Kresten De Koloku fu di Den E Du Diniwroko
Kresten De Koloku fu di Den E Du Diniwroko
„A moro koloku fu gi sani, leki fu kisi sani.”—TORI FU DEN APOSTEL 20:35.
1. Sortu fowtu denki sma abi moro furu na ini a ten disi, èn fu san ede a de wan takru denki?
NA INI den someni tenti yari di pasa baka a yari 1900, wi ben yere sma gebroiki den wortu „mi fosi”, furutron. Den wortu disi e sori go na a fasi fa sma de, taki den e prakseri densrefi nomo èn taki den abi bigi-ai, ala di den no e broko den ede srefi nanga tra sma. Wi kan de seiker taki na ini a yari 2000, sma abi a denki disi ete. Omeni leisi yu no e yere sma aksi: „San yu o gi mi baka dan?” noso „San mi o feni?” So wan denki, taki wi e prakseri wisrefi nomo, no sa meki wi de koloku. A de heri tra fasi leki a gronprakseri di Yesus ben taki fu en: „A moro koloku fu gi sani, leki fu kisi sani.”—Tori fu den Apostel 20:35.
2. A tru taki wi kan de moro koloku te wi e gi sani leki te wi e kisi sani?
2 A tru taki wi kan de moro koloku te wi e gi sani leki te wi e kisi sani? Iya. Prakseri fu Yehovah Gado. En na „a Sma fu pe a libi komopo” (Psalm 36:9). En e gi ala sani di wi abi fanowdu fu meki wi de koloku èn kisi bun bakapisi na ini a libi. Fu tru, en na a Sma di e gi „ibri bun presenti nanga ibri volmaakti kado” (Yakobus 1:17). Yehovah, „a koloku Gado”, e gi doronomo (1 Timoteus 1:11). A lobi den libisma di a meki èn di a e gi someni sani (Yohanes 3:16). Prakseri tu fu wan trutru osofamiri. Efu yu na wan papa noso mama, dan yu sabi omeni sani yu musu du èn gi fu kweki wan pikin. Èn furu yari langa, a pikin no sabi srefi sortu sani yu e du fu sorgu en. A e si ala den sani dati leki soso sani. Toku, yu de koloku te yu e si taki a e go bun nanga yu pikin fu di yu lobi fu gi en sani sondro fu prakseri yusrefi. Fu san ede? Fu di yu lobi en.
3. Fu san ede a de wan prisiri sani fu dini Yehovah èn den kompe-bribiman fu wi?
3 Na so a de tu nanga tru anbegi. Na ini a tru anbegi sma e gi sani fu di den lobi trawan. Fu di wi lobi Yehovah èn fu di den kompe-bribiman fu wi, meki a de wan prisiri sani fu dini den èn fu gi wisrefi na den (Mateus 22:37-39). Iniwan sma di e anbegi Gado fu di a e prakseri ensrefi nomo, no sa abi prisiri te fu kaba. Ma den wan di e dini Gado sondro fu prakseri densrefi nomo, den wan di e broko den ede moro furu nanga san den kan gi, na presi fu san den e howpu fu kisi, e feni koloku trutru. Wi kan kon sabi efu a de so, fu di wi e go luku fa wan tu wortu di abi fu du nanga wi anbegi, gebroiki na ini den Buku fu Bijbel. Wi sa taki fu dri fu den wortu disi na ini na artikel disi nanga a tra artikel.
Yesus En Publiki Diniwroko
4. San na a „publiki diniwroko” di den sma na ini Krestenhèit e du?
4 Na ini a fosi Grikitongo, wan prenspari wortu di abi fu du nanga anbegi na lei·tour·giʹa. Na ini a Nieuwe-Wereldvertaling a vertaal leki „publiki diniwroko”. Na ini Krestenhèit, a wortu lei·tour·giʹa meki wan nyun wortu kon, namku „liturgie” san wani taki kerki gwenti. * Ma den kerki gwenti di sma na ini Krestenhèit abi, no de wan publiki diniwroko di trutru e gi sma wini.
