Yu Lobi den Frumane fu Yehovah Pasa Marki?
Yu Lobi den Frumane fu Yehovah Pasa Marki?
„Mi sili hori ensrefi na den frumane fu yu, èn mi lobi den pasa marki.”—PSALM 119:167.
1. Sortu buku e taki fu den frumane fu Yehovah ibri leisi baka?
YEHOVAH wani taki en pipel musu de koloku. A no de fu taki dati efu wi wani de koloku trutru, dan wi musu waka na ini a wet fu Gado èn wi musu hori wisrefi na den komando fu en. Fu yepi wi du dati, Yehovah e gi wi frumane. Den Buku fu Bijbel e gi den frumane disi ibritron baka, spesrutu na ini Psalm 119, di kande Hiskia, a yongu Kownu manpikin fu Yuda skrifi. A moi singi disi e bigin nanga den wortu: „Koloku fu den sma di tan sondro fowtu na tapu a pasi fu den, den sma di e waka na ini a wet fu Yehovah. Koloku fu den sma di e hori densrefi na den frumane fu en; den e tan suku en nanga a heri ati.”—Psalm 119:1, 2.
2. San den frumane fu Gado abi fu du nanga koloku?
2 Wi „e waka na ini a wet fu Yehovah” te wi e teki soifri sabi fu en Wortu èn te wi e gebroiki a sabi dati na ini wi libi. Ma fu di wi no de volmaakti, meki wi abi frumane fanowdu. A Hebrew wortu di vertaal nanga „frumane” e sori taki Gado e meki wi memre en wet, den komando èn den tirilin fu en (Mateus 10:18-20). Wi sa tan koloku nomo efu wi e tan hori wisrefi na den frumane fu en, bika den e yepi wi fu wai pasi gi den trapu na yeye fasi di e tyari bigi problema nanga sari kon.
Hori Fasti na den Frumane fu Yehovah
3. Te wi poti prakseri na Psalm 119:60, 61, dan sortu frutrow wi abi?
3 A psalm skrifiman ben warderi den frumane fu Gado trutru èn fu dati ede a ben singi: „Mi hasti misrefi, èn mi no ben draidrai fu hori misrefi na den komando fu yu. Den titei fu den godelowsu sma ben lontu mi. Mi no ben frigiti a wet fu yu” (Psalm 119:60, 61). Den frumane fu Yehovah e yepi wi fu horidoro te wi e kisi frufolgu, fu di wi abi a frutrow taki wi hemel Tata kan koti den titei puru, nanga san feanti e tai wi fu gens wi. Te a de a reti ten, dan a e fri wi fu den problema disi, so taki wi kan du a Kownukondre preikiwroko.—Markus 13:10.
4. San wi musu du te wi e kisi frumane fu Gado?
4 Son leisi, wi e kisi piri-ai nanga yepi fu den frumane fu Yehovah. Meki wi warderi a piri-ai disi ala ten, neleki fa a psalm skrifiman ben warderi en. A ben taigi Gado na ini begi: „Den frumane fu yu na sani di mi lostu . . . Mi lobi den frumane fu yu” (Psalm 119:24, 119). Wi abi moro frumane fu Gado leki san a psalm skrifiman ben abi. Na ini den Griki Buku fu Bijbel wi e feni hondrohondro bijbeltekst di teki puru na den Hebrew Buku fu Bijbel. Den tekst disi no wawan e memre wi na den tirilin di Yehovah ben gi en pipel ondro a Wet, ma den e memre wi so srefi na den prakseri fu en nanga a Kresten gemeente. Te Gado e si taki a de fanowdu, dan a e memre wi na sani di abi fu du nanga den wet fu en, èn wi de nanga tangi na ati taki a e gi wi a tiri dati. Èn efu wi e „hori fasti na den frumane fu Yehovah”, dan wi e wai pasi gi sani di kan kori wi fu du sondu. Wi sa wai pasi gi sani di no e plisi wi Mekiman èn di e meki taki wi no de koloku moro.—Psalm 119:31.
5. Fa wi kan kon lobi den frumane fu Yehovah pasa marki?
5 O furu wi musu lobi den frumane fu Yehovah? „Mi sili hori ensrefi na den frumane fu yu, èn mi lobi den pasa marki”, na so a psalm skrifiman ben singi (Psalm 119:167). Wi sa kon lobi den frumane fu Yehovah pasa marki efu wi e si èn e teki den leki a frumane fu wan Tata di e broko en ede trutru nanga wi (1 Petrus 5:6, 7). Wi abi den frumane fu en fanowdu, èn wi sa kon lobi den moro nanga moro te wi e si fa wi e kisi wini fu den.
