Suma Na Gado Dinari na ini a Ten Disi?

„Taki wi koni nofo, e kon fu Gado, di trutru meki wi de koni nofo fu de dinari fu wan nyun frubontu.”—2 KORENTESMA 3:5, 6.

1, 2. Sortu frantwortu ala fosi yarihondro Kresten ben abi, ma fa sani kenki?

NA INI a fosi yarihondro fu wi Gewoon Teri, ala Kresten ben abi wan prenspari frantwortu — a plekti fu preiki a bun nyunsu. Den alamala ben de salfu Kresten èn den ben de dinari fu a nyun frubontu. Son wan fu den ben abi tra frantwortu, soleki fu gi leri na ini a gemeente (1 Korentesma 12:27-29; Efeisesma 4:11). Papa nanga mama ben abi hebi frantwortu na ini na osofamiri (Kolosesma 3:18-21). Ma den alamala ben teki prati na a moro prenspari wroko, namku a preikiwroko. Ini a fosi Grikitongo fu den Kresten Buku fu Bijbel, a frantwortu disi ben de wan di·a·ko·niʹa — wan diniwroko.—Kolosesma 4:17.

² Ten pasa èn sani ben kenki. Wan grupu ben opo kon di sma sabi leki kerki tiriman èn den ben hori a grani fu preiki, gi densrefi (Tori fu den Apostel 20:30). Den kerki tiriman ben de wan pikin grupu na mindri den sma di ben kari densrefi Kresten. Moro furu fu den sma ben de gewoon kerkisma. Den kerkisma kisi leri taki den abi wan tu plekti. Wan fu den plekti disi na taki den musu gi bijdrage fu sorgu den kerki tiriman, ma moro furu fu den no e du noti na a preikiwroko.

3, 4. (a) Fa sma e tron dinari na ini Krestenhèit? (b) Suma na wan dinari na ini Krestenhèit, èn fu san ede sani de tra fasi na den Kotoigi fu Yehovah?

³ Den kerki tiriman e taki dati den na dinari (a wortu disi na wan vertaling fu a Latijn wortu di·aʹko·nos, di wani taki „futuboi”). * Fu kon tron  disi, den e go na hei skoro noso den e teki spesrutu leri èn baka dati den e poti leki dinari. The International Standard Bible Encyclopedia e taki: „’Leki fa a gwenti de, dan den wortu ’a poti di wan sma e poti leki dinari’, e sori go na wan spesrutu wroko di dinari noso priester e kisi akruderi spesrutu kerki gwenti. Den e poti prakseri moro furu na a wroko di den e kisi fu meki a Wortu bekènti noso fu teki fesi na seremonia, noso fu du ala tu.” Suma e gi den dinari a spesrutu wroko? The New Encyclopædia Britannica e taki: „Na den kerki pe den abi a spesrutu beskopuwroko ete, dan ala ten a sma di e poti trawan leki dinari, na wan beskopu. Na ini Presbyter kerki, dan a skin fu owruman fu den kerki dati e gi sma a wroko fu wan dinari.”

⁴ Dati meki taki na ini den kerki fu Krestenhèit, a no ala sma kan kisi a grani fu de wan dinari. Ma disi no de so na den Kotoigi fu Yehovah. Fu san ede? Fu di a no ben de so na ini a fosi yarihondro Kresten gemeente.

Suma Na Gado Dinari Trutru?

5. Soleki fa Bijbel e taki, dan suma na den sma di e dini leki dinari?

⁵ Soleki fa Bijbel e taki, dan ala anbegiman fu Yehovah na dinari, awinsi den de na hemel noso na grontapu. Engel ben dini Yesus (Mateus 4:11; 26:53; Lukas 22:43). So srefi engel e „dini fu a bun fu den sma di o kisi frulusu” (Hebrewsma 1:14; Mateus 18:10). Yesus ben de wan dinari. A ben taki: „A Manpikin fu libisma no ben kon fu sma dini en, ma fu dini sma” (Mateus 20:28; Romesma 15:8). Fu dati ede, fu di den bakaman fu Yesus ben musu „waka soifri na ini en futustap”, dati meki a no de fu fruwondru taki den musu de dinari tu.—1 Petrus 2:21.

