Ondrofenitori

„Ai, Meki Wi Abi wan Bribi Di No E Kon Swaki”!

SOLEKI FA HERBERT MÜLLER FRUTERI

Wan tu mun baka di a legre fu Hitler broko go na ini Bakrakondre, lanti tapu a wroko fu den Kotoigi fu Yehovah. A no ben teki langa bifo mi ben tron wan fu den moro prenspari sma di den Nazi ben suku fu kisi èn den ben onti mi leki wan meti.

WAN leisi mi ben weri sote fu a kibri di mi ben musu kibri èn fu a lon di mi ben musu lon, taki mi taigi a wefi fu mi taki kande a ben o de moro bun efu a legre ben kisi mi. Na a srefi ten dati mi prakseri den wortu fu wan singi: „Ai, meki wi abi wan bribi di no e kon swaki, awansi feanti e frufolgu wi.” * Fu di mi ben prakseri a singi dati, dan mi kisi krakti baka èn mi prakseri mi papa nanga mi mama na ini Doisrikondre èn so srefi a dei di den mati fu mi ben singi a singi disi fu bari adyosi gi mi. Mi kan fruteri unu wan tu fu den prakseri disi?

Na Eksempre fu Mi Papa Nanga Mi Mama

Di mi gebore na ini 1913 na ini a foto Copitz na Doisrikondre, dan mi papa nanga mi mama ben de memre fu na Evangelisch Kerki. * Seibi yari baka dati na ini 1920, dan mi papa gowe libi a kerki. Tapu 6 april, a aksi fu kisi wan Kirchenaustrittsbescheinigung (Wan fruklari di skrifi taki wan sma e gowe libi kerki). Na ambtenari fu a lantikantoro pe sma e skrifi den nen, meki a fruklari gi en. Ma wán wiki baka dati, mi papa ben de baka na ini a kantoro fu taigi na ambtenari taki a nen fu en umapikin no ben de na tapu a fruklari. Na ambtenari meki ete wan dokumenti di ben skrifi taki so srefi en umapikin Martha Margaretha Müller ben gowe libi a kerki. Na a ten dati, Margaretha, mi sisa, ben abi wán nanga afu yari. Te a ben abi fu du nanga a dini fu Yehovah, dan mi papa no ben du sani afu-afu!

 Na ini a srefi yari dati, den Bijbel Ondrosukuman, soleki fa sma ben sabi den Kotoigi fu Yehovah na a ten dati, dopu mi papa nanga mi mama. Mi papa no ben meki spotu nanga den pikin fu en, ma fu di a ben de getrow na Yehovah, dati meki a ben de moro makriki gi wi fu teki a tiri fu en. A getrowfasi di mi papa nanga mi mama ben abi, so srefi ben buweigi den fu tyari kenki kon. Fu gi wan eksempre, wan ten ben de taki mi papa nanga mi mama no ben wani taki wi prei na dorosei tapu sonde. Toku, wán sonde na ini 1925, wi papa nanga mama fruteri wi taki wi ben o go koiri. Wi tyari wan tu nyanyan sani nanga wi èn wi ben abi wan switi ten — dati fu tru ben de wan heri tra sani leki te wi ben tan na ini na oso heri dei! Mi papa ben taki dati a ben leri wan tu sani na wan kongres no so langa pasa èn den sani dati ben meki a kenki a fasi fa a ben denki fu den sani di sma ben gwenti fu du tapu sonde. Te a ben abi fu du nanga tra sani, dan a ben sori tu taki a ben wani tyari kenki kon.

Ala di mi papa nanga mi mama ben e sikisiki, toku den ben teki prati na a preikiwroko. Fu gi wan eksempre, fu prati a traktaat Ecclesiastics Indicted (Wan kragi kontrari den kerki tiriman) dan wan mofoneti wi teki loko makandra nanga den tra memre fu a gemeente èn wi go na a foto Regensburg di ben de so wan 300 kilometer pasa Dresden. A dei baka dati, wi prati den traktaat na ini a heri foto èn baka dati wi teki loko go baka na oso. Na a ten di wi doro oso, dan pikinmoro 24 yuru ben pasa kaba.

