San Gado E Kari Krin na a sei fu Bun Gwenti Nanga Gronprakseri

„Mi, Yehovah, na yu Gado, a Sma di e leri yu fu gi yusrefi wini, a Sma di e meki yu waka na tapu a pasi di yu musu waka.”—YESAYA 48:17.

1, 2. (a) Fa furu sma e denki fu seks hurudu? (b) Fa Kresten e denki fu seks hurudu?

NOWNOWDE, na furu presi na grontapu, sma e feni taki a fasi fa sma musu tyari densrefi na a sei fu bun gwenti nanga gronprakseri, na wan sani di ibriwan sma musu luku fa a e du dati. Sma e si seks leki wan fasi fu sori a lobi di den abi gi wan tra sma èn taki den kan abi seks o ten den wani. Den no e si en leki wan sani di musu du soso na ini a trowlibi. Den e firi taki so langa no wan sma e kisi mankeri, dan a no fowtu fu bosroiti gi yusrefi fa yu o tyari yusrefi. Soleki fa den e si a tori, dan sma no musu krutu trawan na ini afersi di abi fu du nanga bun gwenti nanga gronprakseri, spesrutu ini a tori fu seks.

² Den sma di kon leri sabi Yehovah e denki tra fasi fu a tori. Den e prisiri fu gebroiki den tirilin fu den Buku fu Bijbel, bika den lobi Yehovah èn den wani plisi en. Den e si taki Yehovah lobi den èn taki a e gi den tiri gi a bun fu den, èn taki a tiri dati sa gi den trutru winimarki èn sa meki den koloku trutru (Yesaya 48:17). Fu di Gado na a Sma di e gi libi, dati meki den e du bun fu luku go na en fu a yepi den si fa den musu gebroiki den skin, spesrutu ini a tori disi fu fa libisma e meki tra libisma.

Wan Presenti fu wan Lobi-ati Mekiman

3. San furu sma na ini Krestenhèit leri fu seks demakandra, èn san wi kan taki fu dati te wi e luku san Bijbel e taki?

³ Wan tu sma na ini Krestenhèit leri trawan heri tra fasi leki fa grontapu sma e denki fu a tori disi. Den sma disi leri taki fu abi seks demakandra na wan syen sani, na wan sondu, èn taki a „fosi sondu” na ini a dyari fu Eden ben de a kori di Efa ben kori Adam fu abi seks nanga en. So wan  denki no e kruderi kwetikweti nanga den sani di den Buku fu Bijbel e taki. A Bijbel tori e sori go na den tu fosi libisma leki „a man nanga en wefi” (Genesis 2:25). Gado ben taigi den fu kisi pikin, di a ben e taki: „Un meki pikin èn kon furu èn furu grontapu” (Genesis 1:28). Gado no ben kan gi Adam nanga Efa a komando fu meki pikin èn baka dati A ben o strafu den te den ben sa hori a komando disi. Dati no ben sa de wan bun sani kwetikweti.—Psalm 19:8.

4. Fu san ede Gado meki libisma so taki den kan abi seks nanga makandra?

⁴ Na ini a komando dati di wi fosi papa nanga mama ben kisi èn di Noa nanga den manpikin fu en ben kisi tu, wi e si fu san ede libisma musu abi seks demakandra: fu meki pikin (Genesis 9:1). Ma toku, Gado Wortu e sori taki den futuboi fu en di trow, no musu abi seks demakandra nomo fu meki pikin. Den seks demakandra disi kan gi wan sma san a firi taki a abi fanowdu èn san a skin abi fanowdu, èn den seks demakandra disi kan meki wan trowpaar firi bun. Seks na wan fasi fa wan trowpaar kan sori dipi lobi gi makandra.—Genesis 26:8, 9; Odo 5:18, 19; 1 Korentesma 7:3-5.

