De Klariklari fu Dini Gado

„MI FU mi sei sa prisiri srefisrefi fu gi ala san mi abi èn mi sa gi misrefi dorodoro fu un eigi sili ede”, na apostel Paulus ben skrifi (2 Korentesma 12:15). San den wortu disi e fruteri yu fu a denki di den futuboi fu Yehovah musu pruberi fu kweki? Wan Bijbel sabiman e taki dati di Paulus ben skrifi den wortu dati gi den Kresten na ini Korente, dan a ben wani fu taki: „Mi wani fu gi mi krakti, mi ten, èn mi libi, èn ala sani di mi abi fu a bun fu unu, soleki fa wan papa e prisiri fu du dati gi den pikin fu en.” Paulus ben de klariklari fu „gi ensrefi dorodoro”, noso fu „gi ala en krakti nanga ala en ten”, efu dati ben o de fanowdu fu du a Kresten diniwroko fu en.

Boiti dati, Paulus ben „prisiri srefisrefi” fu du ala den sani disi. A ben „breiti [srefisrefi]” fu du dati, Da Bijbel e taki. Fa a de nanga yu? Yu de klariklari fu gi yu ten, yu krakti, den koni fu yu, èn den gudu fu yu, fu a bun fu Yehovah Gado èn a di fu tra sma? Yu sa du dati, srefi efu dati sa meki taki yu musu „gi ala [yu] krakti nanga ala [yu] ten” son leisi? Èn yu ben o „prisiri srefisrefi” fu du dati?

Den E Weigri Srefisrefi fu Dini Gado

Moro furu sma no e draidrai nomo fu dini Gado, ma den no wani fu dini en kwetikweti. Den no de nanga tangi, den no wani srefisrefi taki Gado tiri den, den e kakafutu srefi gi en. Satan ben kori Adam nanga Efa fu kon kisi a denki disi. A no ben taki san de tru di a ben taigi den taki den ben o „de leki Gado, [den] sa sabi bun nanga ogri” — taki den ben o man bosroiti gi densrefi san bun èn san ogri (Genesis 3:1-5). Den sma di abi so wan srefi sortu denki na ini a ten disi, e feni taki den musu de fri dorodoro fu man du soifri den sani di den wani du, sondro taki den abi wan enkri fruplekti na Gado, èn sondro taki Gado e bumui na ini den libi (Psalm 81:11, 12). Den wani gebroiki ala den sani di den abi fu a bun fu densrefi nomo.—Odo 18:1.

Kande yu no abi a tumusi aparti denki disi. Kande yu abi trutru warderi gi a presenti fu libi di yu e nyan bun fu en nownowde, èn so srefi gi a moro moi fruwakti di wi abi fu libi fu têgo na tapu wan paradijs grontapu (Psalm 37:10, 11; Openbaring 21:1-4). Kande yu de nanga bigi tangi, fu di Yehovah sori yu a bunfasi fu en. Ma wi alamala musu de na ai gi a kefar di de taki Satan kan trubu a denki fu wi na so wan fasi, taki Gado no e feni a diniwroko fu wi bun moro (2 Korentesma 11:3). Fa a sani disi ben kan pasa?

A De Fanowdu Taki Wi De Klariklari fu Dini Gado

Yehovah wani taki sma musu de klariklari fu dini en nanga den heri ati. Noiti a e dwengi wi fu du a wani fu en. Na Satan e du ala san a man fu dwengi noso kori sma fu du a wani fu en. Te a abi fu du nanga a dini fu Gado, dan a tru taki Bijbel e taki fu plekti, komando, markitiki, èn so moro fara (Preikiman 12:13; Lukas 1:6). Toku, a moro prenspari reide di wi abi fu dini Gado, na fu di wi lobi en.—Exodus 35:21; Deuteronomium 11:1.

 Awansi omeni krakti nanga ten Paulus ben gi na ini a diniwroko fu Gado, toku a ben sabi taki den sani di a ben du no ben warti noti’ efu a no ben abi lobi’ (1 Korentesma 13:1-3). Te Bijbel skrifiman e taki fu Kresten leki srafu fu Gado, dan den no e taki fu a dwengi di sma e dwengi trawan fu du tegu diniwroko (Romesma 12:11; Kolosesma 3:24). Den wani taki nanga dati, taki wan sma musu de klariklari fu du a wani fu Gado, fu di a abi dipi lobi gi en èn so srefi gi en Manpikin, Yesus Krestes.—Mateus 22:37; 2 Korentesma 5:14; 1 Yohanes 4:10, 11.

