Bun Gwenti Nanga Gronprakseri fu Bijbel, De Moro Bun?

„A LIBISMA libimakandra abi wan strukturu fu prenspari markitiki fanowdu, so taki den sma na ini a libimakandra kan abi seikerfasi èn den kan kisi tiri na ini a libi.” Na so wan Doisri skrifiman di ben abi furu ondrofeni leki skrifiman, ben taki; a man disi ben abi furu ondrofeni tu leki telefisi takiman. Seiker, dati na wan bun sani di a man disi ben taki. Efu sani musu waka bun nanga a libisma libimakandra, dan sma musu abi wan steifi fondamenti fu sani di ala sma e teki leki markitiki; èn den markitiki disi musu yepi den fu sabi san bun, noso san ogri. Na aksi de: Sortu markitiki na den moro bun markitiki gi a libimakandra èn so srefi gi den sma fu a libimakandra?

Efu den sma e teki den bun gwenti nanga gronprakseri fu Bijbel abra, dan dati musu man yepi den fu libi bun, koloku libi. Èn efu yu luku en moro bradi, dan te sma e hori densrefi na den gronprakseri disi dan dati ben sa meki wan koloku nanga moro bun libimakandra. Na so a de? Meki wi ondrosuku san Bijbel e taki fu tu prenspari afersi: getrowfasi na ini a trowlibi èn eerlijkfasi na ini na aladei libi.

Tai Hori na Yu Patna

Wi Mekiman ben meki Adam èn baka dati A ben meki Efa fu de en patna. A de di Adam nanga Efa ben de makandra, ben de a fosi trow na ini a historia, èn a ben musu de wan trowlibi di ben musu tan fu ala ten. Gado ben taki: „Wan man sa gowe libi en papa nanga  en mama èn a musu tai hori na en wefi èn den musu tron wán skin.” So wan 4000 yari baka dati, Yesus Krestes ben taki baka fu a markitiki disi gi a trowlibi, di a ben taki nanga den bakaman fu en. Boiti dati, dan Yesus ben krutu seks demakandra dorosei fu a trowlibi.—Genesis 1:27, 28; 2:24; Mateus 5:27-30; 19:5.

Soleki fa Bijbel e sori, dan tu prenspari sani gi wan koloku trowlibi na lobi nanga lespeki di ala tu patna abi gi makandra. A masra, di na a edeman fu na osofamiri, musu sori lobi pe a no e denki ensrefi nomo fu di a e luku san de moro bun gi a wefi fu en. A masra musu libi nanga en wefi „akruderi sabi” èn a no musu abi „bita atibron” nanga en. A wefi musu abi „dipi lespeki” gi a masra fu en. Te den trowpatna e libi akruderi den gronprakseri disi, dan den kan wai pasi gi furu fu den problema fu a trowlibi, noso den kan lusu den problema disi. A masra sa wani tai hori na en wefi èn a wefi sa wani tai hori na en masra.—1 Petrus 3:1-7; Kolosesma 3:18, 19; Efeisesma 5:22-33.

A de so, taki a Bijbel markitiki fu tai hori na yu patna, e yepi yu fu abi wan moro koloku trowlibi? We, luku san wan ondrosuku tori ben sori na ini Doisrikondre. Drape den ben aksi wan tu sma san den denki na den moro prenspari sani fu man abi wan bun trowlibi. A fosi sani di sma ben kari leki den moro prenspari sani ben de, a tan di den tu sma musu tan getrow na makandra. Yu no ben sa agri taki sma di trow de moro koloku te den sabi taki a patna fu den de getrow?

San fu Du Efu Problema E Opo Kon?

Ma san wan masra nanga wan wefi kan du dan, te den no e agri nanga makandra srefisrefi? San den kan du efu a lobi fu den e dede gowe? A no ben sa de moro bun dan fu broko a trowlibi? Noso a de so, taki a Bijbel markitiki fu tai hori na yu patna na wan bun sani fu du ete?