Sani Di Gado No Wani fu Sma Du

5. Soleki fa Gado taki, dan sortu sani libisma no mag du ini a tori fu seks demakandra?

⁵ Ala di na abi di sma abi seks nanga makandra na wan presenti fu Gado, toku sma no kan du ala san den wani ini a tori disi. A gronprakseri disi e fiti srefi na ini a trowlibi (Efeisesma 5:28-30; 1 Petrus 3:1, 7). Boiti na ini a trowlibi, dan libisma no mag abi seks nanga makandra. Bijbel e taki a sani disi krinkrin. Na ini a Wet di Gado ben gi a nâsi Israèl, skrifi: „Yu no musu du sutadu” (Exodus 20:14). Baka ten Yesus ben kari „hurudu” nanga „sutadu” leki „takru prakseri” di e komoto fu na ati èn di e doti wan sma (Markus 7:21, 22). Nanga yepi fu santa yeye, na apostel Paulus ben frumane den Kresten na Korente: „Lowe gi hurudu” (1 Korentesma 6:18). Èn na ini en brifi gi den Hebrewsma, Paulus ben skrifi: „Meki a trowlibi de krin na mindri ala sma èn a trowbedi sondro flaka, bika Gado sa krutu huruman nanga sutaman.”—Hebrewsma 13:4.

6. San na ala den sani di Bijbel e kari „hurudu”?

⁶ San a wortu „hurudu” wani taki? A wortu dati e kon fu a Griki wortu por·neiʹa; èn a wortu disi den e gebroiki sontron fu sori taki tu sma di no trow, abi seks nanga makandra (1 Korentesma 6:9). Na tra presi, soleki na Mateus 5:32 nanga Mateus 19:9, a wortu dati wani taki moro furu srefi, èn a e sori na sutadu, na abi di sma abi seks nanga sma fu en eigi famiri, èn na abi di sma abi seks nanga meti. Sma di no trow kan du tra sani tu di wi kan kari por·neiʹa. Den sani dati na te sma e du seks nanga a mofo na a syenpresi, te sma e du seks na a gogo, èn te sma e prei nanga a syenpresi fu wan tra sma. Gado Wortu e krutu ala den sortu sani disi, sontron sondro fu draidrai, èn sontron yu musu luku moro fini fu si taki Gado Wortu e krutu den sani disi.—Lefitikus 20:10, 13, 15, 16; Romesma 1:24, 26, 27, 32. *

Feni Winimarki fu Gado Wet fu Bun Gwenti Nanga Gronprakseri

7. Fa wi e kisi winimarki te wi e hori wisrefi krin na a sei fu bun gwenti nanga gronprakseri?

⁷ A kan de wan tyalensi gi onvolmaakti libisma fu teki a tiri fu Yehovah ini a tori fu seks. A pôpi Dyu filosofiaman Maimonides fu a di fu 12 yarihondro, ben skrifi: „Fu ala den sani na ini a Tora [a Wet fu Moses] di yu no mag du, dan no wan fu den de so muilek soleki fu no abi seks nanga sma fu yu eigi famiri èn fu no abi seks di yu no mag du.” Ma toku, efu wi e gi yesi na san Gado e taki, dan wi o feni furu winimarki (Yesaya 48:18). Fu eksempre, efu wi e gi yesi na Gado na ini na afersi disi, dan dati e yepi wi fu kibri wisrefi gi siki di sma e gi trawan nanga yepi fu seks; son wan fu den siki disi, no abi dresi èn den kan kiri wan sma srefi. * Efu wi e gi yesi dan dati sa kibri wi fu no kisi bere sondro fu trow. Te wi e handri akruderi a koni fu Gado, dan dati e yepi wi fu abi wan krin konsensi. Èn efu wi e du dati, dan dati e meki wi abi moro lespeki gi wisrefi, èn so srefi trawan sa lespeki wi — soleki wi famiriman, wi trowpatna, wi pikin, nanga wi Kresten brada nanga sisa. So srefi a e yepi wi fu abi wan bun fasi fu si sani ini a tori fu seks, èn dati baka sa yepi wi fu de moro koloku na ini a trowlibi. Wan Kresten uma ben skrifi: „A waarheid fu Gado en Wortu na a moro bun kibri di de. Mi e wakti ete fu trow, èn te mi trow, dan nanga furu lespeki mi sa man taigi a Kresten man di mi o trow nanga en, taki mi tan krin.”

