O Fara Yu E Go fu Sori Lobi?

„Yu musu lobi tra sma soleki fa yu lobi yusrefi.”​—MATEUS 22:39.

1. Efu wi lobi Yehovah, dan fu san ede wi musu lobi tra sma tu?

DI SMA ben aksi Yesus san na a moro bigi komando, a ben piki: „Yu musu lobi Yehovah, yu Gado, nanga yu heri ati èn nanga yu heri sili èn nanga yu heri frustan.” Baka dati a ben kari wan tra komando di ben gersi a fosiwan: „Yu musu lobi tra sma soleki fa yu lobi yusrefi” (Mateus 22:37, 39). Iya, lobi gi tra sma e sori taki wan sma na wan Kresten. A no de fu taki dati efu wi lobi Yehovah, dan wi musu lobi tra sma. Fu san ede? Fu di wi e sori taki wi lobi Gado te wi e gi yesi na en Wortu, èn a Wortu fu en e komanderi wi fu lobi tra sma. So bun, efu wi no lobi wi brada nanga sisa, dan wi no kan taki dati wi lobi Gado trutru.​—Romesma 13:8; 1 Yohanes 2:5; 4:20, 21.

2. Sortu lobi wi musu abi gi tra sma?

² Di Yesus ben taki dati wi musu lobi tra sma, dan a no ben taki dati wi musu de mati nomo fu tra sma. A ben taki fu wan lobi di de tra fasi leki a lobi di sma na ini wan osofamiri abi gi makandra, noso a lobi di wan man nanga wan uma abi gi makandra. A ben taki fu a sortu lobi di Yehovah abi gi en getrow futuboi èn a lobi di den futuboi abi gi en (Yohanes 17:26; 1 Yohanes 4:11, 19). Yesus ben si taki wan Dyu leriman fu Wet ben taki nanga koni, fu di a ben agri nanga Yesus taki wan sma musu lobi Gado „nanga en heri ati èn nanga en heri frustan èn nanga ala en krakti” (Markus 12:28-34). A leriman ben abi leti. A lobi di wan Kresten e kweki gi Gado èn gi tra sma, abi fu du nanga den firi nanga a frustan fu wi. Wi e firi en na ini wi ati èn wi e sori a lobi dati fu di wi e gebroiki wi frustan.

3. (a) Fa Yesus ben leri wan „man di ben kisi bun leri na ini a Wet”, taki den tra sma di a ben musu lobi no de wan spesrutu grupu fu sma nomo? (b) Fa na agersitori fu Yesus abi fu du nanga Kresten na ini a ten disi?

³ Di Yesus ben taki dati wi musu lobi tra  sma, dan soleki fa Lukas ben fruteri, „wan seiker man di ben kisi bun leri na ini a Wet” ben aksi: „Suma na trutru den tra sma di mi musu lobi?” Yesus ben piki en nanga wan agersitori. Wan man ben kisi fonfon, den ben fufuru en, èn den ben libi en na baka fu dede. A fosi leisi wan priester ben waka pasa, baka dati wan Leifisma. No wan fu den tu ben poti prakseri na a man. Te fu kaba, wan Samariaman waka kon, a si a man di kisi mankeri, èn a sorgu en bun nanga switifasi. Suma fu den dri man ben du bun gi a man di kisi mankeri? A de krin suma ben du dati (Lukas 10:25-37). A man di ben kisi bun leri na ini a Wet kande ben fruwondru srefisrefi di a ben yere Yesus taki, dati wan Samariasma ben kan handri moro bun leki wan priester nanga wan Leifisma. A de krin, Yesus ben yepi a man fu no lobi wan spesrutu grupu sma nomo. Na so wan fasi Kresten e sori lobi tu. Luku suma na den sma di den lobi.