Den Bijbel skrifiman ben erken taki ala den sma di trow sa abi problema fu di den no de volmaakti leki libisma (1 Korentesma 7:28). Toku trowpaar di e hori densrefi na den Bijbel markitiki fu bun gwenti nanga gronprakseri, e pruberi fu gi makandra pardon èn den e suku fu lusu den problema di den abi makandra. A no de fu taki, dati situwâsi de pe a fiti taki wan Kresten kan suku fu prati nanga en trowpatna noso fu broko a trow — situwâsi soleki hurudu noso pe a wan trowpatna e naki èn e meshandri a trawan na skin sei (Mateus 5:32; 19:9). Ma efu wan trowpatna e broko a trow sondro taki wan seryusu sani pasa noso fu di a wani teki wan tra sma fu libi nanga en, dan dati e sori taki a trowpatna dati e denki ensrefi nomo èn taki a no e hori trawan na prakseri. Èn seiker dati no e meki wan sma en libi kon moro bun noso a no e meki a sma de moro koloku na ini a libi. Meki wi luku wan eksempre.

Peter ben kon si taki en trowlibi no ben gi en prisiri moro. * Fu dati ede, a ben gowe libi en wefi èn ben froisi go libi nanga Monika, di ensrefi ben gowe libi en masra. Fa sani ben waka nanga Peter? Wan tu mun no ben pasa leti srefi, taki Peter ben musu agri taki a libi di a ben libi nanga Monika „no ben go soleki fa mi ben denki taki a ben o go”. Fu san ede a libi no ben go? A misi di libisma e misi fu du san yoisti ala ten; dati ben pasa nanga Peter nanga a trowpatna di a ben abi fosi, èn na dati ben pasa tu nanga en èn nanga en nyun patna. Fu meki a tori moro ogri gi Peter, dan a gawgaw bosroiti di a ben teki pe a ben denki ensrefi nomo, ben tyari en na ini bigi problema na moni sei. Boiti dati, a kenki di sani ben kenki krinkrin na ini na osofamiri libi, ben hebi tumusi gi den pikin fu Monika èn dati meki den ben brokosaka.

Soleki fa na ondrofenitori disi e sori, dan te a trowlibi di yu kan gersi nanga wan boto, doro na ini krasi-watra nanga furu skwala, dan fu gowe libi a boto no e tyari wan lusu na den problema kwetikweti. Na a tra sei, te wan tranga winti fu problema e opo kon, dan a tan di trowpatna e tan hori densrefi na den bun gwenti nanga gronprakseri fu Gado en Wortu, Bijbel, furutron e yepi den fu hori a trowlibi fu pasa den muilek ten èn kon na ini moro switi ten. Èn disi na soifri san ben pasa nanga Thomas èn nanga Doris.

Thomas nanga Doris ben trow moro leki 30 yari kaba, di Thomas ben bigin dringi sopi hebihebi. Doris ben lasi-ati srefisrefi, èn den tu sma disi ben taki nanga makandra fu di den ben wani broko a trow. Doris ben taki nanga wan Kotoigi fu Yehovah fu a tori disi. A Kotoigi ben sori Doris san Bijbel e taki fu a trowlibi, èn a Kotoigi ben gi Doris deki-ati fu no de gaw fu prati nanga en masra sondro fu denki a tori bun fosi, ma fu taki nanga en masra fosi fu luku efu den kan lusu a problema. Dati na soifri san Doris ben du. Baka wan tu mun, Thomas nanga Doris no ben taki moro langa fu broko-trow. Den ben luku fa den ben kan lusu den problema fu den. Fu di den ben teki rai komoto fu Bijbel, dati meki a trowlibi fu den ben kon moro tranga èn dati ben gi den ten fu lusu den problema fu den.