5, 6 (a) Sortu publiki diniwroko den ben du na ini Israèl, èn sortu bun ben kon fu dati? (b) Sortu moro bigi publiki diniwroko ben kon ini a presi fu a wan di den ben du na ini Israèl, èn fu san ede?
5 Na apostel Paulus ben sori go na den priester fu Israèl di a ben gebroiki wan Griki wortu di abi fu du nanga lei·tour·giʹa. A ben taki: „Ibri priester e teki en presi ala dei fu du publiki diniwroko [wan fasi fu lei·tour·giʹa] èn fu tyari den srefi srakti-ofrandi furutron” (Hebrewsma 10:11). Leifi priester ben du wan tumusi prenspari publiki diniwroko na ini Israèl. Den ben leri sma a Wet fu Gado èn den ben tyari srakti-ofrandi di ben tapu den sondu fu a pipel (2 Kroniki 15:3; Maleaki 2:7). Efu den priester nanga a pipel ben waka baka a Wet fu Yehovah, dan a nâsi ben sabi taki a ben man prisiri.—Deuteronomium 16:15.
6 A ben de wan trutru grani gi den priester fu Israèl fu du publiki diniwroko ondro a Wet. Ma a diniwroko fu den no ben warti moro, di Gado drai en baka gi Israèl fu di den no ben de getrow (Mateus 21:43). Yehovah ben seti wan moro bigi sani di ben pasa a diniwroko fu den srefisrefi — a publiki diniwroko di Yesus, a bigi Granpriester, ben du. Ini a tori fu en, wi e leisi: „En, fu di a e tan na libi fu têgo, abi en priesterwroko sondro sma di musu kon na en baka. Fu dati ede, a man frulusu so srefi, den wan di e go na Gado nanga yepi fu en, èn a man frulusu den dorodoro bika ala ten a de na libi fu opo taki gi den.”—Hebrewsma 7:24, 25.
7. Fu san ede a publiki diniwroko fu Yesus e tyari winimarki kon di no wan tra sma kan gi?
7 Yesus e tan wan priester fu têgo, sondro sma di musu kon na en baka. Fu dati ede, en wawan kan frulusu sma dorodoro. A e du publiki wroko di no wan tra sma abi a grani fu du en èn a no e du dati na ini wan tempel di sma meki. A e du a wroko na ini na agersi tempel, a gran seti fu anbegi di Yehovah poti èn di bigin na ini 29 G.T. Yesus e dini now na ini a Moro Santapresi fu a tempel, na ini hemel. En na „wan publiki futuboi [lei·tour·gosʹ] fu a santa presi èn fu a tru tenti, di Yehovah ben seti, èn no libisma” (Hebrewsma 8:2; 9:11, 12). Ala di Yesus abi so wan hei posisi, toku a de „wan publiki futuboi” ete. A e gebroiki a bigi makti fu en fu gi sani. A no e gebroiki en fu teki sani. Èn a gi di a e gi sani e prisiri en. A de wan pisi fu ’a prisiri di ben poti na en fesi’, èn dati ben tranga en fu horidoro na ini en libi na grontapu.—Hebrewsma 12:2.
8. Fa Yesus ben du wan publiki diniwroko fu meki wan tra sani kon ini a presi fu a Wetfrubontu?
8 Yesus ben du wan tra sani tu na ini en publiki diniwroko. Paulus ben skrifi: „Yesus kisi wan moro bun publiki diniwroko, so taki a de a mindriman tu fu wan srefi sortu moro bun frubontu, di abi wan fondamenti akruderi wet fu moro bun pramisi” (Hebrewsma 8:6). Moses ben de a mindriman fu a frubontu, di ben de a fondamenti fu a matifasi di Israèl ben abi nanga Yehovah (Exodus 19:4, 5). Yesus ben de a mindriman fu wan nyun frubontu. Nanga a nyun frubontu dati, wan nyun nâsi ben man gebore, „na Israèl fu Gado”, èn salfu Kresten di komopo na furu nâsi, na memre fu en (Galasiasma 6:16; Hebrewsma 8:8, 13; Openbaring 5:9, 10). Fu tru, a ben du wan tumusi bun publiki diniwroko! Fa wi breiti taki wi sabi Yesus, wan publiki futuboi di e yepi wi fu anbegi Yehovah na wan bun fasi!—Yohanes 14:6.