Fu San Ede Wi Abi den Frumane fu Gado Fanowdu
6. San na wán sani di e meki taki wi abi den frumane fu Yehovah fanowdu, èn san o yepi wi fu memre den?
6 Wan sani di e meki taki wi abi den frumane fu Yehovah fanowdu, na fu di wi e frigiti furutron. The World Book Encyclopedia e taki: „O moro ten e pasa, o moro sma e frigiti. . . . Kande a pasa nanga yu wan leisi taki yu ben sabi wan nen noso wan tra sani, ma wantronso yu no ben man memre moro san na a sani. . . . A sani disi, taki wantronso wi no man memre wan sani moro, e pasa furutron. Sma e taki fu disi te wan sma no man memre wan sani moro di a sabi kaba. Sabidensiman e taki dati a de neleki yu e pruberi fu feni wan sani di lasi na ini wan kamra pe ala sani bruya. . . . Wan bun fasi fu memre wan sani na fu prakseri dipi fu en, wan langa pisi ten baka di yu denki taki yu sabi en heri bun kaba.” Efu wi e studeri fayafaya èn e luku den sani di wi studeri furutron, dan dati sa yepi wi fu memre den frumane fu Gado èn fu hori wisrefi na den fu di den bun gi wi.
7. Fu san ede wi abi den frumane fu Gado fanowdu now moro leki iniwan tra ten?
7 Na ini a ten disi, wi abi den frumane fu Yehovah fanowdu moro leki iniwan tra ten, bika noiti bifo na ini libisma historia, ogridu ben de so furu leki now. Efu wi e poti prakseri na den frumane fu Gado, dan wi e kisi a koni fu man si sani krin. A koni disi sa yepi wi fu wai pasi gi den takru pasi fu grontapu, di kan kori wi. „Mi kisi moro koni fu man si sani krin, moro leki ala den leriman fu mi”, na so a psalm skrifiman ben taki, „bika mi e broko mi ede trutru nanga den frumane fu yu. Mi e tyari misrefi nanga moro frustan moro leki den owru man, bika mi hori misrefi na den komando fu yu. Mi ben hori mi futu fu no waka na tapu no wan enkri takru pasi, so taki mi kan hori misrefi na yu wortu” (Psalm 119:99-101). Efu wi e hori wisrefi na den frumane fu Gado, dan wi sa tan fara fu „ibri takru pasi” èn wi sa luku fu no tron leki den ipi-ipi sma di de ’na dungru na frustan sei èn di drifi komoto fu a libi di de fu Gado’.—Efeisesma 4:17-19.
8. Fa wi kan sreka wisrefi moro bun fu kakafutu na wan bun fasi gi tesi di wi e kisi fu wi bribi ede?
8 Den frumane fu Gado de fanowdu tu bika den e tranga wi fu horidoro ondro den furu tesi di wi e kisi na ini a ’ten disi fu a kaba’ (Danièl 12:4). Efu wi no ben o abi den frumane disi, dan wi ben o tron sma „di yere èn frigiti” (Yakobus 1:25). Ma efu wi e studeri den Buku fu Bijbel fayafaya nanga wisrefi èn nanga a gemeente, ala di wi e gebroiki den publikâsi fu „a getrow èn koni srafu”, dan dati sa yepi wi fu kakafutu bun gi tesi di wi e kisi fu wi bribi ede (Mateus 24:45-47). Den seti disi na yeye fasi e meki taki wi man si san wi musu du fu plisi Yehovah te wi de na ini muilek situwâsi.
Den Konmakandra fu Wi Prenspari Srefisrefi
9. Suma na den „presenti ini libisma”, èn fa den e yepi kompe-bribiman?
9 Wi abi den frumane fu Gado fanowdu èn wan fasi fa wi e kisi den, de na Kresten konmakandra pe brada poti na wroko fu gi tirilin. Na apostel Paulus ben skrifi taki di Yesus „ben opo go na loktu, dan a ben tyari strafuman gowe; a ben gi presenti ini libisma”. Paulus ben taki moro fara: „[Krestes] ben gi sonwan leki apostel, sonwan leki profeiti, sonwan leki evangelie preikiman, sonwan leki skapuman nanga leriman, nanga a prakseri fu meki den santawan kon bun baka gi a diniwroko, fu bow a skin fu a Krestes” (Efeisesma 4:8, 11, 12). Wi kan de nanga tangi na ati trutru taki den ’presenti disi ini libisma’ — den brada di poti leki owruman — e yepi wi fu poti prakseri na den frumane fu Yehovah te wi e kon makandra fu anbegi!
