Gado En Kownukondre​—A Nyun Tirimakti fu Grontapu

„A kownukondre . . . sa broko ala den kownukondre disi na pisipisi èn tyari wan kaba kon na den, èn ensrefi sa tan te ten di no skotu.”—DANIÈL 2:44.

1. Sortu frutrow wi kan abi na ini Bijbel?

BIJBEL na a buku pe Gado tyari sani kon na krin gi libisma. Na apostel Paulus ben skrifi: „Di unu ben kisi a wortu fu Gado, di unu ben yere fu wi, unu no ben teki en leki a wortu fu libisma, ma leki san a de trutru, leki a wortu fu Gado” (1 Tesalonikasma 2:13). A Bijbel abi san wi musu sabi fu Gado: a fasi fa Gado de, den sani di en abi na prakseri, èn dan sani di a e aksi fu wi. A Bijbel abi a moro bun rai gi na osofamiri libi èn fa wan sma musu tyari ensrefi na ini en aladei libi. A Bijbel e taki finifini fu profeititori di ben kon tru na ini a ten di pasa, di e kon tru now, èn di sa kon tru na ini a ten di e kon. Iya, „na Gado ben meki sma skrifi ala den Buku fu Bijbel nanga yepi fu en santa yeye èn den bun fu gi leri, fu piri-ai gi sma, fu poti sani kon reti, fu gi trangaleri ini regtfardikifasi, so taki a sma di de fu Gado kan koni dorodoro, de srekasreka dorodoro gi ibri bun wroko”.—2 Timoteus 3:16, 17.

2. Fa Yesus ben poti krakti tapu a thema fu Bijbel?

² A moro prenspari sani na ini Bijbel na a thema fu en: a buweisi di Gado sa buweisi taki a abi a reti fu tiri nanga yepi fu en hemel Kownukondre. Yesus ben meki a sani disi a moro prenspari sani fu en diniwroko. „Yesus ben bigin preiki èn a ben taki: ’Abi berow, bika a kownukondre fu hemel kon krosibei’” (Mateus 4:17). A ben sori wi sortu presi a Kownukondre musu abi na ini wi libi, di a ben gi wi a tranga: „Tan suku fosi a kownukondre nanga en regtfardikifasi, èn ala den tra sani disi unu sa kisi tu” (Mateus 6:33). Yesus ben sori tu o prenspari a Kownukondre de fu di a ben leri den bakaman fu en fu begi Gado: „Meki yu kownukondre kon. Meki yu wani pasa, soleki na hemel, so tu na grontapu.”—Mateus 6:10.

 A Nyun Tirimakti fu Grontapu

3. Fu san ede Gado en Kownukondre de wan prenspari sani nownow gi wi?

³ Fu san ede a Kownukondre fu Gado de so prenspari gi libisma? Fu di heri-esi a sa du wan sani di sa kenki a tirimakti fu a grontapu disi fu têgo. A profeititori na Danièl 2:44 e taki: „Na ini den dei fu den kownu dati [di e tiri grontapu nownow], a Gado fu hemel sa opo wan kownukondre [wan tiri na ini hemel] di noiti no sa kisi pori. Èn a kownukondre srefi no sa gi na no wan tra pipel. A sa broko ala den kownukondre disi na pisipisi èn tyari wan kaba kon na den [den tiri fu grontapu], èn ensrefi sa tan te ten di no skotu.” Te Gado en hemel Kownukondre sa tiri ala sani, dan noiti moro libisma sa abi grontapu na ini den makti. Libisma tiri di prati èn di no man gi libisma san den abi fanowdu, no sa de moro fu têgo.

4, 5. (a) Fu san ede Yesus na a moro bun sma fu tron Kownu fu a Kownukondre? (b) Sortu wroko Yesus sa abi fu du na ini a ten di e kon?

