Unu Musu De Lepi Sma Di Abi wan Tranga Bribi
Unu Musu De Lepi Sma Di Abi wan Tranga Bribi
„Ala ten a e meki furu muiti fu begi gi unu, so taki te fu kaba, unu kan de lepi sma di abi wan tranga bribi na ini ala sani di Gado wani.”—KOLOSESMA 4:12.
1, 2. (a) San sma di no ben de Kresten, ben taki fu den fosi Kresten? (b) Fa a buku Kolosesma e sori taki den Kresten trutru ben lobi den brada nanga sisa fu den?
DEN bakaman fu Yesus ben wani sabi trutru fa a ben go nanga den tra sma di ben abi a srefi bribi leki den. Tertulianus (wan skrifiman fu a di fu tu nanga a di fu dri yarihondro G.T.) ben fruteri taki den ben sori switifasi na pôtisma, na owrusma, èn na pikin-nengre di no ben abi papa nanga mama. Fu di den ben sori lobi na so wan fasi, meki dati trutru ben naki na ati fu den sma di no ben de na bribi, èn son wan fu den ben taki fu Kresten: ’Luku fa den lobi makandra.’
2 A buku Kolosesma e sori taki na apostel Paulus nanga en kompe Epafras, trutru ben lobi den brada nanga sisa fu den na Kolose, èn den ben wani sabi fa a ben go nanga den. Paulus ben skrifi den: Epafras „e meki furu muiti fu begi gi unu [ala ten], so taki te fu kaba, unu kan de lepi sma di abi wan tranga bribi na ini ala sani di Gado wani”. Na ini a yari 2001, Yehovah Kotoigi sa abi leki yaritekst, den wortu disi fu Kolosesma 4:12: ’Unu musu de lepi sma di abi wan tranga bribi na ini ala sani di Gado wani.’
3. Fu sortu tu sani Epafras ben begi?
3 Yu kan si taki Epafras ben taki fu tu sani di a ben begi gi den lobiwan fu en: (1) taki ’te fu kaba, den ben musu de lepi sma’ èn (2) taki den ben musu „abi wan tranga bribi na ini ala sani di Gado wani”. A tori disi ben poti na ini den Buku fu Bijbel so taki wi ben sa kan kisi wini fu dati. So bun, aksi yusrefi: ’San mi musu du te fu kaba so taki mi kan de wan lepi sma, èn so taki mi kan abi wan tranga bribi na ini ala sani di Gado wani? Èn san o pasa te mi e du dati?’ Meki wi luku.
Du Muiti fu ’De wan Lepi Sma’
4. Na sortu fasi den Kolosesma ben musu de „lepi sma”?
4 Epafras trutru ben wani taki en brada nanga sisa na yeye fasi na ini Kolose, ben musu ’de lepi sma te fu kaba’. Den wortu di Paulus ben gebroiki èn di vertaal dyaso nanga „lepi sma”, kan wani taki dati wan sma musu de volmaakti noso taki a musu de wan bigisma (Mateus 19:21; Hebrewsma 5:14; Yakobus 1:4, 25). Yu sabi kaba kande, taki a dopu di wan sma dopu leki wan Kotoigi fu Yehovah no wani taki dati a de wan lepi Kresten wantronso. Paulus ben skrifi den Efeisesma di ben libi na a westsei fu Kolose, taki skapuman nanga leriman e pruberi fu yepi ’ala sma fu kon de wán na ini bribi èn abi a soifri sabi fu a Manpikin fu Gado, te leki den tron wan bigisma, te leki den gro kon bigi èn kon lepi leki Krestes’. Na wan tra tekst, Paulus ben gi Kresten deki-ati fu tron ’bigisma ini a man di den man frustan sani’.—Efeisesma 4:8-13; 1 Korentesma 14:20.