Lobi na ini na Osofamiri

4. Pe wan Kresten musu sori lobi na a fosi presi?

⁴ Kresten lobi den sma na ini na osofamiri fu den; den wefi lobi den masra fu den, den masra lobi den wefi fu den, papa nanga mama lobi den pikin fu den (Preikiman 9:9; Efeisesma 5:33; Titus 2:4). A tru taki a de wan gewoon sani taki lobi de na ini moro furu osofamiri. Ma soleki fa ondrosuku e sori, dan osofamiri abi bigi problema nownowde, fu di sma e broko trow, a wan patna e meshandri a tra patna, sma no e sorgu den pikin fu den, noso den e meshandri den. A kan taki a firi fu lobi di ben de wan gewoon sani na ini osofamiri, no de nofo fu hori den na makandra (2 Timoteus 3:1-3). Efu Kresten wani meki a go bun na ini na osofamiri libi fu den, dan den musu sori a srefi lobi di Yehovah nanga Yesus abi.​—Efeisesma 5:21-27.

5. Na suma papa nanga mama e suku yepi fu kweki den pikin fu den, èn san ben de a bakapisi gi furu sma di den du disi?

⁵ Kresten papa nanga mama e si den pikin fu den leki wan gudu fu Yehovah di den musu sorgu bun, èn den e frutrow tapu Yehovah taki a sa yepi den fu kweki den pikin (Psalm 127:3-5; Odo 22:6). Na so fasi den e kweki Kresten lobi, èn dati e yepi den fu sorgu taki no wan takru denki pori den pikin fu den. Fu di furu Kresten papa nanga mama du disi, meki den prisiri neleki wan mama di e libi na Bakrakondre. En manpikin ben de wan fu den 575 sma di dopu na Bakrakondre a yari di pasa. Baka di a sisa ben si en manpikin teki dopu, a ben skrifi: „Na a momenti disi, ala san mi du gi a pikin na ini den 20 yari di pasa, no ben de fu soso. Mi frigiti ala ten nanga krakti, èn so srefi a pen, a muiti, nanga a sari fu den yari dati.” Fa a breiti taki a manpikin srefi teki a bosroiti fu dini Yehovah. Furu sma di leri fu den papa nanga mama fu lobi Yehovah, ben de na mindri a heimarki fu 31.089 preikiman na Bakrakondre di ben gi den raportu a yari di pasa.

6. Fa Kresten lobi kan yepi fu meki a trowlibi kon tranga?

⁶ Paulus ben kari lobi „wan volmaakti banti fu wánfasi”, èn a kan hori wan trowlibi bun, srefi te bigi problema e kon (Kolosesma 3:14, 18, 19; 1 Petrus 3:1-7). Di wan man na Rurutu, wan pikin èilanti so wan 700 kilometer farawe fu Tahiti, ben bigin studeri Bijbel nanga Yehovah Kotoigi, dan en wefi no ben feni dati bun srefisrefi. Te fu kaba, a wefi teki den pikin, a gowe libi a man, èn a ben go libi na Tahiti. Toku a man ben sori taki a lobi den fu di a ben e seni moni gi en wefi doronomo, èn a ben e bel fu aksi efu a wefi nanga den pikin ben abi sani fanowdu. So bun, a ben du ala san a ben man fu du den frantwortu fu en leki Kresten (1 Timoteus 5:8). Ala ten a ben e begi efu den ben kan de makandra baka leki wan osofamiri, èn te fu kaba en wefi drai kon na oso. Di a wefi du dati, dan a ben handri nanga en wefi nanga ’lobi, horidoro nanga safri-atifasi’ (1 Timoteus 6:11). A dopu na ini 1998, èn baka ten a ben prisiri srefisrefi di en wefi bosroiti fu studeri Bijbel. A studie dati ben de wan fu den 1351 studie di ben hori na a kontren ondro a tiri fu a Tahiti bijkantoro a yari di pasa.

7. Soleki fa wan man na Doisrikondre ben taki, dan san ben meki en trowlibi kon tranga?

⁷ Na Doisrikondre, wan man ben gens en wefi di ben wani sabi moro fu Bijbel waarheid, èn a man ben bribi trutru taki Yehovah Kotoigi ben wani bedrigi en wefi. Ma baka ten, a ben skrifi go  na a Kotoigi di ben taki nanga en wefi a fosi leisi: „Grantangi taki yu meki mi wefi kon sabi Yehovah Kotoigi. Fosi, mi ben broko mi ede, bika mi ben yere someni takru sani fu den kotoigi. Ma fu di mi go na den konmakandra nanga mi wefi, meki mi e si now taki mi no ben abi fu frede srefisrefi. Mi sabi taki den sani di mi e yere na waarheid, èn a meki wi trowlibi kon moro tranga.” Na mindri den 162.932 Kotoigi fu Yehovah na Doisrikondre, so srefi na mindri den 1773 di e libi na den èilanti ondro a tiri fu a Tahiti bijkantoro, furu osofamiri de na makandra fu di den abi a lobi di Gado e sori.

