Kisi Deki-ati fu Du Diniwroko

SAN ben sa buweigi 24 trowpaar na ini a moro bun ten fu den libi, fu gowe libi den famiri, den mati, nanga den tanpresi fu den, nomo fu go du zendeling wroko na ini wan tra kondre? Fu san ede den ben sa breiti fu go na den presi soleki Papuwa Nyun Ginea nanga Taiwan noso den kondre fu Afrika nanga Latijns-Amerika? A kan de a lobi di den lobi fu go na tra presi fu miti span sani drape? Nôno. Na presi fu dati, na opregti lobi gi Gado nanga tra sma, e buweigi den fu du dati.—Mateus 22:37-39.

Suma na den sma disi? Den na den sma di klari a di fu 109 klas fu a Waktitoren Bijbelskoro Gilead nanga bun bakapisi. Tapu satra 9 september 2000, 5198 sma ben kon makandra na a Waktitoren Skoro Centrum — di de na Patterson, New York — èn na tra presi, fu arki lobi-ati rai di ben kan yepi den sma di klari a skoro, so taki sani kan waka bun nanga den leki zendeling.

A fesiman fu a programa ben de Stephen Lett, wan memre fu a Leri Komte fu a Tiri Skin fu Yehovah Kotoigi. A ben bigin a programa nanga den wortu di komoto fu Mateus 5:13: „Unu na a sowtu fu grontapu.” Brada Lett ben tyari kon na krin taki trutru den wortu fu Yesus e fiti den studenti di klari a skoro. Fu eksempre, sowtu kan meki wan sani tesi moro switi. Na a srefi fasi, den zendeling de leki sowtu na wan agersi fasi te den e du a preikiwroko fu den bun.

Kisi Wan Tu Lasti Deki-ati Bifo den Gowe

Baka dati, Brada Lett ben kari wan tu diniman fu Yehovah di ben dini en langa ten kaba. Den wan disi ben gi lezing komoto fu den Buku fu Bijbel. Den lezing disi ben syatu ma den ben krakti. A fosiwan di a ben kari kon, ben de John Wischuk, di e dini na a Skrifiman Afdeling. A thema fu en ben de „A Moro Syatu Psalm E Gi Sma Tranga fu Dini Leki Zendeling,” èn a ben teki puru fu Psalm 117. Noyaso, na heri grontapu a de tranga fanowdu fu gi wan kotoigi na den „nâsi” nanga „pipel” ini a tori fu Yehovah nanga en Kownukondre. Den studenti ben kisi a deki-ati fu meki Psalm 117 kon tru fu di den e gi trawan tranga fu „Prèise Yah”.

Baka dati a fesiman ben kari Brada Guy Pierce fu a Tiri Skin kon. A brada disi ben taki fu a tori „Yu Musu Man De Klariklari fu Fiti Yusrefi na Sani, ma Toku Yu Musu Tanapu Kánkan.” A Wortu fu Gado de steifi. Na Deuteronomium 32:4 Moses e kari Yehovah Gado a Klepston, toku en Wortu e gi pasi meki wi fiti wisrefi na difrenti sani; dati de so fu di a Wortu ben skrifi gi ala tongo nanga kulturu — iya, gi a heri libisma famiri. Den studenti ben kisi a frumane fu preiki Gado Wortu, fu meki a boskopu fu en naki na ati fu sma èn fu meki a wroko tapu a konsensi fu sma (2 Korentesma 4:2). „Tanapu kánkan gi yoisti gronprakseri, ma de klariklari fu fiti yusrefi na sani tu. Yu no musu si den sma di yu sa miti na ini yu diniwroko, leki moro lagi sma fu di den abi wan tra kulturu”, na so Brada Pierce ben frumane.