5. Fa wi kan meki a de di wi musu de wan lepi sma kon de a moro prenspari marki di wi wani doro?
5 Efu son sma na Kolose no ben de bigisma noso lepi sma na yeye fasi ete, dan den ben musu du muiti fu kon de so wan sma. A no musu de so tu na ini a ten disi? Awinsi wi dopu someni tenti yari kaba noso no so langa ete, wi man si trutru taki wi go na fesi ini a fasi fa wi e rideneri èn ini a fasi fa wi e si sani? Wi e poti prakseri na Bijbel gronprakseri bifo wi e teki bosroiti? Wi e meki den afersi di abi fu du nanga Gado èn nanga a gemeente kon de den moro prenspari sani na ini wi libi, na presi fu si den leki sani di no de so prenspari? Wi no kan gi wan eksempre dyaso fu ala den fasi fa wi ben kan sori taki wi e gro kon tron lepi sma, ma meki wi luku tu eksempre.
6. San na wan sani di wan sma kan du fu go na fesi èn kon de volmaakti, neleki fa Yehovah volmaakti?
6 A fosi eksempre: Kon wi taki dati wi gro kon bigi na ini wan libimakandra pe sma gwenti fu desko trawan noso fu sori feantifasi gi sma fu wan tra ras, kondre, noso presi. Wi sabi now taki Gado no e teki sma partèi èn taki wi no musu du dati tu (Tori fu den Apostel 10:14, 15, 34, 35). Na ini wi gemeente noso wi kring, wi abi sma fu tra ras, kondre, noso presi, so bun wi abi demakandra nanga den. Ma a de so taki kande dipi na ini wi ati, wi e denki takru sani ete fu den sma dati, noso a de so taki wi no e frutrow den srefi? Efu wan fu den sma disi e meki wan fowtu noso e afrontu wi nanga wan pikin sani, dan a de so taki wi e mandi tumusi esi, fu di wantronso wi e denki takru fu den? Aksi yusrefi: ’Mi musu du moro fu kisi a denki fu Gado fu no teki sma partèi?’
7. Efu wi wani tron lepi Kresten, dan fa wi musu si trawan?
7 A di fu tu eksempre: Soleki fa Filipisma 2:3 e taki, dan wi ’no musu du noti fu di wi lobi fu meki trobi noso prakseri wisrefi nomo, ma wi musu du sani na wan sakafasi, fu di wi e si den tra sma leki sma di hei moro wi’. Wi e go na fesi ini a tori disi? Ibri sma abi wan tu sani di a no man du èn tra sani di a kan du heri bun. Kande fosi wi ben de esi fu luku san tra sma no man du. Wi kenki a denki disi èn no e fruwakti fu den moro taki den musu du ala sani na wan „volmaakti” fasi? (Yakobus 3:2). Wi man si now, moro leki oiti bifo, taki wan tu sani de di tra sma e du moro bun leki wi? Wi man du muiti srefi fu si san na den sani di den e du moro bun? ’Mi musu erken taki a sisa disi abi moro pasensi leki mi’. ’A bribi fu a sma dati tranga moro leki di fu mi’. ’Fu tru, a brada na wan moro bun leriman leki mi’. ’A sisa man dwengi ensrefi moro leki fa mi man dwengi misrefi’. Kande wan tu fu den Kolosesma ben musu leri fu du disi ete. Wi musu leri fu du dati tu?
8, 9. (a) San a wani taki dati Epafras ben begi gi den Kolosesma fu den „de” lepi sma? (b) San a ’de di den ben musu de lepi sma’ ben abi fu du nanga a ten di e kon?
8 Epafras ben begi fu den Kolosesma ben kan „de lepi sma”. Den Kolosesma ben tron lepi sma, noso Kresten bigisma. A de krin taki Epafras ben e begi Gado fu den ben kan „de”, noso tan tyari densrefi leki lepi Kresten.