Lobi gi den Kresten Brada Nanga Sisa fu Wi

8, 9. (a) Suma e leri wi fu lobi wi brada nanga sisa, èn san lobi e meki wi du? (b) Gi wan eksempre fu a fasi fa lobi kan meki brada yepi makandra.

⁸ Paulus ben taigi den Kresten fu Tesalonika: „Gado leri unu srefi fu lobi makandra” (1 Tesalonikasma 4:9). Iya, den sma di „Yehovah gi leri” lobi makandra (Yesaya 54:13). Den e sori taki den lobi makandra te den e du sani gi makandra, soleki fa Paulus ben sori di a ben taki: „Dini makandra leki srafu nanga a lobi di unu e sori” (Galasiasma 5:13; 1 Yohanes 3:18). Den e du disi fu eksempre te den e go luku den siki brada nanga sisa, te den e gi deki-ati na den wan di brokosaka, èn te den e yepi den swakiwan (1 Tesalonikasma 5:14). A trutru Kresten lobi fu wi e meki tu taki a paradijs na yeye fasi pe wi de na ini, e kon moro bigi.

⁹ Na ini a gemeente Ancón, di de wan fu den 544 gemeente na Ekwador, den brada ben sori lobi na wan bun fasi. Fu di wan muilek situwâsi ben de na moni sei, meki den no ben abi wroko noso moni. So bun, den preikiman ben bosroiti fu meki moni nanga a seri fu nyanyan gi den fisiman fu drape. Den ben o du dati te den fisiman ben o kon na oso, baka di den fanga fisi a heri neti. Ala sma ben yepi, so srefi den pikin-nengre. Den ben musu bigin wán yuru na mamanten so taki den ben kan seri a nyanyan fo yuru na mamanten, te den fisiman ben drai kon baka. Den brada ben prati a moni di den ben meki, nanga makandra. Ibri sma ben kisi a moni di a ben abi fanowdu. A yepi di den ben yepi makandra na so wan fasi, ben sori trutru Kresten lobi.

10, 11. Fa wi kan sori taki wi lobi den brada di wi no sabi?

¹⁰ Ma wi no lobi den Kresten wawan di wi sabi.  Na apostel Petrus ben taki: ’Abi lobi gi a heri libimakandra fu brada’ (1 Petrus 2:17). Wi lobi ala wi brada nanga sisa, fu di neleki wi, den alamala na anbegiman fu Yehovah Gado. Muilek situwâsi kan gi wi na okasi fu sori a lobi disi. Fu eksempre, na ini a dienstyari 2000, bigi frudu ben pori Mosambik, èn wan borgufeti di e go nanga langa na Angola ben meki furu sma kon pôti. Furu fu den 31.725 brada na Mosambik, èn den 41.222 brada na Angola ben firi a hebi fu den problema disi. Fu dati ede, Kotoigi na Zuid-Afrika di de krosibei, seni furu sani fu frulekti a nowtu fu den brada fu den na den kondre disi. A de di den ben de klariklari fu gi den pôti brada fu den, den sani di den ben abi „tumusi furu”, e sori taki den lobi den.​—2 Korentesma 8:8, 13-15, 24.

¹¹ Lobi de fu si tu, te brada na furu kondre e yepi fu bow Kownukondre zaal nanga kongreshal na kondre di no abi so furu moni. Wan eksempre na den Solomon-èilanti. Ala di feti ben de drape, toku den Solomon-èilanti ben kisi 6 procent moro preikiman a yari di pasa èn den ben abi wan heimarki fu 1697 preikiman. Den ben sreka sani fu bow wan kongreshal. Ala di furu sma fu na èilanti ben lowe go na tra presi, toku friwani wrokoman fu Australia ben kon yepi nanga a bow-wroko. Te fu kaba, den friwani wrokoman ben musu gowe, ma den no ben du dati bifo den ben leri den brada fu den èilanti fa den ben musu kaba a wroko fu a fondamenti. A staal strukturu fu a hal di ben meki na fesi kaba, ben komopo na Australia nanga boto. Den brada sa kaba a tumusi moi presi disi fu anbegi na wan ten te sma tapu nanga den bow-wroko na furu presi fu na èilanti dati. Dati sa de wan moi kotoigi gi Yehovah en nen èn a lobi di den brada lobi makandra.