Karl Adams, wan fu den leriman fu Gilead, di e dini na a  edekantoro so wan 53 yari kaba, ben taki fu wan thema di e hari a prakseri fu sma, namku „Pe Yu Sa Go te Yu Komoto fu Dya?” A tru taki den 24 trowpaar kisi a wroko fu dini leki zendeling na ini 20 difrenti kondre na heri grontapu, ma na aksi ben poti: Te yu doro drape, te yu si a kondre, dan san yu sa du? Wi e libi na ini wan grontapu pe sma wani wan tra sani ala ten. Libisma wani go na nyun presi èn den wani du nyun sani fu plisi densrefi nomo. Na a tra sei, Yehovah gi den studenti wan wroko fu go na a presi pe A wani den fu go so taki den kan sorgu den „skapu” fu en, na wan lobi-ati fasi. Den no ben musu de leki den Israèlsma fu fositen di ben denki densrefi nomo, èn fu dati ede den ben lasi na okasi fu Yehovah gebroiki den fu blesi a heri libisma famiri. Na presi fu dati, den musu de leki Yesus Krestes, di ala ten ben du a wani fu en Tata sondro fu denki ensrefi wawan, èn di ben gi yesi na en Tata awansi san ben miti en tu.—Yohanes 8:29; 10:16.

„Warderi den Dipi Sani fu Gado” ben de a thema fu Wallace Liverance, di e du na administratiewroko fu a Gileadskoro. Ibritron baka, den Buku fu Bijbel e taki fu a Wortu fu Gado leki gudu, leki warti diriston, leki gowtu nanga solfru, èn leki sani di diri èn di sma e suku. Odo 2:1-5 e sori taki efu wi wani feni „a sabi fu Gado srefi”, dan wi musu suku en leki fa wi ben o suku „gudu di kibri”.  A takiman ben gi den studenti deki-ati fu tan diki na ini den dipi sani fu Gado te den e dini na ini a nyun diniwroko fu den. Brada Liverance ben rideneri: „Disi na wan sani di yu kan gebroiki, fu di a e meki yu bribi nanga overtoigi na ini Yehovah kon moro tranga, èn fu di a sa tranga yu fasti bosroiti fu tan du a diniwroko di yu kisi fu du. A sa yepi yu fu taki nanga overtoigi èn fu de wan moro bun leriman te yu e fruteri trawan san Gado abi na prakseri.”

Wan tra leriman fu a Gileadskoro ben du neleki den studenti ben e sidon na ini wan klas, èn dan a ben sori fa Yehovah blesi a preikiwroko di den studenti ben du na ini den feifi mun di pasa. Lawrence Bowen ben sori tapu den wortu fu na apostel Paulus na Tori fu den Apostel 20:20 pe Paulus ben taki fu en publiki diniwroko na Efeise. Brada Bowen ben poti krakti tapu a teki di Paulus ben teki ibri okasi fu gi kotoigi. Den ondrofenitori fu den studenti ben sori taki, neleki na apostel Paulus, den wan di e meki lobi gi Gado nanga a lobi gi tra sma, pusu den na ini a ten disi, noiti e hori densrefi fu no taki waarheid èn fu no meki a krakti fu Gado Wortu wroko tapu trawan. Disi e meki taki Yehovah e blesi den furufuru.

Den Sma Di Abi Ondrofeni E Taki

Na ini a pisi ten fu a Gileadskoro disi, dan a skoro gi memre fu den Bijkantoro Komte ben hori tu na a Patterson Skoro Centrum. Den studenti fu a Gileadskoro disi ben feni winimarki fu de makandra nanga den brada disi di ben komoto fu 23 kondre. Leon Weaver nanga Merton Campbell fu a Dienst Afdeling ben interview difrenti memre fu den Bijkantoro Komte; wan tu fu den disi ben de sma di ben go kaba na a Gileadskoro. San den zendeling disi di ondrofeni furu, ben abi fu fruteri, ben gi den studenti nanga den famiri nanga den mati fu den deki-ati.