⁴ A Moro Prenspari Tiriman na ini a hemel Kownukondre, di e wroko wantewante na ondro Yehovah en tiri, na a moro bun sma fu tiri — Krestes Yesus. Bifo a ben kon na grontapu, a ben de na ini hemel leki Gado en „basi wrokoman”, èn a ben de a fosiwan fu ala den sani di Gado meki (Odo 8:22-31). „En na a prenki fu a Gado di wi no kan si, a fosi geborewan fu ala den sani di Gado meki; bika nanga yepi fu en ala tra sani ben meki na ini hemel nanga na grontapu” (Kolosesma 1:15, 16). Èn di Gado ben seni Yesus kon na grontapu, dan ala ten Yesus ben du Gado wani. A ben horidoro na ondro den moro muilek tesi èn a dede getrow na en Tata.—Yohanes 4:34; 15:10.

⁵ Fu di Yesus ben tan loyaal na Gado srefi teleki a dede, dati meki Gado ben pai en gi dati. Gado ben opo en baka fu go na hemel èn a ben gi en a reti fu de Kownu fu a hemel Kownukondre (Tori fu den Apostel 2:32-36). Leki a Kownu fu a Kownukondre, Krestes Yesus sa abi a kefalek moi wroko fu Gado fu teki fesi gi furu tin dusun makti yeye mekisani, so taki den kan puru libisma tirimakti fu grontapu èn krin wi grontapu fu ala godelowsu fasi (Odo 2:21, 22; 2 Tesalonikasma 1:6-9; Openbaring 19:11-21; 20:1-3). Dan Gado en hemel Kownukondre na ondro Krestes sa de a nyun tirimakti, a wan-enkri tiri abra heri grontapu.—Openbaring 11:15.

6. Sortu tiri wi kan fruwakti fu a Kownu fu a Kownukondre?

⁶ Gado Wortu e taki fu a nyun Tiriman fu grontapu: „Na en den ben gi tirimakti nanga wartifasi nanga wan kownukondre, so taki den pipel, nationaal grupu nanga tongo den alamala ben sa dini en” (Danièl 7:14). Fu di Yesus sa sori a lobi fu Gado, dati meki a vrede nanga koloku na ondro a tiri fu en sa bigi (Mateus 5:5; Yohanes 3:16; 1 Yohanes 4:7-10). „Da gro foe hem kownoekondre nanga vrede noiti sa kaba, . . . foe seti hem boen, èn foe seti hem nanga kroetoe nanga leti” (Yesaya 9:6, Da Bijbel). Dati sa de wan blesi trutru fu abi wan Tiriman di e tiri nanga lobi, retidu, èn nanga regtfardikifasi! Na so, 2 Petrus 3:13 e taki na fesi: „Nyun hemel [a hemel Kownukondre fu Gado] nanga wan nyun grontapu [wan nyun libimakandra na grontapu] de di wi e fruwakti akruderi en pramisi, èn na ini den disi, regtfardikifasi sa de.”

7. Fa Mateus 24:14 e kon tru na ini a ten disi?

⁷ Seiker, Gado Kownukondre na a moro bun nyunsu gi ala den sma di lobi san reti. Fu dati ede, Yesus ben taki na fesi fu wan pisi fu a marki di e sori taki wi e libi now na ini „den lasti dei” fu a godelowsu seti fu sani disi: „A bun nyunsu disi fu a kownukondre sa preiki na heri grontapu pe sma e libi, leki wan kotoigi gi ala nâsi, èn dan a kaba sa kon” (2 Timoteus 3:1-5; Mateus 24:14). A profeititori dati e kon tru now, fu di so wan siksi milyun Yehovah Kotoigi na ini 234 kondre e teki moro leki wan milyard yuru ibri yari fu fruteri trawan fu Gado en Kownukondre. Fu dati ede na ibri presi pe den e anbegi Yehovah na ini so wan 90.000 gemeente na heri grontapu, a fiti taki den e kari den presi disi Kownukondre zaal. Drape, sma e kon fu leri fu a nyun tirimakti di de na pasi e kon.

