A Pen Di Orloku E Tyari

„WINIMAN no de na ini orloku,” na so wan man ben taki di ben de wan srudati fosi èn di ben feti na ini a di fu Tu Grontapufeti. „Soso lasiman de na ini orloku.” Furu sma sa agri nanga a srudati disi. Den paiman fu orloku, takru srefisrefi. Den winiman èn so srefi den sma di lasi, e pai wan takru paiman. Srefi baka te fetiman tapu nanga wan feti, dan milyunmilyun sma e pina ete fu a bigi pen di na orloku tyari.

Sortu pen? Orloku kan kiri wan lo sma, èn nanga dati a e libi furu sma na baka leki weduwe èn so srefi furu pikin-nengre sondro papa noso mama. Furu sma di no dede na ini na orloku, e kisi bigi mankeri na den skin. A feti e siki den so srefi na frustan sei. Milyunmilyun sma e tan na baka leki pôtisma, noso kande den musu lowe go na tra presi. Wi kan frustan a bita-ati di e tan na ini na ati fu den sma disi di no dede na ini den sortu orloku disi? Wi kan frustan a sari di den sma disi e sari?

A Pen Di E Pori Sma

Langa baka di a feti tapu, baka di den gon no e sutu moro, èn baka di den srudati go na oso, dan a pen di orloku libi na ini den ati fu libisma, e tan pori den sma disi. A kan, taki geslakti baka geslakti den sma e tan hori tra sma na ati. Na so fasi a pen fu a wan orloku kan tron a rutu fu a tra feti.

Fu eksempre, na ini 1919 den kondre ben poti den nen na tapu wan kruderi di den ben kari a Kruderi fu Versailles. Nanga dati wan kaba ben kon na a Fosi Grontapufeti. Na ini a kruderi disi den ben skrifi sani di Doisrikondre ben musu du. Den Doisri ben si disi leki ogri sani èn wan fasi fa den tra kondre ben teki refensi tapu Doisrikondre. Soleki fa The Encyclopædia Britannica e taki, dan den kondisi di ben skrifi na ini a kruderi „ben meki taki den Doisri ati ben bron èn dati ben meki taki den ben wani suku refensi”. Wan tu yari baka dati, „fu di den ati ben bron nanga a vrede kruderi, dati meki Hitler ben kisi na okasi fu bigin en tori” èn na atibron disi ben de wan fu den sani di ben meki a di fu Tu Grontapufeti kon.

A di fu Tu Grontapufeti ben bigin na ini Polen èn baka dati a ben panya go so srefi na den Balkan Staten. Den grupu sma fu den difrenti kulturu nanga lo drape, ben hati makandra na ini den yari fu 1940 te go miti 1945. A pen dati di den ben gi makandra, ben sreka a pasi gi a feti fu den Balkan Staten na ini den yari baka 1990. „A bita-ati di sma ben abi gi trawan nanga a refensi di sma ben teki, meki wan lo tra problema kon di moro ogri srefi èn di panya go moro fara te na ini a ten fu wi,” na so a Doisri nyunsu koranti Die Zeit ben skrifi.

Efu ala libisma musu libi na ini vrede nanga makandra, dan a pen fu orloku musu dresi seiker. Fa a pen dati kan dresi? San sma kan du fu puru bita-ati nanga sari? Suma kan dresi a pen di orloku e tyari?

 [Sma di abi a reti fu a prenki na tapu a kafti]

KAFTI: Fatmir Boshnjaku

[Sma di abi a reti fu den prenki na tapu bladzijde 3]

U.S. Coast Guard photo; UN PHOTO 158297/J. Isaac