Yehovah E Gi a Pipel fu En wan Presi Pe Den Kan Kisi Kowru-ati
Kownukondre Preikiman E Fruteri
Yehovah E Gi a Pipel fu En wan Presi Pe Den Kan Kisi Kowru-ati
WAN sma di weri srefisrefi fu di a teki waka, e prisiri srefisrefi fu si wan kowrupresi na wan bergi pasi. Na ini a kondre Nepal den e kari den sortu kowrupresi disi, chautara. Wan trutru chautara ben sa kan de fu feni sei wan bigi bon di lai nanga furu wiwiri èn di sma e kari banyanbon, wan kowrupresi pe sma kan sidon fu teki bro. Te sma e meki wan chautara dan den e du dati fu di den abi bunfasi, èn a nen fu furu fu den sma di e yepi fu meki den chautara disi, no de bekènti.
Ondrofenitori fu Nepal e sori fa Yehovah Gado kon tron wan Sma di e gi prisiri èn di e gi krakti na yeye fasi. A du dati nanga furu sma na ini a seti fu sani disi di „teki waka” èn di weri.—Psalm 23:2.
• Lil Kumari e libi na ini a moi foto Pokhara fu pe a moi srefisrefi fu si den ede fu den Himalayabergi di tapu nanga snew. Ma fu di Lil Kumari ben broko en ede nanga moni tori fu a famiri, meki a ben denki taki furu howpu no ben de moro. Di wan Kotoigi fu Yehovah ben kon na en, dan a moi howpu fu Bijbel naki en ati èn wantewante a ben aksi wan oso-bijbelstudie.
Ala di Lil Kumari ben lobi a studie, toku a no ben de makriki fu go doro, bika famiriman ben gens en trutru. Ma a no ben tapu. A ben go na den konmakandra doronomo èn a ben du san a ben leri, spesrutu den sani di abi fu du nanga a sakafasi di wan wefi musu sori. Dati ben meki taki a masra nanga a mama fu Lil Kumari ben kon si taki a bijbelstudie fu en ben de wan bun sani gi a heri famiri.
Now en masra nanga wan tu famiriman e studeri Gado Wortu. Na wan konmakandra di ben hori no so langa pasa na ini Pokhara, Lil Kumari ben nyan bun fu a programa makandra nanga 15 famiriman fu en. A e taki: „Mi oso kon tron wan presi pe sma kan kisi kowru-ati, bika now wi famiri de na ini wánfasi na ini a tru anbegi èn mi kisi wan trutru korostu firi na ini mi ati.”
• Ala di a wet fu Nepal no e gi sma pasi fu desko den difrenti grupu fu a libimakandra, toku dati abi bigi krakti ete tapu a fasi fa sma e libi. Dati meki furu sma wani sabi san Bijbel e taki fu na abi di sma abi den srefi reti èn so srefi fu a teki di sma no musu teki partèi gi tra sma. Di Surya Maya nanga en famiri leri taki „Gado no e teki sma partèi”, dan dati ben meki den tyari furu kenki kon na ini den libi.—Tori fu den Apostel 10:34.
Surya Maya ben lasti-ati fu na onregtfardikifasi di kon fu di sma e desko difrenti grupu fu a libimakandra èn a ben lasi-ati tu fu di den gwenti di rutu dipi na ini sma, ben de leki wan hebi na en tapu. Furu yari langa na opregti uma disi di ben de wan fayafaya kerkisma, ben e aksi den kruktu gado fu en fu yepi en. Ma a no ben kisi piki tapu den begi fu en. Wan dei di a ben begi fu kisi yepi, en granpikin Babita di ben abi siksi yari ben kon na en èn aksi en: „Fu san ede yu e begi kruktu gado di no man du no wan enkri sani fu yepi yu?”
A ben kon na krin taki Babita en mama ben studeri Bijbel nanga wan fu den Kotoigi fu Yehovah. Nanga furu prisiri Babita ben gi en granmama wan kari fu kon na wan Kresten konmakandra. Di Surya Maya ben go na a konmakandra, dan a ben fruwondru fu si fa sma fu difrenti grupu fu a libimakandra e prisiri nanga makandra, sondro taki wan sma e desko wan trawan. Wantewante a ben aksi wan oso-bijbelstudie. Ala di disi ben meki taki den birtisma fu en no ben bumui moro nanga en, toku a no ben lasi-ati; so srefi a man di a no man leisi èn skrifi so bun, no ben tapu en fu go na fesi na yeye fasi.
Aiti yari pasa, èn siksi memre fu en famiri, so srefi en masra nanga dri pikin fu en, kon tron Kotoigi fu Yehovah. Now Surya Maya na wan furuten dinari, wan gewoon pionier di e prisiri fu yepi trawan fu puru den hebi fu den na a trutru presi pe sma e kisi kowru-ati, wan presi di Yehovah wawan kan gi.