Kompe-tiriman

8, 9. (a) Fu pe den kompe-tiriman fu Krestes e komoto? (b) Sortu frutrow wi kan abi na ini a tiri fu a Kownu nanga en kompe-tiriman?

⁸ Krestes Yesus sa abi kompe-tiriman makandra nanga en na ini Gado en hemel Kownukondre. Openbaring 14:1-4 ben taki na fesi taki 144.000 sma „ben bai puru na mindri libisma” èn den ben kisi wan opobaka fu libi na hemel. Den sma disi na man nanga uma di, na presi fu trawan dini den, ben saka densrefi èn den ben dini Gado nanga tra  libisma. „Den sa de priester fu Gado èn fu Krestes èn den sa tiri leki kownu makandra nanga en, dusun yari langa” (Openbaring 20:6). A nomru fu den de moro pikin leki di fu a „bigi ipi, di no wan sma ben man teri èn di komoto na ala nâsi nanga lo nanga pipel nanga tongo”; a „bigi ipi” disi sa pasa a kaba fu a seti fu sani disi libilibi. Den sma disi e du „santa diniwroko . . . dei nanga neti” gi Gado tu, ma den no e kisi wan kari fu go na hemel (Openbaring 7:9, 15). Den sa tron a fondamenti fu a nyun grontapu leki den sma di sa libi na ondro Gado en hemel Kownukondre.—Psalm 37:29; Yohanes 10:16.

⁹ Di Yehovah ben teki den wan di ben sa tiri nanga Krestes na hemel, dan a ben teki getrow libisma di ben tesi a libi nanga ala den problema di a libi abi. Te yu luku en bun, dan ala sani di kan miti wan sma na ini a libi na sani di den kownu-priester disi ben ondrofeni tu. So bun, a libi fu den na grontapu sa meki taki den kan tiri abra libisma moro bun. Srefi Yesus, „ben leri fu gi yesi fu den sani di a ben pina” (Hebrewsma 5:8). Na apostel Paulus ben taki fu Yesus: „Wi no abi leki granpriester wan sma di no kan firi nanga wi na ini den swakifasi fu wi, ma wan sma di den ben tesi neleki wi na ini ala fasi, ma sondro sondu” (Hebrewsma 4:15). Fu tru, a e gi wi trowstu fu sabi taki na ini Gado en regtfardiki nyun grontapu, lobi-ati kownu nanga priester di abi switifasi sa tiri libisma!

A Kownukondre Ben De San Gado Ben Abi na Prakseri?

10. Fu san ede a Kownukondre fu hemel no ben de wan pisi fu den sani di Gado ben abi na prakseri biginbigin?

¹⁰ A hemel Kownukondre ben de wan pisi fu san Gado ben abi na prakseri biginbigin di a ben meki Adam nanga Efa? Na ini a tori fu Genesis di e taki fu a meki di Gado meki sani, dan na no wan presi den e taki fu wan Kownukondre di ben sa tiri libisma. Yehovah srefi ben de a Tiriman fu den, èn so langa den ben gi yesi na en, dan no wan tra tirimakti ben de fanowdu. Genesis kapitel 1 e sori taki Yehovah ben handri nanga Adam nanga Efa, èn soleki fa a sori, dan a fosigebore hemel Manpikin fu en, ben yepi en nanga dati. A tori drape na Genesis e gebroiki wortu so leki „Gado ben taigi den” èn „Gado ben taki moro fara” nanga den.—Genesis 1:28, 29; Yohanes 1:1.

