Meki Lobi Tranga Unu

„Yu musu lobi Yehovah, yu Gado, nanga yu heri ati èn nanga yu heri sili èn nanga yu heri frustan.”​—MATEUS 22:37.

1. (a) San na wan tu eigifasi di wan Kresten musu leri? (b) San na a moro prenspari Kresten eigifasi, èn fu san ede?

WAN Kresten musu leri furu sani fu kan tron wan bun dinari. A buku Odo e tyari kon na krin o prenspari a de fu wan Kresten abi sabi, frustan nanga koni (Odo 2:1-10). Na apostel Paulus ben taki o prenspari a de fu abi wan tranga bribi nanga wan tranga howpu (Romesma 1:16, 17; Kolosesma 1:5; Hebrewsma 10:39). A prenspari srefisrefi tu taki wi e horidoro èn taki wi man dwengi wisrefi (Tori fu den Apostel 24:25; Hebrewsma 10:36). Ma wi musu abi wan tra sani tu èn efu wi no abi a sani dati, dan ala den tra eigifasi fu wi no warti so furu moro, èn kan meki srefi taki den tra eigifasi disi de fu soso. A sani dati di wi musu abi, na lobi.​—1 Korentesma 13:1-3, 13.

2. Fa Yesus ben sori o prenspari lobi de, èn sortu aksi e opo kon fu dati ede?

² Yesus ben sori o prenspari lobi de, di a ben taki: „Nanga disi ala sma sa sabi taki unu na mi disipel, efu unu abi lobi na un mindri” (Yohanes 13:35). Fu di lobi na a marki di e sori suma na wan tru Kresten, dan wi musu aksi wisrefi sani soleki: San na lobi? Fu san ede lobi de so prenspari taki Yesus ben taki, dati a de a moro prenspari eigifasi fu den disipel fu en? Fa wi kan kweki lobi? Suma wi musu lobi? Meki wi poti prakseri na den aksi disi.

San Na Lobi?

3. San wi kan taki na lobi, èn fu san ede a de wan sani di abi fu du nanga a frustan nanga na ati?

³ Wan fasi fu taki san na lobi, na taki a de ’wan firi di yu abi te yu abi wan bun matifasi nanga wan tra sma, te yu e firi gi wan sma, noso te yu skin teki wan sma’. Lobi na wan eigifasi di e meki sma du bun sani gi trawan, èn son leisi a sma srefi di e sori lobi sa abi fu gi furu fu ensrefi. Soleki fa Bijbel e taki, dan lobi na wan sani di abi fu du nanga a frustan nanga na ati. A frustan fu wan sma de prenspari bika wan sma di lobi trawan, e du disi ala di a e frustan taki problema sa opo kon; a e frustan taki ensrefi nanga tra sma di a lobi, abi swakifasi èn so srefi moi eigifasi. Moro fara, a frustan de ini a tori tu fu di wan Kresten e sori lobi gi den wan di, son leisi kande, ensrefi no ben o lobi, ma e du dati fu di a leisi na ini Bijbel taki Gado wani a du dati (Mateus 5:44; 1 Korentesma 16:14). Toku, te yu e luku en bun, dan lobi na wan sani fu na ati. Soleki fa Bijbel e taki fu en, dan trutru lobi noiti no de wan sani di sma e du nanga den frustan nomo. Wan sma sa musu sori taki a de trutru opregti èn taki a e firi trutru gi tra sma.​—1 Petrus 1:22.

4. Na sortu fasi lobi na wan tranga banti?

⁴ Sma di ala ten e denki densrefi nomo, moro furu no man lobi wan tra sma trutru, bika wan sma di lobi trawan de klariklari fu poti den afersi fu trawan fosi di fu en (Filipisma 2:2-4). Yesus ben taki dati „a moro koloku fu gi sani leki fu kisi sani”, èn disi de so trutru, spesrutu te wi e gi sma sani fu di wi lobi den (Tori fu den Apostel  20:35). Lobi na wan tranga banti di e hori sma makandra (Kolosesma 3:14). Nofotron lobi abi fu du nanga matifasi, ma lobi tranga moro leki a banti di mati abi nanga makandra. Son leisi, sma e taki dati a firi di wan masra nanga en wefi abi gi makandra, na lobi; ma Bijbel e gi wi deki-ati fu kweki wan lobi di e tan moro langa leki a lobi di tu sma abi gi makandra fu skin firi ede. Te tu sma lobi makandra trutru, dan den e tan nanga makandra, srefi te den no man abi demakandra moro na skin sei fu di den kon owru èn kon siki, noso fu di wan fu den no man du furu sani moro.

