Ondrofenitori

Mi E Dini Nanga Mi Heri Sili ala di Tesi E Miti Mi

SOLEKI FA RODOLFO LOZANO FRUTERI

Mi gebore na Meksikow, na ini a foto Gomez Palacio, Durango State, tapu 17 september 1917. Na a ten dati den feti fu a Meksikow Revo ben de fayafaya. Ala di wan kaba ben kon na a revo na ini 1920, toku sma ben e tan feti furu yari langa baka dati na ini a kontren pe wi ben libi. A sani dati ben meki taki a libi ben tranga.

WAN leisi, di mi mama kon sabi taki a legre fu opruruman ben o feti nanga a legre fu a kondre, dan a hori mi nanga den dri brada nanga tu sisa fu mi na ini oso wan tu dei langa. Wi ben abi pikinso nyanyan nomo, èn mi e memre fa mi ben e kibri nanga mi pikin sisa na ondro a bedi. Baka dati, mi mama bosroiti fu teki wi tyari go na Amerkankondre, èn mi papa ben o kon drape tu baka ten.

Wi doro California na ini 1926, wan syatu pisi ten bifo a Bigi Depressie broko na ini Amerkankondre. Wi go ala sei pe wi ben man feni wroko, na den presi soleki San Joaquin Valley, Santa Clara, Salinas, nanga King City. Wi leri du gronwroko èn wi leri so srefi fu du kotiwroko fu ala sortu froktu nanga gruntu. Ala di mi ben gwenti fu wroko bun tranga leki wan yongusma, toku a ten dati ben switi.

Mi Miti Nanga Bijbel Waarheid

Na ini maart fu 1928, wan Bijbel Ondrosukuman, soleki fa sma ben sabi den Kotoigi fu Yehovah na a ten dati, kon na wi oso. A ben de wan owru man di nen Esteban Rivera, èn a ben taki Spanyoro. A nen fu a pikin buku di a gi unu, „Waar zijn de Dooden? (Pe den Dedewan De?)”, èn so srefi den sani di ben skrifi na ini, ben naki mi ati. Ala di mi ben yongu, toku mi ben du muiti fu studeri Bijbel èn mi ben abi demakandra nanga den Bijbel Ondrosukuman. Baka wan pisi  ten, mi mama nanga mi sisa Aurora, so srefi tron sma di ben prèise Yehovah fayafaya.

Na ini den yari krosibei fu 1935, den brada bow wan Kownukondre zaal gi na Ingrisitongo gemeente na ini San Jose. Fu di furu fu den sma di ben taki Spanyoro ben wroko na burugron na ini a kontren dati, dati meki wi bigin preiki gi den èn wi bigin hori a Waktitoren-studie. Wi ben du disi nanga yepi fu den Kotoigi fu San Francisco di ben taki Spanyoro. San Franscisco ben de so wan 80 kilometer pasa a presi pe wi ben e preiki. Baka wan pisi ten, so wan 60 sma ben e kon na den konmakandra na ini Spanyoro di ben e hori na ini a Kownukondre zaal na ini San Jose.

Te fu kaba, tapu 28 februari 1940, na wan bigi konmakandra na ini San Jose, mi teki dopu na ini watra fu sori taki mi ben gi misrefi abra na Yehovah. A yari baka dati, mi tron wan pionier, dati na wan dinari fu Yehovah Kotoigi di e du furuten diniwroko. Baka dati, na ini april 1943, mi kisi kari fu froisi go na Stockton fu go seti wan Spanyoro gemeente. A foto disi ben de so wan 130 km pasa pe mi ben tan. Na a ten dati, mi ben e dini leki a fesiman opziener fu na Ingrisitongo gemeente na ini San Jose, èn mi ben e dini den Kotoigi drape tu di ben taki Spanyoro. Baka di mi seti sani so, taki tra brada ben o du den wroko disi, dan mi froisi go na Stockton.

Mi Soifri Retifasi E Kisi Tesi

Na ini 1940, a legre bigin kari mi ibri leisi baka fu du srudatiwroko, ma ibri leisi den ben sori taki den ben frustan taki mi no ben o man du a wroko dati, fu di mi ben hori misrefi na Bijbel gronprakseri. Heri esi baka di Amerkankondre bigin feti na ini a di fu tu grontapufeti na ini december 1941, dan mi bigin kisi moro hebi kwinsi fu a legre. Te fu kaba, na ini 1944, den poti mi na strafu-oso. Ala di mi ben e wakti a strafu di mi ben o kisi, dan den poti mi na ini wan ondrogron kamra, makandra nanga ogriman. Di den ogriman kon sabi taki mi ben de wan fu den Kotoigi fu Yehovah, dan furu fu den ben wani sabi efu den ogri di den ben du ben meki taki Gado no ben feni den bun.

