Yu Musu Ondrosuku Tra Bribi?

„MI BEN go na ala den Kresten konmakandra pikinmoro wan yari èn mi ben prisiri fu fruteri trawan fu Gado en Kownukondre”, Miguel e taki. Miguel na wan Kotoigi fu Yehovah now na ini Zuid-Amerika. „Dan mi bigin arki kerki programa na radio èn mi bigin luku kerki preikiman na telefisi. Mi ben denki taki den programa dati ben kan yepi mi fu frustan den sma fu tra kerki moro bun. Mi ben sabi taki den leri fu den no ben de akruderi Bijbel, ma mi ben wani sabi moro.”

Na ini a srefi kondre, Jorge ben wroko fayafaya fu leri trawan fu a tru anbegi. Toku, wan dei, ensrefi tu bigin arki kerki programa na radio èn na telefisi. „A de fanowdu fu sabi fa tra sma e denki”, a ben gwenti fu taki. Di sma aksi en fu den kefar di de te sma e arki den falsi leri disi, dan a ben gwenti fu taki: „Noti no sa man swaki a bribi fu wan sma di sabi Bijbel waarheid.” Den ondrofenitori disi e meki wan prenspari aksi opo kon: Wi e handri nanga koni te wi e arki den sani di tra sma e bribi?

Sabi Sortuwan Na a Tru Kresten Bribi

Baka di den apostel dede, dan a tru anbegi ben kon pori fu di furu sokari Kresten bribi ben opo kon. Yesus ben si disi na fesi, èn fu dati ede a meki wi kon sabi wan fasi fa wi kan si a difrenti na mindri den difrenti falsi Kresten bribi èn a tru Kresten bribi. Na a fosi presi, a warskow wi: „Luku bun nanga den falsi profeiti di e kon na unu na ini skapububa, ma na inisei den de krasi wolfu.” Dan a taki go moro fara: „Na den froktu unu sa kon sabi den” (Mateus 7:15-23). Den tru bakaman fu Yesus e du san a leri den èn fu di den e tyari bun froktu, meki a no muilek fu kon sabi den. Neleki fa Yesus ensrefi ben du, den e go na sma fu fruklari a Kownukondre fu Gado nanga yepi fu den Buku fu Bijbel. Fu di den e waka baka na  eksempre fu Yesus, meki den abi noti fu du nanga den politiek nanga sociaal yu-o-hari-yu-o-trusu fu grontapu. Den e teki a Bijbel leki a Wortu fu Gado èn den e lespeki en leki a waarheid. Den e meki a nen fu Gado bekènti. Èn fu di den e du muiti fu sori a lobi di Gado e leri sma, meki den no e teki prati na orloku. Na presi fu dati, den e handri nanga makandra leki brada.—Lukas 4:43; 10:1-9; Yohanes 13:34, 35; 17:16, 17, 26.

Soleki fa den Buku fu Bijbel e sori, sma kan „si a difrenti na mindri wan regtfardiki sma nanga wan godelowsu sma, na mindri wan sma di e dini Gado nanga wan sma di no dini en” (Maleaki 3:18). Tru anbegiman fu a ten disi de na ini wánfasi ini a fasi fa den e denki èn e handri, neleki fa a ben de nanga den fosi yarihondro Kresten (Efeisesma 4:4-6). Te yu kon sabi so wan grupu fu tru Kresten kaba, dan fu san ede yu ben sa wani nomonomo fu sabi moro fu a bribi di tra sma abi?

Luku Bun Nanga Falsi Leriman

Bijbel e erken taki srefi te sma leri Bijbel waarheid kaba, toku a kefar de taki falsi leri kan tyari pori kon na yeye fasi. Na apostel Paulus e warskow: „Luku bun: kande wan sma de, di sa tyari unu gowe leki wan sani di a kisi nanga yepi fu filosofia nanga bedrigifasi di de wan soso sani, akruderi den gwenti fu libisma, akruderi den fondamenti sani fu grontapu èn no akruderi Krestes” (Kolosesma 2:8). A tekst disi e meki wi frustan sani krin srefisrefi! Neleki meti di wani tyari yu gowe fu nyan yu, na a srefi fasi falsi leriman kan de wan trutru kefar.

A tru taki Paulus ben poti prakseri na a bribi fu tra sma. Wan leisi a bigin wan publikitaki nanga den wortu: „Sma fu Ateine, mi si taki na ini ala sani moro leki tra sma, a gersi taki unu abi frede gi den gado. Fu gi wan eksempre, di mi ben waka pasa èn mi ben luku finifini den sani di unu e anbegi, dan mi feni wan altari so srefi pe ben skrifi na tapu: ’Gi wan Gado Di Wi No Sabi’” (Tori fu den Apostel 17:22, 23). Toku a no de so taki Paulus ben furu en frustan doronomo nanga den filisofia fu den Griki publiki takiman.

Wan bigi difrenti de na mindri a sabi di wi e kon sabi moro fu den rutu nanga den leri fu falsi bribi èn a furu di wi e furu wi frustan nanga den sani disi. * Yehovah poti „a getrow èn koni srafu” na wroko fu sorgu gi leri di gron na tapu en Wortu (Mateus 4:4; 24:45). Paulus srefi ben skrifi: „Unu no kan nyan na ’a tafra fu Yehovah’ èn na a tafra fu den ogri yeye. Noso ’a de so taki wi wani meki Yehovah kon dyarusu’?”—1 Korentesma 10:20-22.

Kande wan tu falsi leriman ben de tru Kresten fosi, ma wan dei den drai gowe libi waarheid fu teki wan takru pasi (Yudas 4, 11). A sani disi no musu fruwondru wi. Baka di Yesus ben taki fu „a getrow èn koni srafu” di e teki presi gi a grupu fu salfu Kresten, dan a taki fu a „takru srafu”, wan grupu di e kragi, „mi masra no e kon ete”, èn a e bigin fon den kompesrafu (Mateus 24:48, 49). Furutron, den sma disi srefi makandra nanga den bakaman fu den, no abi soifri leri; den wani soso fu meki trawan lasi a bribi fu den. Fu den sma dati na apostel Paulus ben skrifi: „Efu wan sma e kon na unu èn no e tyari a leri disi, dan noiti teki en na ini un oso noso no taigi en odi.”—2 Yohanes 10; 2 Korentesma 11:3, 4, 13-15.

Opregti sma di e suku a waarheid e handri nanga koni te den e poti bun prakseri na den sani di den e yere fu tra kerki. Te fu kaba Gado sa blesi opregti sma di e suku a waarheid. Bijbel e taki fu a koni fu Gado: „Efu yu e tan suku en leki solfru, èn yu e tan suku en leki gudu di kibri, dan ini a tori disi . . . yu sa feni a sabi fu Gado srefi” (Odo 2:4, 5). Fu di tru Kresten feni a sabi disi fu Gado kaba nanga yepi fu Bijbel èn a Kresten gemeente èn fu di den si fa Yehovah e blesi den sma di e meki a sabi fu Gado tiri den, dati meki den no e tan arki den falsi leri fu tra kerki.—2 Timoteus 3:14.

[Futuwortu]