noso yu e leisi Gado Wortu, Bijbel, dan neleki David, yu e prakseri dipi fu den sani di yu e si èn e leisi? Prakseri wan manpikin di ben kisi wan brifi didyonsro fu en papa di a lobi so furu. Fa a ben o si a brifi dati dan? A no de fu taki dati a no ben o leisi en frafra nomo, èn baka dati trowe en na ini wan la. Na presi fu dati, a ben o leisi en go kon furutron, èn a ben o suku finifini fu sabi san ibri wortu wani taki. Na a srefi fasi, Gado Wortu musu de wan warti sani gi wi, neleki fa a ben de wan warti sani gi a psalm skrifiman di ben singi: „O, fa mi lobi yu wet! Heri dei mi wani poti prakseri na en.”—Psalm 119:97.

Tan Hori Bun Komunikâsi

Bun komunikâsi na a sani di e meki taki iniwan matifasi e tan. A wani taki, dati wan sma musu taki èn arki — no nanga en frustan wawan ma nanga en ati tu. Wi e taki nanga a Mekiman nanga yepi fu begi. Begi na a taki di wi e taki nanga Gado na wan lespeki fasi. Yehovah e prisiri nanga den begi fu den wan di lobi en èn e dini en èn di e erken taki Yesus Krestes na a moro prenspari sma di e teki presi gi En.—Psalm 65:2; Yohanes 14:6, 14.

Na ini owruten, Gado ben taki nanga libisma na difrenti fasi soleki na ini fisyun, na ini dren, èn nanga yepi fu engel. Ma na ini a ten disi, a e du dati nanga yepi fu a Wortu fu en di skrifi, a Santa Bijbel (2 Timoteus 3:16). A Wortu di skrifi abi furu winimarki. Yu kan gebroiki en ala ten fu feni rai. Neleki wan brifi, yu kan nyan bun fu en ala ten baka. Èn sma no man kenki san skrifi na ini Bijbel, soleki fa e pasa furutron nanga den tori di sma e fruteri ibritron baka. So bun, yu musu si Bijbel neleki wan bigi ipi brifi di tyari kon makandra di yu lobi hemel Tata seni gi yu. Meki a taki ibri dei nanga yu nanga yepi fu den brifi disi.—Mateus 4:4.

Fu eksempre, Bijbel e fruteri fa Yehovah e si bun nanga ogri. A e fruklari san a abi na prakseri nanga a libisma famiri èn nanga grontapu. Èn Bijbel e tyari kon na krin fa Gado ben handri nanga furu difrenti sma nanga nâsi. A e fruteri fa A ben handri nanga getrow anbegiman, ma so srefi nanga kefalek ogri-ati feanti. Fu di Yehovah ben meki sma skrifi na so wan fasi, fa a ben handri nanga libisma, meki a sori wi finifini sortu sma a de. A e sori wi en lobi, prisiri, sari, atibron, sari-ati fasi, broko-ede iya, ala den prakseri nanga den firi fu en. A e sori wi so srefi fu san ede a e prakseri na so wan fasi èn fu san ede a e firi so, èn a e du ala den sani disi na so wan fasi, taki libisma kan frustan den sani dati makriki.—Psalm 78:3-7.

Baka di yu leisi wan pisi fu Gado Wortu, fa yu kan kisi wini fu dati? Èn, san de moro prenspari, fa yu kan kisi wan moro bun matifasi nanga Gado? Denki na a fosi presi fu den sani di yu leisi èn leri fu Gado leki wan sma, èn meki den penti saka go na ini yu ati. Baka dati, fruteri Yehovah na ini begi fa yu e denki èn fa yu e firi trutru fu a sani di yu leisi, èn fa yu sa pruberi fu kisi wini fu dati. Dati na komunikâsi. A no de fu taki, dati efu yu e prakseri tra sani tu, dan seiker yu kan taki fu den sani dati tu na ini yu begi.