Mi E Libi Oso

Fu di mi ben abi demakandra nanga a Jugendgruppe (Yongusma Grupu) na ini a gemeente fu wi, dan dati yepi mi tu fu gro na yeye fasi. Ala wiki, den yongu sma di ben abi moro leki 14 yari, ben kon makandra nanga wan tu fu den moro owru brada fu a gemeente. Wi ben prei wan tu wega, wi ben prei poku, wi ben studeri Bijbel, èn wi ben taki fu den sani di Gado meki èn so srefi fu sabidensi. Ma na ini 1932, di mi ben abi 19 yari, dan wan kaba kon na a demakandra di mi ben abi nanga a grupu.

Na ini april fu a yari dati, dan mi papa kisi wan brifi fu a kantoro fu a Waktitoren Genootschap na Maagdenburg. A Genootschap ben suku wan sma di ben man rèi oto èn di ben wani pionier. Mi ben sabi taki mi papa nanga mi mama ben wani sote taki mi go pionier, ma mi ben feni taki mi no ben man du dati. Fu di mi papa nanga mi mama ben de pôti sma, dati meki di mi ben abi 14 yari, mi ben bigin meki broko baisigri nanga naimasyin, èn so srefi skrifimasyin nanga tra wrokosani di sma ben gebroiki na ini kantoro. Fa mi ben kan libi mi famiri? Den ben abi mi yepi fanowdu. Boiti dati, mi no ben dopu srefi ete. Mi papa sidon nanga mi èn a poti wan tu aksi gi mi fu si efu mi ben frustan san a ben wani taki fu teki dopu. Di den piki fu mi ben overtoigi en taki mi ben gro nofo na yeye fasi so taki mi ben kan teki dopu, dan a taki: „Yu musu gi yusrefi fu du a wroko disi.” Mi du dati.

Wán wiki baka dati, mi kisi wan kari fu kon na Maagdenburg. Di mi taigi den mati fu mi di ben de na ini a Yongusma Grupu, dan den ben wani seni mi gowe nanga wan prisiri singi. A singi di mi teki ben fruwondru den, fu di den ben feni taki a ben de wan tumusi seryusu singi. Toku, wan tu fu den  grabu den finyoro nanga den gitara èn den alamala ben singi: „Ai meki wi abi wan bribi di no e kon swaki, awansi feanti e frufolgu wi; di no sa beifi te tesi fu grontapu miti wi.” A dei dati mi no ben sabi omeni leisi den wortu dati ben o gi mi krakti na ini den yari di ben de na mi fesi.

Wan Bruya Bigin

Baka di den brada na ini Maagdenburg ben luku fu si efu mi ben man rèi oto bun, dan den gi mi nanga fo tra pionier wan oto èn wi go na a Schneifel, wan presi krosibei fu Belgia. Wi kon si heri esi taki wi ben abi na oto fu wi tranga fanowdu. A Katolik Kerki na ini a presi dati no ben feni en bun taki wi ben de drape èn den sma fu a dorpu furutron ben wakti wi fu yagi wi gowe, soleki fa den priester ben gi den deki-ati fu du. Furutron na oto ben yepi wi fu gowe fu drape pikinmoro bifo den ben du wi ogri nanga den wrokosani fu den di den e gebroiki fu wroko a gron.

Baka a Memrefesa na ini 1933, na opziener fu a kontren, Paul Grossmann, taigi wi taki a wroko fu a Genootschap ben tapu na ini Doisrikondre. Wan syatu pisi ten baka dati a bijkantoro aksi mi fu kon na Maagdenburg nanga na oto fu teki den publikâsi drape èn fu tyari den go na a foto Saxonia di ben de so wan 100 kilometer pasa Maagdenburg. Ma na a ten di mi doro Maagdenburg, dan a Gestapo (den sikrit skowtu fu den Nazi) ben tapu a kantoro fu a Genootschap kaba. Mi libi na oto na wan brada na ini Leipzig èn mi drai go baka na oso — ma a no ben de fu wan langa ten.