Neleki Gado, Wi Lobi Grontapu

12. Fa wi e waka baka na eksempre fu Yehovah ini a fasi fa wi e si den wan di no abi a srefi bribi leki wi?

¹² Wi osofamiri nanga wi brada nanga sisa na den wan-enkri sma di wi lobi nomo? Nôno, dati no sa de so efu wi na „sma di e waka baka na eksempre fu Gado”. Yesus ben taki: „Gado ben lobi grontapu sote, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi” (Efeisesma 5:1; Yohanes 3:16). Neleki Yehovah Gado, wi e du sani gi ala sma nanga lobi, so srefi gi den wan di no abi a srefi bribi leki wi (Lukas 6:35, 36; Galasiasma 6:10). Nanga disi na prakseri spesrutu wi e preiki a bun nyunsu fu a Kownukondre, èn wi e fruteri tra sma fu a tumusi moi fasi fa Gado sori lobi gi den, so taki den kan kisi winimarki. Disi kan meki taki iniwan sma di e arki, sa kisi frulusu.​—Markus 13:10; 1 Timoteus 4:16.

13, 14. San na wan tu ondrofenitori fu brada nanga sisa di ben sori taki den lobi sma di no de Kotoigi, srefi te a muilek gi den fu taki nanga sma?

¹³ Luku na ondrofenitori fu fo spesrutu pionier na Nepal. Den ben poti na wroko na wan foto di de na a zuid-westsei fu a kondre. Na ini den lasti feifi yari, den sori a lobi fu den fu di den preiki nanga pasensi na a foto èn na dorpu di de farawe. Fu man wroko a kontren fu den, dan furutron den e rei baisigri someni yuru langa, ala di a son faya moro leki 40 graden Celsius. Fu di den ben sori lobi èn ben „horidoro na ini bun wroko”, meki den ben abi bun bakapisi fu di wan bukustudie grupu ben seti na wan fu den dorpu (Romesma 2:7). Na ini maart 2000, dan 32 sma ben kon arki a publikitaki fu a kringopziener di ben kon drape. Nepal ben abi wan heimarki fu 430 preikiman a yari di pasa, èn dati na 9 procent moro leki san den ben abi bifo. A de krin taki Yehovah e blesi a faya nanga a lobi di den brada e sori na ini a kondre dati.

¹⁴ Na Kolombia, pisi ten spesrutu pionier ben go preiki gi den Wayu Ingi. Fu man preiki gi den Ingi disi, den ben musu leri wan nyun tongo. A wani di den ben wani yepi sma trutru, meki den ben kisi bun bakapisi; 27 sma ben kon na a publikitaki ala di alen ben kon so tranga. A lobi, neleki fa den pionier disi sori nanga faya, meki taki a wroko na Kolombia gro nanga 5 procent, èn den ben abi wan heimarki fu 107.613 preikiman. Na Deinsikondre, wan owru sisa ben wani prati a bun nyunsu nanga tra sma, ma a ben malengri. A no ben lasi-ati fu a sani dati, ma a ben meki kontakti nanga sma di ben wani sabi moro fu di a ben skrifi brifi. Nownow a e taki nanga 42 sma nanga yepi fu brifi, èn a e hori 11 oso-bijbelstudie. En  na wan fu den preikiman fu a heimarki fu 14.885 preikiman na Deinsikondre di ben gi den raportu a yari di pasa.

Lobi Yu Feanti

15, 16. (a) O fara wi musu go fu sori lobi, neleki fa Yesus ben taki? (b) Fa brada nanga frantwortu ben handri na wan lobi-ati fasi nanga wan man di ben fruteri falsi sani fu Yehovah Kotoigi?