Du Sani Makandra Nanga Gado

Bijbel e taki dati son getrow man fu owruten ben waka nanga a tru Gado noso na fesi en (Genesis 6:9; 1 Kownu 8:25). San dati wani taki? A wani taki moro furu dati ibri dei den ben libi neleki Gado ben de leti drape nanga den. Fu tru, den ben de sondu sma. Ma toku den ben lobi den wet nanga den gronprakseri fu Gado èn den ben libi  akruderi a prakseri fu Gado. Yehovah e tron wan bun mati fu den sortu sma disi, èn a e sorgu gi den, soleki fa Psalm 32:8 e sori: „Mi sa gi yu inzicht èn leri yu a pasi di yu musu waka. Mi sa gi rai nanga mi ai na yu tapu.”

Yu tu kan abi Yehovah leki wan tumusi bun mati — wan di e waka nanga yu, wan di e sorgu yu, èn wan di e gi yu rai leki wan papa. A profeiti Yesaya ben taki fu Yehovah leki „a Sma di e leri yu fu gi yusrefi wini, a Sma di e meki yu waka na tapu a pasi di yu musu waka” (Yesaya 48:17). Te wi e kisi den winimarki disi, dan fu taki en so, wi e firi taki Yehovah de „na wi reti anu”, soleki fa David ben firi dati.—Psalm 16:8.

Gado Nen​—E Poti Prakseri na den Eigifasi fu En

Furu kerki èn so srefi moro nanga moro Bijbel vertaling no e gebroiki a nen fu Gado èn den no e meki sma kon sabi en nen (Psalm 83:18). Ma toku a nen dati — Yehovah — di ben de fu feni biginbigin so wan 7000 tron na ini den Hebrew Buku fu  Bijbel! (Den sma di poti Bijbel na ini tra tongo no e marki nanga wán markitiki nomo. Ala di den puru a nen fu Gado, toku moro furu fu den libi a nen fu furu falsi gado di kari na ini a fosi tekst, soleki Bâ-al, Bel, Merodak, èn srefi Satan!)

Son sma e denki taki a puru di den puru a nen fu Gado na wan pikin sani. Ma prakseri: A de moro muilek noso moro makriki fu kisi wan bun matifasi nanga wan sma, efu yu no sabi a nen fu en? Kande den titel soleki Gado nanga Masra (di den e gebroiki tu gi falsi gado) e poti prakseri na a krakti fu Yehovah, na a tirimakti fu en, noso na a posisi fu en. Ma En nen wawan e sori soifri suma a de trutru (Exodus 3:15; 1 Korentesma 8:5, 6). Na ini a nen fu a tru Gado wi e feni den eigifasi fu en èn wi kon sabi tu sortu sma a de. A beskopu Walter Lowrie ben taki en leti fa a de: „Wan sma di no sabi a nen fu Gado, no sabi en trutru leki wan sma.”

Luku na eksempre fu Maria, wan opregti Katoliksma di e libi na Australia. Di a ben miti Yehovah Kotoigi a fosi leisi, Maria ben meki den Kotoigi sori en a nen fu Gado na ini Bijbel. San a ben du? „Di mi ben si Gado nen a fosi leisi na ini Bijbel, mi krei. A ben naki mi ati trutru di mi leri sabi, taki mi ben man sabi èn gebroiki Gado en nen trutru.” Maria ben go doro fu studeri Bijbel, èn a fosi leisi na ini en libi, a ben leri sabi Yehovah leki wan sma èn a ben man bow wan matifasi nanga en fu tan Yehovah mati en heri libi langa.

Iya, wi kan „kon krosibei na Gado”, srefi efu wi no man si en nanga wi ai. Nanga wi frustan èn nanga wi ati wi kan „si” den tumusi moi eigifasi fu en. Na so fasi a lobi fu wi gi en o gro èn a lobi di en abi gi wi, o gro tu. So wan lobi na „wan volmaakti banti fu wánfasi”.—Kolosesma 3:14.

