Yepi Tra Sma fu Waka na wan Fasi Di Warti gi Yehovah

„Wi no ben tapu fu begi gi unu èn fu aksi taki unu . . . kan waka na wan fasi di warti gi Yehovah, fu plisi en dorodoro, ala di unu e tan tyari froktu ini ibri bun wroko.”—KOLOSESMA 1:9, 10.

1, 2. Sortu spesrutu sani kan gi wi prisiri nanga satisfaksi?

„WI E tan na wan burugron na ini wan wagi di de wan tanpresi tu. Fu di wi e hori wi libi sempel, meki wi abi moro ten fu tyari a bun nyunsu gi sma. Wi ben kisi a bigi grani fu yepi furu sma fu gi den libi abra na Yehovah.”—Wan trowpaar di de furuten dinari na Zuid-Afrika.

² Yu no e agri taki a e gi prisiri te yu e yepi tra sma? Son sma e pruberi doronomo fu yepi sikisma, pôtisma, noso sma di no abi mati, èn den e prisiri te den e du dati. Tru Kresten de seiker taki a moro prenspari fasi fa den kan yepi tra sma na fu leri den fu Yehovah Gado èn Yesus Krestes. Disi wawan kan meki trawan teki a lusu-paiman fu Yesus èn meki den tron bun mati fu Gado, so taki den kan kisi têgo libi.—Tori fu den Apostel 3:19-21; 13:48.

3. Na sortu yepi wi musu poti seryusu prakseri?

³ Ma fa wi kan yepi den sma di e dini Gado kaba, di e waka na „A Pasi”? (Tori fu den Apostel 19:9). Sondro tweifri yu e prakseri den furu, ma kande yu no sabi san yu kan du moro gi den, noso fa yu kan tan yepi den. Noso te yu e luku a situwâsi fu yu, dan a kan gersi leki yu no man du furu fu yepi den èn fu dati ede yu no e kisi so furu prisiri (Tori fu den Apostel 20:35). Wi kan kon sabi san a buku Kolosesma e taki fu den tu afersi disi.

4. (a) San ben de a situwâsi di Paulus skrifi go na den Kolosesma? (b) San Epafras ben abi fu du nanga disi?

⁴ Di na apostel Paulus ben skrifi den Kresten na Kolose, dan a ben de na Rome pe a ben poti na strafu na ini wan oso, ma sma ben man kon na en ete. Soleki fa yu ben kan fruwakti, dan Paulus ben gebroiki a pikinso fri di a ben abi fu preiki fu Gado Kownukondre (Tori fu den Apostel 28:16-31). Tra Kresten ben kan kon luku Paulus; son leisi a ben kan de so srefi taki wan tu ben poti na strafu makandra nanga en (Kolosesma 1:7, 8; 4:10). Wan fu den ben de a fayafaya preikiman Epafras fu a foto Kolose na Frigia, di ben de na a hei kontren na a owstusei fu Efeise na Pikin Asia (a disiten Torkukondre). Epafras ben abi wan bigi prati na a seti fu wan gemeente na ini Kolose, èn a ben wroko gi den gemeente na ini Laodisea nanga Hièrapolis di ben de krosibei (Kolosesma 4:12, 13). Fu san ede Epafras ben go luku Paulus na Rome, èn san wi kan leri fu den sani di Paulus ben piki en?

