Mi Meki a Santa Yeye Kon De Mi Yepiman?

DOMRI nanga furu tra sma, abi difrenti prakseri fu Gado santa yeye. Ma a tweifri di den e tweifri no de fanowdu. Bijbel e taki krinkrin san na a santa yeye. Na presi taki a de wan sma, soleki fa son sma e taki, a de a bigi wroko krakti di Gado e gebroiki fu du san a wani.—Psalm 104:30; Tori fu den Apostel 2:33; 4:31; 2 Petrus 1:21.

Fu di a santa yeye abi so furu fu du nanga a kontru fu den prakseri fu Gado, meki wi musu wani taki wi libi de akruderi dati. Wi musu wani taki a de wi yepiman.

Wan Yepiman​—Fu San Ede A De Fanowdu?

Di Yesus ben taki fu a ten di a no ben o de moro na grontapu, dan a ben gi den disipel fu en a dyaranti: „Mi sa aksi a Tata èn a sa gi unu wan tra yepiman di sa de nanga unu fu têgo.” Èn ete wan leisi: „Ma toku mi e taigi unu a waarheid: A de fu a bun fu unu taki mi e gowe. Bika efu mi no e gowe, dan a yepiman no sa kon na unu kwetikweti; ma efu mi e gowe, mi sa seni en kon na unu.”—Yohanes 14:16, 17; 16:7.

Yesus ben gi den disipel fu en wan seryusu wroko di a ben gi den a komando: „Go fu dati ede, èn meki disipel fu sma fu ala nâsi, èn dopu den na ini a nen fu a Tata èn fu a Manpikin èn fu a santa yeye, èn leri den fu du ala den sani di mi komanderi unu” (Mateus 28:19, 20). Disi no ben o de wan makriki wroko, bika a ben musu du ala di sma ben o gens den disipel.—Mateus 10:22, 23.

Makandra nanga gens di ben o kon fu dorosei, dan trobi ben o opo kon so srefi na ini a gemeente. „Now mi e frumane unu, brada”, na so Paulus ben skrifi den Kresten na ini Rome na a pisi ten fu 56 G.T., „fu hori ai na den sma di, kontrari a leri di unu kisi, e meki pratifasi kon nanga okasi fu sma naki futu fadon, èn tan farawe fu den” (Romesma 16:17, 18). A situwâsi disi ben o kon moro ogri te den apostel dede. Paulus ben warskow: „Mi sabi taki baka te mi gowe, dan wolfu di e kwinsi sma sa boro kon na un mindri èn den no sa handri na ipi na wan safu fasi, èn fu un eigi mindri man sa opo tanapu di e taki kruktu sani fu hari den disipel kon na den baka.”—Tori fu den Apostel 20:29, 30.

Gado ben abi fu yepi den fu kakafutu gi den problema disi. A ben du dati nanga yepi fu Yesus. Baka di a ben kisi wan opobaka, dan na a dei fu a Pinksterfesa fu 33 G.T., so wan 120 fu en bakaman, „alamala ben kon furu nanga santa yeye”.—Tori fu den Apostel 1:15; 2:4.

Den disipel ben erken taki a santa yeye di kanti na a okasi disi ben de a yepi di Yesus ben pramisi fu gi den. Sondro tweifri den ben frustan moro bun now san ben de a yepiman di Yesus ben taki fu en: „A yepiman, a santa yeye, di a Tata sa seni kon na ini mi nen, a wan dati sa leri unu ala den sani èn a sa tyari ala den sani di mi ben fruteri unu, kon baka na ini un prakseri” (Yohanes 14:26). A ben kari en tu ’a yepiman, a yeye fu a waarheid’.—Yohanes 15:26.

Na Sortu Fasi a Yeye Na wan Yepiman?

A yeye ben musu de wan yepiman na difrenti fasi. Fosi, Yesus ben pramisi taki a yeye ben o meki den memre den sani di a ben fruteri den. Nanga disi a ben wani taki dati a yeye ben o du moro leki fu yepi den nomo fu memre wortu. A yeye ben o yepi den fu frustan a dipi fu den sani di a ben leri den èn san den sani dati ben wani taki trutru (Yohanes 16:12-14). Fu taki en syatu, a yeye ben musu meki taki den disipel fu en ben o frustan a waarheid moro bun. Na apostel  Paulus ben skrifi baka ten: „A de na wi taki Gado tyari den kon na krin nanga yepi fu en yeye, bika a yeye e ondrosuku ala sani, srefi den dipi sani fu Gado” (1 Korentesma 2:10). Efu den salfu bakaman fu Yesus ben musu yepi trawan fu kisi soifri sabi, dan a fasi fa densrefi ben frustan sani ben musu abi wan bun fondamenti.