Kotoigi na ini San Jose pai moni so taki mi ben kan komopo na strafu-oso, ala di mi ben e wakti a ten di mi ben o musu go na fesi krutu. Wan afkati na ini Los Angeles di ben abi a wroko fu feti gi den reti fu borgu, ben bosroiti fu teki a krutu afersi fu mi, èn mi no ben abi fu pai en. A krutuman bosroiti fu no poti mi na strafu-oso moro. Ma a ben wani taki mi ben musu tapu nanga a pionierwroko, mi ben musu go du grontapuwroko, èn so srefi mi ben musu go na den lanti tiriman ibri mun, fu taigi den san mi ben e du. Mi no agri nanga a sani dati, èn fu dati ede mi  kisi tu yari strafu na a strafu-oso di ben de na tapu McNeil Èilanti na ini Washington State. Drape mi gebroiki mi ten fu studeri Bijbel fayafaya. Mi leri so srefi fu wroko nanga wan skrifimasyin. Mi no ben de drape tu yari ete di den lusu mi, fu di mi ben tyari misrefi na wan bun fasi. Mi bigin wantewante fu seti sani so, taki mi ben kan go doro nanga a pionierwroko.

A Wroko Gro Kon Moro Bigi

Na ini winter fu 1947, mi nanga wan kompepionier ben musu go na Colorado City, wan foto na ini Texas, fu go preiki na mindri den sma drape di ben taki Spanyoro. Ma a ben kowru sote, taki wi go na San Antonio pe a ben waran. Ma drape, alen kon so furu taki wi no ben man go preiki oso-fu-oso. Heri esi wi no ben abi moni moro. Furu wiki langa wi nyan soso brede nanga koro di no ben bori èn wi dringi te fu wan wiwiri di den e kari alfalfa. Mi kompe drai go baka na oso, ma mi tan drape. Di den Kotoigi di ben e taki Ingrisitongo kon si taki mi ben abi nyanyan nanga tra sani fanowdu, dan den bigin yepi mi.

A lente baka dati, mi drai go baka na Colorado City fu go doro nanga a wroko fu mi drape, èn te fu kaba wan pikin gemeente fu sma di ben taki Spanyoro, ben seti. Baka dati mi froisi go na a foto Sweetwater na ini Texas, pe mi yepi seti wan tra Spanyoro gemeente. Ala di mi ben de na ini a foto Sweetwater, dan mi kisi wan brifi. A brifi ben skrifi taki mi ben kisi kari fu go na a di fu 15 klas fu a Waktitoren Bijbelskoro Gilead. A skoro ben o bigin tapu 22 februari 1950, èn drape mi ben o kisi leri fu tron wan zendeling. Mi klari a skoro nanga bun bakapisi a zomer dati na a internationaal kongres di ben hori na ini a Yankee Stadium na New York. Baka dati mi tan dri mun langa na a edekantoro fu Yehovah Kotoigi di e tiri a wroko na heri grontapu èn di de na ini Brooklyn. Drape mi kisi leri fu du a wroko di mi ben kisi fu du na a bijkantoro fu Meksikow.

A Wroko na ini Meksikow

Mi doro na ini Meksikow City, a mamafoto fu Meksikow, tapu 20 oktober 1950. So wan tu wiki baka dati, mi kisi a wroko leki bijkantoor opziener, èn mi du a wroko disi fo nanga afu yari langa. Den sani di mi ben leri na ini a pionierwroko, na ini strafu-oso, na Gilead, èn so srefi na Brooklyn, ben yepi mi furu fu du a wroko di mi ben kisi fu du. Di mi doro na Meksikow, dan mi si heri esi taki a ben de fanowdu srefisrefi fu tranga a yeye fasi fu den brada nanga sisa fu wi na ini a kondre disi. A ben de spesrutu fanowdu fu yepi den fu hori densrefi na den hei gronprakseri fu Gado en Wortu, di e sori wi a yoisti fasi fu handri èn fu denki.

A ben de wan gwenti na ini den kondre fu Latijns-Amerika, taki wan man nanga wan uma e libi makandra sondro taki den ben trow akruderi wet. Den kerki fu Krestenhèit, spesrutu a Lomsu Kerki, no ben du noti fu puru a gwenti disi di no de akruderi Bijbel (Hebrewsma 13:4). Fu dati ede, wan tu sma ben tron memre fu den gemeente fu Yehovah Kotoigi, ala di den no ben trow akruderi wet. Now den brada ben seti sani so, taki den sma dati ben kisi siksi mun fu seti den libi akruderi wet. Efu den no ben du dati, dan den brada no ben o si den leki Kotoigi fu Yehovah moro.