Bun Yepi gi den Kolosesma

5. Fu san ede Paulus ben skrifi a brifi gi den Kolosesma?

⁵ Fu di Epafras ben wani taki nanga Paulus fu a situwâsi na ini a gemeente fu Kolose, meki a ben teki waka go na Rome, san ben hebi srefisrefi. A ben fruteri Paulus fu a bribi nanga a lobi fu den Kresten dati, èn so srefi fu den muiti di den ben e meki fu preiki (Kolosesma 1:4-8). Ma Epafras ben musu fruteri Paulus so srefi taki a ben broko en ede nanga den takru sani di ben de wan kefar gi a yeyefasi fu den Kolosesma. Paulus ben piki fu di a skrifi wan brifi nanga yepi fu Gado en santa yeye. Na ini a brifi, a ben kon nanga buweisi fu sori taki den denki di falsi leriman ben panya, ben de fowtu denki. A ben poti furu krakti na tapu, taki den Kolosesma ben musu erken a prenspari frantwortu di Yesus abi. * A fruteri di a ben fruteri den fu prenspari  Bijbel waarheid, ben de a wan-enkri fasi fa a ben yepi den? San na wan tra fasi fa a ben kan yepi den Kolosesma? Èn san wi kan leri fu disi, ini a tori fu yepi tra sma?

6. Tapu sortu sani Paulus ben poti krakti di a ben skrifi en brifi gi den Kolosesma?

⁶ Na a bigin fu en brifi, Paulus ben fruteri fu wan fasi fa wi ben sa kan yepi sma, di kande wi no ben sa prakseri fu en srefi. A ben de wan fasi fa Paulus nanga Epafras ben gi sma yepi, ala di den ben de farawe fu Kolose. Paulus ben fruklari: „Wi e taigi Gado, a Tata fu wi Masra Yesus Krestes, tangi ala ten te wi e begi [futuwortu, „e begi ala ten”] gi unu.” Iya, den begi disi ben de spesrutu gi den Kresten na Kolose. Paulus ben taki moro fara: „Dati na fu san ede, fu a dei di wi ben yere fu en, wi no ben tapu fu begi gi unu èn fu aksi taki unu sa kon furu nanga a soifri sabi fu a wani fu en ini ala koni nanga frustan fu sani na yeye fasi.”—Kolosesma 1:3, 9.

7, 8. Fu sortu sani wi e begi furutron te wi e begi fu wisrefi èn te wi e begi makandra nanga a gemeente?

⁷ Wi sabi taki Yehovah na a „Yereman fu begi”, so bun wi kan frutrow taki a de klariklari fu yere san wi e begi en akruderi en wani (Psalm 65:2; 86:6; Odo 15:8, 29; 1 Yohanes 5:14). Ma te wi e begi gi tra sma, dan san wi e begi?

⁸ A kan de so taki furutron wi e prakseri ’a heri libimakandra fu wi brada na grontapu’ èn wi e begi gi den tu (1 Petrus 5:9). Noso a kan de so taki wi e taki nanga Yehovah fu Kresten èn fu tra sma di e tan na wan presi pe den kisi fu du nanga rampu noso kefalek sari sani. Di fosi yarihondro disipel di ben libi na wan tra presi ben yere fu na angriten na Yudea, dan a musu fu de so taki den ben begi furu gi den brada fu den, srefi bifo den ben seni wan tu sani fu frulekti a nowtu fu den brada (Tori fu den Apostel 11:27-30). Na ini a ten disi, furutron wi e yere begi di abi fu du nanga a heri bradafasi fu wi, noso begi di abi fu du nanga wan bigi grupu fu wi brada nanga sisa. Den begi disi na Kresten konmakandra musu de begi di furu sma musu man frustan èn musu man taki „Amen” na tapu.—1 Korentesma 14:16.

Taki Finifini fu Sani te Yu E Begi

9, 10. (a) Sortu eksempre e sori taki a bun fu begi gi spesrutu sma? (b) Fa a kon taki sma ben begi spesrutu gi Paulus?

