Fu San Ede Yu Musu Begi?

„UNU e aksi èn toku unu no e kisi, bika unu e aksi nanga wan takru prakseri, . . . Kon krosibei na Gado, èn en sa kon krosibei na unu” (Yakobus 4:3, 8). Den wortu dati fu Yakobus, a disipel fu Yesus, musu meki wi go sidon denki fu san ede wi e begi.

Begi a no soso wan fasi fu taigi Gado san wi abi fanowdu. Na ini a barinen Bergitaki fu en, Yesus ben taki: „Un Tata sabi sortu sani unu abi fanowdu bifo unu aksi en srefi.” Ma toku, Yesus ben taki tu: „Tan aksi, èn [a] sa gi unu” (Mateus 6:8; 7:7). So bun, Yehovah wani taki wi musu fruteri en san wi denki taki wi abi fanowdu. Ma moro sani de ini a tori fu begi.

Trutru mati no e taki nanga makandra soso te den abi wan sani fanowdu. Den wani sabi sani fu makandra, èn a matifasi fu den e gro te den e taigi makandra den sani di den e firi. Na a srefi fasi, a begi di wi e begi abi moro na ini leki nomo fu aksi san wi abi fanowdu. A e gi wi na okasi fu meki wi matifasi nanga Yehovah kon moro tranga fu di wi e taigi en taki wi gi wisrefi na ini a dini fu en nanga wi heri ati.

Iya, Gado gi wi a grani fu begi, so taki wi kan kon krosibei na en. Disi wi kan du soso efu wi e fruteri Gado fa wi e firi, na presi fu wi taigi en sani di wi leri na ede nomo. Dati na wan prisiri trutru, fu taki nanga Yehovah na ini begi! Boiti dati, wan odo fu Bijbel e taki: „A begi fu den opregtiwan e plisi en.”—Odo 15:8.

 „Fu mi sei, a kon di mi e kon krosibei na Gado, bun gi mi”, na so a psalm skrifiman Asaf ben singi (Psalm 73:28). Ma wi musu du moro leki begi nomo, fu kon krosibei na Gado. Luku fa a tori di e kon now e sori wi a sani disi:

„Wan fu den disipel fu [Yesus] ben taigi en: ’Masra, leri wi fa fu begi.’” Yesus ben piki en: „Te unu e begi, taki: ’Tata, meki yu nen kon santa. Meki yu kownukondre kon’” (Lukas 11:1, 2). Wi kan begi trutru na a fasi disi, sondro taki wi leri fosi san na Gado en nen èn fa a nen dati sa kon santa? Den begi fu wi ben sa kruderi nanga a begi dati efu wi no ben frustan san na Gado en Kownukondre? Wi kan frustan den afersi disi te wi e ondrosuku Bijbel finifini. A sabi di wi o kon sabi sani na a fasi dati, sa yepi wi fu sabi Gado èn fu frustan den pasi fu en. Boiti dati, te wi kon sabi Yehovah Gado, dan dati sa meki wi firi moro krosibei fu en èn wi sa firi taki wi musu gi wisrefi moro na ini a dini fu en. Dati baka, sa yepi wi fu taki moro fri nanga en na ini begi.

Begi Kan Lusu Problema

A kweki di wi e kweki wan krosibei matifasi nanga Yehovah sa yepi wi fu lusu problema. Luku fa disi ben de tru na ini ibriwan fu den situwâsi di e kon now. Den tori disi e sori taki den wan di ben e begi, ben man tranga a matifasi fu den nanga Yehovah.

Na ini Brasyonkondre, wan uma di nen Maria, ben begi Gado fu a yepi en. Na uma ben wani opo ensrefi teige den markitiki di sma abi fu tyari densrefi na wan bun fasi na ini a libimakandra. Dati a ben wani du tu fu di a ben si a hoigrifasi na ini a libimakandra. Maria ben gowe libi srefi en masra, den pikin fu en, nanga na oso fu en. A ben bigin gebroiki drug tu. Ma di ala den sani disi no ben man meki en firi koloku, dan a ben taki nanga Gado na wan opregti fasi fa a ben firi èn Maria ben begi Gado fu yepi en.

Syatu baka dati, tu Kotoigi fu Yehovah ben kon na Maria, èn den ben libi A Waktitoren na baka; a tijdschrift dati ben taki o warti a de fu teki a tiri fu Gado. A sani di Maria ben leisi ben naki en ati, èn a ben bigin studeri Bijbel nanga den Kotoigi a srefi dei dati. Te fu kaba, a sani disi ben meki taki en osofamiri libi ben kon bun baka. Di Maria ben e leri fu Yehovah, a ben wani sori en fa a lobi en. „Mi ben kenki a fasi fa mi ben libi, èn mi ben bigin libi wan moro bun libi”, na so Maria e taki. „Na ini a bigin, mi masra nanga mi famiri no ben wani fu mi studeri Bijbel. Ma di den ben si fa mi ben e kenki mi libi, dan den ben bigin gi mi deki-ati.” Baka ten, Maria ben gi en libi abra na a Yereman fu begi so taki a kan dini en.