Gi furu fu den sma a no ben de wan problema fu seti den libi. A wan-enkri sani di den ben musu du, na taki den ben musu trow. Gi trawan, sani no ben de so makriki. Fu gi wan eksempre, wan tu fu den ben trow tu leisi, dri leisi srefi, sondro taki den ben broko trow akruderi wet. Te fu kaba, den trowlibi fu a pipel fu Yehovah ben de akruderi den leri fu a Wortu fu Gado. Baka dati den brada nanga sisa nyan bun fu tumusi moi blesi na yeye fasi na ini den gemeente.​—1 Korentesma 6:9-11.

Na ini a ten dati, sma no ben kisi nofo skoro leri na ini Meksikow. Bifo mi ben doro drape srefi na ini 1950, a bijkantoro ben bigin seti wan leri leisi èn skrifi skoro na ini den gemeente. Wi seti den skoro disi baka, èn wi seti sani fu skrifi den skoro disi na ini lantibuku. Sensi 1946, di sma bigin poti tapu papira omeni sma ben kisi leri na den skoro disi, moro leki 143.000 sma na ini Meksikow ben leri fu leisi èn skrifi na den skoro fu den Kotoigi!

Den wet fu Meksikow no ben erken ala kerki. Ma na ini den yari di no pasa so langa ete, prenspari kenki kon na ini den wet disi. Na ini 1992 a  kondre meki wan nyun wet di ben abi fu du nanga kerki afersi. Na so fasi lanti kon erken Yehovah Kotoigi leki wan kerki organisâsi na ini 1993.

A fasi disi fa sani kenki gi mi bun furu prisiri, bika fosi mi no ben denki taki a ben o man pasa. Mi ben go na den lantikantoro doronomo furu yari langa èn mi ben si taki den sma drape no ben lobi fu si mi. Toku, a moi fu si fa a Juridische Afdeling fu wi bijkantoro seti den afersi disi, so taki now wi no e kisi so furu problema moro te wi e du preikiwroko.

Mi E Dini Makandra Nanga wan Zendeling Patna

Di mi doro na Meksikow, furu sma di ben klari Gileadskoro nanga bun bakapisi fosi mi, ben de na ini a kondre kaba. Wan fu den sma disi ben de Esther Vartanian, wan Kotoigi fu a kondre Armeinia, di ben bigin pionier na ini 1942 na ini Vallejo, na California. Wi trow tapu 30 yuli 1955, èn baka dati wi go doro nanga a wroko di wi ben kisi fu du na ini Meksikow. Esther tan du zendelingwroko na ini Meksikow City, èn wi ben libi na a bijkantoro, pe mi ben tan du diniwroko.

Na ini 1947, Esther doro na Monterrey, Nuevo León, Meksikow, a fosi presi pe a ben musu du zendelingwroko. Wán gemeente nomo fu 40 Kotoigi ben de na ini Monterrey. Ma na a ten di a Genootschap seni en go na Meksikow City na ini 1950, fo gemeente ben de drape. Nownowde, tu yongu sma fu den osofamiri di Esther ben studeri Bijbel nanga den, de na a bijkantoro fu wi di de krosibei fu Meksikow City. Esther studeri Bijbel nanga den osofamiri dati, na a ten di a ben du diniwroko na Monterrey.

Na ini 1950, den zendeling ben abi pikinmoro a heri Foto Meksikow leki a gebied pe den ben musu preiki. Den ben waka go na ala den presi pe den ben musu preiki. Den ben rèi so srefi nanga bus di ben owru srefisrefi, èn den ben lai nanga sma. Di mi doro drape na a kaba fu 1950, seibi gemeente ben de. Now pikinmoro 1600 gemeente nanga moro leki 90.000 Kownukondre preikiman  de na ini Meksikow City, èn a yari di pasa, moro leki 250.000 sma drape go na a Memrefesa fu a dede fu Krestes! Na ini den yari di pasa, mi nanga Esther kisi a grani fu dini na ini furu fu den gemeente disi.

Te mi nanga Esther e bigin wan bijbelstudie, dan wi ala ten e pruberi fu taki nanga a papa fu na osofamiri, so taki a heri osofamiri abi wan prati na a bijbelstudie. Leki bakapisi fu dati wi si taki furu osofamiri kon tron futuboi fu Yehovah. Mi e bribi taki wan fu den sani di meki taki a tru anbegi gro so esi na ini Meksikow, na fu di furutron heri osofamiri e kon makandra na ini a tru anbegi.

Yehovah Blesi a Wroko

Sensi 1950 a wroko na ini Meksikow go moi na fesi. Furu sma tron tru anbegiman, èn so srefi furu kenki kon na ini a fasi fa sani orga. Mi breiti srefisrefi taki mi yepi pikinso fu meki a wroko go na fesi, ala di mi ben wroko makandra nanga den sma disi di de koloku èn di abi switifasi gi trawan.