11. Sortu volmaakti bigin libisma ben abi?

¹¹ Bijbel e taki: „Gado ben si ala san a ben meki èn luku! a ben de heri bun” (Genesis 1:31). Ala sani na ini a dyari fu Eden ben de volmaakti srefisrefi. Adam nanga Efa ben libi na ini wan paradijs. Den frustan fu den ben de volmaakti èn so srefi a skin fu den ben de volmaakti. Den ben kan taki nanga a Mekiman fu den èn en ben kan taki nanga den. Èn efu den ben e tan getrow, dan den ben sa meki volmaakti pikin. Wan nyun hemel tirimakti no ben sa de fanowdu.

12, 13. Te den volmaakti libisma ben o kon moro furu, dan fu san ede Gado ben sa man taki nanga den alamala?

¹² Te a libisma famiri ben sa kon moro furu, dan fa Gado ben sa taki nanga den alamala? Prakseri den stari na hemel. Den poti makandra na ini grupu fu stari di sma e kari galaksia. Son wan fu den grupu fu stari disi abi wan milyard stari. Trawan  abi so wan wán bilyun stari. Èn sabiman e denki taki so wan 100 milyard fu den grupu fu stari disi de na ini na universum so fara leki libisma kan si na universum! Toku, a Mekiman e taki: „Opo un ai go na loktu èn luku. Suma meki den sani disi? Na a Sma di e tyari a legre fu den go na doro, so srefi a nomru fu den, di e kari den alamala srefi na den nen. Fu di a abi dinamik krakti pasa marki, èn fu di a abi tumusi bigi krakti tu, meki no wan fu den no e mankeri.”—Yesaya 40:26.

¹³ Gado kan sabi ala sani fu den hemel mekisani disi. Dati meki seiker A no ben sa de wan problema gi En fu sabi ala sani fu wan krinkrin moro pikin nomru fu libisma. Srefi now, milyunmilyun fu den futuboi fu en e begi en ala dei. Den begi dati e doro Gado wantewante. So bun fu taki nanga ala den volmaakti libisma no ben sa de wan problema gi en. A no ben sa abi wan hemel Kownukondre fanowdu fu sabi suma na den. Dati na trutru wan kefalek moi seti! Fu abi Yehovah leki Tiriman, fu kan go na en wantewante, èn fu abi a howpu fu no dede noiti, e libi fu têgo na ini wan paradijs na grontapu.

„A No De Na wan Man”

14. Fu san ede libisma sa abi Yehovah en tiri fanowdu fu têgo?

¹⁴ Ma libisma — srefi volmaakti libisma — ben sa abi Yehovah en tiri fanowdu fu têgo. Fu san ede? Fu di Yehovah no ben meki den so taki fu densrefi den ben sa man meki sani waka bun nanga den sondro Yehovah en tiri. Dati na wan wet gi libisma, soleki fa a profeiti Yeremia e erken: „Mi sabi heri bun, o Yehovah, taki a no de na a sma fu grontapu fu a bepaal en pasi. A no de na wan man di e waka srefi fu bepaal pe fu poti en futu na pasi. Sori mi mi fowtu, o Yehovah” (Yeremia 10:23, 24). A ben sa de wan don sani efu libisma ben o denki taki den ben sa kan meki sani waka bun na ini a libimakandra sondro fu Yehovah tiri den. Dati no ben o de a fasi fa A ben meki den. Efu den ben o de fri fu Yehovah en tiri, dan sondro misi dati ben o abi leki bakapisi a denki di den ben o denki densrefi nomo; èn so srefi dati ben o abi leki bakapisi bita-ati, tranga ogridu, feti, nanga dede. ’A wan libisma ben o tiri a tra libisma nanga ogri bakapisi gi en.’—Preikiman 8:9.

