O Ten Yu E Taki Dati Sani Waka Bun gi wan Sma?

WAN wortubuku e taki dati sani e waka bun gi wan sma te „a kisi gudu, te trawan feni en bun noso te a abi wan hei posisi”. Dati na ala san a wani taki? Gudu, a feni di sma e feni wan trawan bun noso hei posisi na den wan-enkri sani di e sori o bun wan sani waka gi wan sma? Bifo yu piki, dan prakseri fu a sani disi: Yesus Krestes no ben kisi furu materia gudu gi ensrefi na ini en heri libi. A moro bigi pisi fu den sma no ben feni en bun; èn den fesiman fu a ten fu en no ben si en srefi leki wan warti sma. Ma toku, sani ben waka bun gi Yesus. Fu san ede?

Di Yesus ben de na grontapu, dan a ben „gudu ini Gado ai” (Lukas 12:21). Baka di a kisi wan opobaka, Gado blesi en fu di a ben hei en „nanga glori nanga grani”. Yehovah ben hei en Manpikin nanga „wan moro hei posisi èn na wan bun-ati fasi a ben gi en a nen di hei moro ibri tra nen” (Hebrewsma 2:9; Filipisma 2:9). A fasi fu libi fu Yesus ben meki Yehovah ati prisiri (Odo 27:11). Sani ben waka bun nanga a libi fu  en na grontapu, bika a ben doro en marki. Yesus ben du a wani fu Gado èn a ben gi En nen grani. Fu en sei, Gado ben gi Yesus gudu, ben feni en bun, èn ben gi en wan hei posisi di no wan koniman, politiekman, noso sport barinenman o abi oiti wan dei. Yesus ben de trutru a man di sani fu en ben waka bun, moro leki di fu iniwan tra sma di oiti ben libi na grontapu.

Kresten papa nanga mama e frustan, taki efu den yongu pikin fu den e libi soleki fa Krestes ben libi, dan neleki Yesus den pikin o kon gudu ini Gado ai. Now den sa kisi furu blesi èn na ini a seti fu sani di e kon ete den o abi wan tumusi bigi paiman. Gi wan yongu sma, no wan moro betre fasi fu libi neleki Krestes de, leki fu du a wroko di Yesus ben du fu di yu e teki a furuten diniwroko efu a man.

Ma na ini son kulturu, moro furu a gwenti de, taki yongu sma no e teki a furuten diniwroko. Te wan yonkuman kaba en skoro, dan sma e fruwakti kande taki a e teki wan furuten grontapuwroko, taki a e trow èn e seti en libi. Fu di den e rideneri na so wan fowtu fasi meki son leisi, yongu sma di kweki na ini so wan kulturu no e go na ini a furuten diniwroko (Odo 3:27). Fu san ede? Fu a hebi druk ede, meki den e frukisi fu libi na a fasi fa a moro bigi pisi fu sma na ini a kulturu dati e denki. Dati na san ben pasa nanga Robert. *

Te Kulturu Nanga Konsensi E Tuka

Robert ben kweki leki wan Kotoigi fu Yehovah. Di a ben de wan tini, dan a fasi fa a ben tyari ensrefi èn den mati di a ben abi no ben bun srefisrefi. En mama ben bigin broko en ede nanga en. Fu dati ede, a ben aksi wan pionier, wan furuten dinari fu Yehovah Kotoigi, fu gi Robert deki-ati. Robert e fruteri san ben pasa moro fara.

„Mi ben warderi en trutru taki a pionier brada ben poti prakseri na mi. A bun eksempre di a ben gi, ben meki taki mi ben wani pionier so esi leki mi kaba skoro. Na a ten dati mi mama ben broko en ede agen — ma now fu wan heri tra sani ede. We, na ini wi kulturu a bun taki wan umapikin e bigin pionier wantewante baka te a kaba skoro, ma den wani taki wan boi musu seti en libi fosi, so taki a no abi moni problema, fosi a kan bigin denki fu pionier.

Mi ben feni wan wroko èn ben bigin nanga mi eigi bisnis. Heri esi mi ben de dipidipi na ini bisnis tori èn a ben kon tron wan plekti nomo fu go na den konmakandra nanga a preikiwroko. Mi konsensi ben bigin fon mi — mi ben sabi taki mi ben man dini Yehovah moro bun. Awansi fa no fa, a ben de trutru wan bigi feti fu no broko mi ede nanga san trawan ben e fruwakti fu mi, ma mi breiti taki mi ben du dati. Now mi trow èn mi nanga mi wefi pionier den tu yari di pasa. No so langa pasa, den poti mi leki wan dinari ini a diniwroko na ini a gemeente. Tru, mi kan taki dati now mi e firi trutru prisiri te mi e dini Yehovah nanga mi heri ati, nanga ala san mi man.”