⁹ Ma Bijbel e gi wi eksempre fu sma di ben taki finifini fu sani te den ben begi gi trawan. Prakseri fu san Yesus ben taki na Lukas 22:31, 32. A ben abi 11 getrow apostel. Den alamala ben o abi yepi fu Gado fanowdu na ini den muilek ten di ben o kon ete èn Yesus ben begi gi den (Yohanes 17:9-14). Toku, Yesus ben begi spesrutu gi wán disipel, Petrus, èn a ben taki finifini fu sani di ben abi fu du nanga a wan disipel dati. Tra eksempre: Elisa ben begi efu Gado ben kan yepi wán man spesrutu, a futuboi fu en (2 Kownu 6:15-17). Na apostel Yohanes ben begi efu sani ben kan go bun na skin sei èn na yeye fasi nanga Gayus (3 Yohanes 1, 2). Èn tra begi ben poti prakseri na spesrutu grupu sma.—Yob 42:7, 8; Lukas 6:28; Tori fu den Apostel 7:60; 1 Timoteus 2:1, 2.

¹⁰ Den brifi fu Paulus e poti krakti tapu a tori fu begi fu spesrutu sani. A ben aksi efu den Kolosesma ben kan begi gi en, noso gi en èn den kompe fu en. Kolosesma 4:2, 3 e taki: „Horidoro na ini begi, tan na ai ala di unu e taki Gado tangi; na a srefi ten begi gi wi tu, efu Gado kan opo wan doro gi wi gi a wortu, fu taki fu a santa kibritori fu a Krestes, di fu dati ede mi de na bui na ini dungru-oso.” Luku den tra eksempre disi tu: Romesma 15:30; 1 Tesalonikasma 5:25; 2 Tesalonikasma 3:1; Hebrewsma 13:18.

11. Di Epafras ben de na Rome, dan gi suma a ben begi?

¹¹ Na so a ben de nanga a kompe fu Paulus na Rome. „Epafras, di de wan fu unu, . . . e seni taki unu odi. Ala ten a e meki furu muiti fu begi gi unu” (Kolosesma 4:12). A wortu di vertaal nanga „meki tranga muiti”, kan wani taki „fu strei”, soleki san wan atleet na ini den prei fu owruten ben du. Epafras ben begi fayafaya soso gi a grupu bribiman na heri grontapu, noso a ben begi srefi gi tru anbegiman na ini heri Pikin Asia? Paulus ben sori taki Epafras ben begi spesrutu gi den wan na Kolose. Epafras  ben sabi a situwâsi fu den. Wi no sabi den nen fu ala den sma, èn wi no sabi nanga sortu problema den ben abi fu du, ma prakseri fa a situwâsi fu den ben de. Kande a yongu Linus ben du furu muiti fu kakafutu gi filosofia di ben pôpi na ini a ten dati. Rufus ben kan abi krakti fanowdu fu kakafutu gi den sani di a ben gwenti fu du fosi na ini a Dyu bribi. Persis ben abi wan masra di no ben de na bribi. A ben abi horidoro nanga koni fanowdu fu kweki en pikin na ini Masra? Èn Asinkritus ben abi wan siki di te fu kaba a ben o dede fu en. A ben abi moro trowstu fanowdu? Iya, Epafras ben sabi den sma na ini a gemeente fu en, èn a ben begi opregti gi den bika en nanga Paulus ben wani taki den sortu sma dati di ben gi densrefi fu dini Gado, ben musu waka na wan fasi di warti gi Yehovah.

12. Fa wi ben sa kan taki finifini fu sani te wi e begi fu wisrefi?

¹² Yu e si na eksempre di wi kan waka na baka? Yu si fa wi kan yepi tra sma? Leki fa sori kaba, te wi e begi na Kresten konmakandra dan wi no e taki finifini fu sani, fu di difrenti sortu sma de drape. Ma te wi e begi fu wisrefi noso te wi e begi nanga wi osofamiri, dan wi kan begi gi spesrutu sani. Sontron wi kan aksi Gado efu a kan tiri èn blesi ala den opziener di e reis noso ala den skapuman na yeye fasi. Ma wi no ben sa kan aksi sani finifini tu son leisi? Fu eksempre, te yu e begi, dan fu san ede yu no e kari a nen fu a kringopziener di e kon na yu gemeente, noso a nen fu a fesiman fu yu Gemeente Bukustudie? Filipisma 2:25-28 nanga 1 Timoteus 5:23 e sori taki Paulus ben broko en ede spesrutu nanga a gosontu fu Timoteus èn di fu Epafroditus. Wi kan poti prakseri tu na den sikisma di wi sabi a nen fu den?