Lobi​—Wan Prenspari Eigifasi

5. Fu san ede lobi na wan prenspari eigifasi gi wan Kresten?

⁵ Fu san ede lobi na wan prenspari eigifasi gi wan Kresten? Na a fosi presi, fu di Yesus ben komanderi den bakaman fu en fu lobi makandra. A ben taki: „Unu na mi mati efu unu e du san mi e komanderi unu. Mi e komanderi unu den sani disi, taki unu musu lobi makandra” (Yohanes 15:14, 17). A di fu tu sani na fu di Yehovah srefi na lobi, èn wi leki anbegiman fu en musu du san en e du (Efeisesma 5:1; 1 Yohanes 4:16). Bijbel e taki dati wi sa kisi têgo libi te wi e teki sabi fu Yehovah nanga Yesus. Fa wi kan taki dati wi sabi Gado efu wi no e pruberi fu de neleki en? Na apostel Yohanes ben rideneri so: „A sma di no abi lobi, no kon sabi Gado, bika Gado na lobi.”​—1 Yohanes 4:8.

6. Fa lobi kan yepi wi fu si difrenti sani na ini wi libi na wan yoisti fasi?

⁶ Lobi prenspari fu a di fu dri sani ede: A e yepi wi fu si difrenti sani na ini wi libi na wan yoisti fasi, èn a e meki wi du sani nanga a yoisti denki. Fu eksempre, a prenspari srefisrefi fu teki sabi fu Gado Wortu doronomo. A sabi disi de leki nyanyan gi wan Kresten. A e yepi en fu gro kon lepi èn fu du sani soleki fa Gado wani (Psalm 119:105; Mateus 4:4; 2 Timoteus 3:15, 16). Ma Paulus ben warskow: „Sabi e meki sma kisi heimemre, ma lobi e tranga sma” (1 Korentesma 8:1). Nôno, a no fowtu fu abi soifri sabi. A problema de na wi bika wi abi sondu firi (Genesis 8:21). Efu wan sma abi sabi ma no abi lobi, dan a sabi di a abi ben sa kan meki a kisi heimemre èn ben kan meki a denki taki a betre moro trawan. Dati no sa pasa te a moro prenspari sani di e meki a du sani gi trawan, na lobi. „Lobi . . . no e dyaf, a no abi bigifasi” (1 Korentesma 13:4). Wan Kresten di e du sani fu di a lobi sma, no e kisi bigifasi, srefi te a kon abi furu sabi. Lobi e meki taki a e tan abi sakafasi èn a e hori en fu no meki wan nen gi ensrefi.​—Psalm 138:6; Yakobus 4:6.

7, 8. Fa lobi e yepi wi fu poti prakseri na den moro prenspari sani?

⁷ Paulus ben skrifi den Filipisma: „Disi na san mi e tan begi, taki a lobi fu unu kan kon moro nanga moro nanga a soifri sabi èn nanga ala a koni fu man si sani krin, so taki unu kan kon sabi seiker san na den moro prenspari sani” (Filipisma 1:9, 10). Kresten lobi sa yepi wi fu du soleki fa wi kisi a deki-ati dya fu kon sabi seiker san na den moro prenspari sani. Teki fu eksempre san Paulus ben taigi Timoteus: „Efu wan sma e suku fu kisi wan wroko leki opziener, dan a wani wan tumusi bun wroko” (1 Timoteus 3:1). Na ini a dienstyari 2000, ete 1502 gemeente seti na heri grontapu, so taki ala nanga ala, 91.487 gemeente de now. Fu dati ede, moro owruman de fanowdu, èn den wan di e suku fu kisi a grani dati, trutru de fu prèise.

⁸ Ma den wan di e suku fu kisi a grani fu de fesiman, sa tan si san na den moro prenspari sani, efu den e hori na prakseri fu san ede brada e kisi so wan grani. Den sani soleki a frantwortu di wan fesiman abi noso a moro bigi grani, no de prenspari. Owruman di e plisi Yehovah e du a wroko fu den fu di den lobi Yehovah èn fu di den lobi den brada fu den. Den no e suku fu kon de wan prenspari sma, noso fu kisi makti. Baka di na apostel Paulus ben gi den gemeente owruman a rai fu tan abi wan bun fasi fu denki, dan a ben taki o prenspari a de fu abi „sakafasi”. A ben gi ala sma fu a gemeente a rai disi: „Saka unsrefi . . . na ondro a makti anu fu Gado” (1 Petrus 5:1-6). A de wan bun sani efu iniwan sma di e suku fu kisi wan grani, e poti prakseri na a eksempre fu den someni owruman na heri grontapu di e wroko tranga, di abi  sakafasi, èn na so fasi de wan blesi gi a gemeente fu den.​—Hebrewsma 13:7.