Ala ten baka a tijdschrift disi, gi yongu sma deki-ati fu leri wan tu bun wroko — efu a kan, te den de na skoro ete. Nanga sortu marki? Fu kon gudu? Nôno. A moro prenspari reide na fu den man sorgu densrefi bun te den kon moro bigi èn fu dini Yehovah so srefi someni leki den man, spesrutu na ini a furuten diniwroko. Ma toku a pasa furutron taki yongu man nanga uma e wroko so tranga na a grontapuwroko fu den taki a diniwroko no de so prenspari moro gi den. Son wan no e prakseri srefi fu du a furuten diniwroko. Fu san ede den no e du dati?

 Den sani di Robert taki e meki taki wi e frustan a sani disi moro bun. Di a ben leri kaba fa fu du bisnis, dan a bigin nanga en eigi bisnis. Heri esi a ben gersi taki a ben naki en skin fu soso. A sani di a ben wani, na fu no abi moni problema. Ma oiti iniwan sma ini noso dorosei fu a Kresten gemeente e doro a marki dati trutru? Kresten musu suku fu feni a moni di de fanowdu fu du den plekti, fu pai wantewante gi ala san den musu pai. Ma den musu frustan tu taki, na ini den ten disi pe noti no de seiker, wan tu sma nomo oiti man taki dati den no abi moni problema trutru. Dati meki Yesus pramisi di skrifi na ini Mateus 6:33 e trowstu Kresten trutru.

Robert breiti taki a ben teki a bosroiti fu du san en ati wani, na presi fu du san a kulturu fu en e aksi. Now a e wroko leki wan furuten dinari. Iya, a furuten diniwroko na wan tumusi bun wroko. Robert de koloku bika a e dini Yehovah soleki fa a e taki, ’someni leki a man’.

Du a Moro Bun Sani Nanga den Talenti Di Yu Abi

Na mindri den Kotoigi fu Yehovah furu sma de di abi talenti. Son wan fu den koni srefisrefi; trawan man wroko heri bun nanga anu. Ala den koni disi e kon fu Yehovah di e gi „ala sma libi, bro nanga ala sani” (Tori fu den Apostel 17:25). Sondro libi, a koni disi no ben o abi waarde.

We, a fiti dan taki wi e gebroiki wi libi di wi gi abra na Yehovah, ini a diniwroko fu en. Dati na san wan man di abi talenti ben bosroiti fu du. A ben libi na ini a fosi yarihondro G.T. Leki wan memre fu wan prenspari famiri a ben pasa den yongu yari fu en na ini a pôpi foto Tarsus fu Silisia. Ala di a ben gebore leki wan Dyu, toku a ben tron wan borgu fu Rome fu en papa ede. Dati meki a ben abi furu reti nanga grani. Di a ben gro kon moro bigi, dan a ben studeri a Wet nanga wan fu den moro prenspari „leriman” na a ten dati — Gamalièl. A ben gersi taki a no ben o teki langa srefi, bifo a ben o abi ’gudu, bifo sma ben o feni en bun, èn bifo a ben o kisi wan hei posisi’.—Tori fu den Apostel 21:39; 22:3, 27, 28.

Suma ben de a yonkuman disi? En nen ben de Saul. Ma Saul ben kon tron wan Kresten èn te fu kaba a ben kon tron na apostel Paulus. A ben poti den ambisi fu en na wan sei èn a ben gi en heri libi fu du a diniwroko fu Yehovah leki wan Kresten. Den sma no ben kon sabi Paulus leki wan kefalek bun afkati, ma leki wan fayafaya preikiman fu a bun nyunsu. Pikinmoro 30 yari baka di Paulus du a zendingwroko, a ben skrifi wan brifi gi den mati fu en na ini Filipi. Na ini a brifi a ben taki fu wan tu sani di a ben du fosi, bifo a ben tron wan Kresten. A ben taki: „Fu [Yesus Krestes] ede mi teki a lasi di mi lasi ala sani, èn mi e si den leki wan ipi doti, so taki mi kan wini Krestes” (Filipisma 3:8). Nôno, Paulus no ben sari fu a fasi fa a ben gebroiki en libi!

We, fa a ben de nanga den sani di Paulus ben leri fu Gamalièl? A ben man gebroiki den oiti wan dei? Iya! Na difrenti okasi a ben yepi nanga „a opo di [a] opo taki gi a bun nyunsu èn a poti di [a] poti en steifi akruderi a wet”. Ma a moro prenspari wroko fu Paulus ben de fu preiki a bun nyunsu — wan sani di a no ben o man leri noiti fu a skoroleri di a ben kisi.—Filipisma 1:7; Tori fu den Apostel 26:24, 25.

Na ini a ten disi, son wan ben man gebroiki den koni nanga den talenti fu den èn srefi a skoroleri di den kisi fu horibaka gi Kownukondre afersi na wan srefi sortu fasi. Amy fu eksempre, studeri bisnis nanga krutu afersi na wan universiteit. Wan ten a ben abi wan bun wroko na wan kantoro fu krutu afersi. Ma now a e dini na wan fu den bijkantoro fu a Waktitoren Genootschap leki wan friwani furuten dinari di no e kisi pai. Disi na san Amy e taki fu en libi now: „Mi denki taki mi du a moro bun sani di mi ben kan du na ini mi libi. . . . Mi no wani kenki no wan enkri sani na ini mi libi, nanga den sani di owru skoromati fu na universiteit abi. Mi breiti taki mi teki a bosroiti fu libi na so wan fasi. Mi abi ibriwan sani di mi abi fanowdu èn ibriwan sani di mi wani — wan koloku libi èn so srefi wan bun wroko di e gi mi prisiri.”