6. Fa Yesus ben sori taki den disipel fu en musu de dinari?

⁶ Syatu bifo Yesus ben opo go na hemel, a ben taigi den disipel fu en: „Go . . . èn meki disipel fu sma fu ala nâsi, èn dopu den na ini a nen fu a Tata èn fu a Manpikin èn fu a santa yeye, èn leri den fu du ala den sani di mi komanderi unu” (Mateus 28:19, 20). Den disipel fu Yesus ben musu de sma di e meki disipel — dinari, so bun. Den nyun disipel di den ben meki, ben o leri fu du ala den sani di Yesus ben komanderi, so srefi a komando fu go èn meki disipel. Efu na wan man noso uma, bigisma noso pikin-nengre, wan tru disipel fu Yesus Krestes ben o de wan dinari.—Yoèl 2:28, 29.

7, 8. (a) Sortu bijbeltekst e sori taki ala tru Kresten na dinari? (b) Sortu aksi kon ini a tori fu a poti di wan sma poti leki dinari?

⁷ Akruderi disi, dan tapu a dei fu a Pinksterfesa na ini 33 G.T., ala den disipel fu Yesus di ben drape, man nanga uma, ben go fruteri tu fu „den bun bigi sani di Gado du” (Tori fu den Apostel 2:1-11). Moro fara, na apostel Paulus ben skrifi: „Nanga na ati wan sma e sori bribi fu regtfardikifasi, ma nanga a mofo wan sma e meki sani bekènti na publiki fu kan kisi frulusu” (Romesma 10:10). Paulus no ben skrifi den wortu disi gi wan grupu kerki tiriman, ma „gi ala den wan di [ben] de na Rome leki lobiwan fu Gado” (Romesma 1:1, 7). Na a srefi fasi, ala ’den santawan na Efeise nanga den wan di de getrow ini wánfasi nanga Krestes Yesus’ ben musu ’weri na den futu a wrokosani fu man tyari a bun nyunsu fu vrede’ (Efeisesma 1:1; 6:15). Èn ala den sma di ben yere a brifi gi den Hebrewsma, ben musu ’hori fasti na a meki di den ben musu meki a howpu fu den bekènti na publiki sondro fu degedege’.—Hebrewsma 10:23.

⁸ Ma o ten wan sma e tron wan dinari? Fu taki en tra fasi, o ten a poti leki dinari èn suma e gi en a grani dati?

 A Poti Di wan Sma Poti Leki Dinari—O Ten?

9. O ten Yesus ben poti leki dinari, èn suma ben gi en a grani dati?

⁹ Fu kon sabi o ten wan sma e poti leki dinari èn suma e du dati, dan luku na eksempre fu Yesus Krestes. A no ben abi no wan papira, noso a no kisi no wan nen fu wan spesrutu skoro di e sori taki a ben de wan dinari. Èn no wan libisma ben poti en leki dinari. Fu san ede dan, wi kan taki dati a ben de wan dinari? Fu di den wortu di Yesaya skrifi nanga yepi fu Gado en santa yeye, ben kon tru na ini en: „A yeye fu Yehovah de na tapu mi, bika a ben salfu mi fu meki bun nyunsu bekènti” (Lukas 4:17-19; Yesaya 61:1). Den wortu dati e sori krin taki Yesus ben kisi a komando fu go fruteri bun nyunsu. Suma ben gi en a komando? Fu di Yehovah en santa yeye ben salfu en gi a wroko, meki a de krin taki Yehovah Gado ben poti Yesus leki dinari. O ten disi ben pasa? Te yu e luku en bun, dan Yehovah en yeye ben kon na tapu Yesus di a dopu (Lukas 3:21, 22). So bun, a ben poti leki dinari na en dopu.