15. San ben pasa fu di wi fosi papa nanga mama ben teki wan takru bosroiti?

¹⁵ A de wan sari sani, taki wi fosi papa nanga mama ben teki a bosroiti taki den no ben abi Gado fanowdu leki a Tiriman fu den, èn den ben teki a bosroiti fu libi sondro taki den musu gi yesi na en. Leki wan bakapisi fu dati, Gado no ben yepi den moro fu tan volmaakti. Now den ben tron neleki wan elektris wrokosani di en titei ben koti puru fu a presi pe a faya fu en ben komoto. So bun, baka wan pisi ten den ben o du sani safrisafri èn den ben o tapu fu du sani — dati ben o pasa te den dede. Den ben tron leki wan brokobroko sani di sma ben gebroiki fu meki tra sani; èn dati na ala san den ben kan gi den bakapikin fu den (Romesma 5:12). „A Klepston [Yehovah], volmaakti en wroko de, bika ala den pasi fu en na retidu. . . . Den fu den sei, handri na wan pori fasi; den no de en pikin, a mankeri didon na densrefi” (Deuteronomium 32:4, 5). A tru, taki na opruru yeye mekisani di ben tron Satan ben furu na ede fu Adam nanga Efa; ma Adam nanga Efa ben abi volmaakti frustan, èn fu dati ede den ben kan taigi Satan taki den no ben wani du a fowtu sani di a ben aksi fu den.—Genesis 3:1-19; Yakobus 4:7.

16. Sortu buweisi historia e gi fu san e pasa te sma wani de fri fu Gado?

¹⁶ Historia e gi bogobogo buweisi fu a sani di e pasa te sma wani de fri fu Gado. Dusundusun yari, sma pruberi ala sortu fasi fu libisma tiri, èn den ben pruberi ala sortu ekonomia sistema nanga fasi fu libi na ini wan libimakandra. Toku, godelowsufasi e go doro fu „kon ogri moro nanga moro” (2 Timoteus 3:13). A buweisi dati wi si na ini a di fu 20 yarihondro. A yarihondro dati ben lai nanga bita-ati sani di sma ben du, èn a ben lai nanga ogri, feti, angriten, pôtifasi, nanga pina, di sma ben du moro leki iniwan ten na ini a historia. Èn awansi o furu den go na fesi fu gi datra yepi, toku te fu kaba ibri sma e dede (Preikiman 9:5, 10). Fu di libisma ben pruberi fu du den eigi sani, dati meki libisma meki densrefi tron wan sani di Satan nanga den ogri yeye fu en kan swari; èn dati de so takru fu di Bijbel e kari Satan „a gado fu a seti fu sani disi”.—2 Korentesma 4:4.

 A Presenti fu a Fri Wani

17. Fa libisma ben musu gebroiki a presenti fu a fri wani di den kisi fu Gado?

¹⁷ Fu san ede Yehovah ben sa meki taki libisma kan waka den eigi pasi? Fu di a ben meki den nanga a kefalek moi presenti fu a fri wani, dati wani taki dati den srefi kan bosroiti san den o teki. „Pe a yeye fu Yehovah de, na drape fri de” (2 Korentesma 3:17). No wan sma wani de wan robot, e meki wan trawan taigi en san a musu taki èn san a musu du ibri momenti fu a dei. Ma Yehovah ben wani, taki libisma musu gebroiki a presenti fu a fri wani na wan frantwortu fasi; A ben wani, taki libisma ben musu si o koni a de fu du a wani fu en èn o koni a de fu tan saka densrefi na ondro en (Galasiasma 5:13). So bun, a no ben de so taki libisma ben musu de fri krinkrin fu a tiri fu Gado so taki den kan du san densrefi wani nomonomo, bika dati ben sa meki taki ala sma ben sa libi sondro wet fu tiri den. A fri di sma ben o de fri, ben o abi skotu; èn den skotu dati ben o de den wet di Gado ben gi akruderi a bun-ati fu en.