Kresten E Du Publiki Diniwroko Tu
9, 10. San na wan tu fasi fa Kresten e du publiki diniwroko?
9 No wan libisma e du so wan bigi publiki diniwroko leki di fu Yesus. Ma te salfu Kresten e kisi a paiman fu den na hemel, dan den e teki presi sei Yesus èn den e teki prati na a publiki diniwroko fu en leki kownu nanga priester (Openbaring 20:6; 22:1-5). Ma Kresten na grontapu e du publiki diniwroko ete, èn den e prisiri srefisrefi fu di den e du dati. Fu eksempre, di nyanyan ben mankeri na Palestina, dan na apostel Paulus ben tyari wan tu sani go di den brada na Europa ben gi, fu frulekti a nowtu fu den Dyu Kresten na Yudea. Dati ben de wan publiki diniwroko (Romesma 15:27; 2 Korentesma 9:12). Na ini a ten disi, Kresten e prisiri fu du wan srefi sortu diniwroko. Den e gi yepi wantewante te den brada fu den de na nowtu, te den abi fu du nanga naturu rampu noso tra takru sani.—Odo 14:21.
10 Paulus ben sori go na wan tra publiki diniwroko di a ben skrifi: „Srefi efu den e kanti mi trowe leki wan dringi-ofrandi na tapu a srakti-ofrandi èn na tapu a publiki diniwroko di unu e du fu di unu e bribi, toku mi breiti èn mi e prisiri nanga un alamala” (Filipisma 2:17). A tranga wroko di Paulus ben du fu a bun fu den Filipisma, ben de wan publiki diniwroko di a ben du nanga lobi èn nanga faya. Wan srefi sortu publiki diniwroko e du na ini a ten disi. Den salfu Kresten spesrutu, di e dini leki „a getrow èn koni srafu”, e du dati fu di den e gi nyanyan na yeye fasi na a yoisti ten (Mateus 24:45-47). Moro fara, leki wan grupu, den wan disi na „wan santa priesterwroko” di kisi a komando fu „tyari srakti-ofrandi na yeye fasi di Gado feni bun nanga yepi fu Yesus Krestes” èn fu ’meki den moi sani bekènti na ala sei fu a sma di ben kari den puru fu dungru kon na ini en tumusi moi leti’ (1 Petrus 2:5, 9). Neleki Paulus, „a getrow èn koni srafu” e prisiri nanga den sortu grani dati, srefi te den e ’kanti densrefi trowe’ fu du den frantwortu fu den. Èn den kompe fu den, den „tra skapu”, e wroko makandra nanga den èn e horibaka gi den na ini a wroko fu fruteri a libisma famiri fu Yehovah èn fu den prakseri fu en * (Yohanes 10:16; Mateus 24:14). Fu tru, dati na wan kefalek moi publiki diniwroko di e gi prisiri!—Psalm 107:21, 22.
Du Santa Diniwroko
11. Fa na umaprofeiti Ana ben de wan tumusi moi eksempre gi ala Kresten?
11 Wan tra Griki wortu di abi fu du nanga wi anbegi na la·treiʹa èn na ini a Nieuwe-Wereldvertaling a vertaal leki „santa diniwroko”. Santa diniwroko abi fu du nanga den wroko di wan sma e du na ini na anbegi fu en. Fu eksempre, Bijbel e taki fu Ana di ben de wan umaprofeiti èn wan weduwe di ben abi 84 yari, taki „den no ben misi en noiti na ini a tempel, ala di a ben e du santa diniwroko [wan Griki wortu di abi fu du nanga la·treiʹa] dei nanga neti, nanga faste èn nanga tranga begi” (Lukas 2:36, 37). Ana ben anbegi Yehovah ala ten. En na wan moi eksempre gi wi alamala — efu wi yongu noso owru, efu wi na man noso uma. Neleki fa Ana ben begi Yehovah na wan opregti fasi èn ben anbegi en na ini a tempel doronomo, na so a santa diniwroko fu wi wani taki dati wi musu begi èn musu go na konmakandra.—Romesma 12:12; Hebrewsma 10:24, 25.