A Yoisti Denki E Yepi Wi fu Horidoro

9. Fu san ede Kresten e hori den blesi di Yehovah pramisi, na prakseri?

⁹ Wan tra sani e meki taki a prenspari fu du sani nanga lobi. Bijbel e pramisi taki den wan di e gi densrefi na Gado fu di den lobi en, sa kisi furu blesi nownow èn kefalek moi blesi na ini a ten di e kon (1 Timoteus 4:8). Te wan Kresten e bribi tranga na ini den pramisi disi èn no e tweifri kwetikweti na Yehovah taki „a e tron a sma di e pai den wan di e suku en seryusu”, dan dati e yepi en fu tanapu kánkan na ini a bribi (Hebrewsma 11:6). Moro furu fu wi wani trutru taki Gado en pramisi musu kon tru, èn neleki na apostel Yohanes wi e taki: „Amen! Kon, Masra Yesus” (Openbaring 22:20). Iya, te wi e denki dipi fu den blesi di wi sa kisi dyonsro efu wi de getrow, dan dati e tranga wi fu horidoro, neleki fa Yesus ben man horidoro fu di a ben hori ’a prisiri di ben poti na en fesi’, na prakseri.​—Hebrewsma 12:1, 2.

10, 11. Fa a du di wi e du sani nanga lobi e yepi wi fu horidoro?

¹⁰ Fa a de dan, efu wi e dini Yehovah soso fu di wi wani libi na ini a nyun grontapu? Dan wi ben kan lasi pasensi heri esi, noso wi no ben sa de tevrede te problema e kon, noso te sani no e pasa leki fa wi wani noso na a ten di wi feni bun. A bigi kefar ben kan de taki wi kan drifi gowe (Hebrewsma 2:1; 3:12). Paulus ben taki fu wan kompe fu en di ben nen Demas. Demas ben gowe libi en. Fu san ede? Fu di „a ben lobi a disiten seti fu sani” (2 Timoteus 4:10). Iniwan sma di e du diniwroko soso fu kisi wini gi ensrefi, kan go du a srefi sani. Den kan kon lobi den sani di grontapu e gi wantewante èn no sa wani libi den sani dati na wan sei now, fu kisi blesi di musu kon ete.

¹¹ Na wan bun sani te wi wani fu kisi blesi na ini a ten di e kon, èn a no wan freimde sani te wi e howpu tapu frulekti fu problema, ma lobi e meki wi frustan san na den moro prenspari sani na ini wi libi. A no a wani fu wi prenspari ma na a wani fu Yehovah (Lukas 22:41, 42). Iya, lobi e tranga wi. Lobi e meki a de wan prisiri sani fu wakti a Gado fu wi. Wi de tevrede nanga awansi sortu blesi a e gi, èn wi de seiker taki na en reti ten wi sa kisi ala sani di a pramisi — èn moro sani srefi (Psalm 145:16; 2 Korentesma 12:8, 9). Na a srefi ten, lobi e yepi wi fu tan dini en sondro fu denki wisrefi nomo, bika „lobi . . . no e du sani di de fu en eigi bun nomo”.​—1 Korentesma 13:4, 5.

Suma wan Kresten Musu Lobi?

12. Suma wi musu lobi neleki fa Yesus e taki?

¹² Yesus ben gi wan fondamenti tirilin di e sori suma wi musu lobi, di a ben kari tu sani fu a Wet fu Moses. A ben taki: „Yu musu lobi Yehovah, yu Gado, nanga yu heri ati èn nanga yu heri sili èn nanga yu heri frustan” èn „Yu musu  lobi a sma na yu sei leki yusrefi”.​—Mateus 22:37-39.

