Begi E Du Sma Bun?

PIKINMORO ibri sma e firi taki a musu begi wan ten. Te yu luku en bun, dan pikinmoro ala sma di de na ini wan bribi e begi fayafaya. Fu eksempre, dusundusun tron wán dei, wan Budasma kan begi: „Mi e poti mi bribi na ini Amida Buda.” Èn a srefi sani dati a e begi a heri dei.

Efu wi luku ala den problema di de na heri grontapu, dan a bun fu aksi: San wan sma e fruwakti fu kisi te a e begi? A de so, taki ala den begi disi e du sma bun?

Fu San Ede Sma E Begi?

Furu sma fu Owstusei e begi den afo fu den èn so srefi den gado fu den soleki Syinto nanga Tao. Den e du disi fu di den wani pasa den examen na skoro nanga bun bakapisi, den wani koti bun nyanyan sani na gron, noso den no wani kon siki. Nanga den muiti di den Budasma e du, dan den e howpu taki den kan kisi frulekti nanga vrede. Den Hindusma e gi densrefi na ini a begi di den e begi den man-gado nanga den uma-gado fu den. Den e du disi fu di den wani kisi sabi, den wani kon gudu, èn den wani feni kibri.

Wan tu Katoliksma e howpu taki den kan yepi a libisma famiri fu di den e gi den libi leki monnik noso non na ini klooster; drape den e begi doronomo. Milyunmilyun Katoliksma e suku bun na Maria fu di den e taki begi di den leri na ede, èn dati den e du sontron nanga yepi fu krara fu rowskransi. Furu sma na ini den kondre fu Owstusei, e gebroiki wan tromu pe begi di skrifi na tapu papira de na ini. Den Protestantsma e taki den wortu fu a Wi Tata Begi ala ten baka. Ma na a tra sei, den  kan taigi Gado tu fa den e firi èn dati den kan taigi en nanga den eigi wortu. Furu Dyu e kon fu farawe so taki den kan begi na a Westsei Skotu na ini Yerusalem. Dati den e du, fu di den e howpu taki a tempel sa kon bun baka èn taki wan nyun pisi ten sa kon pe sani sa waka bun èn pe vrede sa de.

Ala di milyunmilyun sma e begi tranga, toku den problema e kon moro furu tapu a libisma famiri. Den problema soleki pôtifasi, ogridu, orloku, a tron di sma e tron srafu fu sani fu di den no man dwengi densrefi, èn a prati di osofamiri e prati. A kan taki ala den sma disi no e begi na a yoisti fasi? Fu taki en leti, a kan taki wan sma de di trutru e yere den begi?

Wan Sma De Di E Yere Den Begi?

Begi no kan bun trutru, efu wan sma no e yere den begi dati. Te wan sma e begi, dan soleki fa a sori a sma dati e bribi taki wan sma na ini a yeye kondre e yere en. Ma begi no e waka neleki fa radio golf na ini a loktu e waka. Furu sma e bribi taki wan sma de di kan sabi srefi san wan sma e denki te a e begi. Suma kan de a sma dati?

Fa a du kon taki prakseri e du kon na ini den finifini pisi fu na ede tonton, na wan dangra tori gi ondrosukuman te leki now ete. Ma fu dati ede, wi kan fruwakti taki a Sma di meki na edetonton musu man sabi den prakseri disi di de na ini na edetonton. A wan dati na no wan tra sma leki wi Mekiman, Yehovah Gado (Psalm 83:18; Openbaring 4:11). Te wan sma e begi, dan a musu seni den begi fu en go na en. Ma a de so taki Yehovah e arki ala den begi disi?

Gado E Arki Ala Begi?

Kownu David fu Israèl fu fositen, ben de wan man di ben lobi begi. Leki wan psalm skrifiman, a ben skrifi sani nanga yepi fu santa yeye, èn a ben singi: „O Yereman fu begi, na yu, sma fu ala sortu skin sa kon srefi.” (Psalm 65:2). Yehovah man frustan den begi di sma e begi na ini iniwan fu den dusundusun tongo di a libisma famiri e taki. A tru taki no wan libisma frustan kan teki so furu bodoi na ini en, ma dati no wani taki dati Gado no kan poti prakseri na ala den sma di e begi en na wan bun fasi.

Ma toku, Yesus Krestes — wan man di ben lobi begi so srefi — ben tyari kon na krin taki a no ala begi e plisi Gado. Luku san Yesus ben taki fu a taki di sma ben taki begi na ede, wan sani di den ben lobi du na ini a ten dati. Soleki fa a Njoe Testament Nanga Dem Psalm e skrifi, dan Yesus ben taki: „Te oen de begi, oen no moe meki foeloe taktaki, leki fa dem heiden de doe; bikasi dem denke taki, Gado sa jeri dem, efi dem taki foeloe woortoe” (Mateus 6:7). Wi no kan fruwakti taki Yehovah sa arki begi fu wi te den begi dati no e taigi en fa wi e firi trutru.

Wan Bijbel odo ben sori fu san ede wan tu begi no e plisi Gado. A Bijbel odo dati e taki: „A sma di e drai en yesi puru fu yere a wet — srefi a begi fu en de wan tegu sani” (Odo 28:9). Wan tra odo e taki: „Yehovah de fara fu den godelowsuwan, ma den begi fu den regtfardikiwan a e yere” (Odo 15:29). Na wan ten di den fesiman fu Yuda fu fositen ben abi fu tyari frantwortu fu den bigi fowtu fu den, Yehovah ben meki bekènti: „Te unu e bradi den mindri-anu fu unu opo, mi e kibri mi ai gi unu. Awansi unu e begi furu, toku mi no e arki; un eigi anu kon furu nanga sma brudu di unu meki fadon.”—Yesaya 1:1, 15.

Na apostel Petrus ben kari wan tra sani di ben kan meki taki Gado no e arki begi. Petrus ben skrifi: „Un masra, tan libi nanga [un wefi] akruderi sabi, fu di unu e gi den grani leki na wan moro swaki prapi, na umasma fasi, fu di unu de erfgenaam fu a no-frudini bun-ati fu libi, so taki noti no e hendri den begi fu unu.” (1 Petrus 3:7). A kan, taki den begi fu wan man di no e teki a rai disi, e tan leti drape na ini a kamra pe a e begi!

A de krin, taki efu Gado wani arki den begi fu sma, dan den sma musu doro wan tu marki. Ma furu sma di e begi no e broko den ede furu nanga den sani di Gado e aksi fu wi. Dati na fu san ede so furu opregti begi no e yepi wi fu abi wan moro bun grontapu.

We dan, san Gado e aksi fu wi so taki a kan yere den begi fu wi? A piki tapu na aksi disi abi fu du nanga a sani di e meki wi begi. Fu taki en leti, efu wi wani sabi efu den begi fu wi o du wi bun, dan wi musu frustan fu san ede wi e begi. Fu san ede Yehovah meki a de so, taki wi kan taki nanga en?

[Sma di abi a reti fu den prenki na tapu bladzijde 3]

G.P.O., Yerusalem