Den ben gi den studenti di ben klari a skoro disi, rai fu yepi den na ini a diniwroko di den kisi fu du na ini tra kondre. Den rai di den ben gi den ben de: „Tan denki bun. Efu yu e tuka nanga wan sani di yu no sabi, noso di yu no e frustan, dan no lasi-ati. Frutrow tapu Yehovah”; „leri fu de koloku nanga den sani di yu kan kisi, èn frutrow tapu Yehovah taki en sa gi yu san yu abi fanowdu na ini a libi.” Tra komentaar di gi ben de fu yepi den studenti tan abi prisiri nanga a diniwroko di den kisi. Wan tu fu den komentaar dati ben de: „No go teki a diniwroko di yu kisi now, gersi nanga san yu ben du ini a kondre pe yu komoto”; „leri a tongo fu a presi pe yu e go èn taki en bun so taki yu nanga den sma drape kan frustan makandra bun”; „kon sabi den gwenti nanga a kulturu fu a pipel, bika disi sa yepi yu fu tan du a diniwroko di yu kisi.” Den komentaar disi ben gi den nyun zendeling furu deki-ati.

Baka den interview, dan David Splane, di ben de wan zendeling fosi èn di ben klari a di fu 42 klas fu a Gileadskoro, èn di e dini now leki wan memre fu a Tiri Skin fu Yehovah Kotoigi, ben hori a moro prenspari lezing di ben hari sma prakseri èn di ben abi leki nen „Yu Na wan Studenti Noso Yu Na wan Sma Di Klari a Skoro—Sortuwan Yu De?” A ben aksi den wan di ben klari a skoro disi: „Fa yu sa si yusrefi te yu go fu du a zendelingwroko di yu kisi fu du? Yu sa si yusrefi leki wan sma di klari a skoro disi èn di sabi ala sani fu a zendelingwroko kaba, noso yu sa si yusrefi leki studenti di musu leri furu ete?” Brada Splane ben sori taki wan koni sma di klari a skoro, e si ensrefi leki wan studenti. Den zendeling musu si ibri sma di den e miti na ini a zendelingwroko fu den, leki sma di kan leri den wan sani (Filipisma 2:3). Den studenti ben kisi deki-ati fu wroko skinskin nanga den tra zendeling, nanga a bijkantoro, èn nanga a gemeente pe den sa go. „Unu pasa a lasti examen fu unu, ma unu no kaba fu de studenti. Meki ibri sma sabi taki yu de drape fu leri”, na so Brada Splane ben tranga den.

Baka a lezing disi, den studenti ben kisi a diploma fu den, èn den arkiman ben kisi fu yere pe den studenti ben o go fu wroko leki zendeling. Baka dati wan momenti ben kon di ben naki na ati fu ala sma, di wán fu den studenti di klari a skoro ben leisi wan resolutie. Drape ben skrifi taki den studenti di klari a skoro abi a fasti bosroiti fu meki den sani di den leri fu Gado Wortu, pusu den fu du moro bigi sani na ini a santa diniwroko.

Seiker, ala sma di ben drape ben agri taki a rai di den studenti di klari a skoro, kisi, ben tranga a fasti bosroiti fu den fu sori lobi gi Gado nanga gi tra sma. Èn so srefi den studenti di klari a skoro, ben abi wan moro fasti bosroiti fu yepi sma na yeye fasi te den sa du a diniwroko fu den leki zendeling.

[Faki na tapu bladzijde 25]

STATISTIEK FU A KLAS

Nomru fu kondre pe den komoto: 10

Nomru fu kondre pe den kisi toewijzing fu go: 20

Nomru fu studenti: 48

Gemiddeld yari di den abi: 33,7

Gemiddeld yari di den de na ini waarheid: 16,2

Gemiddeld yari di den de na ini a furuten diniwroko: 12,5

[Faki na tapu bladzijde 26]

A di fu 109 Klas di Klari a Waktitoren Bijbelskoro Gilead Nanga Bun Bakapisi

Na tapu a lijst na ondrosei, den rei nomru fu fesi go na baka èn den nen skrifi fu kruktu-anusei go na reti-anusei na ibri rei.

(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.