Aksi fu Leisiman

O fara wan getrow Kresten wefi kan go fu sori taki a no wani broko a trow, te en masra wani broko a trow nomonomo?

Di libisma trowlibi ben bigin, Gado ben taki dati wan masra nanga wefi musu „tai hori” na makandra (Genesis 2:18-24). Libisma ben tron onvolmaakti, èn dati ben meki taki problema ben opo kon na ini furu trowlibi. Ma toku Gado wani ete taki trowpatna musu tai hori na makandra. Na apostel Paulus ben skrifi: „Na den trowsma mi e gi leri, toku a no mi, ma Masra, taki wan wefi no musu prati nanga en masra; ma efu toku a wefi ben o gowe, dan a musu tan sondro fu trow noso a musu meki en bun baka nanga en masra; èn wan masra no musu gowe libi en wefi.”—1 Korentesma 7:10, 11.

Den wortu disi e meki wi kon si taki na mindri onvolmaakti libisma a kan pasa taki wan trowpatna e teki a bosroiti fu gowe libi a trawan. Fu eksempre, Paulus ben taki dati efu wan fu den trowpatna ben gowe, dan ala tu patna musu „tan sondro fu trow”. Fu san ede? We, wan fu den ben gowe libi a trawan, ma na ini na ai fu Gado den tu trowpatna tai ete na makandra. Paulus ben kan taki disi, fu di Yesus ben poti den markitiki gi a Kresten trowlibi: „Suma di e prati nanga en wefi, boiti tapu a gron fu hurudu [Grikitongo: por·neiʹa], èn e trow wan trawan, e du sutadu” (Mateus 19:9). Iya, a wan-enkri gron fu brokotrow soleki fa den Buku fu Bijbel e sori, na „hurudu”, dati na, seks hurudu. Na ini a kefal di Paulus ben taki fu en, dan buweisi ben de taki no wan fu den tu trowpatna ben go huru, èn fu dati ede te a masra noso a wefi gowe libi a trawan, dan a trow no broko na ini Gado en ai.

Ne Paulus e taki now fu a situwâsi pe wan tru Kresten abi wan trowpatna di no de na bribi. Poti prakseri na san musu pasa soleki fa Paulus e sori: „Efu a wan di no de na bribi e gowe, dan meki a gowe; wan brada noso wan sisa no abi fruplekti na ini den situwâsi dati, ma Gado kari unu fu abi vrede” (1 Korentesma 7:12-16). San wan getrow wefi kan du efu en masra di no de na bribi, gowe libi en, èn e suku srefi fu broko a trow na lanti?

A kan, taki a wefi wani taki a masra musu tan nanga en. A kan, taki a lobi en masra ete, èn taki a sabi taki den ala tu abi a lobi fu makandra fanowdu èn taki den ala tu abi seks demakandra fanowdu, èn so srefi taki a abi en masra fanowdu fu sorgu gi en nanga den pikin kande di no bigi ete. A ben kan de tu taki a e howpu taki baka ten, en masra sa tron wan bribiman èn sa kisi frulusu. Ma efu a masra e seti en tori fu broko a trow (fu sani ede di Bijbel no e gi primisi fu brokotrow), dan a wefi ben kan „meki a [masra] gowe”, soleki fa Paulus ben skrifi. A srefi sani wi kan taki tu te wan masra di de na bribi, èn di no e lespeki a fasi fa Gado e si a trowlibi, wani gowe libi en wefi nomonomo.

Ma na ini so wan situwâsi, a wefi kan si taki a musu kibri ensrefi nanga den pikin fu en. Fa so? A ben sa kan, taki a wani kisi a reti na lanti fu sorgu den pikin fu en di a lobi, so taki a kan tan sori mama lobi gi den pikin, èn kan tan gi den leri ini a tori fu bun gwenti nanga gronprakseri, èn taki a kan tan leri den pikin den bun sani fu Bijbel so taki den pikin kan kisi bribi (2 Timoteus 3:15). A broko di a masra wani broko a trow, kan meki taki a wefi lasi den reti fu en di a abi na lanti. Fu dati ede, a wefi kan sorgu taki den lanti basi kon sabi bunbun fa a tori de, so taki a kan kibri den reti di a abi fu de nanga den pikin fu en, èn so srefi fu sorgu taki a masra fu en de fruplekti fu sorgu na osofamiri di a e gowe libi. Na wan tu presi, te wan uma e krutu a brokotrow, dan a kan poti en na ondro papira pe skrifi taki en abi a reti fu lanti fu sorgu den pikin, èn taki a sa kisi yepi na moni sei, sondro taki na uma e agri nanga a broko di en masra wani broko a trow. Na tra presi baka, a fasi fa den wortu skrifi na tapu papira, e sori taki na uma e agri fu broko a trow; so bun, efu en masra ben de a sma di du sutadu, dan te a wefi e poti en nen na ondro den papira, dan dati e sori taki a no wani en masra moro.

