Yu Musu Bribi Dati?

A STUDENTI di abi 12 yari, ben e meki muiti fu frustan den moro prenspari gronprakseri fu wiskunde. A skoromeester fu en gi a klas wan wiskunde som di no ben sori muilek.

„Meki x=y èn meki den ala tu abi a waarde fu 1”, a skoromeester ben bigin.

„Dati mi e frustan”, a studenti ben denki.

Baka di a skrifi fo lin fu meki a som na wan fasi di ben sori bun, dan den studenti fu en fruwondru fu si fa a skoromeester klari a som: „Fu dati ede, 2=1!”

„Sori taki dati no tru”, a tyalensi den studenti fu en di ben kon bruya.

Fu di a yongu studenti ben sabi pikinso nomo fu wiskunde, meki a no ben sabi fa a ben musu sori taki a sani no ben tru. Ala den sani di ben du fu meki a som ben sori bun dorodoro. A de so dan, taki a boi musu bribi a fasi fa a skoromeester klari a som, ala di a no e frustan fa dati kan? Fu taki leti, en skoromeester ben abi moro furu frustan fu wiskunde leki en. A no musu bribi a sani dati, kwetikweti! ’A no de fanowdu fu sori taki a sani disi no tru, a boi prakseri na ensrefi. ’Mi frustan srefi e taigi mi taki a sani disi no kan’ (Odo 14:15, 18). A boi ben sabi taki en skoromeester èn so srefi den tra pikin fu en klas no ben o gi wan sma tu golu fu kisi wán golu baka na presi fu dati!

Baka wan pisi ten a studenti di ben e kisi wiskunde les toku kon feni san no ben bun na a fasi fa skoromeester ben klari a som. Na srefi ten, na ondrofeni disi leri en wan bun les. Srefi te wan sma di sabi moro furu leki wi e taki wan sani di a seti bun na fesi èn di sori tru dorodoro, dan a no de fanowdu taki na arkiman e bribi a kaba fu a tori efu dati don, soso fu di a no man sori na a ten dati taki a sani no tru. Fu taki leti, a studenti ben e handri akruderi wan bun Bijbel gronprakseri di de fu feni na 1 Yohanes 4:1 — no de esi fu bribi ala sani di yu e yere, srefi te a sori taki a e komoto fu sma di sabi moro furu leki wi, noso di abi wan moro hei posisi leki wi.

Disi no wani taki dati yu musu weigri nomonomo fu kenki den denki fu yu di no de akruderi trutru buweisi. A no bun fu tapu yesi gi informâsi di kan yepi yu fu kisi a yoisti denki fu sani. Ma yu no musu „meki a prakseri fu [yu] bruya tumusi makriki” te wan sma di feni taki a sabi moro leki yu, noso taki a abi wan hei posisi, e kwinsi yu (2 Tesalonikasma 2:2). A tru taki a skoromeester ben wani kisi den studenti fu en pikinso. Ma son ten sani de moro seryusu. Libisma kan abi furu „triki fasi fu meki takru plan”.—Efeisesma 4:14; 2 Timoteus 2:14, 23, 24.

A Tru Taki Sabiman Ala Ten Abi Leti?

Awansi omeni koni sabiman abi kande, toku den e denki difrenti fu makandra èn furutron den e kenki a fasi fa den e denki fu sani. Fu gi wan eksempre, a prenspari tori di abi fu du nanga den sani di e meki taki sma e siki, e tan wan yu-o-hari-yu-o-trusu na mindri datra. Wan professor na ini datratori na a Harvard Universiteit e skrifi: „A fayafaya yu-o-hari-yu-o-trusu disi de, fu di son sabidensiman e denki taki a fasi fa sma tan e meki taki den e siki, èn tra sabidensiman e denki taki a fasi fa wi e libi na grontapu e du dati”. A grupu fu sabidensiman di e si a libi leki wan seti di sma no man kenki, abi a tranga bribi taki a siki di sma e kon siki, moro furu abi fu du nanga den gen fu wi. Ma trawan e bribi taki a situwâsi di sma e libi na ini, makandra nanga a fasi fa den e libi, na den moro prenspari sani di e meki taki sma e kon siki. Fu man horibaka gi den sani di den e bribi, dan ala tu partèi de gaw fu taki fu ondrosukuwroko di abi fu du nanga a tori disi, èn so srefi den e pruberi fu gi buweisi nanga yepi fu nomru. Toku, a yu-o-hari-yu-o-trusu e tan go doro.