A kantoro fu a Genootschap na ini Switserland ben aksi mi fu bigin pionier na ini Bakrakondre. Mi seti sani fu go drape baka wán noso tu wiki. Ma mi papa gi mi rai fu go wantewante. Mi gi yesi na a rai fu en èn mi libi oso na ini wan tu yuru. A dei baka dati skowtu kon na mi papa en oso fu teki mi, fu di mi ben weigri fu du srudatiwroko. Den ben kon tumusi lati.

Mi Bigin Wroko na ini Bakrakondre

Tapu 15 augustus 1933, mi doro na a pionier-oso na ini Heemstede, wan foto di de 25 kilometer pasa Amsterdam. A dei baka dati mi go preiki sondro taki mi ben sabi wán wortu Bakratongo. Mi ben abi wan kotoigikarta pe wan Bijbel boskopu ben skrifi na tapu èn mi bigin preiki. Di wan Katolik uma teki a buku Verzoening, dan mi kisi deki-ati fu tru! A srefi dei dati mi pristeri so srefi 27 pikin buku. Na a kaba fu a fosi dei, mi ben prisiri srefisrefi fu di mi ben man preiki fri baka.

Na ini den dei dati a wan-enkri fasi fa pionier ben feni moni ben de fu den bijdrage di den ben kisi te den ben pristeri buku. Den ben gebroiki a moni fu bai nyanyan nanga tra sani di den ben abi fanowdu. Efu pikinso moni ben tan abra na a kaba fu a mun, dan den ben prati en na mindri densrefi so taki den ben kan pai gi sani di ibri pionier abi fanowdu gi ensrefi. Wi no ben abi furu materia sani, ma Yehovah ben sorgu so bun gi wi, taki na ini 1934 mi ben man go na wan kongres na ini Switserland.

Wan Getrow Kompe

Na a kongres, mi si Erika Finke di ben abi 18 yari. Mi ben sabi en fu a ten di mi ben e libi na oso. A ben de wan mati fu mi sisa Margaretha èn a fasi fa a ben tanapu kánkan gi a waarheid ben naki mi ati ala ten. A no ben de langa baka di a ben dopu na ini 1932, taki wan sma taigi a Gestapo taki Erika ben weigri fu taki „Heil Hitler!” A Gestapo go suku en èn den komanderi en fu taigi den fu san ede a ben weigri fu du dati. Erika leisi Tori fu den Apostel 17:3 gi a skowtu di ben de na a skowtu-oso èn a fruklari taki Gado poti wán man nomo leki Frulusuman, èn dati na Yesus Krestes. „Tra sma de di abi a srefi bribi leki a di fu yu?” a skowtu ben wani sabi. Erika no ben wani gi en no wan enkri nen. Di  a skowtu taigi en taki a ben o sroto en, dan Erika taigi en taki a moro betre a dede na presi fu a gi en den nen fu den trawan. A skowtu luku Erika èn a bari: “Gowe fu dyaso. Go na yu oso. Heil Hitler!”

Baka a kongres, dan mi drai go baka na Bakrakondre ala di Erika tan na ini Switserland. Ma wi ala tu ben feni taki wi ben kisi wan moro krosibei matifasi. Ala di Erika ben de ete de na ini Switserland, a yere taki a Gestapo ben suku en na ini Doisrikondre pe a ben tan fosi. A bosroiti fu tan na ini Switserland èn fu pionier drape. Wan tu mun baka dati, a Genootschap aksi en fu go na Spanyorokondre. A pionier na Madrid, baka dati na Bilbao, èn baka dati a pionier na San Sebastian, pe en nanga en pionier patna ben poti na ini srafu-oso, fu di kerki tiriman ben sutu faya gi den bakaman fu den fu frufolgu den tu pionier sisa disi. Na ini 1935 den kisi a komando taki den musu libi Spanyorokondre. Erika kon na Bakrakondre èn wi trow a srefi yari dati.