Karl Klein, di e dini leki wan memre fu a Tiri Skin fu Yehovah Kotoigi, kon luku wi makandra nanga en wefi, Margaret, di den ben de nanga fakansi wan tu yari pasa. Brada Klein ben wani si fa a wroko ben go na ini Meksikow, èn fu dati ede en nanga Margaret kon na a gemeente na ini a birti San Juan Tezontla, di de krosibei fu Meksikow City. Wi ben de memre fu a gemeente disi na a ten dati. A zaal fu wi ben pikin, a ben bradi pikinmoro fo nanga afu meter, èn a ben langa pikinmoro feifi nanga afu meter. Di wi doro drape, pikinmoro 70 sma ben de drape kaba, èn pikinmoro presi no ben de fu tanapu. Den bigisma ben e sidon na tapu sturu, den sma di ben de moro yongu ben sidon na tapu bangi, èn pikin-nengre ben sidon na tapu ston, noso na gron.

A sani disi ben naki na ati fu Brada Klein fu di ala den pikin ben abi den eigi Bijbel na den èn den ben luku den bijbeltekst, makandra nanga a takiman. Baka a publikitaki, Brada Klein taki fu Mateus 13:19-23 èn a taki dati Meksikow abi furu fu a „bun gron” di Yesus ben taki fu en. Nownowde, seibi fu den pikin di ben de na a konmakandra a dei dati, e teki prati na a bigi wroko fu bow a bijkantoro fu wi kon moro bigi. A bijkantoro de krosibei fu Meksikow City. Wan tra brada e dini na Bethel, èn wan tu trawan na pionier!

Na a ten di mi ben kon na Meksikow City, a bijkantoro fu wi ben abi erfu memre nomo. Now so wan 1350 sma e wroko dyaso, èn so wan 250 fu den e yepi fu bow den nyun pisi fu a bijkantoro. Te ala a wroko disi kaba, kande na ini 2002, dan so wan 1300 sma moro sa man tan na a bijkantoro di bow kon moro bigi. Yu musu sabi taki na ini 1950 wi ben abi moro mendri leki 7000 Kownukondre preikiman na ini a heri kondre, ma now mi abi moro leki 500.000! Mi ati e prisiri srefisrefi te mi e si fa Yehovah blesi a muiti fu den brada fu wi na Meksikow di abi sakafasi, èn di e wroko so tranga fu gi en prèise.

Wan Bigi Tyalensi E Miti Mi

Wan fu den moro bigi tyalensi di miti mi den dei disi, na siki. Mi no ben de wan sma di ben gwenti fu siki. Ma na ini november 1988, mi kisi wan berurtu di meki taki mi skin kon lan. Tangi fu Yehovah, mi kon kisi misrefi pikinso nanga yepi fu oefening èn nanga a datra yepi di mi kisi. Ma a no mi heri skin e wroko leki fa mi ben sa wani. Datra e tan yepi mi èn den e tan luku mi fu sorgu taki mi no e kisi hebi ede-ati moro, èn so srefi tra sani di mi kisi leki bakapisi fu a siki fu mi.

Ala di mi no man du so furu moro leki san mi ben sa wani, toku mi de tevrede fu di mi ben man yepi furu sma fu kon sabi den prakseri fu Yehovah èn fu tron futuboi fu en di gi densrefi abra na en. Mi e kisi prisiri tu fu di mi e taki nanga so furu Kresten brada nanga sisa leki a kan, te den e kon na wi bijkantoro; mi e firi taki wi e gi makandra deki-ati.

Mi kisi furu tranga fu di mi sabi taki Yehovah e warderi a diniwroko di wi e du gi en, èn fu di mi sabi taki den sani di wi du no de fu soso (1 Korentesma 15:58). Ala di mi e siki èn mi no man du so furu moro, toku mi poti prakseri na den wortu fu Kolosesma 3:23, 24: „Awansi san unu e du, du en nanga un heri sili leki gi Yehovah èn no gi libisma, bika unu sabi taki na fu Yehovah unu sa kisi a reti paiman fu na erfenis.” Akruderi a frumane disi, mi leri fu dini Yehovah nanga mi heri sili ala di tesi e miti mi.

[Prenki na tapu bladzijde 24]

Na ini 1942 di mi ben de wan pionier

[Prenki na tapu bladzijde 24]

A wefi fu mi bigin du a zendelingwroko fu en na ini Meksikow na ini 1947

[Prenki na tapu bladzijde 24]

Mi nanga Esther now

[Prenki na tapu bladzijde 26]

Tapusei na a kruktu-anusei: A Bethelfamiri fu wi na ini Meksikow na ini 1952 èn mi de na fesisei

Tapusei: Na ini 1999, moro leki 109.000 sma kon makandra gi a distrikt kongres na ini a stadion disi na ini Meksikow City

Ondrosei na a kruktu-anusei: A nyun bijkantoro fu wi di e kaba bow.