Na a di fu tu presi, Yesus ben leri den disipel fu en fu begi èn fu du dati furutron. Efu den ben e firi son ten taki den no sabi trutru san fu begi, dan a yeye ben kan taki gi den noso ben man yepi den. „Na a srefi fasi, a yeye e kon yepi wi tu nanga wi swakifasi; bika wi no sabi san na a problema di wi musu begi fu en, ma a yeye srefi e taki gi wi nanga geme di no de fu yere.”—Romesma 8:26.

Na a di fu dri presi, a yeye ben musu yepi den disipel fu Yesus fu opo taki gi a waarheid na publiki. A ben warskow den: „Den o gi unu abra na den krutubangi drape, èn den sa krawasi unu na ini den snoga fu den. Srefi fu mi ede den sa srepi unu go na fesi tiriman nanga kownu, fu unu de leki wan kotoigi gi den èn gi den nâsi. Ma te den gi unu abra, no broko un ede nanga fa unu o piki noso san unu o taki, bika na a yuru ten dati unu o kisi san unu musu taki; bika a no soso unu e taki, ma a yeye fu un Tata e taki nanga yepi fu unu.”—Mateus 10:17-20.

A santa yeye ben o yepi sma tu fu kon sabi a Kresten gemeente èn a ben o buweigi den memre fu a gemeente fu teki koni bosroiti. Meki wi taki moro fini fu den tu sani disi di abi fu du nanga a tori disi èn luku san den wani taki gi wi tide.

A Yeye E Sori Suma Gado Feni Bun

Furu yarihondro langa den Dyu ben dini ondro a Wet fu Moses leki a pipel di Gado ben frukisi. Bika den ben weigri fu teki Yesus leki a Mesias, meki a ben taki na fesi taki heri esi Yehovah ben o trowe den tu: „Noiti unu no ben leisi na ini den Buku fu Bijbel: ’A ston di den bowman ben trowe, na a wan di kon tron a prenspari ukuston. Fu Yehovah ede disi pasa, èn a de wan tumusi moi sani na ini wi ai’? Dati meki mi e taigi unu: Den sa teki a kownukondre fu Gado puru fu unu èn gi en na wan nâsi di e meki den froktu fu en” (Mateus 21:42, 43). Di a Kresten gemeente ben seti kaba na a Pinksterfesa fu 33 G.T., dan den bakaman fu Krestes kon tron a „nâsi di e meki den froktu fu en”. Sensi a ten dati, dan a gemeente disi ben de a sani di Gado ben gebroiki fu taki nanga sma. Gado ben gi wan krin marki fu meki sma kon sabi suma a feni bun.

Na a Pinksterfesa, a santa yeye ben meki den disipel taki tra tongo di den no ben leri noiti ete. Disi ben meki taki sma di ben luku ben e fruwondru èn den ben aksi: „Fa a du kon taki ibriwan fu wi e yere a tongo fu pe wi ben gebore?” (Tori fu den Apostel 2:7, 8). Den ben man taki tra tongo di den no ben sabi, èn so srefi „furu wondruwroko nanga marki ben bigin feni presi nanga yepi fu den apostel”. Dati meki so wan dri dusun sma ben erken taki a yeye fu Gado ben e wroko trutru.—Tori fu den Apostel 2:41, 43.

So srefi, fu di den e sori „a froktu fu a yeye” — lobi, prisiri, vrede, langa-pasensi, switifasi, bun-ati, bribi, safri-atifasi, nanga a dwengi di wan sma e dwengi ensrefi — dan sma ben kon sabi krinkrin taki den disipel fu Krestes ben de Gado futuboi (Galasiasma 5:22, 23). Fu taki en leti, dan lobi na a tumusi aparti sani di ben meki sma kon sabi a tru Kresten gemeente. Yesus ben taki na fesi: „Nanga disi ala sma sa sabi taki unu na mi disipel, efu unu abi lobi na un mindri.”—Yohanes 13:35.

Den memre fu a fosi Kresten gemeente ben teki a tiri di Gado en santa yeye ben gi èn den ben gebroiki a yepi di a ben gi, bun. Kresten di e libi na ini a ten disi e frustan taki Gado no e wiki den dedewan now èn a no e du wondru leki fa a ben du dati na ini a fosi yarihondro. Ma den e meki sma kon sabi den leki opregti disipel fu Yesus Krestes fu di den e kweki a froktu fu a yeye fu Gado.—1 Korentesma 13:8.

A Yeye E Yepi Wi fu Teki Bosroiti

Bijbel skrifi nanga yepi fu santa yeye. So bun, te wi e meki Bijbel abi krakti na wi tapu, dan a de neleki santa yeye e gi wi leri (2 Timoteus 3:16, 17). A kan yepi wi tu fu teki koni bosroiti. Ma wi e meki a du dati?