8. Fa a krin fasi fa wi e tyari wisrefi, kan horibaka gi a soifri anbegi?

 ⁸ Te wi e tan tyari wisrefi na wan krin fasi, dan wi kan du furu tu fu puru fowtu prakseri di sma abi fu a tru anbegi èn wi kan hari sma kon na a Gado di wi e anbegi. Na apostel Petrus ben skrifi: „Tan tyari unsrefi na wan bun fasi na mindri den nâsi, so taki ini den sani di den e taki fu unu leki unu na ogri sma, leki wan bakapisi fu den bun wroko fu unu, di den ben si nanga den eigi ai, den kan gi glori na Gado na a dei te a sa ondrosuku sani” (1 Petrus 2:12). Srefi efu den sma di no e dini Yehovah no wani si a krin fasi fa wi e tyari wisrefi, toku wi kan de seiker taki wi hemel Tata e si den muiti di wi e du fu teki en rai, èn a e feni en bun èn a e prisiri nanga dati.—Odo 27:11; Hebrewsma 4:13.

9. Fa san ede wi musu frutrow a tiri di Gado e gi, ala di wi no e frustan krin kande fu san ede a e du dati na so fasi? Gi wan eksempre.

⁹ Bribi na ini Gado wani taki dati wi e frutrow taki en sabi san de moro bun gi wi, srefi te wi no e frustan ala ten fu san ede En e tiri wi na a fasi fa a e tiri wi. Poti prakseri na wan eksempre fu a Wet fu Moses. Wán wet di abi fu du nanga den legre kampu ben aksi taki kunkun ben musu beri dorosei fu a kampu (Deuteronomium 23:13, 14). Kande den Israèlsma ben aksi densrefi fu san ede den ben musu du so wan sani; wan tu fu den ben kan denki srefi taki a sani dati no ben de fanowdu. Ma sensi a ten dati, dan datra kon si taki a wet disi ben yepi fu hori den presi krin pe den ben go teki a watra fu den, èn a ben kibri den gi siki di insekt ben tyari abra. Na a srefi fasi, Gado wani taki sma musu abi seks soso na ini a trowlibi, èn na dati A e aksi fu wi gi a bun fu wi na yeye fasi, na a sei fu a libimakandra, na a sei fu den firi fu wi, na skin sei, èn na frustan sei. Meki wi poti prakseri now na wan tu eksempre na ini Bijbel fu sma di ben tan hori densrefi krin na a sei fu bun gwenti nanga gronprakseri.

Yosef—Ben Kisi Blesi fu a Fasi Fa A Ben Tyari Ensrefi na a Sei fu Bun Gwenti Nanga Gronprakseri

10. Suma ben pruberi fu kori Yosef, èn sortu piki a ben gi tapu dati?

¹⁰ Kande yu sabi na eksempre na ini Bijbel fu Yosef, a manpikin fu Yakob. Di Yosef ben abi 17 yari, dan a ben tron wan srafu fu Potifar, na edeman fu den waktiman fu a Farao fu Egipti. Yehovah ben blesi Yosef, èn baka ten Yosef ben poti na wroko fu luku a heri oso fu Potifar. Na a ten di Yosef ben abi 20 yari, dan a ben kon de „wan moi man di ben moi fu luku na tapu”. Yosef ben hari a prakseri fu Potifar en wefi, di ben pruberi fu kori Yosef. Yosef ben sori krin pe a ben tanapu, di a ben tyari kon na krin taki efu a ben o du so wan sani, dan a ben o tori en masra èn so srefi a ben o „sondu na Gado”. Fu san ede Yosef ben denki so?—Genesis 39:1-9.

11, 12. Ala di wan skrifi wet fu Gado no ben de di e taki dati yu no musu du hurudu nanga sutadu, toku fu san ede Yosef ben musu denki na a fasi fa a ben denki?