A diniwroko di wi e du gi Gado musu sori tu taki wi abi wan dipi lobi gi libisma. „Wi ben kon de nanga switifasi na un mindri, neleki te wan mama di e gi pikin bobi e boboi den eigi pikin fu en”, Paulus ben skrifi a gemeente na ini Tesalonika (1 Tesalonikasma 2:7). Na ini furu kondre na ini a ten disi, a wet e fruplekti mama fu sorgu den pikin fu den. Ma seiker a no tru taki moro furu mama e du dati soso fu di den wani gi yesi na a wet, a no so? Nôno. Den e du dati fu di den lobi den pikin fu den èn den pikin warti na ini den ai. A tru srefisrefi taki wan mama di e gi pikin bobi, e prisiri srefisrefi fu du bun furu gi den pikin fu en! Fu di Paulus ben abi a srefi „safri firi fu lobi” gi den sma di a ben dini, meki taki „a ben prisiri srefisrefi” („[a] ben wani [fu du dati]”, Da Bijbel), fu gi en libi srefi fu yepi den (1 Tesalonikasma 2:8). Lobi e buweigi wi fu waka baka na eksempre fu Paulus.—Mateus 22:39.

Wi Kan Dini Yehovah Sondro Taki Wi E Prisiri fu Du Dati?

A no de fu taki, dati wi no musu lobi wisrefi moro leki wi lobi Gado nanga tra sma. Efu wi du dati dan wan trutru kefar de taki wi no sa de klariklari fu dini Gado nanga wi heri ati. Kande wi ben sa bigin firi taki wi no wani dini Gado, fu di wi e mandi taki wi no man libi wi libi soifri na a fasi fa wi wani du dati. Disi ben pasa nanga wan tu Israèlsma di ben lasi a lobi di den ben abi gi Gado, ma toku den ben tan dini en, soso fu di den ben si en leki wan fruplekti. San ben de a bakapisi fu dati? A dini di den ben musu dini Gado ben kon tron „wan sani di ben weri” den.—Maleaki 1:13.

Iniwan ofrandi di wi e tyari gi Gado, ala ten musu de „gosontu dorodoro”, sondro mankeri, a „moro bun wan” di de fu kisi (Lefitikus 22:17-20; Exodus 23:19). Na presi taki den sma na ini den dei fu Maleaki ben gi Yehovah den moro bun wan fu den meti fu den, dan den bigin òfer den wan di densrefi no ben wani fu tru. Fa Yehovah ben feni a sani dati? A taigi den priester: „Te unu e pristeri wan breni meti leki ofrandi [yu e taki]: ’A no wan ogri sani.’ Èn te unu e pristeri wan lan meti noso wan sikiwan: ’A no wan ogri sani’ Grantangi, tyari en go gi a tiriman fu yu. A sa prisiri nanga yu, noso a sa teki yu nanga switifasi? . . . Èn unu tyari wan sani kon di priti, èn a lanwan, èn a sikiwan; iya, unu tyari en kon leki wan presenti. Mi kan prisiri fu en na unu anu?”—Maleaki 1:8, 13.

Fa a sani disi ben kan pasa nanga iniwan fu wi? Den ofrandi fu wi kan kon tron „wan sani di e weri” wi efu wi no de klariklari fu tyari den nanga wi heri ati (Exodus 35:5, 21, 22; Lefitikus 1:3; Psalm 54:6; Hebrewsma 13:15, 16). Fu gi wan eksempre, a de so taki Yehovah e kisi a pikinso ten fu wi di e tan abra?

Wan sma kan denki fu tru taki Gado ben o feni en bun taki wan famiriman fu wi di abi a bun fu wi na prakseri noso wan Leifisma di e du diniwroko fayafaya, ben o dwengi wan Israèlsma na wan noso tra fasi, fu teki a moro bun meti fu èn fu gi en leki ofrandi, ala di a no ben wani du dati kwetikweti? (Yesaya 29:13; Mateus 15:7, 8) Yehovah no ben wani den sortu ofrandi dati èn te fu kaba a ben drai baka gi den sma di ben tyari den.—Hosea 4:6; Mateus 21:43.

Du a Wani fu Gado Nanga Prisiri

Fu dini Gado na wan fasi di a sa feni bun, dan wi musu waka baka na eksempre fu Yesus Krestes. „Mi no e suku mi eigi wani”, a ben taki, „ma a wani fu en di seni mi” (Yohanes 5:30). Yesus ben abi bigi prisiri fu di a ben de klariklari fu dini Gado. Yesus ben meki den wortu fu a profeiti David kon tru: „Mi prisiri fu du yu wani, o mi Gado.”—Psalm 40:8.

Ala di Yesus ben prisiri fu du a wani fu Yehovah, disi no ben de wan makriki sani fu du. Poti prakseri na san ben pasa syatu bifo den grabu en, krutu en, èn kiri en. Ala di Yesus ben de na ini a dyari fu Getsemane, a ben „sari trutru”, èn a  ben kon firi „hebi banawtu”. A tesi disi di a ben kisi ben hebi sote taki, di a ben begi, „a sweti fu en ben kon tron leki dropu brudu di ben fadon na gron”.—Mateus 26:38; Lukas 22:44.