10. Suma e meki wan Kresten dinari kon „koni nofo”?

¹⁰ Fa a ben de nanga den fosi yarihondro bakaman fu Yesus? Den ben kisi den wroko leki dinari fu Yehovah tu. Paulus ben taki: „Taki wi koni nofo, e kon fu Gado, di trutru meki wi de koni nofo fu de dinari fu wan nyun frubontu” (2 Korentesma 3:5, 6). Fa Yehovah e meki den anbegiman fu en kon koni fu tron dinari? Luku na eksempre fu Timoteus, di Paulus ben kari „Gado en dinari na ini a bun nyunsu fu a Krestes”.—1 Tesalonikasma 3:2.

11, 12. Fa Timoteus ben go na fesi fu tron wan dinari?

¹¹ Den wortu di e kon now èn di ben de gi Timoteus, e yepi wi fu frustan fa a tron wan dinari: „Ma yu, tan na ini den sani di yu ben leri èn di den ben buweigi yu fu bribi, fu di yu sabi fu suma yu ben leri den èn taki fu sensi pikin-nengreten yu sabi den santa buku, di kan meki yu kon koni fu kisi frulusu nanga yepi fu a bribi di abi fu du nanga Krestes Yesus” (2 Timoteus 3:14, 15). A fondamenti fu a bribi fu Timoteus ben de sabi fu den Buku fu Bijbel. Disi ben o meki en taki na publiki. A leisi di a ben leisi Bijbel, ben o de nofo fu du disi? Nôno. Timoteus ben abi yepi fanowdu fu kisi soifri sabi fu san a ben leisi èn fu frustan san den sani dati wani taki na yeye fasi (Kolosesma 1:9). So bun, „den ben buweigi [Timoteus] fu bribi”. Fu di a ben sabi den Buku fu Bijbel „fu sensi pikin-nengreten”, meki den fosi sma di ben gi en leri ben  abi fu de en mama nanga en granmama fu di, soleki fa a sori, en papa no ben de na bribi.—2 Timoteus 1:5.

¹² Ma Timoteus ben musu du moro fu tron wan dinari. Wan fu den sani ben de, taki a bribi fu en ben kon tranga fu di a ben abi demakandra nanga Kresten fu gemeente di ben de krosibei. Fa wi sabi dati? Bika di Paulus ben miti Timoteus fositron, dan „den brada na Listra èn na Ikonium ben taki bun sani” fu Timoteus (Tori fu den Apostel 16:2). Boiti dati, na ini a ten dati son brada ben skrifi brifi go na den gemeente fu tranga den. Èn opziener ben go luku den fu bow den. Den sortu sani disi di den ben seti, ben yepi Kresten leki Timoteus fu go na fesi na yeye fasi.—Tori fu den Apostel 15:22-32; 1 Petrus 1:1.

13. O ten Timoteus ben poti leki dinari? Fu san ede yu ben sa taki dati a no ben tapu fu go na fesi na yeye fasi, di a tron wan dinari?

¹³ Te wi e prakseri a komando fu Yesus di skrifi na Mateus 28:19, 20, dan wi kan de seiker taki wan ten ben kon, di a bribi di Timoteus ben bribi meki taki a ben waka baka Yesus èn a ben dopu (Mateus 3:15-17; Hebrewsma 10:5-9). Disi ben sori taki a ben gi ensrefi nanga en heri ati fu dini Gado. Timoteus ben tron wan dinari di a dopu. Bigin fu a ten dati, dan en libi, en krakti, nanga ala sani di a ben abi ben de fu Gado. Disi ben de wan prenspari pisi fu en anbegi, „wan santa diniwroko”. Ma Timoteus no ben denki taki a ben bun kaba di a tron wan dinari. A ben go doro fu go na fesi na yeye fasi èn a tron wan lepi Kresten dinari. Disi ben pasa fu di Timoteus ben abi krosibei demakandra nanga lepi Kresten soleki Paulus èn so srefi fu di a ben studeri nanga ensrefi èn ben preiki fayafaya.—1 Timoteus 4:14; 2 Timoteus 2:2; Hebrewsma 6:1.