13. Fu sortu situwâsi wi ben sa kan taki tu te wi e begi fu wisrefi?

¹³ A tru taki wi no musu bumui ini sma tori, ma a bun te den begi fu wi e sori taki trutru wi e prakseri den sma di wi sabi èn di wi e sorgu gi den (1 Timoteus 5:13; 1 Petrus 4:15). Kande wan brada lasi en wroko, èn wi no man gi en wan tra wroko baka. Ma na ini den begi fu wi, wi kan kari en nen èn taki spesrutu fu a problema fu en (Psalm 37:25; Odo 10:3). Wi sabi wan sisa di kon owru sondro wan masra èn sondro pikin, bika a abi a fasti bosroiti fu trow „soso na ini Masra”? (1 Korentesma 7:39). Te yu e begi fu yusrefi, dan fu san ede yu no e aksi Yehovah efu a kan blesi a sisa èn kan yepi en fu tan getrow na ini en diniwroko? Teki wan tra eksempre, kande tu owruman gi wan brada rai fu di a meki wan fowtu. Fu san ede ten na ten, ibriwan fu den no e kari a nen fu a brada èn e taki spesrutu fu en te den e begi den wawan?

14. San a begi di wi e begi fu spesrutu sani abi fu du nanga a yepi di wi e gi trawan?

¹⁴ Yu kan taki fu bun furu sani te yu e begi tu gi sma di yu sabi, èn di abi yepi fu Yehovah fanowdu, so srefi trowstu, koni, nanga santa yeye, noso iniwan fu den froktu di e kon fu dati. Fu di yu de farawe noso fu wan tra sani ede, meki kande yu no man yepi den na materia sei soleki fa yu wani, noso yu no kan yepi den wantewante. Ma no frigiti fu begi gi den brada nanga sisa fu yu. Yu sabi taki den wani waka na wan fasi di warti gi Yehovah, ma trutru den ben kan abi yepi fanowdu fu tan du dati. Wan sroto fu yepi den du dati, de nanga den begi fu yu.—Psalm 18:2; 20:1, 2; 34:15; 46:1; 121:1-3.

Du Sani Di E Tranga Tra Sma

15. Fu san ede wi musu wani sabi moro fu a lasti pisi fu a buku Kolosesma?

¹⁵ A no de fu taki dati a begi di wi e begi fayafaya fu spesrutu sani, a no a wan-enkri fasi fu yepi tra sma, spesrutu den wan di yu lobi trutru. A buku Kolosesma e tyari dati kon na krin. Furu sabiman  e bribi taki baka di Paulus ben gi leri nanga bun rai na ini den brifi fu en, dan den sani di a ben taki moro fara ben de soso odi di ensrefi ben seni èn di a ben seni taki gi trawan (Kolosesma 4:7-18). Ma wi kon si kaba taki a lasti pisi disi fu a buku abi prenspari rai, èn wi kan leri moro sani fu a pisi disi.

16, 17. San wi kan taki fu den brada di kari na Kolosesma 4:10, 11?

¹⁶ Paulus ben skrifi: „Aristarkus, di de na strafu makandra nanga mi, e seni taki unu odi, èn so srefi Markus, a neef fu Barnabas (di unu ben kisi komando kaba taki unu musu ontfanga en bun efu a ben sa kon wan leisi na unu), nanga Yesus, di den e kari Yustus; di de wan fu den sma di besnij. Soso den sma disi na wrokoman gi a kownukondre fu Gado makandra nanga mi, èn den wan disi gi mi yepi di e gi mi tranga.”—Kolosesma 4:10, 11.