Fu san ede Yesus ben firi so wan bigi banawtu? Seiker a no ben de fu di a ben suku en eigi wini nomo noso fu di a no ben wani fu du a wani fu Gado? A ben de klariklari fu dede èn a piki Petrus na wan krakti fasi di Petrus ben taigi en: „De bun gi yusrefi, Masra; a sani disi no sa pasa nanga yu, kwetikweti” (Mateus 16:21-23). Yesus ben broko en ede nanga a fasi fa a dede di a ben o dede leki wan tegu ogriman ben o abi krakti tapu Yehovah èn tapu a santa nen fu en. Yesus ben sabi taki en Papa ben o sari srefisrefi fu si taki sma ben handri na so wan takru fasi nanga en lobi manpikin.

Yesus ben frustan tu taki a ben kon krosibei fu wan tumusi prenspari ten ini a kontru fu a prakseri fu Yehovah. Te a ben tan hori ensrefi na wan getrow fasi na den wet fu Gado dan dati seiker ben o sori taki Adam ben kan teki a srefi bosroiti dati. A getrowfasi fu Yesus ben o sori taki Satan lei di a fruklari taki libisma no ben o de klariklari fu dini Gado getrow, te den ben o kisi tesi. Nanga yepi fu Yesus, Yehovah sa masi Satan te fu kaba èn a sa puru den bakapisi fu na opruru di a ben meki.—Genesis 3:15.

Dati na wan bigi frantwortu di ben de na tapu Yesus en skowru! A nen fu en Tata, vrede na heri grontapu, èn a frulusu fu a heri libisma famiri, ala den sani disi ben anga fu a getrowfasi fu Yesus. Fu di a ben sabi dati, meki a ben begi: „Mi Tata, efu a kan, meki a beker disi pasa mi. Toku, no soleki fa mi wani, ma soleki fa yu wani” (Mateus 26:39). Srefi di Yesus ben kisi a moro hebi tesi, toku dati noiti hori en fu de klariklari fu saka ensrefi na ondro a wani fu en Tata.

’A Yeye Wani, ma a Skin Swaki’

Neleki fa Yesus ben kisi hebi tesi di a ben dini Yehovah, na so wi tu kan fruwakti taki Satan sa tesi wi leki futuboi fu Gado (Yohanes 15:20; 1 Petrus 5:8). Boiti dati, wi no de volmaakti. So bun, awansi wi e dini Gado nanga prisiri, a no sa de wan makriki sani gi wi fu du dati. Yesus ben si fa den apostel fu en ben du tranga muiti fu du ala den sani di a ben aksi den fu du. Fu dati ede a ben taki: „A no de fu taki, dati a yeye wani, ma a skin swaki” (Mateus 26:41). Yesus ben abi no wan swakifasi na ini en volmaakti libisma skin. Toku, a ben abi na prakseri den swakifasi fu a skin fu en disipel, na onvolmaaktifasi di den ben kisi fu Adam di ben de onvolmaakti. Yesus ben sabi taki onvolmaaktifasi di e meki taki sma no man du ala san den wani du, ben o meki taki den ben o abi fu du tranga muiti fu du ala den sani di den ben wani du na ini a diniwroko fu Yehovah.

A kan de so taki wi abi a srefi firi leki na apostel Paulus di ben brokosaka srefisrefi, fu di na onvolmaaktifasi fu en ben meki taki a no ben man dini Gado dorodoro. „A man di mi man winsi de na ini mi”, Paulus ben skrifi, „ma a man di mi man du san bun no de na ini mi” (Romesma 7:18). Wi tu e feni taki wi no kan du dorodoro ala den sani di wi wani fu du (Romesma 7:19). A no fu di wi no wani. Na fu a swakifasi fu a skin ede meki wi no man du ala sani di wi wani du, awansi fa wi e meki muiti.

No meki wi lasi-ati. Efu wi de klariklari nanga wi heri ati fu du ala san wi man du, dan Gado seiker sa feni a diniwroko fu wi bun. Meki a de so, taki wi e ’du ala san wi man’ fu waka baka a fasi fu Yesus di ben saka ensrefi dorodoro fu du a wani fu Gado. (2 Timoteus 2:15; Filipisma 2:5-7; 1 Petrus 4:1, 2) Yehovah sa pai wi èn sa horibaka gi wi te wi e sori taki wi de klariklari fu du en wani. A sa gi wi „a krakti di e pasa san de normaal” fu yepi wi nanga den swakifasi fu wi (2 Korentesma 4:7-10). Nanga yepi fu Yehovah wi, neleki Paulus, sa „prisiri srefisrefi fu gi ala san [wi] abi èn [wi] sa gi [wi]srefi dorodoro” na ini a warti diniwroko fu En.

[Prenki na tapu bladzijde 21]

Paulus ben de klariklari fu dini Yehovah so bun leki a ben man du dati

[Prenki na tapu bladzijde 23]

Srefi di Yesus ben kisi a moro hebi tesi, a ben du a wani fu en Tata