14. Fa wan sma di „abi a yoisti yeye gi a têgo libi” e go na fesi fu tron wan dinari na ini a ten disi?

¹⁴ Na so sani e waka tu na ini a ten disi te wan sma poti leki wan Kresten dinari. Wan sma di „abi a yoisti yeye gi a têgo libi” e kisi yepi fu leri sabi Gado èn den prakseri fu en, nanga yepi fu wan bijbelstudie (Tori fu den Apostel 13:48). A sma e leri fu gebroiki Bijbel gronprakseri na ini en libi èn a e leri fu begi Gado nanga wan marki di a wani doro na prakseri (Psalm 1:1-3; Odo 2:1-9; 1 Tesalonikasma 5:17, 18). A abi demakandra nanga tra bribiman èn a e meki bun gebroiki fu den sani di a „getrow èn koni srafu” gi èn den sani di a seti (Mateus 24:45-47; Odo 13:20; Hebrewsma 10:23-25). So bun, a e go na fesi fu di a e kisi leri nanga yepi fu wan bun leriprograma.

15. San e pasa te wan sma e teki dopu? (Luku a futuwortu so srefi.)

¹⁵ Te fu kaba, fu di a bijbelstudenti kisi lobi gi Yehovah Gado èn wan tranga bribi na ini a frulusu-ofrandi, meki a wani gi ensrefi abra krinkrin na en hemel Tata (Yohanes 14:1). A e gi ensrefi abra na ini begi, èn baka dati a e teki dopu fu sori na publiki taki a teki a bosroiti dati na ini en ati. A dopu fu en na a seremonia pe a poti leki dinari, bika dati na a ten te Gado e erken en leki wan futuboi, wan di·aʹko·nos, di gi ensrefi abra dorodoro na En. A musu tan aparti fu grontapu (Yohanes 17:16; Yakobus 4:4). A ben gi ensrefi krinkrin leki „wan srakti-ofrandi di de libilibi, di santa èn  di e fiti Gado ai” sondro fu hori wan sani na baka noso sondro fu aksi wan sani baka (Romesma 12:1). * En na Gado dinari, èn a e waka baka Krestes.

San a Kresten Diniwroko Wani Taki?

16. San ben de wan tu frantwortu di Timoteus ben abi leki wan dinari?

¹⁶ San Timoteus ben musu du na ini en diniwroko? A ben abi spesrutu plekti di a ben go na difrenti presi nanga Paulus. Èn di Timoteus ben tron wan owruman, dan a ben wroko tranga fu leri èn fu tranga kompekresten. Ma neleki fa a ben de nanga Yesus èn Paulus, dan a moro prenspari pisi fu en diniwroko ben de fu preiki a bun nyunsu èn fu meki disipel (Mateus 4:23; 1 Korentesma 3:5). Paulus ben taigi Timoteus: „Ma hori yu frustan na wán na ini ala sani, nyan pina, du a wroko fu wan evangelie preikiman, du yu diniwroko dorodoro.”—2 Timoteus 4:5.

17, 18. (a) Sortu diniwroko Kresten e du? (b) O prenspari a preikiwroko de gi wan Kresten dinari?