Fa a de nanga a wroko di wi teki fu du? Santa yeye o meki taki wi man si wan wroko di wi  wani du, soleki fa Yehovah e si dati. A wroko di wi e du, musu kruderi nanga Bijbel gronprakseri, èn efu a kan dan a wroko disi musu yepi wi fu suku fu doro theokrasia marki. A moni di yu o kisi noso wan moro betre posisi na wrokope, na sani di trutru no de so prenspari. Wan moro prenspari sani na efu a wroko di wi e du e gi wi san wi abi fanowdu fu tan na libi èn efu a e meki taki wi abi nofo ten nanga nofo okasi fu du wi Kresten plekti.

A winsi di wi e winsi fu nyan bun fu a libi, na wan sani di furu sma wani èn a de wan bun sani tu (Preikiman 2:24; 11:9). So bun, wan Kresten di si sani na wan yoisti fasi, kande o abi prisiriten so taki a kan kisi krakti baka èn kan firi bun. A no musu abi prisiriten di e sori taki a e waka baka „den wroko fu a skin”, ma a prisiriten di a abi musu sori taki a de wan sma di e kweki a froktu fu a yeye. Paulus e fruklari: „Den wroko fu a skin de krin fu si now, èn den na hurudu, libi di no krin, lusu fasi fu libi, na anbegi fu kruktu gado, afkodrei, feantifasi, trobi, dyarusu, faya atibron, kesekese, pratifasi, sekte, bigi-ai, dringi sopi te fu drungu, bradyari fesa, nanga den sortu sani disi.” Wan sani di wi no musu du so srefi, na taki wi no musu tron „sma di e prakseri densrefi nomo, fu di wi e wiki strei nanga makandra èn e dyarusu tapu makandra”.—Galasiasma 5:16-26.

A de a srefi te wi e teki mati. Te wi e teki mati, dan a sa de wan koni sani fu luku fa den de na yeye fasi. Wi no musu teki mati fu di wi e luku a fesi fu den, noso den sani di den abi. A de krin taki a man David ben de a mati fu Gado, bika Gado ben taki fu en dati a ben de „wan man di [en] ati feni bun” (Tori fu den Apostel 13:22). Di Gado ben teki David leki kownu fu Israèl, dan a no ben luku a fesi fu David, ma a ben teki en akruderi a gronprakseri: „Gado no e luku sani na a fasi fa libisma e luku sani, bika libisma e si san na ai e si nomo; ma fu a sei fu Yehovah, a e si fa na ati de.”—1 Samuèl 16:7.

Dusundusun matifasi broko fu di sma ben bow den matifasi disi fu di den luku sma fesi noso den luku den sani di a trawan abi. Matifasi di rutu na ini gudu di kan lasi gowe iniwan ten, kan broko wantronso (Odo 14:20). A Wortu fu Gado di skrifi nanga yepi fu santa yeye e gi wi a rai taki te wi e teki mati, dan wi musu teki den wan di kan yepi wi fu dini Yehovah. A e fruteri wi fu poti prakseri na a gi fu sani na presi fu a kisi fu sani, bika a e tyari moro koloku kon te wi e gi sani (Tori fu den Apostel 20:35). Ten nanga lobi na wan tu fu den moro warti sani di wi kan gi wi mati.

Wan Kresten di e suku wan trowpatna, e kisi rai fu Bijbel di skrifi nanga yepi fu santa yeye. Te yu e luku en bun, dan Bijbel e taki: ’No luku a moi fesi nanga a skin fu a sma nomo. Luku den futu.’ Den futu? Iya, na a fasi disi: A sma e gebroiki den futu fu en fu du a wroko fu Yehovah fu preiki a bun nyunsu? Den futu fu en switi, fu taki en so, soleki fa Yehovah e si dati? Den futu fu en e tyari a boskopu fu waarheid èn a bun nyunsu fu vrede? Wi e leisi: „O switi na tapu den bergi den futu fu a sma de di e tyari bun nyunsu kon, a sma di e meki vrede bekènti, a sma di e tyari bun nyunsu kon fu wan moro bun sani, a sma di e meki frulusu bekènti, a sma di e taigi Sion: ’Yu Gado tron kownu!’”—Yesaya 52:7; Efeisesma 6:15.

Fu di wi e libi na ini „muilek ten di tranga fu pasa”, meki wi abi yepi fanowdu fu du a wani fu Gado (2 Timoteus 3:1). A yepiman, Gado en santa yeye, ben horibaka na wan krakti fasi gi a wroko fu Kresten na ini a fosi yarihondro. A ben de so srefi a yepiman fu iniwan sma. Wi tu kan meki taki a santa yeye de wi yepiman. Wan prenspari fasi fa wi kan du dati na taki wi e studeri Gado Wortu di skrifi nanga yepi fu santa yeye, fayafaya. Wi meki a santa yeye kon tron wi yepiman kaba?

 [Wan prenki di e tapu heri bladzijde 23]