A Gersi Taki Heri Esi Orluku O Bigin

Baka di wi trow, dan wi pionier na Heemstede èn baka dati wi froisi go na a foto Rotterdam. A manpikin fu wi di nen Wolfgang, gebore drape na ini 1937. Wán yari baka dati wi froisi go na a foto Groningen di de na a noordsei fu Bakrakondre, èn drape wi ben prati wan oso nanga Ferdinand nanga Helga Holtorf èn na umapikin fu den. Den ben de Doisri pionier. Na ini yuli 1938, a Genootschap taigi wi taki a tirimakti fu Bakrakondre ben gi wan warskow taki Kotoigi di ben abi a nationaliteit fu Doisrikondre no ben abi primisi moro fu preiki. Pikinmoro na a ten dati, mi kisi a toewijzing leki kringopziener èn mi nanga mi osofamiri froisi go tan na tapu a Lichtdrager (Tyariman fu Leti), a boto fu a Genootschap. A boto disi ben de a tanpresi fu pionier di ben preiki na a noordsei fu Bakrakondre. Moro furu mi no ben de nanga mi osofamiri, fu di mi ben rèi baisigri fu wán gemeente go na a trawan fu gi den brada deki-ati fu tan preiki. Èn den brada no du tra fasi. Wan tu fu den bigin du moro srefi. Wim Kettelarij ben de wan bun eksempre.

Na a ten di mi miti Wim, a ben de wan yonguman di ben erken a waarheid, ma a ben abi tumusi furu fu du leki wrokoman na wan burugron. „Efu yu wani abi ten fu dini Yehovah,” mi ben gi en leki rai, „dan yu musu suku wan tra wroko.” A du dati. Baka wan pisi ten di wi miti baka, dan mi gi en deki-ati fu go pionier. „Ma mi musu wroko fu man abi nyanyan”, a ben taki. „Yu o kisi nyanyan”, mi gi en leki dyaranti. „Yehovah sa sorgu yu.” Wim bigin pionier. Baka wan pisi ten, srefi na a ten fu a di fu Tu Grontapufeti, a ben dini leki kringopziener. Na a dei fu tide, Wim di abi moro leki 80 yari, na wan Kotoigi di e preiki fayafaya ete. Yehovah sorgu en fru tru.

A Wroko Tapu èn Den E Suku fu Kisi Mi

Na ini mei 1940, pikinmoro wan yari baka di Reina, a di fu tu pikin fu wi gebore, dan a legre fu Bakrakondre gi abra èn den Nazi teki Bakrakondre abra. Na ini yuli a Gestapo teki a kantoro èn so srefi a drukkerij fu a Genootschap abra. A yari baka dati, skowtu hori furu Kotoigi èn den hori mi tu. Fu di mi ben de wan Kotoigi èn so srefi wan Doisri di ben owru nofo fu tron srudati, dan a no ben muilek fu frustan san a Gestapo ben o du nanga mi. Mi bigin seti misrefi taki mi no ben o si mi osofamiri baka.

Ma na ini mei 1941 a Gestapo lusu mi fu strafu-oso èn mi kisi a komando fu go du srudatiwroko na ini a legre. Mi no ben man bribi dati. A srefi dei daiti mi bigin wroko kibrikibri èn a srefi mun dati mi ben de baka na ini a kringwroko. Mi ben tron  wan fu den moro prenspari sma di a Gestapo ben suku fu kisi.

Fa Mi Osofamiri Ben Kakafutu

A wefi fu mi ben froisi nanga den pikin fu mi go na a dorpu Vorden na a owstusei fu a kondre. Ma fu di mi no ben wani taki den ben kon na ini problema, dan mi ben go na oso wanwan leisi nomo (Mateus 10:16). Fu di den brada no ben wani taki mi kon na ini problema, meki den no ben gebroiki a tru nen fu mi, ma den ben kari mi Duitse Jan (Doisri Jan). Srefi Wolfgang, a boi fu mi di ben abi fo yari, no ben kisi primisi fu taki fu en „Papa” ma a ben musu taki soso fu „Ome Jan” (Omu Jan). Disi ben de wan muilek sani gi en fu frustan fu di a ben sabi mi èn a ben lobi mi leki en papa.