9 Wi no kan fruwakti taki ibri sma di e tron wan Kresten, srefi wan lepi Kresten, sa horidoro leki wan Kresten tu. Yesus ben taki dati wan engel manpikin fu Gado „no ben tan na ini a waarheid” (Yohanes 8:44). Èn Paulus ben memre den Korentesma na wan tu sma fu fositen di ben dini Yehovah wan pisi ten, ma ben tapu fu du dati. A ben warskow brada di salfu nanga santa yeye: „Fu dati ede, meki a sma di e denki taki a e tanapu, luku bun taki a no e fadon” (1 Korentesma 10:12). Disi e poti krakti tapu a begi gi den Kolosesma, taki „te fu kaba” den ben musu „de lepi sma”. Baka di den kon de lepi sma, noso bigisma, dan den ben musu horidoro, den no ben musu hari densrefi puru, kon weri, noso drifi gowe (Hebrewsma 2:1; 3:12; 6:6; 10:39; 12:25). So bun, den ben o de „lepi sma” tapu a dei te Gado ben o ondrosuku sani èn ben o teki a bosroiti efu a feni den bun te fu kaba.—2 Korentesma 5:10; 1 Petrus 2:12.
10, 11. (a) Sortu eksempre Epafras ben gi wi ini a tori fu begi? (b) Sortu bosroiti yu wani teki te yu e luku san Epafras ben du?
10 Wi si kaba taki a prenspari fu kari sma na den nen te wi e begi gi den, ala di wi e aksi Yehovah spesrutu fu yepi den, fu trowstu den, fu blesi den, èn fu gi den santa yeye. Na so Epafras ben begi gi den Kolosesma. Te yu e luku en bun, dan den wortu dati kan èn musu gi wi wan bun idea fu den sani di wi kan taigi Yehovah fu wisrefi na ini begi. A no de fu taki, wi musu aksi Yehovah fu yepi wi so taki „te fu kaba” wisrefi sa „de lepi sma”. Yu e du dati?
11 Fu san ede yu no e fruteri na ini begi san na yu situwâsi? Taki nanga Gado fu den sani di yu du kaba fu tron wan „lepi sma”, noso wan bigisma. Begi en fu yepi yu kon si san yu musu du ete fu gro na yeye fasi (Psalm 17:3; 139:23, 24). Sondro tweifri yu abi wan tu sani di yu musu du fu gro na yeye fasi. We, na presi fu lasi-ati fu a sani disi, yu musu taigi Gado krinkrin na ini begi san yu wani, èn aksi en spesrutu fu yepi yu go na fesi. Yu no musu du disi wan leisi nomo. Fu taki en leti, fu san ede yu no e teki a bosroiti taki a wiki disi di e kon yu sa begi spesrutu, fu yu kan ’de wan lepi sma te fu kaba’. Èn prakseri fu du dati nofotron, ala di yu e hori a yaritekst na prakseri. Te yu e begi, dan poti prakseri na den firi di yu abi kande fu hari yusrefi puru, fu kon weri, noso fu drifi gowe fu a diniwroko fu Gado, èn prakseri san yu kan du fu no abi den firi dati.—Efeisesma 6:11, 13, 14, 18.
Begi fu Kisi wan Tranga Bribi
12. Fu san ede spesrutu, den Kolosesma ben abi wan „tranga bribi” fanowdu?
12 Epafras ben begi tu gi wan tra sani di den Kolosesma ben musu abi, efu te fu kaba den ben wani de sma di Gado feni bun. Wi musu abi a srefi sani. San ben de a sani dati? Epafras ben begi taki den ben musu abi „wan tranga bribi na ini ala sani di Gado wani”. Den ben abi fu du nanga leri di ben de kontrari a tru anbegi èn nanga filosofia di ben pori sma denki. Son wan fu den filosofia ben bedrigi sma fu di den ben du sani di ben gersi a tru anbegi. Fu eksempre, sma ben dwengi den Kolosesma fu hori spesrutu dei nanga faste èn nanga fesa, neleki fa sma ben musu du dati na ini a Dyu anbegi. Falsi leriman ben poti prakseri na engel, den makti yeye di Gado ben gebroiki fu tyari a Wet gi Moses. Prakseri fa a ben de efu yu ben abi fu horidoro na ini den sortu situwâsi dati! Bun furu difrenti idea ben de di meki taki sma no ben sabi moro san den ben musu bribi.—Galasiasma 3:19; Kolosesma 2:8, 16-18.