¹⁷ Na so a de tu nanga Kresten dinari na ini a ten disi. Den e du wan publiki diniwroko, wan evangeliewroko, pe den e sori tra sma fa den kan kisi frulusu fu di Yesus gi ensrefi leki ofrandi, èn den e leri den safri-atiwan fu kari a nen fu Yehovah (Tori fu den Apostel 2:21; 4:10-12; Romesma 10:13). Den e gebroiki Bijbel fu sori taki a Kownukondre na a wan-enkri howpu gi a libisma famiri di e pina. Den e sori tu taki now srefi sani e waka moro bun efu wi e libi akruderi den gronprakseri fu Gado (Psalm 15:1-5; Markus 13:10). Ma wan Kresten dinari no e preiki gi sma fu fruteri den taki den musu gebroiki Kresten gronprakseri te den abi problema nanga makandra. Na presi fu dati, a e leri taki ’a dini fu Gado abi wan pramisi gi a disiten libi èn a libi di musu kon ete’.—1 Timoteus 4:8.

¹⁸ A tru taki moro furu dinari abi tra fasi fa den e dini, èn a fasi fa a wan Kresten e dini, kan difrenti fu a fasi fa wan tra Kresten e du dati. Furu fu den abi plekti na ini na osofamiri fu den (Efeisesma 5:21–6:4). Owruman nanga dinari ini a diniwroko abi plekti na ini a gemeente (1 Timoteus 3:1, 12, 13; Titus 1:5; Hebrewsma 13:7). Furu Kresten e yepi fu bow Kownukondre zaal. Son wan fu den abi a tumusi moi grani fu wroko leki friwani-wrokoman na wan fu den Bethel-oso fu a Waktitoren Genootschap. Toku, ala Kresten dinari e teki prati na a preiki fu a bun nyunsu. A no de so taki son wan fu den no e preiki. A teki di wan sma e teki prati na a wroko disi e sori na publiki taki a de wan tru Kresten dinari.

A Fasi fa wan Kresten Dinari Musu Tyari Ensrefi

19, 20. Fa Kresten dinari musu tyari densrefi?

¹⁹ Moro furu fu den dinari fu Krestenhèit e fruwakti taki sma e sori den spesrutu lespeki. Den e teki nen soleki „lespekiwan” nanga „pater”. Ma wan Kresten dinari sabi taki Yehovah wawan e frudini fu kisi so wan lespeki (1 Timoteus 2:9, 10). No wan Kresten dinari e aksi fu sma fu den gi en a tumusi bigi grani dati èn a no e suku fu kisi spesrutu nen (Mateus 23:8-12). A sabi taki a wortu di·a·ko·niʹa trutru wani taki „diniwroko”. Son leisi, Bijbel e gebroiki a werkwortu di abi fu du nanga di·a·ko·niʹa te a e taki fu diniwroko di sma e du gi trawan, soleki a sma di e bedini tra sma na ini wan restaurant (Lukas 4:39; 17:8; Yohanes 2:5). Ala di den e gebroiki a wortu gi a Kresten diniwroko, di de wan moro prenspari wroko, toku wan di·aʹko·nos e tan wan futuboi.

²⁰ Fu dati ede, no wan Kresten dinari kan taki dati a prenspari moro leki wan tra sma. Trutru Kresten dinari — srefi den wan di abi spesrutu frantwortu na ini a gemeente — na srafu di abi sakafasi. Yesus ben taki: „A sma na un mindri di wani kon bigi, musu de un dinari, èn a sma na un mindri di wani de a fosiwan, musu de un srafu” (Mateus 20:26, 27). Di Yesus ben sori den disipel fu en a yoisti fasi fa den ben musu tyari densrefi, dan a ben wasi den futu fu den èn nanga dati a ben du a wroko fu a moro lagi srafu (Yohanes 13:1-15). Fu tru a ben dini den nanga sakafasi! Fu dati ede, Kresten dinari e dini Yehovah Gado èn Yesus Krestes nanga sakafasi (2 Korentesma 6:4; 11:23). Den e sori sakafasi te den e dini makandra. Èn te den e preiki a bun nyunsu, dan sondro  fu denki densrefi den e dini tra sma di no de na bribi.—Romesma 1:14, 15; Efeisesma 3:1-7.