Ala di mi ben lon gi a Gestapo, dan Erika ben sorgu den pikin èn a ben tan preiki. Na a ten di Reina ben abi tu yari, dan Erika ben teki en na tapu baka fu a baisigri te a ben go preiki na ini den dorpu. Ala di a ben muilek fu feni nyanyan, toku Erika ala ten ben abi nofo nyanyan gi en osofamiri (Mateus 6:33). Wan Katolik gronman di mi ben meki a naimasyin fu en wan leisi, ben gi en patata. So srefi a ben tyari boskopu fu mi go na Erika. Wan leisi Erika ben pai wán golu gi wan sani ini wan wenkri. Fu di na eiginari fu a wenkri ben sabi taki Erika ben libi kibrifasi èn taki a no ben o man kisi den karta di a ben kan gebroiki fu bai nyanyan, dan a gi en a sani sondro fu teki moni fu en èn so srefi a gi en tu golu. Den fasi disi fa sma ben sori taki den ben firi gi trawan, ben yepi Erika fu tan na libi.—Hebrewsma 13:5.

Mi E Wroko Makandra Nanga Brada Di Abi Deki-ati

Na a srefi ten dati, mi ben tan go na den gemeente — ma mi ben miti soso nanga den brada di ben abi frantwortu na ini den gemeente. Fu di a Gestapo ben de na mi baka doronomo, meki taki noiti mi ben man tan na wán presi moro langa leki wan tu yuru. Moro furu fu den brada nanga sisa no ben kisi primisi fu miti mi. Den ben sabi soso den Kotoigi di ben de memre fu a pikin Bijbelstudie grupu fu den. Dati meki taki tu Kotoigi uma di ben de sisa fu makandra na skin fasi èn di ben libi na difrenti presi na ini a srefi foto, kon sabi te leki baka a di fu Tu Grontapufeti, taki den ala tu ben tron Kotoigi na a ten fu a feti.

Mi ben abi a wroko tu fu feni kibripresi gi den buku fu a Genootschap. Wi ben kibri so srefi papira,  stencil masyin, nanga skrifimasyin fu meki kopi fu A Waktitoren, fu te wi ben sa abi den fanowdu kande. Son ten wi ben musu tyari den buku di a Genootschap ben druk go fu a wan kibripresi go na a trawan. Mi e memre wan leisi di mi ben musu tyari 30 dosu di ben lai nanga buku go na wan presi, ala di mi ben pruberi fu no meki sma kon sabi san mi ben e du — a wroko dati fu tru ben gi mi senwe!

Boiti dati, wi ben seti sani fu tyari nyanyan fu burugron na ini na owstusei fu Bakrakondre go na den foto na ini a westsei, ala di sma no ben mag du dati. Wi ben lai nyanyan na tapu wan asiwagi èn baka dati wi ben teki pasi go na a westsei. Te wi ben doro wan liba, dan wi no ben man abra no wan fu den broki, fu di srudati ben hori wakti na den. Na presi fu dati wi ben lai den nyanyan sani na ini pikin boto, wi ben koti a liba abra esi-esi nanga den, èn baka dati wi ben poti den sani na tapu wan tra wagi. Te wi ben doro a foto pe wi ben musu go dan wi ben wakti te neti. Dan wi ben weri kowsu gi den futu fu na asi èn wi ben go safrisafri na a presi pe a gemeente ben kibri nyanyan. Fu drape a nyanyan ben prati gi den brada di ben abi en fanowdu.

Efu a Doisri legre ben kon sabi taki so wan presi ben de pe wi ben kibri nyanyan, dan dati ben kan meki taki wan sma ben o lasi libi. Toku, wan tu brada ben de klariklari fu yepi nanga dati. Fu gi wan eksempre, na osofamiri Bloemink na ini a foto Amersfoort ben gi wi primisi fu gebroiki a foroisi fu den leki wan maksin gi den nyanyan sani, ala di na oso fu den ben de so krosibei fu wan presi pe wan grupu Doisri srudati ben tan! Den Kotoigi soleki den wan disi di ben abi deki-ati, ben poti den libi na ini kefar fu a bun fu den brada fu den.