[Faki/​Prenki na tapu bladzijde 6]

Yehovah E Du wan Sani na Tapu a Lobi Di Yu E Sori gi En

MATIFASI e kon fu tu sei. Te wi e pruberi fu kisi wan matifasi nanga Gado, dan ensrefi e tron wan mati fu wi tu. Luku sortu firi a ben abi gi den owru sma Simeon nanga Ana, tu sma di Bijbel e taki spesrutu fu den. Na Evangelie skrifiman Lukas e fruteri wi taki Simeon di ben e wakti a Mesias, ben de wan „regtfardiki sma di ben abi lespeki”. Yehovah ben si taki Simeon ben abi den moi eigifasi disi èn a sori taki a ben lobi na owru man disi fu di a taigi en taki „a no ben o dede bifo a si Krestes”. Yehovah ben hori ensrefi na a pramisi fu en èn a ben tyari Si­meon go na a beibi Yesus, di en papa nanga mama ben tyari en kon na a tempel na ini Yerusalem. Nanga furu prisiri èn nanga furu warderi, Simeon teki a beibi èn a ben begi: „Now, Soeverein Masra, meki a srafu fu yu go na ini vrede, neleki fa yu ben meki bekènti; fu di den ai fu mi si a fasi fa yu sa tyari frulusu kon.”—Lukas 2:25-35.

„Na a srefi ten dati”, Yehovah sori tu taki a ben lobi Ana di ben abi 84 yari, fu di A ben tyari en go na Yesus tu. Soleki fa Bijbel e fruteri wi, dan a lobi weduwe disi ben de ala ten na ini a tempel pe „a ben e du santa diniwroko” gi Yehovah. Neleki Simeon, Ana ben abi bun furu warderi, èn a taigi Yehovah tangi gi a bunfasi di A ben sori en pasa marki. Baka dati a ben taki fu a pikin „nanga ala sma di e fruwakti a frulusu fu Yerusalem”.—Lukas 2:36-38.

Iya, Yehovah ben si o furu Simeon nanga Ana ben lobi èn lespeki en. Yehovah ben si tu fa den ben e broko den ede nanga a fasi fa A ben o tyari en prakseri kon tru. Den tori disi di skrifi na ini Bijbel no e meki taki yu wani tron wan mati fu Yehovah?

Neleki en Papa, Yesus ben si tu fa wan sma de trutru. Ala di a ben e gi leri na a tempel, a ben si wan „pôti weduwe” di ben gi „tu pikin pisi moni nomo, di no abi furu waarde srefisrefi”. Tra sma di si dati, ben o si a presenti disi fu a weduwe leki wan pikin sani, ma gi Yesus dati no ben de so. A ben prèise na uma disi bika a ben gi ala san a abi (Lukas 21:1-4). Fu dati ede, wi kan abi a dyaranti taki efu wi e gi Yehovah nanga Yesus a moro bun sani di wi abi, awinsi wi gi den wan bigi sani noso wan pikin sani, dan den o warderi wi.

Ala di Gado e prisiri nanga den wan di lobi en, a e sari te sma e drai baka gi en èn e waka wan takru pasi. Genesis 6:6 e fruteri wi taki na ogri-ati fasi fu libisma bifo a Frudu fu den dei fu Noa, „ben hati [Yehovah] na ini en ati”. Baka ten, Israèlsma di ben e trangayesi ala ten baka „ben e tesi Gado, èn den ben hati a Santa Sma fu Israèl srefi”, na so Psalm 78:41 e taki. Iya, Gado a no wan yeye di meki ala sani, sondro fu abi firi gi den sani di a meki. A no wan yeye tu di abi mi-no-ke fasi nanga den mekisani fu en. A de wan sma trutru, wan sma di no abi a problema leki wi, taki onvolmaaktifasi e meki taki den firi fu en no de so soifri moro.

[Prenki na tapu bladzijde 7]

Wan fasi fa wi kan kisi wan bun matifasi nanga Yehovah, na te wi e prakseri dipi fu den sani di a meki