Ibri leisi baka a kon na krin taki den leri fu den moro bigi barinen man di e sidon prakseri  nyun tori, no tru, ala di den leri disi ben sori tru na a bigin. A filosofiaman Bertrand Russell ben taki fu Aristoteles leki wan fu „den filosofiaman di abi moro bigi krakti na sma tapu”. Ma Russell ben sori tu taki den leri fu Aristoteles „no tru kwetikweti”. „Na ini a ten disi”, a skrifi, „den bakaman fu Aristoteles gens pikinmoro ibri fasi fa sma go na fesi na ini sabidensi, na ini a fasi fa sma e ridineri, noso na ini filosofia.”—History of Western Philosophy.

„Den Sani Di na wan Lei Fasi Den E Kari ’Sabi’”

A kan de so taki den fosi Kresten ben miti furu sma di ben de futuboi fu den barinen Griki filosofiaman soleki Sokrates, Plato, nanga Aristoteles. Sma fu a ten dati di ben kisi furu leri ben denki taki den ben betre moro leki furu fu den Kresten. Den no ben si furu fu den futuboi fu Yesus leki „koniman na skin fasi” (1 Korentesma 1:26). Fu taki leti, den sma di ben kisi leri fu den filosofia fu a ten dati, ben denki taki den sani di den Kresten ben bribi ben de „wan don sani” noso „wan soso sani” nomo.—1 Korentesma 1:23; Da Bijbel.

Efu yu ben de na mindri den fosi Kresten, yu ben o lobi a triki fasi fa den koni heiman fu a ten dati ben tyari buweisi kon na fesi fu overtoigi sma, noso yu ben o kisi furu lespeki gi den fu di den ben sori taki den ben koni? (Kolosesma 2:4) Yu no ben o abi reide fu du dati, soleki fa na apostel Paulus e taki. A ben memre ala den Kresten taki Yehovah ben si „a sabi foe dem sabiman”, èn a „koni foe dem koniman” fu a ten dati leki wan don sani (1 Korentesma 1:19) Da Bijbel. „San na den sani”, a ben aksi, „di a filosofiaman, a skrifiman èn so srefi a man di e krutu sani, fu a grontapu disi kan sori fu ala a koni di den abi?” (1 Korentesma 1:20, Phillips). Ala di den abi so furu koni, toku den filosofiaman, den skrifiman, èn so srefi den man di ben e krutu sani na ini a ten fu Paulus, no ben man sori krin fa fu lusu den problema fu a libisma famiri.

Dati meki taki Kresten leri fu tan farawe fu den sani di na apostel Paulus ben taki fu den leki „den sani di na wan lei fasi den e kari „sabi”, ma di no e kruderi nanga makandra” (1 Timoteus 6:20). A reide fu san ede Paulus ben kari a sabi disi ’falsi’ na fu di a ben mankeri wan tumusi spesrutu sani — a sabi disi no ben sori taki a ben komoto fu Gado so taki sma ben kan ondrosuku efu den leri fu den ben de akruderi den prakseri fu Gado (Yob 28:12; Odo 1:7). Fu di den no kan sori taki den leri fu den e komoto fu Gado èn so srefi fu di a moro bigi bedrigiman, Satan, breni den, dati meki noiti den sa man feni a waarheid.—1 Korentesma 2:6-8, 14; 3:18-20; 2 Korentesma 4:4; 11:14; Openbaring 12:9.

A Bijbel​—A Wortu fu Gado Di E Sori Wi a Pasi fu En

Den fosi Kresten noiti ben tweifri taki Gado ben tyari kon na krin en wani, en prakseri, èn so srefi den gronprakseri fu en na ini den Buku fu Bijbel (2 Timoteus 3:16, 17). Dati ben meki taki sma no ben man ’tyari den gowe leki wan sani di den kisi nanga yepi fu filosofia nanga bedrigifasi di de wan soso sani, akruderi den gwenti fu libisma’ (Kolosesma 2:8). A srefi sani e pasa na ini a ten disi. Kontrari fu den frekti èn bruya fasi fu denki fu sma, a Wortu fu Gado di sma skrifi ondro a krakti fu santa yeye e gi sma wan krakti fondamenti di e horibaka gi a bribi fu wi (Yohanes 17:17; 1 Tesalonikasma 2:13; 2 Petrus 1:21). Sondro a fondamenti dati, a bribi fu wi noiti sa kon tranga fu di wi sa musu poti bribi na ini den leri nanga den filosofia fu libisma di no abi fasti gron.—Mateus 7:24-27.