¹⁷ Na ini a lasti pisi dati, Paulus ben taki fu wan tu brada di ben frudini en, taki sma poti spesrutu prakseri na den. A ben taki dati den ben de na mindri den sma di besnij, èn taki den ben komopo na Dyu famiri. Na Rome, furu Dyu ben de di besnij, èn son wan fu den ben de Kresten now. Toku, Paulus ben kisi yepi fu den brada di a ben taki fu den. A sori leki den no ben draidrai fu abi demakandra nanga Kresten di ben de Heiden fosi, èn a musu fu de so taki nanga prisiri den ben preiki makandra nanga Paulus gi den Heiden.—Romesma 11:13; Galasiasma 1:16; 2:11-14.

18. Na sortu fasi Paulus ben prèise son wan fu den sma di ben de nanga en?

¹⁸ Luku san Paulus taki: „Na den wan disi gi mi yepi di e gi mi tranga.” A ben gebroiki wan Griki wortu èn disi na a wan-enkri leisi taki a wortu de fu feni na ini Bijbel. Furu sma di e vertaal sani, e vertaal a wortu nanga „trowstu”. Ma wan tra Griki wortu de (pa·ra·ka·le’o), di den vertaal moro furu nanga „trowstu”. Paulus ben gebroiki a wortu disi na tra presi na ini a srefi brifi, ma a no ben gebroiki en na Kolosesma 4:11.—Mateus 5:4; Tori fu den Apostel 4:36; 9:31; 2 Korentesma 1:4; Kolosesma 2:2; 4:8.

19, 20. (a) San den wortu wani taki di Paulus ben gebroiki gi den brada di yepi en na Rome? (b) Na sortu fasi kande den brada dati yepi Paulus?

¹⁹ A musu de so taki den sma di Paulus kari, ben du moro leki fu trowstu en nomo nanga den sani di den ben taki. Son leisi na ini grontapu buku, sma ben gebroiki a Griki wortu di vertaal na Kolosesma 4:11 nanga ’yepi di e gi sma tranga’, gi wan dresi di ben frulekti sma di brokosaka. A New Life Version e taki: „Fa den ben de wan yepi gi mi trutru!” Today’s English Version e gebroiki den wortu disi: „Den ben yepi mi furu.” San den Kresten brada di ben libi krosibei fu Paulus, ben du kande fu yepi en?

²⁰ Sma ben man kon na Paulus, ma ensrefi no ben man du furu sani, soleki fu go bai den moro prenspari sani di a ben abi fanowdu — nyanyan nanga krosi fu weri na winterten. Fa a ben o kisi den bukulolo fu studeri, noso bai den sani di a ben abi fanowdu fu skrifi? (2 Timoteus 4:13). Yu no e denki taki den brada dati ben yepi Paulus nanga san a ben abi fanowdu, fu di den ben du den moro prenspari sani soleki fu bai sani noso du boskopu gi en? Kande a ben wani go luku wan spesrutu gemeente fu tranga den. Fu di a ben de na strafu, meki a no ben man du dati. So bun, den brada dati kande ben go na den gemeente gi Paulus, ala di den ben e tyari boskopu go, èn ben tyari raportu gi en kon baka. Disi ben tranga en fu tru!

21, 22. (a) Fu san ede wi musu poti prakseri na den wortu fu Kolosesma 4:11? (b) San na wan tu fasi fa wi kan gebroiki na eksempre fu den sma di ben de nanga Paulus?

²¹ Fu di Paulus ben skrifi fu a fasi fa sma ben kan gi trawan ’yepi di e gi den tranga’, meki wi kon frustan fa wi ben sa kan yepi tra sma. A kan de so taki den e waka na wan fasi di warti gi Yehovah fu di den e tyari densrefi akruderi bun gwenti nanga gronprakseri, e go na Kresten konmakandra, èn e teki prati na a preikiwroko. Wi kan taigi den taki wi e warderi den sani di den e du. Ma wi kan du moro fu gi trawan ’yepi di e gi den tranga’, soleki fa den sma ben du dati gi Paulus?