Ala di José ben abi wan moi wefi nanga wan bun bisnis na ini Bolifia, toku a no ben de koloku. A wakalibi di a ben abi nanga wan tra uma, ben meki taki en wefi gowe libi en. A ben bigin dringi sopi hebihebi èn a ben firi taki a no ben warti notinoti. José e taki: „Mi ben bigin begi nanga mi heri ati, èn mi ben aksi san mi musu du fu plisi Gado. Syatu baka dati, Yehovah Kotoigi ben kon na mi wrokopresi, èn den ben pristeri mi fri oso-bijbelstudie, ma mi ben seni den gowe. Disi mi ben du dri leisi. Ma ibritron di mi ben begi fu kisi yepi, dan den Kotoigi ben kon. Te fu kaba, mi ben teki a bosroiti taki mi ben o arki den a tra leisi. Mi ben leisi a heri Bijbel kaba èn mi ben abi furu sani fu aksi, ma ala ten den Kotoigi ben piki den aksi fu mi heri bun. A leri di mi ben leri sani fu Yehovah, ben gi mi libi wan heri tra marki, èn den mati fu mi na mindri den Kotoigi ben de trutru bun eksempre di ben gi mi deki-ati! Mi ben gowe libi na uma di mi ben hori nanga en èn mi ben gowe libi den mati di ben lobi dringi sopi makandra nanga mi. A no ben teki langa srefi, fu mi de baka nanga mi wefi èn nanga den pikin fu mi. Mi ben teki dopu na a bigin fu a yari 1999.”

Na ini Italiakondre, a trowlibi fu Tamara ben de na ini problema, èn dati meki a ben begi fu kisi koni. Tamara ben tron wan sma di ben lobi feti; dati ben du kon fu di a ben kisi fonfon na ini en eigi osofamiri èn den ben yagi en gowe fu oso di a ben abi 14 yari. Tamara e taki: „Mi ben feni wan Bijbel èn mi ben bigin leisi en. Wan neti, mi ben leisi taki ’a feni di wan sma e feni koni de neleki a feni di wan sma e feni wan gudu di kibri’. Mi ben begi fu kisi a koni dati (Odo 2:1-6). A tra mamanten, Yehovah Kotoigi ben kon na mi. Mi ben bigin studeri Bijbel nanga den, ma a ben teki ten fu mi du den sani di mi ben leri. Te fu kaba, mi ben teki a bosroiti taki mi ben wani libi na  a fasi fa Kresten musu libi èn mi ben teki dopu. Now, makandra nanga mi masra, mi e yepi trawan fu kisi wini fu a koni fu Gado.”

Beatriz ben de na mindri a grupu fu barinen sma nanga gudu sma na ini a libimakandra na ini Caracas, Venezuela. Ma a trow fu en kon broko èn a ben lasi-ati. Beatriz ben bruya, èn a ben begi furu yuru langa wan ten. A tra mamanten, wan trowpaar ben naki na tapu a doro. A sani dati ben fruferi Beatriz, a ben luku go na dorosei na ini wan pikin olo fu a doro, èn a ben si tu sma nanga bukutas. Beatriz ben du neleki a no ben de na oso, ma bifo den sma dati gowe, den ben pusu wan strooibiljet go na ondro a doro. „Sabi Yu Bijbel”, ben skrifi na tapu. A kan, taki a kon di den tu sma ben kon na en, ben abi fu du nanga a begi di a ben begi a neti bifo? Beatriz ben kari a trowpaar, èn a ben aksi den fu drai kon baka. Syatu baka dati, a ben studeri Bijbel èn baka ten a ben teki dopu. Te fu kaba Beatriz kon de koloku, èn now a e leri trawan fa fu feni koloku.

Carmen ben begi fu di a ben feti nanga a pôti di a ben pôti. A ben abi tin pikin nanga wan masra Rafael di ben drungu ala ten. „Mi ben wasi krosi èn so mi ben pruberi fu kisi moni”, na so Carmen e taki. Ma Rafael ben bigin dringi sopi moro hebi. „Mi masra ben bigin kenki en libi, soso baka di wi ben bigin studeri Bijbel nanga Yehovah Kotoigi. Wi ben leri fu a pramisi fu a Kownukondre — taki heri esi Yehovah sa puru ala pôtifasi fu grontapu nanga so srefi a kwinsi di sma e kwinsi trawan. Te fu kaba, Gado ben gi piki tapu den begi fu mi!” A leri di Rafael ben e leri fu den pasi fu Yehovah ben meki Rafael tapu nanga a dringi di a ben e dringi sopi, èn a ben weri „a nyun fasi fa sma musu de” (Efeisesma 4:24). En nanga en osofamiri ben man feni wan moro bun libi. Rafael e taki: „A kan, taki wi no gudu, wi no abi wi eigi oso, ma wi abi den sani di wi abi fanowdu na ini a libi, èn wi de koloku.”

A Ten te Gado Sa Gi Piki Tapu Ala Begi

A begi di den sma disi ben e begi, ben du den bun? A no de fu taki! Èn yu ben si tu, taki na ini furu fu den kefal disi, Gado ben gi piki tapu den begi fu den, di wan sma fu a Kresten gemeente ben yepi den fu kon krosibei na Yehovah Gado fu di den ben e studeri Bijbel nanga den?—Tori fu den Apostel 9:11.

So bun, wi sabi fu san ede wi musu begi. Now heri esi, a begi di wi e begi fu Gado en Kownukondre kon èn fu en wani pasa na grontapu, sa kisi piki (Mateus 6:10). Baka te Gado krin wi grontapu fu den wan di e gens en, dan „grontapu sa kon furu trutru nanga a sabi fu Yehovah” (Yesaya 11:9). Dan ala den wan di lobi Yehovah sa prisiri fu „a glori fri fu den pikin fu Gado” — èn seiker Gado sa gi piki tapu den begi fu den.—Romesma 8:18-21.

[Prenki na tapu bladzijde 7]

Yu sabi fu san ede wi musu begi?