Horidoro na ini a Diniwroko

21. Sortu grani Paulus ben kisi fu di a horidoro na ini a diniwroko?

²¹ Fu man de wan dinari, dan Paulus ben musu horidoro. A ben fruteri den Kolosesma taki a ben pina furu fu man preiki a bun nyunsu gi den (Kolosesma 1:24, 25). Ma fu di a horidoro, meki furu sma teki a bun nyunsu èn tron dinari. Den ben tron manpikin fu Gado èn brada fu Yesus Krestes, èn den abi a howpu fu tron yeye mekisani èn de makandra nanga en na ini hemel. Dati na trutru wan tumusi moi grani fu di den horidoro!

22, 23. (a) Fu san ede a de fanowdu taki Kresten dinari na ini a ten disi e horidoro? (b) Sortu kefalek moi froktu e kon te Kresten e horidoro?

²² Na ini a ten disi a de fanowdu taki den wan di trutru de Gado dinari, e horidoro. Furu fu den abi problema ala dei nanga siki èn nanga na owrudei. Papa nanga mama e wroko tranga fu kweki den pikin fu den, èn furu fu den e du dati sondro wan patna. Nanga deki-ati, pikin na skoro e kakafutu gi sani lontu den di kan hari den fu du fowtu sani. Furu Kresten abi fu du nanga seryusu problema na ekonomia sei. Èn furu e pina fu di sma e frufolgu den, noso den abi fu du nanga problema fu a ten disi di ’muilek’ èn ’di tranga fu pasa’! (2 Timoteus 3:1). Iya, den pikinmoro siksi milyun dinari fu Yehovah na ini a ten disi kan taki makandra nanga na apostel Paulus: „Na ala fasi wi e rikomanderi wisrefi na Gado leki dinari: fu di wi ben musu frudrage furu” (2 Korentesma 6:4). Kresten dinari no e tapu fu du diniwroko. Fu tru, den de fu prèise fu di den e horidoro.

²³ Boiti dati, neleki Paulus wi sa kisi kefalek moi winimarki efu wi e horidoro. Efu wi e horidoro, dan a matifasi di wi abi nanga Yehovah sa tan èn wi e meki en ati prisiri (Odo 27:11). Wi e tranga wi eigi bribi èn wi e meki disipel, èn na so fasi wi e tyari moro sma kon na ini a Kresten bradafasi (1 Timoteus 4:16). Yehovah kibri den dinari fu en èn a blesi a diniwroko fu den na ini den lasti dei disi. A bakapisi fu disi ben de taki a fikapisi fu den 144.000 tyari kon makandra, èn milyunmilyun tra sma abi a frutrow taki den sa man prisiri fu têgo libi na tapu wan paradijs grontapu (Lukas 23:43; Openbaring 14:1). Fu tru, a Kresten diniwroko na wan fasi fa Yehovah e sori sari-ati (2 Korentesma 4:1). Meki wi kibri en leki wan gudu èn meki wi de nanga tangi na ati taki den froktu di sa kon fu dati, sa tan fu têgo.—1 Yohanes 2:17.

[Futuwortu]

Yu Kan Tyari Disi Kon na Krin?

• Sortu frantwortu ala den fosi yarihondro Kresten ben abi?

• O ten wan sma poti leki wan Kresten dinari èn suma e gi en a grani dati?

• Fa Kresten dinari musu tyari densrefi?

• Fu san ede wan Kresten dinari musu horidoro ala di a abi fu du nanga problema?

[Aksi fu a tori disi]

[Prenki na tapu bladzijde 16, 17]

Timoteus ben kisi leri fu Gado Wortu fu sensi en pikin-nengreten. A ben poti leki dinari di a dopu

[Prenki na tapu bladzijde 18]

A dopu e sori taki wan sma gi ensrefi fu dini Gado èn a e sori taki a sma poti leki dinari

[Prenki na tapu bladzijde 20]

Kresten dinari de klariklari fu dini