10. San na a moro prenspari penti na ini Hebrewsma 10:24, 25?
10 Efu wi de nanga tangi gi den sani di Gado seti, dan dati sa meki taki wi wani de na den feifi gemeente konmakandra fu wi di e hori ibri wiki. Paulus ben sori taki a de prenspari fu kon makandra doronomo. A ben skrifi: „Meki wi poti ai na makandra, so taki wi e tranga makandra fu sori lobi èn fu du bun wroko, fu no libi a kon di wi e kon makandra, soleki fa sonwan abi a gwenti fu du, ma fu gi makandra deki-ati, èn dati moro furu, fu di unu e si a dei e kon krosibei.”—Hebrewsma 10:24, 25.
11. Fa wi e kisi wini fu ibri konmakandra di wi abi na ini a wiki?
11 Yu e warderi san den konmakandra fu wi e du gi wi? A Waktitoren-studie di wi e hori ibri wiki e tranga wi bribi, a e yepi wi fu waka baka den frumane fu Yehovah, èn a e gi wi krakti fu kakafutu gi „a yeye fu grontapu” (1 Korentesma 2:12; Tori fu den Apostel 15:31). Na a Publiki Konmakandra, takiman e gi rai fu Gado Wortu, so srefi den e gi frumane fu Yehovah èn den e taki fu Yesus en kefalek moi „wortu fu têgo libi” (Yohanes 6:68; 7:46; Mateus 5:1–7:29). A Theokrasia Diniwroko-skoro e yepi wi fu gi sma leri moro bun. A Diniwroko Konmakandra prenspari srefisrefi fu di a e yepi wi fu pristeri a bun nyunsu na wan moro bun fasi te wi e go oso fu oso, te wi e tyari gobaka, te wi e hori oso-bijbelstudie, èn te wi e du tra fasi fu wi diniwroko. Fu di a grupu fu a Gemeente Bukustudie de pikin, meki wi abi moro okasi fu taki sani di furutron abi fu du nanga den frumane fu Gado.
12, 13. Fa Gado en pipel na wan kondre na ini Asia ben sori taki den e warderi Kresten konmakandra?
12 Te wi de na gemeente konmakandra doronomo, dan wi e kisi yepi fu memre den komando fu Gado. Konmakandra e yepi wi fu tan tranga na yeye fasi te orloku de, te wi e miti problema na ekonomia sei èn te wi e kisi tra tesi fu wi bribi ede. So wan 70 Kresten na ini wán kondre fu Asia ben si trutru o prenspari den konmakandra de. Den ben musu libi den oso na baka èn sma ben dwengi den fu go libi na busi. Fu di den ben abi a fasti bosroiti fu tan kon makandra doronomo, meki den ben drai go baka na a foto fu den di ben kon pori fu na orloku ede. Den ben teki den pisi di ben tan abra fu a Kownukondre zaal, èn den ben bow a zaal baka na ini a busi.
13 Ala di a pipel fu Yehovah na wan tra presi na ini a srefi kondre, ben abi fu du nanga orloku someni yari langa, toku den e go doro ete fu dini fayafaya. Den ben aksi wan fu den owruman na ini a kontren dati: „San yepi moro furu fu hori den brada makandra?” San a brada ben piki? „Wi no ben misi noiti fu hori wan konmakandra 19 yari langa. Son leisi, te den sma ben trowe bom noso te tra problema ben de, dan wan tu brada no ben man kon na a konmakandra presi, ma wi ben hori ala den konmakandra ala ten.” Den lobi brada nanga sisa disi trutru e frustan o prenspari a de fu ’no libi a kon di den e kon makandra’.
14. San wi kan leri fu a gwenti di na owrusma Ana ben abi?
14 ’Noiti sma no ben misi’ a weduwe Ana di ben abi 84 yari, ’na ini a tempel’. Fu di a ben du disi, meki a ben de drape tu di den ben tyari a beibi Yesus drape syatu baka di a gebore (Lukas 2:36-38). Yu abi a fasti bosroiti fu no misi konmakandra? Yu e du ala san yu man fu de na ala den kongres fu wi nanga ala den tra bigi konmakandra? Na den konmakandra disi wi e kisi leri di e gi wi winimarki na yeye fasi. A leri disi di wi e kisi e sori wi krin tu taki wi hemel Tata e sorgu gi en pipel (Yesaya 40:11). Den sortu okasi disi e meki wi prisiri tu, èn a de di wi de drape e sori taki wi e warderi den frumane fu Yehovah.—Nehemia 8:5-8, 12.