13. San den Kolosesma ben musu erken fu man kisi yepi, èn fa dati kan yepi wi?
13 Paulus ben sori taki den sani di den sma ben du, ben de fowtu sani. A ben poti krakti na tapu, taki den Kolosesma ben musu erken a frantwortu di Yesus abi. A ben taki: „Fu di unu teki Krestes Yesus, a Masra, tan waka na ini wánfasi nanga en, meki rutu èn kon bow na ini en èn kon stanfaste na ini a bribi, neleki fa unu ben leri.” Iya, a ben de fanowdu taki den Kolosesma ben musu bribi dorodoro o prenspari a Krestes de na ini a wani fu Gado èn na ini den libi, èn wi so srefi musu du dati. Paulus ben fruklari: „Na ini en, a heri fasi fa gado de, de fu si. Èn na so unu abi wan gado fasi, nanga yepi fu en, di de edeman fu ala tirimakti nanga tiriman.”—Kolosesma 2:6-10.
14. Fu san ede howpu ben de wan trutru sani gi den Kolosesma?
14 Den Kolosesma ben de salfu Kresten. Den ben abi wan aparti howpu, namku fu libi na ini hemel, èn den ben abi ala reti fu tan howpu fayafaya tapu dati (Kolosesma 1:5). A ben de „Gado wani”, taki den ben musu bribi tranga taki a howpu fu den ben o kon tru sondro misi. Iniwan fu den ben musu tweifri na a howpu dati? Kwetikweti! A musu de tra fasi na ini a ten disi nanga ala den sma di abi a howpu di Gado gi, namku fu libi na tapu wan paradijs grontapu? A no musu de so srefisrefi! A de krin taki a warti howpu dati na wan fu den „sani di Gado wani”. Now prakseri fu den aksi disi: Efu yu e du muiti fu de wan fu den sma fu a „bigi ipi” di o pasa „a bigi banawtu” libilibi, dan a howpu de wan trutru sani gi yu? (Openbaring 7:9, 14). A howpu de wan fu den sani di e meki taki yu „abi wan tranga bribi na ini ala sani di Gado wani”?
15. Sortu penti Paulus ben kari makandra nanga howpu?
15 Te wi e taki fu „howpu”, dan wi no e taki fu wan sani di wi e winsi frafra nomo, noso wan dren di wi e dren nanga opo ai. Wi kan si taki disi de so, te wi e luku san Paulus ben taigi den Romesma kaba. Ibri penti di Paulus ben kari, abi wan sani fu du nanga a penti di e kon baka dati. Luku pe Paulus e poti „howpu” te a e rideneri: „Meki wi prisiri ala di wi de na ini banawtu, fu di wi sabi taki banawtu e meki wi horidoro, horidoro e meki Gado feni wi bun, a feni di Gado feni wi bun e meki wi kisi howpu, èn a howpu no e meki wi lasi-ati, bika a lobi fu Gado kanti kon na ini wi ati nanga yepi fu a santa yeye.”—Romesma 5:3-5.
16. Sortu howpu yu kisi di yu ben leri Bijbel waarheid?
16 A fosi leisi di Yehovah Kotoigi ben taki nanga yu fu a Bijbel boskopu, dan wan spesrutu waarheid kande ben hari yu prakseri, soleki a situwâsi fu den dedesma, noso na opobaka. A fosi nyun sani di furu sma ben kon sabi, ben de taki libisma sa man libi na tapu wan paradijs grontapu, soleki fa Bijbel e sori dati. Memre a fosi leisi di yu ben yere fu a leri disi. A de wan tumusi moi howpu fu tru — no wan siki èn no wan owrudei no sa de moro, yu kan tan na libi fu prisiri nanga den sani di yu kisi fu a tranga wroko fu yu, èn vrede sa de nanga den meti! (Preikiman 9:5, 10; Yesaya 65:17-25; Yohanes 5:28, 29; Openbaring 21:3, 4) Yu kon abi wan kefalek moi howpu fu tru!