 De Eerlijk na ini Ala Sani

Fu tai hori na en trowpatna, dan wan sma musu abi a krakti fu hori ensrefi na bun gwenti nanga gronprakseri, èn a sma musu lobi fu du dati. Den srefi eigifasi de fanowdu fu tan eerlijk na ini wan grontapu di no de eerlijk. Bijbel abi furu fu taki fu eerlijkfasi. Na apostel Paulus ben skrifi den fosi yarihondro Kresten na ini Yudea: „Wi wani tyari wisrefi na wan eerlijk fasi na ini ala sani” (Hebrewsma 13:18). San dati wani taki?

Wan eerlijk sma na wan sma di trawan kan frutrow, èn a de wan sma di no e du kruka sani. Te a de nanga trawan, dan a no e teki no wan sma partèi; a e taki sani leki fa den de, a e lespeki trawan, èn a no e kori den. Boiti dati, wan eerlijk sma na wan sma di abi soifri retifasi èn di no e bedrigi en kompe-libisma. Eerlijk sma e meki taki frutrow de, èn dati baka e meki taki sma e handri na wan bun fasi nanga makandra èn taki sma e tron trutru mati fu makandra.

A de so, taki eerlijk sma na koloku sma? We, den abi reide fu de koloku. Ala di kruktudu nanga bedrigifasi panya na ala sei, toku trawan abi furu lespeki gi eerlijk sma; noso kande fu di kruktudu nanga bedrigifasi panya na ala sei, dati meki trawan abi furu lespeki gi eerlijk sma. Soleki fa wan ondrosuku di den ben hori na mindri yongu sma e sori, dan so wan 70 procent fu den yonguwan e si eerlijkfasi leki wan kefalek warti sani. Boiti dati, awansi o owru noso yongu wi de, eerlijkfasi na wan fu den fosi sani di wi e aksi fu den wan di wi e si leki wi mati.

Christine ben leri fufuru sensi a ben abi so wan 12 yari. Na ini den yari baka dati Christine ben tron wan fufuruman di ben koni na ini a furufuru di a ben fufuru sma. „Mi ben abi wan tu dei, pe mi ben tyari so wan 5000 Doisri moni [2200 Amerkan dala] kon na oso”, na so a ben taki. Ma skowtu ben piki Christine go na skowtu-oso difrenti leisi, èn ala ten a ben de na ini kefar taki den ben o seni en go na dungru-oso. Di Yehovah Kotoigi ben tyari kon na krin gi Christine san Bijbel e taki fu eerlijkfasi, dan Christine ben kon lobi den markitiki fu bun gwenti nanga gronprakseri soleki fa den skrifi na ini Bijbel. Christine ben leri fu gi yesi na a frumane: „Meki a sma di e fufuru, no fufuru moro.”—Efeisesma 4:28.

Na a ten di Christine ben teki dopu leki wán fu den Kotoigi fu Yehovah, dan a no ben fufuru moro. A ben e meki muiti fu de eerlijk na ini ala sani, fu di den Kotoigi ben poti furu krakti tapu a de di wan sma musu de eerlijk èn tapu tra Kresten eigifasi. A nyunsu koranti Lausitzer Rundschau e skrifi: „Den sani soleki eerlijkfasi, bescheidenfasi, nanga lobi gi a sma na yu sei, dati na bun gwenti nanga gronprakseri di de kefalek prenspari na ini a bribi fu den Kotoigi.” Fa Christine srefi e firi fu a kenki di a tyari kon na ini en libi? „Mi e firi moro koloku now fu di mi tapu nanga fufuru. Mi e firi taki mi na wan sma di tra sma kan lespeki na ini a libimakandra.”

A Heri Libimakandra E Feni Winimarki fu Dati

Den sma di e tan getrow na den trowpatna èn den sma di de eerlijk, no wawan den de moro koloku sma, ma so srefi den na bun sma gi a libimakandra te yu luku en bun. Wrokobasi e suku wrokoman di no e bedrigi. Wi alamala lobi fu tan na mindri birtisma di wi kan frutrow, èn wi lobi bai sani na ini wenkri fu san wi sabi taki na opregti man abi a wenkri dati. A no de so, taki wi e lespeki den politiekman, den skowtu, nanga den krutuman di no wani abi noti fu du nanga kruktudu? A libimakandra e feni furu winimarki te den sma na ini a libimakandra e tyari densrefi na wan eerlijk fasi ala ten, èn no wawan te den e tyari densrefi na wan eerlijk fasi te den wani kisi wini gi densrefi nomo.