12. San na wan trutru prenspari sani fu wi santa diniwroko, èn fa disi de wan publiki diniwroko so srefi?
12 Na apostel Paulus ben taki fu wan trutru prenspari sani fu wi santa diniwroko di a ben skrifi: „A santa diniwroko di mi e du gi Gado nanga mi yeye, abi fu du nanga a bun nyunsu fu en Manpikin, èn Gado na mi kotoigi taki mi e denki unu ala ten te mi e begi” (Romesma 1:9). Iya, a preiki fu a bun nyunsu a no soso wan publiki diniwroko di wi e du gi den sma di e arki en, ma so srefi a de wan fasi fu sori taki wi e anbegi Yehovah Gado. Awansi wi e feni wan sma di wani arki noso di no wani du dati, toku a preikiwroko na santa diniwroko di wi e du gi Yehovah. Wi lobi Tata na hemel abi tumusi moi eigifasi èn den prakseri fu en na fu a bun fu sma. A muiti di wi e meki fu fruteri tra sma fu den sani disi, trutru e gi wi prisiri.—Psalm 71:23.
Pe Wi E Du Santa Diniwroko?
13. Sortu howpu den wan abi di e du santa diniwroko na ini na inisei fesi dyari fu Yehovah en yeye tempel, èn suma e prisiri makandra nanga den?
13 Paulus ben skrifi den salfu Kresten, taki: „Fu di wi sa kisi wan kownukondre di no kan seki, meki wi tan abi no-frudini bun-ati, so taki wi kan du santa diniwroko gi Gado na wan fasi di a feni bun, nanga frede èn lespeki gi Gado” (Hebrewsma 12:28). Ala di salfuwan no e tweifri srefisrefi taki den o kisi a Kownukondre, den no e meki no wan sani pori den bribi te den e anbegi a Moro Heiwan. Den wawan kan du santa diniwroko gi en na ini a Santa presi èn na ini na inisei fesi dyari fu Yehovah en yeye tempel. Den e wakti fayafaya fu dini nanga Yesus na ini a Moro Santapresi, hemel srefi. Den kompe fu den di de a grupu fu den tra skapu, e prisiri makandra nanga den na ini a tumusi moi howpu fu den.—Hebrewsma 6:19, 20; 10:19-22.
14. Fa a bigi ipi e kisi wini fu Yesus en publiki diniwroko?
14 Ma pe den tra skapu e du santa diniwroko dan? Soleki fa na apostel Yohanes ben si na fesi, dan wan bigi ipi fu den de fu si na ini den lasti dei disi. Den „wasi den langa krosi fu den èn meki den kon weti na ini a brudu fu a Pikin Skapu” (Openbaring 7:14). Disi wani taki dati, neleki den salfu kompe-bribiman fu den, den e sori bribi na ini Yesus en publiki diniwroko, namku a gi di a ben gi en volmaakti libi fu a bun fu a libisma famiri. Den tra skapu e kisi wini tu fu Yesus en publiki diniwroko fu di den e „hori densrefi na [Yehovah en] frubontu” (Yesaya 56:6). Nôno, a no de so taki den de memre fu a nyun frubontu. Ma den e hori densrefi na a frubontu fu di den e gi yesi na den wet di abi fu du nanga dati, èn den e wroko makandra nanga den sani di seti nanga yepi fu a frubontu. Den abi demakandra nanga na Israèl fu Gado fu di den e nyan na a srefi tafra na yeye fasi. So srefi den e wroko makandra nanga den memre fu en fu di den e prèise Gado na publiki èn e tyari ofrandi na yeye fasi di e plisi en.—Hebrewsma 13:15.
