Bun Gwenti Nanga Gronprakseri E Go na Baka

„A SORTU sani dati noiti e pasa bifo”, na so Helmut Schmidt ben taki. A ben de wan man di fosi ben de Fosi-minister fu Doisrikondre. A ben broko en ede nanga sani di ben pasa no so langa ete di ben skrifi leki prenspari nyunsu na ini koranti èn di ben taki fu lantiman di ben e fufuru hebihebi. „Bun gwenti nanga gronprakseri lasi gowe, fu di sma gridi”, na so Helmut Schmidt ben taki.

Furu sma ben sa agri nanga en. Langa ten, sma ben teki bun gwenti nanga gronprakseri di komoto fu Gado Wortu, Bijbel, na ala sei leki wan sani di e yepi wi fu sabi san bun èn san ogri. Ma noyaso den e si den bun gwenti nanga gronprakseri leki sani di no de prenspari moro. Èn disi de so srefi na ini den kondre di sma e si leki kondre fu Krestenhèit.

Wi Musu Hori Wisrefi na Bun Gwenti Nanga Gronprakseri fu Bijbel Ete?

Sani di Bijbel e leri di abi fu du nanga bun gwenti nanga gronprakseri, na so srefi sani soleki fu de eerlijk èn fu hori na soifri retifasi. Toku na furu presi wi e si bedrigifasi, krukafasi, nanga kruktudu. The Times fu Londen ben skrifi taki wan tu skowtu ’ben fufuru soleki fa a sori, so wan 100.000 Ingrisi pontu ibritron te den ben gi den drug di den skowtu teki fu sma baka na den seriman fu drug fu seri, noso fu puru den buweisi fu den moro prenspari man fu na organisâsi fu ogri-ati sma di e du ogri nanga tranga’. Sma e taki dati na ini Oostenrijk a krukafasi ini a tori fu verzekering de wan aladei sani. Èn na  ini Doisrikondre den grupu fu sabidensiman ben skreki di ondrosukuman ben kon feni „wán fu den moro takru fasi fu krukafasi na ini a sabidensi fu Doisrikondre” no so langa pasa. Wan professor, wan „bigiman na mindri den sabidensiman fu Doisrikondre”, ben gi falsi bodoi fu sani di a ben ondrosuku.

Fu tan getrow na ini a trowlibi, na wan tra bun gwenti nanga gronprakseri di komoto fu Bijbel. Bijbel e sori taki trowlibi musu de wan sani di musu tan langa ten. Ma ipi-ipi trowpaar e kaba a trowlibi na krutubangi fu brokotrow. A Katolik koranti Christ in der Gegenwart (A Disiten Kresten) e skrifi taki „srefi na ini Switserland ’pe sma wani hori densrefi na kefalek owruten gwenti’, moro nanga moro sma di trow, e broko a trow”. Na ini Bakrakondre, so wan 33 procent fu ala trowlibi e kaba fu di den sma e broko trow. Wan umasma di ben si fa sani ben kenki na ini a libimakandra na ini Doisrikondre na ini den yari di pasa, ben skrifi fu a sani disi di ben trobi en: „Sma e si a trowlibi now leki wan owruten sani èn wan sani di no de fu a ten disi. Sma no e trow moro fu tan nanga a sma en heri libi langa.”

Na a tra sei, milyunmilyun sma e si den bun gwenti nanga gronprakseri na ini Bijbel leki sani di wi kan frutrow èn di wi kan gebroiki na ini a libi ini wi disiten grontapu. Wan trowpaar ben libi na a presi pe den tu kondre, Switserland nanga Doisrikondre, e miti. A trowpaar disi ben kon si taki a leri di den ben e leri fu libi akruderi den bun gwenti nanga gronprakseri fu Bijbel, ben meki den tron moro koloku. Efu yu ben o aksi a trowpaar disi, dan den ben o piki: „Soso wán tirilin de gi ala sani na ini a libi. A tirilin dati na a Bijbel.”

San yu e prakseri? A de so, taki Bijbel kan de wan warti tirilin? Wi kan gebroiki den bun gwenti nanga gronprakseri fu Bijbel na ini a ten disi?