13. Fa wi kan leri fu lobi Yehovah, ala di wi no kan si en?

¹³ Den wortu fu Yesus e sori krin taki a moro prenspari sma di wi musu lobi, na Yehovah. Ma wi no abi lobi gi Yehovah wantewante te wi gebore. Dati na wan sani di wi musu leri. A fosi leisi di wi yere fu en, wi kon lobi en fu den sani ede di wi yere. Safrisafri wi ben kon sabi fa a ben sreka grontapu gi a libisma famiri (Genesis 2:5-23). Wi ben kon sabi fa a handri nanga a libisma famiri; a no libi wi na wan sei di sondu kon na ini a libisma famiri, ma a du wan sani fu frulusu wi (Genesis 3:1-5, 15). A ben handri na wan switi fasi nanga den wan di ben de getrow, èn te fu kaba a ben gi en wan-enkri gebore Manpikin fu gi wi pardon fu wi sondu (Yohanes 3:16, 36). Fu di wi ben kon sabi den sani disi, meki wi kon warderi Yehovah moro (Yesaya 25:1). Kownu David ben taki dati a ben lobi Yehovah fu di A ben sorgu gi en nanga lobi (Psalm 116:1-9). Na ini a ten disi, Yehovah e sorgu gi wi, a e tiri wi, a e tranga wi, èn a e gi wi deki-ati. O moro wi e leri sabi en, o moro a lobi fu wi e kon moro tranga.​—Psalm 31:23; Sefania 3:17; Romesma 8:28.

Fa Wi Kan Sori a Lobi fu Wi?

14. Na sortu fasi wi kan sori taki wi lobi Gado trutru?

¹⁴ A no de fu taki dati furu sma na heri grontapu e taki dati den lobi Gado, ma te wi e luku den sani di den e du, dan dati e sori tra fasi. Fa wi kan sabi taki wi lobi Yehovah trutru? Wi kan taki nanga en na ini begi èn wi kan fruteri en fa wi e firi. Èn wi kan du sani na so wan fasi di e sori taki wi lobi en. Na apostel Yohanes ben taki: „A sma di e hori ensrefi na a Wortu fu [Gado], na a sma di e sori taki a lobi Gado trutru. Fu dati ede wi sabi taki wi de wán nanga en” (1 Yohanes 2:5; 5:3). Boiti tra sani, Gado Wortu e fruteri wi fu abi demakandra nanga makandra, èn fu libi wan krin libi pe wi e tyari wisrefi na wan bun fasi. Wi e luku bun fu no hoigri, wi e taki waarheid, èn wi e sorgu taki wi no e doti a frustan fu wi (2 Korentesma 7:1; Efeisesma 4:15; 1 Timoteus 1:5; Hebrewsma 10:23-25). Wi e sori lobi te wi e gi materia sani na sma di de na nowtu (1 Yohanes 3:17, 18). Wi no e draidrai fu fruteri tra sma fu Yehovah. Dati wani taki dati wi e teki prati na a preiki fu a bun nyunsu fu a Kownukondre na heri grontapu (Mateus 24:14; Romesma 10:10). Te wi e gi yesi na Gado Wortu, fu di wi e du den sani disi, dan dati e sori taki wi lobi Yehovah trutru.

15, 16. Fa lobi gi Yehovah ben abi krakti tapu someni sma na ini a yari di pasa?

¹⁵ Lobi gi Yehovah e yepi sma fu teki yoisti bosroiti. A yari di pasa, a lobi dati meki taki 288.907 sma gi densrefi abra na en, èn den ben dopu na ini watra fu sori taki den teki a bosroiti dati (Mateus 28:19, 20). A gi di den ben gi densrefi abra ben de wan prenspari okasi. Na a okasi fu sori taki den ben kenki den libi. Fu eksempre, Gazmend ben de wan fu den moro bigi barinen basketbalman na Albania. En nanga en wefi ben studeri Bijbel wan tu yari kaba, èn ala di den ben abi fu du nanga problema, toku te fu kaba den ben doro den markitiki fu de Kownukondre preikiman. A yari di pasa, Gazmend dopu, èn a ben de wan fu den 366 sma di dopu na Albania na ini a dienstyari 2000. Wan koranti ben tyari wan artikel kon na doro fu en èn na artikel dati ben taki: „En libi abi wan marki, fu  dati ede disi na a moro koloku pisi ten fu en nanga en osofamiri. A no prenspari gi en moro fu si san a kan du fu kisi wini gi ensrefi nomo, ma na presi fu dati, a e luku san a kan du fu yepi tra sma.”