15. Pe a bigi ipi e du santa diniwroko, èn fa a blesi disi abi krakti na den tapu?
15 So bun, a bigi ipi de fu si ala di den „e tanapu na fesi a kownusturu èn na fesi a Pikin Skapu, èn den ben weri langa weti krosi”. Moro fara, „den de na fesi a kownusturu fu Gado; èn den e du santa diniwroko gi en na ini a tempel fu en dei nanga neti; èn a Sma di sidon na tapu a kownusturu sa bradi en tenti na den tapu” (Openbaring 7:9, 15). Na ini Israèl, proselietsma ben anbegi na ini a dorosei fesi dyari fu a tempel fu Salomo. Na so a bigi ipi e anbegi Yehovah na ini a dorosei fesi dyari fu en yeye tempel. A dini di den e dini drape e gi den prisiri (Psalm 122:1). Srefi baka di a lastiwan fu den salfu kompe fu den e kisi en paiman na hemel, toku den sa go doro fu du santa diniwroko gi Yehovah leki en pipel.—Openbaring 21:3.
Santa Diniwroko Di No Bun
16. Sortu warskow wi e kisi efu wi e du santa diniwroko?
16 Na ini den dei fu Israèl fu owruten, den sma ben musu du santa diniwroko akruderi den wet fu Yehovah (Exodus 30:9; Lefitikus 10:1, 2). So srefi na ini a ten disi, wi musu hori wisrefi na den sani di Yehovah e aksi efu wi wani taki a feni wi santa diniwroko bun. Dati na fu san ede Paulus ben skrifi den Kolosesma: „Wi no ben tapu fu begi gi unu èn fu aksi taki unu sa kon furu nanga a soifri sabi fu a wani fu en ini ala koni nanga frustan fu sani na yeye fasi, so taki unu kan waka na wan fasi di warti gi Yehovah, fu plisi en dorodoro, ala di unu e tan tyari froktu ini ibri bun wroko èn e tan gro ini a soifri sabi fu Gado” (Kolosesma 1:9, 10). A no de na wi fu bosroiti san na a yoisti fasi fu anbegi Gado. Soifri sabi fu den Buku fu Bijbel, frustan fu sani na yeye fasi, nanga a koni fu Gado, na sani di de prenspari srefisrefi. Efu wi e du tra fasi, dan den bakapisi kan de takru.
17. (a) Fa den ben pori a santa diniwroko na ini a ten fu Moses? (b) Fa wi ben sa kan du santa diniwroko na wan fowtu fasi na ini a ten disi?
17 Memre den Israèlsma na a ten fu Moses. Wi e leisi: „Gado ben drai en baka gi den èn a ben meki den go du santa diniwroko gi a legre fu hemel” (Tori fu den Apostel 7:42). Den Israèlsma dati ben si den bigi wroko di Yehovah du fu a bun fu den. Toku den ben go dini tra gado te den ben prakseri taki den ben o kisi wini na den. Den no ben de loyaal, èn wi abi fu de loyaal efu wi wani taki Gado feni wi santa diniwroko bun (Psalm 18:25). A tru taki wan tu sma nomo ben sa drai den baka gi Yehovah fu anbegi stari noso pikin kaw fu gowtu, ma tra fasi fu afkodrei de tu. Yesus ben warskow fu no dini „Gudu”, èn Paulus ben kari bigi-ai wan fasi fu afkodrei (Mateus 6:24; Kolosesma 3:5). Satan e hei ensrefi leki wan gado (2 Korentesma 4:4). Den sortu fasi disi fu afkodrei de na ala sei èn den de wan trapu. Prakseri, fu eksempre, fu wan sma di e taki dati a e waka baka Yesus, ma en trutru marki na ini a libi na fu kon gudu. Noso a e frutrow soso tapu ensrefi èn tapu en eigi denki. Suma a e dini trutru? A sma disi no e difrenti kwetikweti fu den Dyu na ini a ten fu Yesaya. Den Dyu dati ben sweri na a nen fu Yehovah, ma den ben gi den doti kruktu gado a grani fu den kefalek moi wroko fu Yehovah.—Yesaya 48:1, 5.