¹¹ A de krin, taki Yosef no ben teki a bosroiti disi  fu di a ben frede taki libisma ben o kon sabi san a ben du. Yosef en famiri ben libi farawe èn en papa ben denki taki Yosef dede srefi. Efu Yosef ben o du seks hurudu, dan noiti en famiri ben o sabi dati. Èn soleki fa a sori, dan Yosef ben kan kibri a tori srefi gi Potifar nanga den tra mansma futuboi, fu di den no ben de na ini na oso ala ten (Genesis 39:11). Toku, Yosef ben sabi taki so wan sondu a no ben man kibri gi Gado.

¹² Yosef ben musu kisi en denki fu den sani di a ben sabi kaba fu Yehovah. Sondro tweifri a ben sabi san Yehovah ben meki bekènti na ini a dyari fu Eden: „Dati meki wan man sa gowe libi en papa nanga en mama èn a musu tai hori na en wefi èn den musu tron wán skin” (Genesis 2:24). Moro fara, Yosef ben sabi kande san Yehovah ben taigi wan Filistijn kownu di ben pruberi fu kori Sara, na afo fu Yosef. Yehovah ben taigi a kownu dati: „Luku, yu de wan dede sma, bika fu na uma disi di yu ben teki, fu di a de wan tra man wefi. . . . Èn mi ben tapu yu tu fu yu no sondu teige mi. Fu dati ede mi no ben gi yu pasi fu fasi en” (Genesis 20:3, 6). So bun, ala di Yehovah no ben gi wan wet ete pe disi ben skrifi, toku a ben de krin fu si fa en ben denki fu a trowlibi. A firi di Yosef ben firi san na bun gwenti nanga gronprakseri, èn so srefi a wani di Yosef ben wani plisi Yehovah, ben meki taki a no ben du hurudu.

13. Soleki fa a sori, dan fu san ede Yosef no ben man wai pasi gi Potifar en wefi?

¹³ Ma Potifar en wefi ben horidoro, èn „dei fu dei” a ben begi Yosef fu kon didon nanga en. Fu san ede Yosef no ben pruberi fu wai pasi nomo gi en? We, leki wan srafu a ben musu du den wroko di a kisi fu du èn Yosef no ben kan du furu fu kenki dati. Den owruten sani di sabidensiman ben feni, e sori taki a fasi fa den oso fu Egipti ben meki, ben meki taki wan sma ben musu pasa den moro prenspari kamra fu na oso efu a ben wani go na den maksin. Fu dati ede, a ben kan muilek srefisrefi gi Yosef fu wai pasi gi a wefi fu Potifar.—Genesis 39:10.

14. (a) San ben pasa nanga Yosef baka di a ben lon gowe fu Potifar en wefi? (b) Fa Yehovah ben blesi Yosef fu di a ben tan getrow?

¹⁴ A dei ben doro di den ben de den wawan na ini na oso. Potifar en wefi ben go fu grabu Yosef hori èn a ben bari taki: „Kon didon nanga mi!” Yosef ben lon gowe. Fu di a sani disi ben hati a wefi, dati meki a ben taki dati Yosef ben pruberi fu abi seks nanga en nanga tranga. San ben pasa fu dati ede? Yehovah ben pai Yosef wantewante fu di a ben hori en soifri retifasi? Nôno. Den ben trowe Yosef na ini dungru-oso èn den ben tai en nanga keti (Genesis 39:12-20; Psalm 105:18). Yehovah ben si taki a sani disi no ben pasa nanga reti, èn te fu kaba a ben sori grani na Yosef fu di a ben puru en fu wan dungru-oso èn ben poti en na ini wan kownu-oso. Yosef ben tron a moro makti sma na ini Egipti baka Farao, èn Yehovah ben blesi Yosef nanga wan wefi èn nanga pikin (Genesis 41:14, 15, 39-45, 50-52). Boiti dati, a tori di ben skrifi so wan 3500 yari pasa èn di ben taki fu a soifri retifasi fu Yosef, ben skrifi so taki sensi a ten dati, ala den futuboi fu Gado ben sa kan poti prakseri na a tori dati. Trutru kefalek moi blesi e kon te wan sma e hori ensrefi na den regtfardiki wet fu Gado! Na a srefi fasi, na ini a ten disi, kande wi no e si wantewante den winimarki di e kon te wi e hori wisrefi na den wet nanga gronprakseri fu Gado, ma wi kan de seiker taki Yehovah e si dati èn a sa blesi wi te fu kaba.—2 Kroniki 16:9.