18. San Gado ben sori fu di a ben libi libisma fu meki den teki den eigi bosroiti?

¹⁸ Fu di Gado gi pasi meki a libisma famiri waka en eigi pasi, dati meki a sori wi gi ala ten taki wi abi en tirimakti fanowdu. A fasi fa Gado e tiri, a reti di en abi fu tiri, dati na a wan-enkri reti fasi fu tiri. A tiri dati e meki taki sma e firi moro koloku, e firi moro bun, èn sani e waka moro bun gi den. Disi de so fu di wi frustan nanga wi skin na sani di Yehovah meki, èn den sani disi ben sa wroko moro bun efu den ben o wroko akruderi den wet fu Yehovah. „Mi, Yehovah, na yu Gado, a Sma di e leri yu fu gi yusrefi wini, a Sma di e meki yu waka na tapu a pasi di yu musu waka” (Yesaya 48:17). Wan sma de fri fu teki en eigi bosroiti so langa a e hori ensrefi na den wet fu Gado. Efu sma e du dati dan dati no de wan hebi sani, ma a ben sa meki a sma prisiri nanga wan moksi patu fu difrenti sortu nyanyan, oso, moi sani, nanga poku. Efu a fri wani ben gebroiki na wan yoisti fasi, dan dati ben o meki sma abi wan kefalek moi libi di ala ten e tan moi na ini wan paradijs na grontapu.

19. Sortu wrokosani Gado e gebroiki fu meki libisma kon bun baka nanga en?

¹⁹ Ma fu di libisma teki wan takru bosroiti, dati meki den hari densrefi puru fu Gado, èn den ben kon de onvolmaakti, den ben e go na baka, èn den dede. So bun, den ben abi wan sma fanowdu di ben o frulusu den fu a sari tori disi èn fu tyari  den baka na ini wan bun matifasi nanga Gado; so taki den ben kan de manpikin nanga umapikin fu En. A wrokosani di Gado ben gebroiki fu du a tori disi na a Kownukondre, èn a Frulusuman na Yesus Krestes (Yohanes 3:16). Nanga yepi fu a seti disi, dan den sma di trutru ben abi berow — soleki a lasi manpikin na ini Yesus en agersitori — ben sa kon bun baka nanga Gado èn a ben sa teki den baka leki en eigi pikin.—Lukas 15:11-24; Romesma 8:21; 2 Korentesma 6:18.

20. Fa a Kownukondre sa meki den sani di Gado abi na prakseri kon tru?

²⁰ Sondro tweifri, Yehovah en wani sa pasa na grontapu (Yesaya 14:24, 27; 55:11). Nanga yepi fu en Kownukondre na ondro Krestes, Gado sa buweisi krinkrin (A sa sori) taki en abi a reti fu tiri. A Kownukondre dati sa tyari wan kaba kon na a tiri fu libisma èn a tiri fu ogri yeye tapu a grontapu disi, èn soso a tiri dati sa tiri komoto fu hemel wan dusun yari langa (Romesma 16:20; Openbaring 20:1-6). Ma na ini a pisi ten dati, dan fa Yehovah sa sori taki a tiri fu en na a moro bun tiri? Èn baka den dusun yari, dan sortu rol a Kownukondre sa prei? A tra artikel sa poti prakseri na den aksi disi.

Penti fu Luku Baka San Wi Leri

• San na a thema fu a Bijbel?

• Suma sa de na ini a nyun tirimakti fu grontapu?

• Fu san ede sani noiti kan waka bun te libisma wani tiri densrefi sondro Gado?

• Fa wi musu gebroiki a fri wani fu wi?

[Aksi fu a tori disi]

[Prenki na tapu bladzijde 10]

A leri fu Yesus ben poti krakti tapu Gado en tirimakti nanga yepi fu a Kownukondre

[Prenki na tapu bladzijde 12]

Na ini ibri kondre Yehovah Kotoigi e meki a Kownukondre de a moro prenspari sani san den e leri trawan

[Prenki na tapu bladzijde 14]

Historia e sori taki sani no e waka bun te sma wani de fri fu Gado

[Sma di abi a reti fu a prenki]

WWI soldiers: U.S. National Archives photo; concentration camp: Oświęcim Museum; child: UN PHOTO 186156/​J. Isaac