²² Kande yu sabi wan sisa di du a koni sani fu  hori ensrefi na 1 Korentesma 7:37, ma di nownow no abi famiri di e tan krosibei fu en. Yu ben kan aksi en fu du sani makandra nanga yu osofamiri, kande fu nyan makandra, noso fu kon makandra nanga wan pikin grupu mati noso famiri? Fu san ede yu no e aksi en fu go na wan kongres noso wan fakansi nanga yu famiri? Noso aksi en fu go nanga yu fu bai nyanyan sani na wan ten di a feni bun. Wi ben kan aksi sma di de weduwe noso kande den wan di no man rei oto moro, den srefi sortu sani disi. Yu kan leri furu te yu e arki den ondrofenitori fu den, noso e aksi den aladei sani soleki: fa yu kan si sortu froktu na den moro bun wan, noso fa yu musu suku yoisti krosi gi pikin-nengre (Lefitikus 19:32; Odo 16:31). Disi kan meki taki unu sa tron moro bun mati. So bun, te den abi wan tu dresi fu na apteiki fanowdu noso wan srefi sortu sani, dan den no sa frede fu aksi yu fu yepi den. A musu fu de so taki den brada di ben de nanga Paulus na Rome, ben yepi en nanga sani di a ben man gebroiki bun èn den ben tranga en. Yu kan gi a srefi sortu yepi tu. Na ini a ten dati èn so srefi na ini a ten disi, wan tra blesi di wi e kisi, na taki den banti fu lobi e kon moro tranga èn a bosroiti fu dini Yehovah makandra na wan getrow fasi, e kon moro tranga tu.

23. Fa wi ben sa kan gebroiki wi ten bun?

²³ Ibriwan fu wi kan prakseri fu situwâsi di skrifi na ini na artikel disi. Den situwâsi disi na eksempre nomo, ma den kan memre wi na trutru situwâsi pe wi kan gi den brada nanga sisa fu wi ’yepi di e gi den tranga’. A no de so taki wi e pruberi fu de leki den sma di e gebroiki den ten nomo fu meki a libi fu tra sma kon moro bun. Dati no ben de a marki fu den brada di kari na Kolosesma 4:10, 11. Den ben ’wroko makandra gi a kownukondre fu Gado’. A tranga di den ben gi sma, ben abi langalanga fu du nanga dati. Meki wi du a srefi sani.

24. San na a moro prenspari sani di e meki taki wi e begi gi tra sma èn e meki wi wani du muiti fu tranga den?

²⁴ Te wi e begi fu wisrefi, dan wi e kari sma na den nen èn wi e meki muiti fu tranga den, bika: Wi e bribi taki den brada nanga sisa fu wi wani „waka na wan fasi di warti gi Yehovah, fu plisi en dorodoro” (Kolosesma 1:10). A sani dati abi fu du nanga wan tra sani di Paulus ben taki fu en. A ben skrifi taki Epafras ben begi gi den Kolosesma, efu den ben sa kan „de lepi sma di abi wan tranga bribi na ini ala sani di Gado wani” (Kolosesma 4:12). Fa wisrefi kan tron so wan sma? Meki wi luku.

[Futuwortu]

 Yu Ben Si Disi?

• Fa wi ben sa kan gi tra sma moro yepi te wi e begi fu wisrefi?

• Na sortu fasi son Kresten ben gi Paulus ’yepi di ben gi en tranga’?

• Na ini sortu situwâsi wi kan gi tra sma ’yepi di e gi den tranga’?

• Fu san ede wi e begi gi den brada nanga den sisa fu wi èn e meki muiti fu tranga den?

[Aksi fu a tori disi]

[Prenki na tapu bladzijde 18]

Yu kan teki wan tra Kresten nanga yu te yu e go koiri nanga yu famiri?

[Sma di abi a reti fu a prenki]

Courtesy of Green Chimney’s Farm