’A Frubontu Di Yob Ben Meki Nanga En Ai’

15. San ben de a ’frubontu di Yob ben meki nanga en ai’?

¹⁵ Wan tra sma di ben hori en soifri retifasi, ben de Yob. Na a ten di Didibri ben tesi en, dan Yob ben  luku baka san a ben du na ini en libi. Yob ben taki dati efu a ben du ogri sani, dan a ben de klariklari fu teki strafu; èn wan fu den sani di Yob ben kari, ben de Yehovah en wet ini a tori fu seks. Yob ben taki: „Mi meki wan frubontu nanga mi ai. So bun, fa mi ben kan poti prakseri na wan nyunwenke?” (Yob 31:1) Nanga disi, Yob ben wani taki dati na ini a teki di a ben e teki a bosroiti fu hori en soifri retifasi na Gado, dan a no ben wani srefi fu luku wan uma nanga lostu. A no de fu taki, Yob ben o si umasma ala dei èn a ben o yepi den kande efu den ben abi yepi fanowdu. Ma Yob no ben wani poti prakseri na umasma fu lobi den soleki fa wan man e lobi wan uma. Fosi den tesi bigin miti Yob, dan a ben de wan kefalek guduman, „a moro bigi man fu ala den sma na Owstu sei” (Yob 1:3). Ma a no ben gebroiki en makti leki guduman fu kisi furu uma. A ben abi wán wefi nomo èn a ben hori ensrefi na en wefi. A de krin, taki noiti Yob ben prei nanga a prakseri fu pasa a wet fu abi seks nanga yongu umasma.

16. (a) Fu san ede Yob na wan moi eksempre gi Kresten di trow? (b) Fa a fasi fa mansma ben tyari densrefi na ini a ten fu Maleaki ben de heri tra fasi leki fa Yob ben tyari ensrefi? Èn fa a de na ini a ten disi?

¹⁶ So bun, na ini bun ten èn na ini tranga ten, Yob ben hori en soifri retifasi ini a tori fu bun gwenti nanga gronprakseri. Yehovah ben si disi èn a ben blesi en furu (Yob 1:10; 42:12). Fu tru, Yob na wan moi eksempre gi Kresten di trow, gi mansma nanga umasma! Dati meki Yehovah ben lobi en sote! Ma na ini a ten disi, sma e tyari densrefi heri tra fasi; èn a fasi fa den e tyari densrefi noyaso gersi san ben pasa na ini a ten fu Maleaki. A profeiti dati ben krutu a fasi fa den trowmasra ben gowe libi den wefi, nomo fu go trow nanga moro yongu uma furutron. Na altari fu Yehovah ben furu nanga watra-ai fu den wefi di den masra fu den ben gowe libi den, èn Gado ben krutu den wan disi di ben „handri feradelek” nanga den trowpatna fu den.—Maleaki 2:13-16.