¹⁵ Yesus ben fruteri a man di ben kisi bun leri na ini a Wet, taki a ben kan si wan Samariasma leki wan sma di wi musu lobi tu. Na ini a Bergitaki, Yesus ben go moro fara fu di a ben taki: „Unu ben yere sma taki dati ’Unu musu lobi tra sma èn taki unu musu abi bita-atifasi gi yu feanti’. Ma mi e taigi unu: Tan lobi den feanti fu unu èn tan begi gi den wan di e frufolgu unu, so taki unu kan sori taki unu na manpikin fu un Tata di de na hemel” (Mateus 5:43-45). Srefi te wan sma e gens wi, toku wi e pruberi fu „tan wini ogri nanga bun” (Romesma 12:19-21). Efu a kan, dan wi e prati nanga en, a moro warti gudu di wi abi, namku a waarheid.

¹⁶ Na Ukraini, wan artikel na ini a koranti Kremenchuk Herald ben taki dati Kotoigi fu Yehovah na wan ogri sekte. Disi ben de wan seryusu sani, bika son sma na Europa e taki so fu Yehovah Kotoigi, fu di den wani meki trawan bribi taki a wroko fu den Kotoigi musu tapu. Fu dati ede, den Kotoigi ben go na a skrifiman fu na artikel, dan den ben aksi en fu tyari wan artikel kon na doro pe a ben musu fruteri fa sani de trutru. A ben agri, ma di na artikel ben kon na doro, dan a ben poti wan tra sani tu na ini a koranti pe a ben taki dati den sani na ini a fosi artikel ben de tru tori. So bun, brada nanga frantwortu ben go baka na en èn den ben gi en moro bodoi. Te fu kaba, a skrifiman ben kon si taki den sani na ini a fosi artikel no ben bun, èn a ben tyari wan artikel kon na doro pe a ben taki dati san a ben skrifi na ini a fosi artikel no ben de tru. Na wan switi fasi den brada ben taigi en krinkrin fa sani ben de trutru. A lobi-ati fasi disi fa den brada ben lusu a problema disi ben meki den abi bun bakapisi.

Fa Wi Kan Kweki Lobi?

17. San e sori taki a no ben sa de makriki ala ten fu handri nanga trawan na wan lobi-ati fasi?

¹⁷ Te wan beibi gebore, dan a papa nanga mama fu en lobi en wantewante. Wi no e handri nanga bigisma na so wan lobi fasi ala ten, soleki fa wi e du dati nanga wan beibi. Dati na fu san ede Bijbel e fruteri wi ibritron baka fu lobi makandra. Na wan sani di wi musu kweki (1 Petrus 1:22; 4:8; 1 Yohanes 3:11). Yesus ben sabi taki a lobi fu wi ben o kisi tesi, di a ben taki dati wi musu gi wi brada pardon „seibitenti na seibi tron” (Mateus 18:21, 22). Paulus ben gi wi deki-ati tu fu „tan frudrage makandra” (Kolosesma 3:12, 13). Dati meki a no e fruwondru wi te a e taigi wi: „Du muiti fu kisi lobi”! (1 Korentesma 14:1) Fa wi kan du disi?

18. San o yepi wi kweki lobi gi tra sma?

 ¹⁸ Na a fosi presi, wi kan hori a lobi di wi abi gi Yehovah Gado na prakseri ala ten. A lobi disi na wan tumusi prenspari sani di musu meki wi lobi tra sma. Fu san ede? Fu di te wi lobi tra sma, dan wi e sori krin fa wi hemel Tata de, èn wi e gi en glori nanga prèise na so wan fasi (Yohanes 15:8-10; Filipisma 1:9-11). Na a di fu tu presi, wi kan pruberi fu si sani neleki fa Yehovah e si den. Ibri leisi te wi du sondu, wi e sondu na Yehovah; toku, ibri leisi baka a e gi wi pardon èn a e tan lobi wi (Psalm 86:5; 103:2, 3; 1 Yohanes 1:9; 4:18). Efu wi e leri fu denki neleki Yehovah, dan wi sa de klariklari fu lobi tra sma èn gi den pardon te den e afrontu wi (Mateus 6:12). Na a di fu dri presi, wi kan handri nanga tra sma neleki fa wi wani taki den musu handri nanga wi (Mateus 7:12). Fu di wi no de volmaakti, meki wi musu kisi pardon furutron. Fu eksempre, te wi e taki sani di e hati tra sma, dan wi e howpu taki den sa memre taki ten na ten ala sma e sondu nanga a tongo (Yakobus 3:2). Efu wi wani taki tra sma e handri nanga wi na wan lobi fasi, dan wi musu handri nanga den na wan lobi-ati fasi.