A kan taki furu sma na ini a libimakandra èn na ini a gemeente no sabi a fini fu a tori; den no sabi efu a trow ben broko akruderi san den Buku fu Bijbel e taki fu a tori. So bun, bifo dati kon sa fara, a ben sa bun efu a wefi taigi a fesiman opziener nanga wan tra owruman na ini a gemeente fa a tori de trutru (a ben o moro bun efu a sisa skrifi dati na tapu papira). Dati ben sa meki taki trawan ben kan kon sabi fa a tori de trutru, efu a de fanowdu fu den kon sabi dati — na a ten di a sani pasa, noso baka ten.

Meki wi luku baka san Yesus ben wani taki di a ben taki: „Suma di e prati nanga en wefi, boiti tapu a gron fu hurudu, èn e trow wan trawan, e du sutadu.” Efu wan masra go huru trutru, ma a ben wani libi go doro nanga en wefi na ini a trowlibi, dan a wefi (a sma di no abi a fowtu, na ini na eksempre fu Yesus) ben kan luku efu a sa gi en masra pardon èn tan abi a srefi trowbedi  leki en, noso taki a wefi ben kan teki a bosroiti taki a no wani libi nanga a masra moro. Efu a wefi wani gi a masra pardon èn a wani go doro nanga a masra di a trow nanga en, dan a wefi no fowtu efu a e du dati.—Hosea 1:1-3; 3:1-3.

Efu a masra di ben huru e suku fu broko a trow, dan kande toku ete a wefi wani gi en pardon, fu di a e howpu taki en masra o kon baka na en. Na a wefi na a sma di e teki a bosroiti efu a sa krutu a broko di en masra wani broko a trow; èn disi a wefi sa du akruderi en konsensi èn akruderi a situwâsi fu en. Na ini wan tu kondre, wan uma di e krutu a brokotrow, ben kan poti en nen na ondro papira. Den papira dati e sori taki a e kisi a reti fu lanti fu sorgu den pikin fu en èn a e kisi yepi na moni sei fu en masra, sondro taki a e sori nanga dati taki a e agri fu broko a trow. Efu a wefi e poti en nen na ondro den papira disi, dan dati no e sori taki a no ben wani en masra moro. Ma na ini tra presi, den ben kan aksi a wefi di e krutu a broko trow, fu a poti en nen na ondro wan tu papira di e sori taki a e agri fu broko a trow. Efu a wefi poti en nen na ondro den papira dati, dan a e sori krinkrin taki a no wani en masra moro.

Na ini a kefal disi, fu no meki taki a wefi nanga den owruman na ini a gemeente no e frustan makandra bun baka ten, dan a ben sa bun efu a wefi ben sa gi den wan brifi pe skrifi san a e du ini a tori disi èn fu san ede a e du den sani dati. A ben sa kan skrifi taki a ben taigi en masra taki a ben wani gi en pardon èn taki a ben sa wani de en wefi. Dati ben sa wani taki dati a masra e broko a trow sondro taki a wefi wani broko a trow; na presi fu sori taki a no wani en masra moro, dan a ben de klariklari fu gi en pardon. So bun, a wefi sori krin taki a ben de klariklari fu gi pardon èn taki a wani tan libi nanga a masra na ini a trowlibi. Now te a e poti en nen na ondro papira di e sori nomo fa sani sa seti na moni sei èn na a sei fu suma o sorgu den pikin, dan dati no ben o sori taki a no wani en masra moro. *

Efu a sisa sori krinkrin taki a de klariklari fu gi pardon srefi baka te a trow broko, dan dati wani taki dati en nanga en masra no de fri fu trow nanga wan tra sma. A wefi, di no fowtu, ben wani gi pardon, ma a masra no ben wani. Efu disi e pasa, èn baka ten a wefi e teki a bosroiti taki a no wani en masra moro fu a huru di a ben huru, dan ala tu sma de fri fu trow baka. Yesus ben sori taki a sma di no fowtu, abi a reti fu teki so wan bosroiti.—Mateus 5:32; 19:9; Lukas 16:18.

[Futuwortu]