Boiti dati, trowpatna di e tan getrow e meki taki tranga osofamiri de. Èn furu sma ben o agri nanga a politiekman fu Europa, di ben taki: „Teleki now, na osofamiri seti [di wi sabi], na a moro prenspari presi fu seikerfasi gi libisma èn a de wan seti di e tyari wini kon gi libisma.” A vrede di de na ini na osofamiri seti, dati na a presi pe bigisma nanga pikin-nengre abi a moro bun okasi fu sori lobi gi makandra so taki den e firi bun. So bun, den wan di de getrow na ini a trowlibi, e yepi fu seti wan steifi libimakandra.

Prakseri o furu winimarki ala sma ben o feni, te trawan no ben o gowe libi a trowpatna fu den. Prakseri o furu winimarki ala sma ben o feni, te krutu-oso no ben o de gi sma di wani broko-trow. Èn prakseri o furu winimarki ala sma ben o feni, te sma no ben abi fu feti fu kisi a frantwortu fu sorgu den pikin te a trow broko. Èn fa a ben o de te wi no ben o abi fufuruman moro, kruka lantiman, nanga kruka sabidensiman? Te yu e yere dati, dan a no gersi taki dati na soso wan dren? No gi den wan di wani sabi finifini san Bijbel e taki èn di wani sabi finifini tu san Bijbel e taki fu a tamara fu wi. Gado en Wortu e pramisi taki heri esi Yehovah en Kownukondre na ini na anu fu a Mesias, sa teki a tiri abra fu ala den libisma libimakandra na grontapu. Ala den sma di sa libi na ondro a Kownukondre dati, sa kisi  leri fu libi akruderi den bun gwenti nanga gronprakseri fu Bijbel. Na a ten dati, „na den regtfardiki sma sa abi grontapu leki a gudu fu den, èn den sa libi na tapu fu têgo”.—Psalm 37:29.

Bun Gwenti Nanga Gronprakseri fu Bijbel, De Moro Bun

Milyunmilyun sma di ondrosuku den Santa Buku fu Bijbel, kon frustan taki Bijbel rai na koni di e komoto fu Gado, èn a rai dati bigi moro ala fasi fu libisma denki. Den sortu sma disi e si Bijbel leki wan sani di den kan frutrow, èn wan sani di fiti na ini a libi fu sma na ini a disiten grontapu fu wi. Den sabi taki fu gi yesi na a rai fu Gado Wortu, de a moro bun sani di den kan du.

Fu dati ede, den sma disi e teki a Bijbel rai: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en tapu na ini ala yu pasi, èn ensrefi sa meki yu pasi kon reti” (Odo 3:5, 6). Te den e gi yesi na den wortu disi, dan a libi fu den e waka moro bun srefisrefi. Den e tyari winimarki kon gi tra sma tu di e libi lontu den. Èn den e kweki wan tranga frutrow na ini „a libi di musu kon ete”. Na ini a libi dati, ala libisma sa hori densrefi na den bun gwenti nanga gronprakseri fu Bijbel.—1 Timoteus 4:8.

[Futuwortu]

[Prenspari pisi na tapu bladzijde 5]

Te sma miti nanga problema na ini a trowlibi èn e hori densrefi na den markitiki fu Bijbel, dan furutron dati e yepi fu hori a trowlibi èn fu lusu den problema

[Prenspari pisi na tapu bladzijde 6]

Ala di — noso yoisti fu di — kruktudu nanga bedrigifasi panya na ala sei — toku trawan abi furu lespeki gi eerlijk sma