Den Frumane fu Yehovah E Poti Wi Aparti
15, 16. Fa a hori di wi e hori wisrefi na den frumane fu Yehovah abi krakti tapu a fasi fa wi e tyari wisrefi?
15 Efu wi e hori wisrefi na den frumane fu Gado, dan dati e yepi wi fu no de wan pisi fu a godelowsu grontapu disi. Fu eksempre, te wi e poti prakseri na den frumane fu Gado, dan dati e hori wi fu no du seks hurudu (Deuteronomium 5:18; Odo 6:29-35; Hebrewsma 13:4). Te wi e kisi tesi fu lei, fu bedrigi trawan noso fu fufuru, dan wi kan hori wisrefi fu no du den sani dati fu di wi e waka baka den frumane fu Gado (Exodus 20:15, 16; Lefitikus 19:11; Odo 30:7-9; Efeisesma 4:25, 28; Hebrewsma 13:18). Efu wi e hori wisrefi na den frumane fu Yehovah, dan dati e hori wi so srefi fu no teki refensi, fu no hori na ati na ogri di wan sma du nanga wi, noso fu no fruteri ogri-ati lei fu iniwan sma.—Lefitikus 19:16, 18; Psalm 15:1, 3.
16 Efu wi e poti prakseri na den frumane fu Gado, dan wi e tan santa, noso Gado poti wi aparti gi a diniwroko fu en. Èn a prenspari srefisrefi taki wi no de wan pisi fu a grontapu disi! Di Yesus ben begi Yehovah tapu a lasti neti fu en libi na grontapu, dan na wan seryusu fasi a ben aksi a sani disi gi den bakaman fu en: „Mi gi den a wortu fu yu, ma grontapu no ben wani si den na ai, bika den no de wan pisi fu grontapu, neleki fa mi no de wan pisi fu grontapu. Mi e begi yu, fu no teki den puru na grontapu, ma fu luku den fu a godelowsuwan ede. Den no de wan pisi fu grontapu, neleki fa mi no de wan pisi fu grontapu. Santa den nanga yepi fu waarheid; yu wortu na waarheid” (Yohanes 17:14-17). Meki wi tan warderi a Wortu fu Gado, fu di dati e poti wi aparti gi a diniwroko fu en.
17. San ben kan pasa efu wi ben o poti den frumane fu Gado na wan sei? So bun, san wi musu du?
17 Leki futuboi fu Yehovah, wi wani taki Gado e tan feni wi bun fu du en diniwroko. Ma efu wi ben o poti den frumane fu Gado na wan sei, dan wi ben kan kon kisi a denki fu a grontapu disi, di de fu si na ini a fasi fa sma e taki, den buku di den e leisi, a sortu prisiriten di den abi, èn a fasi fa den e tyari densrefi. Èn seiker wi no wani tron sma di lobi moni, di de asranti, di abi heimemre, di de sondro tangi, di no de loyaal, di abi wan krasi fasi fu du sani, di tranga-ede, di abi bigimemre, di lobi prisiri moro leki den lobi Gado. Dyaso wi kari soso wan tu fu den eigifasi di den sma e sori di drifi komoto fu Gado (2 Timoteus 3:1-5). Fu di wi e libi bun fara na ini den lasti dei fu a godelowsu seti fu sani disi, dan meki wi tan begi Yehovah fu yepi wi so taki wi kan go doro fu hori wisrefi na den frumane fu en èn na so fasi wi kan ’de na ai akruderi a wortu fu en’.—Psalm 119:9.
18. Sortu bun sani wi sa du te wi e hori wisrefi na den frumane fu Gado?
18 Den frumane fu Yehovah e du moro leki fu fruteri wi nomo san wi no musu du. Efu wi e hori wisrefi na den frumane fu en, dan dati sa meki wi go du bun sani, èn a sa meki taki wi e frutrow Yehovah sondro fu tweifri; wi sa lobi en nanga wi heri ati, nanga wi heri sili, nanga wi heri frustan èn nanga ala wi krakti (Deuteronomium 6:5; Psalm 4:5; Odo 3:5, 6; Mateus 22:37; Markus 12:30). Den frumane fu Gado e buweigi wi tu fu lobi tra sma (Lefitikus 19:18; Mateus 22:39). Wi e sori trutru taki wi lobi Gado èn tra sma, te wi e du a wani fu Gado èn e prati a „sabi fu Gado” di e gi libi, nanga tra sma.—Odo 2:1-5.
Wi Sa Kisi Libi Efu Wi E Hori Wisrefi na den Frumane fu Yehovah!