18. Fa sma du santa diniwroko na wan fowtu fasi na ini a ten di pasa èn na ini a ten disi?
18 Yesus ben warskow tu: „A yuru e doro te ibri sma di e kiri unu sa denki taki a du wan santa diniwroko gi Gado” (Yohanes 16:2). Saulus di ben tron na apostel Paulus, sondro tweifri ben denki taki a ben du diniwroko gi Gado di a ’ben feni en bun taki den ben kiri Stefanus’ èn di a ’ben de wan kefar gi den disipel fu Masra’ (Tori fu den Apostel 8:1; 9:1). Na ini a ten disi, wan tu sma di e kiri trawan fu di den de fu wan tra ras noso di e kiri heri libimakandra, e taki tu dati den e anbegi Gado. Furu sma de di e taki dati den e anbegi Gado, ma te yu e luku en bun, dan den sani di den e anbegi na den eigi kondre, den eigi ras, gudu, densrefi, noso tra gado.
19. (a) Fa wi e si wi santa diniwroko? (b) Sortu santa diniwroko sa gi wi prisiri?
19 Yesus ben taki: „Na Yehovah, yu Gado, yu musu anbegi, èn gi en wawan yu musu du santa diniwroko” (Mateus 4:10). A ben taki nanga Satan, ma a prenspari srefisrefi taki ibriwan fu wi e gi yesi na den wortu fu en! A du di wi e du santa diniwroko gi a Soeverein Masra fu na universum, na wan kefalek bigi grani di e meki wi kisi frede gi Gado. Èn san wi kan taki fu a du di wi e du publiki diniwroko di abi fu du nanga wi anbegi? A du di wi e du disi fu a bun fu den na sma, na wan wroko di e gi prisiri èn a e meki wi koloku srefisrefi (Psalm 41:1, 2; 59:16). Toku, so wan diniwroko e meki wi koloku trutru, soso efu wi e du en nanga wi heri ati èn na a yoisti fasi. Suma trutru e anbegi Gado na a yoisti fasi? A santa diniwroko fu suma Yehovah e feni bun? Wi kan gi wan piki tapu den aksi disi efu wi e luku a di fu dri wortu fu Bijbel di abi fu du nanga wi anbegi. Wi sa du disi na ini na artikel di e kon.
[Futuwortu]
^ paragraaf 4 Moro furu, den kerki gwenti na ini Krestenhèit, na a fasi fa den e du sani na ini na anbegi fu den, noso spesrutu seremonia soleki a Komuni di den abi na ini a Lomsu Katolik Kerki.
^ paragraaf 10 Tori fu den Apostel 13:2 e fruteri taki profeiti nanga leriman na ini Antiokia ben ’e du diniwroko na publiki’ (disi vertaal fu a Griki wortu di abi fu du nanga lei·tour·giʹa) gi Yehovah. Kande a du di den ben du a diniwroko disi na publiki, wani taki so srefi dati den ben preiki gi a publiki.
San Yu Ben Sa Piki?
• Sortu kefalek moi publiki diniwroko Yesus ben du?
• Sortu publiki diniwroko Kresten e du?
• San na a santa diniwroko di Kresten e du, èn pe den e du dati?
• San wi musu kisi efu wi wani taki wi santa diniwroko musu plisi Gado?
[Aksi fu a tori disi]
[Prenki na tapu bladzijde 10]
Papa nanga mama e prisiri srefisrefi fu di den lobi fu gi sani
[Prenki na tapu bladzijde 12, 13]
Kresten e du publiki diniwroko te den e yepi tra sma èn te den e preiki a bun nyunsu
[Prenki na tapu bladzijde 14]
Wi abi soifri sabi nanga frustan fanowdu fu sabi seiker taki Gado e feni wi santa diniwroko bun