17, 18. (a) Fa den penti di Paulus ben kari gi den Romesma, meki taki sma kisi howpu? (b) Fu sortu howpu Romesma 5:4, 5 e taki, èn yu abi so wan howpu?
17 Na ini a ten di pasa, kande sma ben gens yu noso den frufolgu yu (Mateus 10:34-39; 24:9). Srefi na ini a ten disi, sma ben fufuru sani na ini den oso fu Kotoigi na difrenti kondre noso den Kotoigi ben musu lowe gowe na tra presi. Wan tu fu den ben kisi fonfon, sma ben teki den Bijbel publikâsi fu den, noso sma ben panya lei fu den nanga yepi fu sani soleki radio nanga telefisi. Awansi sortu frufolgu yu kisi, toku soleki fa Romesma 5:3 e taki, yu ben man prisiri ala di yu ben de na ini banawtu, èn wan bun sani kon fu di yu du dati. Soleki fa Paulus ben skrifi, dan a banawtu di yu ben de na ini meki taki yu horidoro. Baka dati, a hori di yu ben horidoro meki taki Gado feni yu bun. Yu ben sabi taki yu ben e du san bun èn taki yu ben du Gado wani, so bun yu ben sabi fu tru taki a ben feni yu bun. Fu taki en soleki fa Paulus ben taki en, yu ben frustan taki ’Gado feni yu bun’. Paulus ben skrifi moro fara taki fu di ’Gado feni yu bun, meki yu kisi howpu’. We, fa dati kan? Fu san ede Paulus taki fu „howpu” leki lasti? Yu no ben abi howpu langa ten kaba, fu sensi yu ben yere a bun nyunsu fu a fosi leisi?
18 A de krin taki dyaso Paulus no e taki fu a howpu di wi ben abi fosi fu libi wan volmaakti libi. A e taki fu wan sani di tranga moro leki a howpu dati; wan sani di e go moro dipi, wan sani di e gi wi moro deki-ati fu du wan sani. Te wi e horidoro na wan getrow fasi èn e kon frustan taki Gado feni wi bun, dan disi e meki taki a howpu di wi ben abi fosi e kon moro tranga. A howpu di wi ben abi, e kon de wan trutru sani gi wi now, a e kon moro tranga, èn a e tron wan sani di wisrefi e howpu na tapu. A howpu disi di kon de wan pisi fu wi, de moro krin fu si. Na ini ala wi denki nanga fasi fu handri, a de krin fu si taki a howpu disi de dipi na ini wi ati. „Èn a howpu no e meki wi lasi-ati, bika a lobi fu Gado kanti kon na ini wi ati nanga yepi fu a santa yeye.”
19. Fa a howpu fu yu musu de wan fu den sani di yu e begi fu dati doronomo?
19 A ben de na opregti begi fu Epafras taki den sani di ben de fu kon ete, ben musu tan abi krakti tapu den brada nanga sisa fu en na ini Kolose. So srefi a ben begi taki den ben musu tan abi na overtoigi taki den sani dati ben o kon trutru, èn den ben musu abi „wan tranga bribi na ini ala sani di Gado wani”. Na a srefi fasi, meki ibriwan fu wi taki nanga Gado doronomo fu wi howpu. Te yu e begi fu yusrefi, dan taki tu fu a howpu di yu abi fu a nyun grontapu. Taigi Yehovah, taki trutru yu wani a nyun grontapu fu kon, ala di yu e bribi trutru taki a sa kon. Begi en fu yepi yu fu meki yu bribi kon moro tranga. Neleki fa Epafras ben begi fu den Kolosesma abi „wan tranga bribi na ini ala sani di Gado wani”, na so yu musu begi gi dati tu. Yu musu du dati furutron.
