Bijbel​—Wan Leribuku fu Libi

„A WORTU fu Gado de libilibi èn a abi krakti èn a srapu moro leki iniwan feti-owru . . . èn a man fu si krin san na ati e denki èn abi na prakseri” (Hebrewsma 4:12). A bijbeltekst disi di e sori san Gado Wortu kan du, seiker e meki Bijbel de moro leki soso wan bun buku nomo.

„A boskopu fu en de prenspari srefisrefi gi wi libi neleki a bro di wi musu bro fu tan na libi”, na so wan kerki skrifiman ben taki en soifri. Baka dati a ben taki moro fara: „Te yu e prakseri a wani di wi wani kon betre na ini a ten disi èn taki wi abi dati fanowdu tu, èn te wi e leisi Bijbel nanga dati na prakseri, dan den bakapisi di e kon fu dati bun kefalek.” Neleki wan lampu di e gi krin leti, na so Bijbel e trowe leti na tapu wan lo muilek tori nanga problema fu a disiten libi.—Psalm 119:105.

Fu tru, a koni di Bijbel e sori, abi a makti fu kenki wi denki, fu yepi wi lusu problema, fu meki wi libi kon moro bun, èn fu gi wi koni so taki wi sabi san fu du nanga den situwâsi ini a libi di wi no man kenki. Ma a moro prenspari sani na taki, Bijbel e yepi wi fu leri kon sabi Gado èn fu lobi en.

Wan Buku Di E Leri Sma San Den Kan Du

A Gran Skrifiman fu Bijbel, Yehovah Gado, ’sabi ala den fasi fu wi’. En na a Sma di sabi moro leki wi san wi abi fanowdu na skin sei, na a sei fu den firi fu wi, èn na yeye fasi (Psalm 139:1-3). Na wan switi fasi, a e sori libisma o fara den kan go na ini a fasi fa den musu tyari densrefi (Mika 6:8). A de wan bun sani fu suku fu frustan o fara libisma kan go èn fu frustan fa Gado e tiri wi, èn fu leri fu libi na a fasi disi. Koloku fu a sma di „en prisiri de na ini a wet fu Yehovah”, na so a psalm skrifiman e taki. „Ala san a e du sa waka bun” (Psalm 1:1-3). Efu na dati wi kan fruwakti, dan seiker a de warti fu wi ondrosuku a tori moro fara.

Ala ten Maurice, wan skoromeester di ben go nanga pensyun kaba, ben bribi taki Bijbel abi wan tu warti historia tori èn a de wan bun buku. Ma toku, a no ben bribi taki Bijbel komoto fu Gado. Baka di Maurice ben arki fu san ede Gado ben gi libisma en skrifi Wortu, dan a ben go ondrosuku difrenti Bijbel profeititori. Leki wan yonkuman, Maurice ben studeri fositen historia, buku tori, sabidensi, nanga aardrijkskunde. A e erken taki a ben denki taki a ben sabi ala sani kaba. Dati ben meki taki a no ben man si den furu eksempre na ini Bijbel di ben sori taki Bijbel musu kon fu Gado. „Mi ben de na ini a feti di sma e feti fu  abi wan bun libi, fu kon gudu, èn fu du den switi sani na ini a libi. A ben de wan sari, taki mi no ben sabi noti fu a moro bun buku di oiti ben skrifi èn di abi someni switi tori nanga waarheid.”

Now di Maurice pasa 70 yari, a e sori tapu a tori pe Yesus ben kon na fesi na apostel Tomas, èn Maurice de nanga tangi te a e taki: „Den tyari mi anu go na a ’soro di ben e brudu’, èn dati meki fu têgo mi abi na overtoigi taki Bijbel na a waarheid trutru” (Yohanes 20:24-29). Na apostel Paulus ben taki nanga leti di a ben taki dati Bijbel e tyari kon na krin san de na ini na ati, èn Bijbel e meki taki a libi warti furu. A de trutru wan leribuku fu libi.