19. Fa wi kan suku yepi fu santa yeye te wi e kweki lobi?

¹⁹ Na a di fu fo presi, wi kan suku a yepi fu santa yeye, fu di lobi na wan fu den froktu fu a yeye (Galasiasma 5:22, 23). Nofotron, a lobi di mati lobi makandra, den firi di sma na ini osofamiri abi gi makandra, nanga lobifiri, na sani di e pasa fu ensrefi. Ma wi abi yepi fanowdu fu Yehovah en yeye fu kon kweki a lobi di Yehovah abi, a lobi di de wan volmaakti banti fu wánfasi. Wi kan suku yepi fu santa yeye fu di wi e leisi a Bijbel di skrifi nanga yepi fu Gado en santa yeye. Fu eksempre, te wi e ondrosuku a libi fu Yesus, dan wi sa si fa a ben handri nanga sma, èn wi kan leri fu handri na a srefi fasi (Yohanes 13:34, 35; 15:12). Moro fara, wi kan aksi Yehovah gi santa yeye, spesrutu te wi de na ini situwâsi di e meki en muilek fu du sani na wan lobi-ati fasi (Lukas 11:13). Èn a lasti sani di wi kan du fu kisi lobi, na fu tan krosibei na a Kresten gemeente. Te wi de nanga lobi brada nanga sisa, dan dati e yepi wi fu kweki lobi.​—Odo 13:20.

20, 21. Fa Yehovah Kotoigi ben sori lobi na wan tumusi moi fasi na ini a dienstyari 2000?

²⁰ Na ini a yari di pasa, wan heimarki fu 6.035.564 preikiman fu a bun nyunsu ben de na heri grontapu. Yehovah Kotoigi ben wroko 1.171.270.425 yuru fu suku sma fu fruteri den fu a bun nyunsu dati. Na lobi meki taki den ben du a wroko disi ala di a weer ben faya, ala di alen ben kon, èn ala di a ben kowru. Na lobi meki taki den ben taki nanga skoromati, nanga sma na wrokope, èn a meki taki den ben go taki tu nanga sma di den no sabi srefisrefi, na strati èn na tra presi. Furu fu den sma di den Kotoigi ben preiki gi, ben abi wan mi-no-kefasi, èn son sma ben gens den. Ma wan tu sma ben wani sabi moro, so taki den ben meki 433.454.049 gobaka, èn den ben hori 4.766.631 bijbelstudie. *

²¹ Ala den sani disi ben sori krinkrin taki Yehovah Kotoigi lobi Gado nanga tra sma trutru! A lobi dati noiti no sa lasi. Wi de seiker taki a dienstyari 2001 sa de wan yari pe wi sa gi moro kotoigi srefi na a libisma famiri. Meki a de so taki Yehovah sa tan blesi den loyaal anbegiman fu en di e dini en fayafaya, ala di den e ’meki ala den sani fu den feni presi nanga lobi’.​—1 Korentesma 16:14.

[Futuwortu]

Yu Kan Tyari Disi Kon na Krin?

• Suma na wi eksempre te wi lobi tra sma?

• O fara wi musu go fu sori lobi?

• San na wan tu ondrofenitori di e sori Kresten lobi?

• Fa wi kan kweki Kresten lobi?

[Aksi fu a tori disi]

 [Raportu na tapu bladzijde 18-21]

2000 DINIWROKO RAPORTU FU YEHOVAH KOTOIGI NA HERI GRONTAPU

 (Luku a tijdschrift)

[Prenki na tapu bladzijde 15]

Kresten lobi kan meki taki wan osofamiri e tan na makandra

[Prenki na tapu bladzijde 17]

Lobi e meki wi prati a howpu fu wi nanga tra sma