20. Fu san ede wi no musu lasi-ati te wan tu sma e drai gowe libi a Kresten pasi?
20 Yu no musu broko yu ede tumusi noso lasi-ati fu di no ala sma de lepi èn abi wan tranga bribi. A kan de so taki wan tu sma e meki fowtu, sani e meki den drai gowe, noso den e gi abra. Dati ben pasa nanga wan tu fu den sma di ben wroko skinskin nanga Yesus, namku den apostel fu en. Ma di Yudas tron wan toriman, dan den tra apostel ben go du sani safrisafri? Den ben tapu fu dini Yehovah? Kwetikweti! Petrus ben gebroiki Psalm 109:8 fu sori taki wan trawan ben o kon na Yudas en presi. Den ben teki wan tra sma, èn den loyaalwan fu Gado ben go doro fayafaya nanga a preikiwroko di den ben kisi fu du (Tori fu den Apostel 1:15-26). Den ben abi a fasti bosroiti fu de lepi sma di abi wan tranga bribi.
21, 22. Fa trawan sa si taki yu na wan lepi sma di abi wan tranga bribi?
21 Yu kan de seiker srefisrefi taki trawan sa si taki yu na wan lepi sma di abi wan tranga bribi na ini ala sani di Gado wani. Sma sa luku fa yu e du dati èn den sa warderi en. Suma na den sma?
22 We, den brada nanga den sisa fu yu, di sabi yu èn di lobi yu, sa si dati. Srefi te moro furu fu den no e taki noti nanga mofo, toku a bakapisi sa de a srefi leki san wi e leisi na 1 Tesalonikasma 1:2-6: „Wi e taki Gado tangi ala ten te wi e taki fu yu na ini den begi fu wi, bika doronomo wi e prakseri a wroko di unu du na wan getrow fasi èn a wroko di unu du nanga lobi èn a horidoro di unu horidoro fu a howpu ede di unu abi na ini wi Masra Yesus Krestes na fesi wi Gado nanga Tata. Fu di . . . a bun nyunsu di wi e preiki, no ben kon na unu nanga wortu wawan, ma so srefi nanga krakti èn nanga santa yeye èn tranga overtoigi . . . ; èn unu tron sma di e waka na wi baka èn na baka Masra.” Na so den loyaal Kresten lontu yu sa firi tu, te den e si taki yu „de wan lepi sma di abi wan tranga bribi na ini ala sani di Gado wani”.—Kolosesma 1:23.
23. San musu de yu fasti bosroiti na ini a yari disi?
23 Sondro tweifri, yu hemel Tata sa si san yu e du èn dati sa plisi en. Yu kan frutrow taki a de so. Fu san ede? Fu di yu de wan lepi sma di abi wan tranga bribi „na ini ala sani di Gado wani”. Paulus ben gi den Kolosesma deki-ati di a ben skrifi den taki den ben waka „na wan fasi di warti gi Yehovah, fu plisi en dorodoro” (Kolosesma 1:10). Iya, libisma no de volmaakti, ma toku den man plisi en dorodoro. Den brada nanga sisa fu yu na Kolose ben du dati. Kresten di de lontu yu nownow, e du dati. Yu kan du dati tu! Fu dati ede, na ini a yari disi, meki a de so taki den sani di yu e begi ibri dei èn den sani di yu gwenti du, e sori taki yu abi a fasti bosroiti fu ’de wan lepi sma te fu kaba, di abi wan tranga bribi na ini ala sani di Gado wani’.
Yu Kan Memre Disi Ete?
• San yu musu du fu ’de wan lepi sma’?
• Sortu sani fu yusrefi yu ben sa kan taki na ini begi?
• Soleki fa Romesma 5:4, 5 e taki, dan sortu howpu yu wani abi?
• Sortu marki yu sa abi gi a yari disi, now di yu studeri na artikel disi?
[Aksi fu a tori disi]
[Prenki na tapu bladzijde 20]
Epafras ben begi fu den brada fu en ben kan de lepi Kresten di abi wan tranga bribi na ini Krestes èn di e bribi trutru taki a howpu fu den sa kon tru
[Prenki na tapu bladzijde 23]
Neleki yu, milyunmilyun tra sma abi a howpu di de seiker èn den abi wan tranga bribi tu