A E Gi Sma Krakti fu Tanapu Kánkan na ini wan Libi Di Lai Nanga Problema

Bijbel e gi rai so srefi di e yepi sma fu fri densrefi fu takru gwenti. Daniel ben man puru a doti gwenti fu smoko, èn so srefi Daniel ben man tapu nanga wan libi fu bradyari fesa èn fu dringi tumusi furu sopi (Romesma 13:13; 2 Korentesma 7:1; Galasiasma 5:19-21). Fu taki a tori fa a de, dan te sma wani rutu den sortu gwenti disi puru èn te den wani weri „a nyun sma di den musu de”, dan den musu du bun furu muiti gi dati (Efeisesma 4:22-24). „Dati ben de wan tyalensi,” na so Daniel e taki, „fu di wi de so onvolmaakti.” Ma toku, a ben waka bun nanga en. Now Daniel e leisi Gado Wortu ibri dei, èn dati e yepi en fu tan wan mati fu Yehovah.

Di Daniel ben e gro kon bigi, dan ala ten a ben abi furu lespeki gi Bijbel — ala di noiti a ben leisi dati — èn a ben begi Gado ibri neti. Toku, wan sani ben e mankeri. A no ben de koloku. En libi bigin kenki di a ben si Gado en nen na ini Bijbel a fosi leisi (Exodus 6:3; Psalm 83:18). Baka dati a ben gebroiki a nen Yehovah na ini den begi fu en, èn den begi fu en ben tron wan sani pe a ben firi moro taki a ben taki trutru nanga Gado. „Yehovah ben tron a sma di ben de moro krosibei fu mi moro leki ibri tra sma, èn teleki now Yehovah na a moro krosibei mati fu mi.”

Bifo Daniel ben teki leri fu Bijbel, dan a fasi fa a ben e si a tamara no ben moi. „Yu no abi fu de wan sma di tya-ede, fu frustan san e pasa na grontapu”, na so a e taki. „Mi ben frede, èn mi ben pruberi fu abi furu sani fu du so taki mi no ben sa abi ten fu denki fu a tori dati.” Ne a ben leri taki Gado sa du reti gi ala sma tapu wan grontapu di kon krin, pe libisma di gi yesi na Gado sa man nyan bun fu vrede nanga koloku fu têgo. (Psalm 37:10, 11; Danièl 2:44; Openbaring 21:3, 4) Now Daniel abi wan trutru howpu. Bijbel yepi en fu tanapu kánkan, èn dati e yepi en now fu si a libi na wan bun fasi.

Yepi fu Wini Problema na a Sei fu den Firi fu Sma

George ben abi seibi yari di en mama dede. A ben frede fu go sribi te neti, fu di a no ben sabi efu a ben o wiki a tra dei. Ne a ben leisi san Yesus ben taki fu dede èn fu na opobaka: „A yuru e kon pe ala sma di de na ini den memre-grebi, sa yere [Yesus] en sten èn sa kon na doro.” Den tra wortu fu Yesus di ben naki na ati fu George tu, ben de: „Mi na a opobaka nanga a libi. A sma di e poti bribi na ini mi, sa kon na libi, awinsi a dede” (Yohanes 5:28, 29; 11:25). Den sortu prakseri disi George ben kan frustan, èn den ben trowstu en. „A waarheid disi,” na so George e taki, „no wawan de moi fu prakseri fu en, ma a e naki na ati so srefi.”

Daniel, di wi ben kari kaba, ben frede so srefi. En mama no ben man kweki en, dati meki a mama fu en ben seni en go na difrenti osofamiri di ben teki kwekipikin na den oso. Ala ten Daniel ben firi taki no wan sma no wani en, èn a ben wani fu abi a seikerfasi di sma e firi te den de wan memre fu wan lobi-ati osofamiri. Te fu kaba, a ben feni san a ben e suku nanga yepi fu a studeri di a ben studeri Bijbel. Daniel ben kon abi demakandra nanga a Kresten gemeente fu Yehovah Kotoigi èn a ben tron wan pisi fu wan osofamiri na yeye fasi. Drape a ben firi taki den teki en èn a  ben firi taki trawan ben lobi en. Fu tru, Bijbel e gi winimarki fu di wi kan gebroiki en na ini a libi èn a e yepi wi nanga a fasi fa wi e firi.