Amy ben teki a bosroiti fu libi na wan fasi di ben meki a kisi wan korostu firi, satisfaksi, nanga a blesi fu Yehovah. Fu tru dati na trutru san Kresten papa nanga mama wani gi den pikin fu den!

 Sani E Waka Bun na ini a Kresten Diniwroko

A no de fu taki, dati a prenspari taki yu man si o ten sani waka bun trutru na ini a diniwroko srefi. A no muilek fu si taki sani waka bun te wi abi wan prisiri ten na ini a preikiwroko, te wi prati Bijbel buku, noso te wi ben man meki sma abi wan prati na Bijbel takimakandra. Ma efu wanwan leisi nomo wi e feni wan sma di wani arki, dan wi kan denki taki wi e lasi wi ten. Ma prakseri taki sani e waka bun te ’sma e feni yu bun’. Suma musu feni wi bun? Yehovah, sondro tweifri. Wi kan kisi a bun-ati fu Yehovah efu sma e arki a boskopu noso efu den no e arki. Yesus ben leri den disipel fu en wan prenspari sani ini a tori disi.

Yu e memre taki Yesus ben seni 70 Kownukondre preikiman go „na ibri foto nanga presi pe ensrefi ben o go” (Lukas 10:1). Den ben musu preiki na ini den foto nanga den dorpu sondro taki Yesus ben o go nanga den. Dati ben de wan nyun sani gi den. Fu dati ede, Yesus ben gi den finifini bodoi bifo a seni den go. Te den ben o miti „wan mati fu vrede”, dan den ben musu gi en wan bun kotoigi fu a Kownukondre. Ma te sma no ben o teki a boskopu, dan den ben musu go moro fara sondro fu broko den ede. Yesus ben fruklari taki den sma di no wani arki en, trutru e weigri fu arki Yehovah srefi.—Lukas 10:4-7, 16.

Di den 70 ben kaba nanga a preikiwroko fu den, dan den ben kon baka na Yesus fu fruteri en fa a ben waka „nanga prisiri èn den ben taki: ’Masra, srefi den ogri yeye e arki wi te wi e gebroiki yu nen’” (Lukas 10:17). A ben musu de wan prisiri sani gi den sondu man disi fu puru makti yeye mekisani! Ma Yesus ben warskow den disipel disi fu en di ben de fayafaya: „No prisiri fu a sani disi, taki den yeye e saka na un ondro, ma prisiri bika un nen skrifi na ini hemel” (Lukas 10:20). Ma a ben kan de so, taki a no ala ten den 70 disipel ben o abi a makti fu puru ogri yeye, èn taki a no ala ten den ben o ondrofeni bun bakapisi na ini a diniwroko. Ma efu den ben o tan getrow, dan Yehovah ben o feni den bun ala ten.

Yu E Warderi Furuten Dinari?

Wan leisi wan yonkuman ben taigi wan Kresten owruman: „Te mi kaba hei skoro, dan mi o suku wan wroko. Efu mi no man feni wan wroko, dan mi sa luku efu mi o go na ini wan noso tra fasi fu furuten diniwroko.” Ma moro furu sma di teki a pionierwroko no e denki so. Fu man pionier meki son wan no teki den okasi di den kisi fu feni wan wroko di e pai bun. Trawan weigri fu gebroiki den moi okasi di den kisi fu teki kefalek hei skoro leri. Neleki na apostel Paulus, den no du furu sani di den ben kan du, ma neleki Paul, Robert nanga Amy, den no e sari fu den bosroiti di den ben teki. Den e warderi a grani di den abi fu gebroiki den talenti di den abi fu prèise Yehovah, di de wan sma di warti fu kisi a moro bun sani di den man gi.

Fu difrenti reide ede, furu getrow Kotoigi fu Yehovah no abi na okasi fu pionier. Kande den abi frantwortu di den musu du fu di dati skrifi na ini Bijbel. Ma toku, Yehovah e prisiri nanga den te den e dini en nanga den ’heri ati, sili nanga frustan’ (Mateus 22:37). Ala di densrefi no man pionier, toku den e erken taki den wan di e pionier, teki wan bun wroko.

Na apostel Paulus ben skrifi: „No kon de moro leki a seti fu sani disi” (Romesma 12:2). Akruderi a rai di Paulus gi, dan wi no musu meki den markitiki fu wan kulturu noso den wan fu grontapu, kenki wi prakseri. Efu yu man pionier noso yu no man du dati, meki a diniwroko fu Yehovah de a moro prenspari sani na ini yu libi. So langa Yehovah feni yu bun, sani o waka bun gi yu.

[Futuwortu]

[Prenki na tapu bladzijde 19]

No poti yusrefi na ini wan libi pe yu e naki yu skin fu soso