Yu Kan Kon Krosibei na wan Gado Di Yu No Man Si?
Yu Kan Kon Krosibei na wan Gado Di Yu No Man Si?
Kande yu e aksi: „Fa mi kan kweki wan bun matifasi nanga wan sma di mi no man si?” A ben kan gersi leki na aksi disi bun. Ma prakseri disi:
O PRENSPARI a de fu si wan sma te yu wani kweki lobi na ini wan matifasi èn te yu wani meki a matifasi disi tan ala ten? A no de so taki den sani di yu no man si de prenspari tu, noso moro prenspari srefi? A no de fu taki! Dati meki son sma kweki wan bun matifasi nanga trawan fu di den gwenti seni brifi gi makandra. Na ini den brifi fu den, den e fruteri makandra na wan eerlijkfasi fu den sani di den lobi èn di den no lobi, fu den sani di den wani doro, fu den gronprakseri di den e horibaka gi, nanga den switi tori di den lobi. Den e fruteri makandra tu fu den eigifasi fu den, noso den e taki fu sani di e hari den prakseri.
Breni sma e sori tu taki a si di wan sma e si no de a moro prenspari sani fu kweki wan bun matifasi nanga wan tra sma. Luku na eksempre fu Edward nanga Gwen, wan trowpaar di breni. * Edward ben miti Gwen na wan bigisma skoro fu brenisma, so bun Gwen ben de wan kompestudenti fu en. Edward ben lobi den eigifasi fu Gwen. A ben lobi spesrutu taki Gwen ben de eerlijk te a ben e taki èn taki a ben e tyari ensrefi na wan yoisti fasi. A ben lobi a tumusi moi fasi fa Gwen ben denki fu wroko tu. Gwen fu en sei ben lobi Edward fu di, soleki fa Gwen srefi taki: „Edward ben abi ala den eigifasi di ben de prenspari, soleki fa den ben leri mi di mi ben e gro kon bigi.” Den bigin hori nanga makandra èn dri yari baka dati den trow.
„Te yu de makandra”, na so Edward e taki, „dan a no abi trobi trutru efu wan sma breni fu man kweki wan matifasi nanga wan tra sma. Yu no man si makandra kande, ma a no muilek fu kon sabi fa wan tra sma e firi.” Now, 57 yari baka dati, den lobi makandra trutru ete. Den e taki dati no moro mendri leki fo sani yepi den fu abi wan tumusi moi matifasi: (1) luku den eigifasi fu a tra sma, (2) prakseri fu den eigifasi disi so taki den e hari yu, (3) tan abi bun komunikâsi nanga makandra èn (4) du sani makandra.
Den fo penti disi de prenspari trutru gi iniwan bun matifasi, efu a de na mindri mati, trowpatna, noso moro prenspari, na mindri libisma nanga Gado. Na ini na artikel di e kon now, wi o si fa den penti disi kan yepi wi, efu wi e gebroiki den, fu kweki wan bun matifasi nanga Gado, awinsi wi no man si en. *
[Futuwortu]
^ paragraaf 4 Den nen kenki.
^ paragraaf 6 Tra fasi leki wan matifasi na mindri libisma, wan matifasi nanga Gado e kon fu di sma e bribi taki a de (Hebrewsma 11:6). Fu wan finifini takimakandra di e sori fa wi kan bow wan tranga bribi na ini Gado, grantangi luku Is er een Schepper die om u geeft?, di a Wachtower Bible and Tract Society of New York, Inc., tyari kon na doro.