Yehovah yepi mi nanga mi wefi fu tan getrow na ini den yari di lanti ben tapu a preikiwroko. Na ini mei 1945 a Doisri legre lasi a feti èn te fu kaba mi libi leki wan loweman ben kon na wan kaba. A Genootschap aksi mi fu tan dini leki wan kringopziener, teleki den ben feni tra brada fu du a wroko. Na ini 1947, Bertus van der Bijl teki a wroko abra fu mi. * Na a ten dati a di fu dri pikin fu wi gebore èn wi go tan na a owstusei fu a kondre.

Sari Nanga Prisiri

Baka a feti mi kon sabi taki pikinmoro wan yari baka di mi libi oso fu go na Bakrakondre, den ben poti mi papa na srafu-oso. Den ben lusu en tu leisi fu di a ben e sikisiki, ma ibri leisi den ben sroto en baka. Na ini Februari fu 1938, den seni en go na a strafuman kampu Buchenwald èn baka dati den seni en go na Dachau. Drape, tapu 14 mei 1942, mi papa dede. A tan kánkan èn getrow teleki a dede.

Den ben seni so srefi mi mama go na a Dachau srafuman kampu. A tan drape teleki den lusu en na ini 1945. Na eksempre di mi papa nanga mi mama gi mi fu di den ben tan kánkan, ben abi furu fu du nanga den blesi di mi kisi na yeye fasi. Fu dati ede a kon di mi mama kon tan nanga wi na ini 1954 ben de wan grani gi wi. Mi sisa Margaretha — di ben pionier na ini a Komunist Owstu Doisrikondre sensi 1945 — ben kon tu. Ala di mi mama ben e siki èn a no ben taki Bakratongo, toku a tan abi wan prati na a preikiwroko, teleki en libi na grontapu kon na wan kaba na wan getrow fasi na ini oktober 1957.

A kongres fu 1955 na ini Nuremburg, Doisrikondre, ben sori fu de wan spesrutu wan. Baka di wi doro drape, dan wan tu brada fu Dresden taigi Erika taki en mama ben de na a kongres tu. Fu di Dresden ben de na ondro a tirimakti fu Owstu Doisrikondre, dan Erika no ben si en mama 21 yari langa. Den seti sani fu miti makandra èn mama nanga umapikin brasa makandra. A miti di den ben miti makandra baka ben de wan prisiri fu tru!

Baka wan pisi ten, na osofamiri fu wi gro kon teki aiti pikin. A de wan sari, taki wi lasi wan fu den boi fu wi fu di oto ben naki en. Ma wi e kisi bigi prisiri te wi e si fa ala den pikin di tan abra e dini Yehovah. Wi breiti taki a manpikin Wolfgang fu wi e dini na ini a kringwroko nanga en wefi èn taki a manpikin fu den so srefi e dini leki kringopziener.

Mi de nanga tangi na ati, fu di mi si fa a wroko fu Yehovah go na fesi na ini Bakrakondre. Di mi bigin pionier dyaso na ini 1933, dan pikinmoro wán hondro Kotoigi ben de. Na a dei fu tide, moro leki 30.000 Kotoigi de. Ala di wi e lasi a krakti fu wi na skin sei, toku mi nanga Erika abi a fasti bosroiti ete fu libi akruderi den wortu fu a singi di de fu den ten di pasa kaba: „Ai, meki wi abi wan bribi di no e kon swaki.”

[Futuwortu]

[Prenki na tapu bladzijde 23]

A „Jugendgruppe” („Yongusma Grupu”) na a ten di den e rostu, baka di den ben kaba preiki

[Prenki na tapu bladzijde 24]

Mi nanga kompepionier ben wroko na ini a kontren fu Schneifel. Mi ben abi 20 yari

[Prenki na tapu bladzijde 25]

Makandra nanga Erika èn nanga Wolfgang na ini 1940

[Prenki na tapu bladzijde 26]

Fu a kruktu-anusei go na a reti-anusei: Mi granpikin Jonathan nanga en wefi, Mirjam; Erika, mi, mi manpikin Wolfgang nanga en wefi, Julia

[Prenki na tapu bladzijde 26]

Wan brada di ben de na strafu-oso nanga mi papa ben teken a prenki disi fu en na ini 1941