Wi no musu frigiti taki, Yehovah e si san de na ini wi ati èn a sabi san wi e suku. Gado „e ondrosuku den ati”, èn a e gi „ibriwan sma akruderi den pasi fu en”.—Odo 21:2; Yeremia 17:10.

Rai Di Sma Kan Gebroiki na ini na Osofamiri-Libi

Bijbel e gi rai di wi kan gebroiki ini a tori fu fa libisma musu libi nanga makandra. George e taki: „Den kesekese di sma abi nanga tra sma fu di den e difrenti fu makandra, noso fu di den no e frustan makandra, na den moro hati sani na ini a libi.” Fa George e du te a e miti nanga den sortu sani disi? „Efu mi denki taki wan sma abi wan sani teige mi, dan mi e gebroiki a rai fu Mateus 5:23, 24 di e taki langalanga: ’Suku vrede fosi nanga a brada fu yu.’ A taki di mi kan taki nanga a sma fu a sani di e trobi mi, dati nomo e meki sani e waka bun kaba. Mi kan firi a vrede fu Gado di Bijbel e kari. A e wroko. Èn a de wan sani di mi kan gebroiki na ini a libi trutru.”—Filipisma 4:6, 7.

Te masra nanga wefi no e agri nanga makandra, dan ala tu musu „de esi fu yere, no esi fu taki, no esi fu kisi atibron” (Yakobus 1:19). So wan rai e meki moro bun komunikâsi kon. George e taki moro fara: „Te mi e fiti a rai fu lobi makandra èn fu du gi mi wefi san mi ben o du gi misrefi, dan wantewante mi e si taki sani e bigin waka bun. Dan a de moro makriki gi mi wefi fu abi lespeki gi mi” (Efeisesma 5:28-33). Iya, Bijbel e leri wi fa wi kan erken wi eigi onvolmaaktifasi èn san wi kan du nanga dati. Iya, Bijbel e leri wi fa wi kan meki sani waka bun te wi e kisi fu du nanga onvolmaaktifasi fu tra sma.

Rai Di E Tan Ala Ten

Koni Kownu Salomo ben taki: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala yu pasi, èn ensrefi sa meki yu pasi kon reti” (Odo 3:5, 6). Den wortu disi no muilek fu frustan kwetikweti! Ma toku den wortu disi dipi srefisrefi!

Bijbel na wan krakti di e wroko bun srefisrefi. A e yepi sma di lobi Gado fu tyari a libi fu den na ini wánfasi nanga a wani fu en èn fu feni koloku fu „waka na ini a wet fu Yehovah” (Psalm 119:1). Awansi fa a situwâsi fu wi de, Bijbel abi tiri nanga rai di wi abi fanowdu (Yesaya 48:17, 18). Leisi en ala dei, prakseri dipi fu san yu e leisi, èn fiti en na ini yu libi. A sa hori yu frustan krin èn a sa meki taki yu sa man poti prakseri na den sani di de soifri èn di bun (Filipisma 4:8, 9). Yu no sa leri wawan fa fu libi èn fa fu nyan bun fu a libi, ma so srefi fa fu lobi a Mekiman fu libi.

Te yu e tyari yu libi na a fasi disi, dan Bijbel sa tron gi yu — neleki fa a tron gi milyunmilyun sma — moro leki wan bun buku nomo. Trutru yu sa si taki a de wan leribuku fu libi!

[Prenki na tapu bladzijde 6]

Bijbel kan tranga a bosroiti di yu teki fu puru takru gwenti

[Prenki na tapu bladzijde 7]

Bijbel e leri yu fa yu kan tron wan mati fu Gado