¹⁶ Na so a ben de tu nanga wan sisa di no dopu so langa pasa. A ben wroko na wan oli bisnis na a kondre Gwam èn den ben wani gi en wan moro prenspari frantwortu. Baka di a ben kisi moro nanga moro frantwortu someni yari langa, den ben gi en na okasi fu tron a fosi uma vice-president fu a bisnis. Ma a ben gi en libi na Yehovah now. So bun, baka di a taki nanga en masra fu a sani disi, dan a nyun sisa bosroiti fu no teki a wroko. Na presi fu dati, a ben seti en so fu wroko afu dei, so taki a ben kan du muiti fu tron wan furuten dinari, wan pionier. Lobi gi Yehovah meki taki a ben wani dini en leki wan pionier na presi fu suku gudu na ini a grontapu disi. Te yu e luku en bun, dan na heri grontapu a lobi disi gi Yehovah meki taki 805.205 sma ben teki prati na difrenti fasi fu pionierwroko na ini a dienstyari 2000. Den pionier ben sori lobi nanga bribi fu tru!

Den Sani Di E Meki Wi Lobi Yesus

17. Sortu moi eksempre fu lobi wi e si te wi e luku Yesus?

¹⁷ Yesus na wan tumusi moi eksempre fu wan sma di e du sani fu di a abi lobi. Di a no ben kon na grontapu ete leki libisma, dan a ben lobi en Tata èn a ben lobi a libisma famiri. Leki a sma di e prenki koni srefi, a ben taki: „Mi ben tron leki wan basi wrokoman na [Yehovah] sei, èn mi ben tron a sma di spesrutu a ben abi waran firi gi dei na dei, èn mi ben breiti na en fesi ala ten, mi ben breiti nanga a fatu gron fu a grontapu fu en, èn den sani di mi ben abi waran firi gi den trutru, ben de den manpikin fu libisma” (Odo 8:30, 31). Lobi ben meki taki Yesus gowe libi en tanpresi na hemel fu kon gebore leki wan beibi. A ben handri nanga pasensi èn nanga switifasi nanga den safri-atisma èn den pôtisma, èn a nyan pina fu den feanti fu Yehovah. Te fu kaba, a dede na wan pina-udu gi a heri libisma famiri (Yohanes 3:35; 14:30, 31; 15:12, 13; Filipisma 2:5-11). Fa disi de wan tumusi moi eksempre fu du sani nanga a yoisti reide!

18. (a) Fa wi e kweki lobi gi Yesus? (b) Na sortu fasi wi e sori taki wi lobi Yesus?

¹⁸ Te den sma nanga wan soifri ati, e leisi den tori fu Yesus en libi na ini den Evangelie èn e denki dipi fu omeni blesi a kisi fu di a ben de  getrow na ini en libi, dan dati e meki den kisi tranga lobi gi en. Wi na ini a ten disi de leki den sma di Petrus ben taigi a sani disi: „Ala di unu no si [Yesus] noiti, toku unu lobi en” (1 Petrus 1:8). Wi e sori taki wi lobi en, te wi e bribi na ini en èn e gi wisrefi soleki fa a ben gi ensrefi na ini en libi (1 Korentesma 11:1; 1 Tesalonikasma 1:6; 1 Petrus 2:21-25). Na alayari Memrefesa fu a dede fu Yesus di ben hori tapu 19 april 2000, ben memre 14.872.086 sma fu san ede wi lobi Yesus. Dati ben de wan bigi grupu fu tru! Èn fa disi e tranga wi fu di wi sabi taki someni sma wani kisi frulusu nanga yepi fu Yesus en srakti-ofrandi! A lobi di Yehovah nanga Yesus abi gi wi èn a lobi di wi abi gi den, e tranga wi fu tru.

19. Sortu aksi wi sa luku na ini na artikel di e kon?

¹⁹ Yesus ben taki dati wi musu lobi Yehovah nanga wi heri ati, nanga wi heri sili, nanga wi heri frustan, èn nanga ala wi krakti. Ma a ben taki so srefi taki wi musu lobi tra sma neleki fa wi lobi wisrefi (Markus 12:29-31). Suma na den tra sma disi? Èn fa lobi gi tra sma e yepi wi fu du sani na wan yoisti fasi en nanga wan yoisti reide? Wi sa taki fu den aksi disi na ini na artikel di e kon.

Yu E Memre Disi Ete?

• Fu san ede lobi na wan eigifasi di prenspari srefisrefi?

• Fa wi kan kweki lobi gi Yehovah?

• Fa a fasi fa wi e tyari wisrefi e sori taki wi lobi Yehovah?

• Fa wi e sori taki wi lobi Yesus?

[Aksi fu a tori disi]

[Prenki na tapu bladzijde 10, 11]

Lobi e yepi wi fu wakti nanga pasensi tapu frulekti fu den nowtu fu wi

[Prenki na tapu bladzijde 12]

A bigi srakti-ofrandi di Yesus ben tyari e buweigi wi fu lobi en