19. Fa wi kan sori tra sma taki a e yepi trutru èn a e gi winimarki te wi e poti prakseri na den frumane fu Yehovah?
19 Efu wi e hori wisrefi na den frumane fu Yehovah èn efu wi e yepi tra sma fu du a srefi sani, dan wi sa kibri wisrefi èn den wan di e arki wi (1 Timoteus 4:16). Fa wi kan sori tra sma taki a e yepi trutru èn a e gi winimarki te wi e poti prakseri na den frumane fu Yehovah? Wi kan sori dati fu di wi e gebroiki Bijbel gronprakseri na ini wi eigi libi. Na so fasi, den sma ’di abi a yoisti yeye gi a têgo libi’, sa abi buweisi taki a fasi fu libi di Gado Wortu e sori, trutru na a moro bun fasi fa den kan libi (Tori fu den Apostel 13:48). Den sa si tu taki ’Gado de trutru na wi mindri’ èn den sa wani anbegi a Soeverein Masra Yehovah makandra nanga wi.—1 Korentesma 14:24, 25.
20, 21. Den frumane fu Gado èn a yeye fu en sa meki taki wi sa man du san?
20 Efu wi e tan studeri den Buku fu Bijbel, e du san wi e leri, èn e gebroiki den sani na yeye fasi di Yehovah seti, dan wi sa kon lobi den frumane fu en pasa marki. Efu wi e poti prakseri na den, dan den frumane disi sa yepi wi fu weri „a nyun fasi fa wan sma musu de, di ben meki akruderi a wani fu Gado na ini trutru regtfardikifasi nanga loyaalfasi” (Efeisesma 4:20-24). Den frumane fu Yehovah èn a santa yeye fu en sa meki taki wi man sori lobi, prisiri, vrede, langa pasensi, switifasi, bun-ati, bribi, safri-atifasi, a dwengi di wan sma e dwengi ensrefi — eigifasi di de heri tra fasi leki den eigifasi fu a grontapu di de na ini a makti fu Satan! (Galasiasma 5:22, 23; 1 Yohanes 5:19). Fu dati ede, wi kan de nanga tangi na ati te Yehovah e memre wi na den sani di A e aksi fu wi, te wi e studeri Bijbel nanga wisrefi, te owruman e gi wi rai, èn na den gemeente konmakandra, na den kongres èn na den tra bigi konmakandra fu wi.
21 Fu di wi e hori wisrefi na den frumane fu Yehovah, meki wi man prisiri, srefi te wi musu pina fu regtfardikifasi ede (Lukas 6:22, 23). Wi e frutrow tapu Gado taki en sa frulusu wi fu den moro takru situwâsi. Dati de prenspari, spesrutu now di ala nâsi e tyari kon na wán „fu feti a feti fu a bigi dei fu Gado na Almaktiwan” na Har–Magedon.—Openbaring 16:14-16.
22. San musu de wi fasti bosroiti te wi e prakseri fu den frumane fu Yehovah?
22 Efu wi wani kisi a grani fu têgo libi, di wi no e frudini, dan wi musu lobi den frumane fu Yehovah pasa marki èn wi musu hori wisrefi na den nanga wi heri ati. Fu dati ede, meki wi abi a denki fu a psalm skrifiman di ben singi: „Den frumane fu yu de regtfardiki te ten di no skotu. Meki mi frustan den, so taki mi man tan na libi” (Psalm 119:144). Èn meki wi abi a fasti bosroiti soleki fa den wortu fu a psalm skrifiman e sori: „Mi kari yu [Yehovah]. O frulusu mi! Èn mi sa hori misrefi na den frumane fu yu” (Psalm 119:146). Iya, meki wi sori nanga den sani di wi e taki èn nanga den sani di wi e du, taki trutru wi lobi den frumane fu Yehovah pasa marki.
San Yu Ben Sa Piki?
• Fa a psalm skrifiman ben si den frumane fu Yehovah?
• Fu san ede wi abi den frumane fu Gado fanowdu?
• San den konmakandra fu wi abi fu du nanga frumane fu Gado?
• Fa den frumane fu Yehovah e poti wi aparti fu a grontapu disi?
[Aksi fu a tori disi]
[Prenki na tapu bladzijde 15]
A psalm skrifiman ben lobi den frumane fu Yehovah pasa marki
[Prenki na tapu bladzijde 16, 17]
Yu e waka baka na eksempre fu Ana fu di yu abi a fasti bosroiti fu no misi konmakandra?
[Prenki na tapu bladzijde 18]
Fu di wi e poti prakseri na den frumane fu Yehovah, meki a e poti wi aparti leki sma di krin èn di A feni bun fu du en diniwroko