Wan Krin Yongu Uma

17. Fa a meisje fu Sulem ben de leki „wan dyari di tapu”?

¹⁷ Wan di fu dri sma di ben hori en soifri retifasi, ben de wan meisje fu Sulem. Fu di a ben yongu èn a ben moi, meki a no ben hari a lobi fu wan boi di ben sorgu skapu wawan, ma so srefi a ben hari a lobi fu Salomo, a gudu kownu fu Israèl. Na ini a heri tori di skrifi na ini Heisingi, a meisje fu Sulem ben tan krin; èn dati meki den wan di ben de lontu en, ben lespeki en. Ala di a meisje no ben wani Salomo, toku Salomo ben skrifi a tori fu a meisje nanga yepi fu santa yeye. A skapuman di a meisje ben lobi, ben lespeki en furu tu fu a krin fasi fa a meisje ben tyari ensrefi. Na wan momenti a skapuman ben prakseri dipi èn a ben kon si taki a meisje fu Sulem ben de leki „wan dyari di tapu” (Heisingi 4:12). Na ini Israèl fu owruten, moi dyari ben abi moi difrenti sortu prani, switi smeri bromki, nanga bigi bon. Den sortu dyari disi ben tapu lontu nanga wan skotu; èn te wan sma ben sa wani go na inisei, dan a ben musu pasa wan portu di ben sroto (Yesaya 5:5). Gi a skapuman, a krinfasi nanga a moifasi fu a meisje fu Sulem di ben hori ensrefi na bun gwenti nanga gronprakseri, ben moi srefisrefi neleki fa den sortu dyari disi ben moi. A meisje ben krin srefisrefi. A lobi fu a meisje ben sa de soso gi a masra di a ben o trow nanga en.

18. Fu sortu sani den tori fu Yosef, Yob, nanga a meisje fu Sulem e memre wi?

 ¹⁸ A meisje fu Sulem poti wan moi eksempre gi Kresten uma noyaso ini a hori di den musu hori soifri retifasi na a sei fu bun gwenti nanga gronprakseri. Yehovah ben si a krinfasi fu a meisje fu Sulem èn a ben warderi dati. A ben blesi a meisje neleki fa a ben blesi Yosef nanga Yob. A hori di den dri sma disi ben hori soifri retifasi, skrifi na ini Gado en Wortu, èn den tori disi na wan yepi gi wi. Ala di den muiti di wi e du fu hori wi soifri retifasi noyaso, no skrifi na ini Bijbel, toku Yehovah abi wan „buku fu memre” gi den wan di e suku fu du a wani fu en. Meki wi no frigiti noiti taki Yehovah e „poti prakseri” èn a e prisiri te wi e du muiti fu tan krin na a sei fu bun gwenti nanga gronprakseri dorodoro.—Maleaki 3:16.

19. (a) Fa wi musu si krinfasi na a sei fu bun gwenti nanga gronprakseri? (b) Fu sortu tori wi sa taki na ini a tra artikel?

¹⁹ Ala di den wan di no abi bribi kan spotu nanga wi, toku wi e prisiri na ini a gi di wi e gi yesi na wi lobi-ati Mekiman. Wi abi den moro bun gwenti nanga den moro bun gronprakseri, fu di den e komoto fu Gado. Dati meki wi kan abi furu lespeki gi wisrefi, èn wi musu si en leki wan bigi gudu. Te wi e tan hori wisrefi krin na a sei fu den bun gwenti nanga gronprakseri, dan wi kan prisiri na ini den blesi fu Gado èn wi kan tan abi wan krin howpu fu têgo blesi na ini a ten di e kon. Ma san na den sani di wi kan du nownow fu tan krin na a sei fu bun gwenti nanga gronprakseri? A tra artikel sa taki fu a prenspari aksi disi.

[Futuwortu]

Yu Kan Tyari Disi Kon na Krin?

• San Bijbel e leri fu seks demakandra?

• San na ala den sani di Bijbel e kari „hurudu”?

• Fa wi e kisi winimarki te wi e hori wisrefi krin na a sei fu bun gwenti nanga gronprakseri?

• Fu san ede Yosef, Yob, nanga a meisje fu Sulem na moi eksempre gi Kresten noyaso?

[Aksi fu a tori disi]

[Prenki na tapu bladzijde 9]

Yosef ben lon gi hurudu

[Prenki na tapu bladzijde 10]

A meisje fu Sulem ben de leki „wan dyari di tapu”

[Prenki na tapu bladzijde 11]

Yob ben meki ’wan frubontu nanga en ai’