’Ma wakti’, wan sma kande kan taki. ’A no tru taki den tru tori fu sabidensi sori taki a Bijbel abi fowtu èn fu dati ede sma no kan frutrow na en tapu neleki fa den no kan frutrow tapu den filosofia fu libisma di e kenki doronomo? Bertrand Russell ben taki, fu gi wan eksempre, taki „Kopernikus, Kepler, nanga Galileo ben abi fu krutu Aristoteles èn so srefi Bijbel fu meki sma kon bribi taki grontapu a no a mindribere fu na universum”. (Na wi skrifi den wortu skoinsi.) A no tru so srefi taki na ini a ten disi, fu gi wan eksempre, sabiman di e bribi taki Gado meki ala sani, e hori nomo taki Bijbel e leri taki Gado meki grontapu na ini siksi dei nomo di ibri wan fu den abi 24 yuru? Den sabiman disi e bribi a sani dati, ala di ala sani e sori krin taki grontapu srefi de milyardmilyard yari kaba.

Fu taki leti, Bijbel no e taki dati grontapu na  a mindribere fu na universum. Dati ben de wan leri fu kerki fesiman di densrefi no ben bribi a Wortu fu Gado. A tori di skrifi na ini Genesis èn di e fruteri taki Gado meki ala sani, e sori taki grontapu de milyardmilyard yari kaba èn a no e taki dati grontapu ben meki na ini dei di ibriwan fu den abi 24 yuru (Genesis 1:1, 5, 8, 13, 19, 23, 31; 2:3, 4). Te wi e luku a Bijbel bun dan wi e si taki ala di a no de wan sabidensi leribuku, a no de „wan soso sani” tu, kwetikweti. Fu taki leti, a de dorodoro akruderi den buweisi di sabidensi tyari kon na fesi. *

A „Krakti fu Un Denki”

Ala di furu fu den disipel fu Yesus ben de man nanga uma di no ben gudu, di no ben kisi furu leri kande, toku den ben abi wan tra gudu di Gado ben gi den. Awansi sortu sma den ben de, toku den alamala ben kisi a krakti nanga a koni fu man denki. Na apostel Paulus ben gi den kompekresten fu en deki-ati fu gebroiki a „krakti fu denki” di den ben abi bun, so taki den ben kan „ondrosuku èn si gi [densrefi] san na a bun, switi èn volmaakti wani fu Gado”.—Romesma 12:1, 2.

Nanga a „krakti fu denki” di Gado ben gi den”, den fosi Kresten ben si krin taki iniwan filosofia noso leri di no ben de akruderi a Wortu fu Gado di ben tyari kon na krin, ben warti noti. Fu taki leti, sontron den koniman na ini a ten fu den fosi Kresten ben „gens a waarheid” èn den no ben wani si den buweisi di ben de fu si na den lontu taki wan Gado de. „Ala di den ben taki dati den ben koni, toku den tron don sma”, na apostel Paulus ben skrifi. Fu di den ben drai baka gi a waarheid di abi fu du nanga Gado èn den prakseri fu en, meki den tron „sma di ben taki sani sondro fu gebroiki den frustan, èn a don ati fu den ben kon dungru”.—Romesma 1:18-22; Yeremia 8:8, 9.

Den sma di e taki dati den koni, furutron e rideneri taki „wan Gado no de” noso „Wi no kan frutrow a Bijbel” noso „Den dei disi a no den lasti dei’”. Na Gado en ai den sortu denki disi don a srefi neleki te sma e taki dati „2=1” (1 Korentesma 3:19). Awansi sortu posisi noso koni sma e taki dati den abi, toku yu no abi fu bribi den sani di den e taki efu den sani dati de kontrari fa Gado e denki, noso efu den no tru. Te fu kaba, a moro koni sani fu du na fu ala ten „meki Gado de tru, awansi ibri libisma sori fu de wan leiman”.—Romesma 3:4.

[Futuwortu]

[Prenki na tapu bladzijde 31]

Tra fasi leki den denki fu libisma di e kenki doronomo, Bijbel e gi sma wan bun fondamenti so taki wi kan bribi en

[Sma di abi a reti fu a prenki]

Na a kruktu-anusei, Epikurus: Wi teki a fowtow disi nanga a primisi fu a British Museum; tapusei na mindri, Plato; National Archeological Museum, Ateine, Grikikondre; na a leti-anusei, Sokrates: Rome, Musei Capitolini